JOHN 13

Jesuwe Yoi Pinlan Yapoi

1 # Jn 11.55; 12.23; 16.28. Hatüo shaaji Yinyepu Mo sheshao ne ngoh. Jesuwe tüopa kahtok angyange Ipa tangte tailak I hipak ngoiteki she shing. Kahtoknyu me I jingne aoyin ngoh imante Iye jinte ken, hüyange Iye imante üküm ngoiye ken.

2 # Jn 6.71; Mk 14.10. Jesu hüyange I pinlan mowe ngoh. Kahshih-e Simon üha Judas Iskariot, mongme Jesu lowe tamlak jingne toilinge tam. 3Ipawe wong üshei Ite phayang she Jesuwe shing; I Kahwang mepu pei hüyange Kahwang tangte tailak she Jesuwe shing. 4Tüokhei khao me ngohpu Jesu yong. Iye inpu inkhek khokke ang, hüyange shiengme nyeshoh ja hit. 5#Lk 7.44; 22.27.Tüophei me Iye yapoi shengme yeng yei hüyange pinlan ya poi hüyange I shiengme hitte ngohpu nyeshoh yahpuwe iman ya shitte tam. 6I Simon Peter tangte wen. Peterwe Ite i, “Youngwanpa, nange ü-ya poilak a?” 7Jesuwe Ite janne i, “Taowe hanghe ling sha-a nange yeshing, hüyangpoi phei me nange shinglak.”

8 # Hin 12.12; Jn 3.5; 9.7. Peterwe Ite i, “Nange ü-ya poilak ne yeje!” Jesuwe Ite janne i, “Taowe nang ya yepoitam küma-a, nang ü-phei meitam yenang.”

9Simon, Peterwe Ite i, “Youngwanpa, hümma-a ü-ya shaha tahpoi, ü-yak hei shango poitam pha!”

10Jesuwe Ite i, “Aoyinne yeng yaoyangki jaowe ngohnang hüyange I ya kaiye yengyaolak wongpong yeje. Ja tokte kaiye numan üshei jaowe ngohnang.” 11#Jn 13.2.I aowe lowe tamlak Jesuwe shing; tüokhei “Iye numan khongküm jaowe ngohpu ne yeje she i.”

12Aope Iye iman ya poiye sho hüyange yoi inkhek in hüyange yoi shotjing me yeshot; Iye imante i, “Taowe numan jingne lingpu shingya? 13Numan-e üte Konnyüopa hüyange Youngwanpa she nyik; hüyange numan-e shuwe nyikyangki, hangjingne hatüowa Tao. 14Hümma-a numan Konnyüopa hüyange Youngwanpawe numan ya poipune mengma-a numane-o shejawe sheja ya teipoilak yang. 15#1 Pet 2.21.Hangjingne Taowe numante hangke linge hüo hüke linglak jingne leppu ja hüonang. 16#Mt 10.24; Lk 6.40.Üting tingha me Taowe numante inang; yoi nokpu phei rhapa sheyongpu yeje, yejema-a aowe shonne tei tüopa-a shonne tampupa phei yongpu yeje. 17#Lk 11.28; Jas 1.25.Sha-a numan-e tüopa ütingpa shingteki, numan-e toishao me hüowe lingma-a numan hangshin mongmeilak!

18 # Tüo 41.9. “Numan üshei jingne Taowe ngaopu ne yeje; aoyin Taowe le Taowe shingnang. Hüyangpoi hüke iyangpu laingao ütingpa me ngailak wongpong: ‘Aowe ü-mepu an hah Iye Ü-phei tüi-e yonglak.’ 19#Jn 14.29; 8.28.Tüopa manngaipe sha-a muh Taowe numante tüopa ngao inang, hüke aope tüopa ütahte ngailakei numan-e ‘Taowa I yang’ she üting laklak. 20#Mt 10.40; Lk 10.16.Üting tingha me Taowe numante inang: aoyinne Taowe shonpu ütamja yahlakei, Tao-o yahnang; hüyange aoyinne Tao yah, aowe Tao shon I yahnang.”

I Lolak Jesuwe Inang

(Mt 26.20-25; Mk 14.17-21; Lk 22.21-23)

21 # Mt 26.21-25; Mk 14.18-21; Lk 22.21-23. Hüke Jesuwe tüolan ngaoyang phei me, I yeonge luwe shang, hüyange ngaiye i: “Üting tingha me Taowe numante inang: numan yo me jawe Tao lowe tamlak.”

22Pinlan eihate teilei hüyange ao jeng ipu shi, she yeonge nüngnei. 23#Jn 19.26; 20.2; 21.7,20.I pinlan yo me ja, ao te Jesuwe sheken she ngoh, Jesu jakuh me nyiangyange ngoh. 24Tüokhei Simon Peterwe Ite mükke tinge leiyange i, ao jeng Iye ipuweih tomante ipha she tongtüoh.

25Tüophei me I hangke ngoh, tüokih-e Jesu jakuh me nyienyange Iye i, “Youngwanpa, hatüowa ao shi?”

26 # Jn 6.71. Jesuwe jan, “Taowe ao te tüopa ankhüo shengme hüngyange phalakei I ne menglak.” Tüophei me Iye ankhüo hüng, yah, jonyange Simon Iskariot üha, Judas te pha. 27Aope Iye tüopa hah. Ite satan ong. Jesuwe Ite i, “Nange hanghe linglakei mamshe lingyah!” 28Tüome shotte ngohpu aowe-o hangne Jesuwe Ite hüke ngao yeshing. 29#Jn 12.6.Ütamme teih, Judas me nginshao ang, tüokhei Jesuwe, “Mo jingne teman wongpong hanghe shaktüoh”, yejema-a, Iye toihalante ülam ja phalak jeng inang she teih.

30 # Lk 22.53. Tüokhei Judaswe an yahyang phei me I mamshe yayong tai. Hüyange hatüowa wangnyak ne ngoh.

Ngaokeng Üla

31 # Jn 17.1. Judas taite phei me Jesuwe i: “Sha-a Kahta Üha müktishiwa ütahte ngainang; sha-a Kahwang müktishiwa I kaiye ngainang. 32Hüyange Kahwang müktishiwa I kaiye ngaipu ne mengma-a, hümma-a, Kahwang Iye Kahta Üha müktishiwapu ngaitamlak, hüyange Iye mamshe lingkülak. 33#1 Jn 2.1; Jn 7.33.Ühalan, Tao numan phei hipak laowe yengoh oklak. Numan-e Tao yamlak; hüyangpoi Jehudilante hanghe ngao, numante sha-a inang, ‘Tao ümeken me tai tüoken me numan yetai oklak.’ 34#Jn 15.12,17; 1 Jn 3.23; 2 Jn 5; Lev 19.18; 1 Thes 4.9; 1 Pet 1.22; Heb 13.1; Eph 5.2; 1 Jn 4.10.Taowe numante ngaokeng üla pha nang; jawe ja te teiken yah, Taowe numante hangke ken hüke jawe ja te teiken yah. 35Numan teikenpu ngeye üsheiye numan ü pinlan she shinglak.”

Peterwe Yejanlak Jesuwe Inang

(Mt 26.31-35; Mk 14.27-31; Lk 22.31-34)

36 # Jn 21.18; 2 Pet 1.14. Simon Peterwe Ite i, “Youngwanpa, nang ümeken te tailak shi?” Jesuwe jan, “Tao ümeken te taipuweih nange sha-a yewoi oklak, hüyangpoi nang phei me woilak.”

37 # Mt 26.33-35; Mk 14.29-31; Lk 22.33-34. Peterwe Ite i, “Youngwanpa, nang phei tao sha-a hangne yetai okne? Nang jingne taowe ü-üyin phalakei.” 38Jesuwe janne i, “Nange üting tingha me üjingne nang üyin phalak a? Taowe nangte ütingpa ipha ning, nange lüm me tao manjan manjan awha yekolak.”

Currently Selected:

JOHN 13: KONYBSI

Highlight

Copy