JOHN 3

Jesu Hüyange Nicodemus

1 # Jn 7.50; 19.39; Lk 23.13; Jn 7.26. Phariseelan ükhong mepu Jehudilan woipa ja Nicodemus she minpu ngoh. 2#Jn 2.11; 7.31; 9.16; Lam 10.38.Yaja Jesu tangte tüopa kahta pei hüyange Ite i: “Rabbi, (konnyüopa) toman-e shingnang nang Kahwange shonpu konnyüopa ja, hangjingne I phei jamme Kahwang yenangma-a nange lingpu kahnyingwüngha füo aowe-o lingpu ye-oklak.”

3 # Jn 1.13; 1 Pet 1.23; Jas 1.18; 1 Jn 3.9. Jesuwe Ite jan, “Üting tingha me Taowe nangte iphaning: I nishe yepuh ma-a, aowe-o Kahwang Ahngching ye-ngelak.” 4Nicodemus Ite jan; “Lwngmei kahta ja hangke nishe puhlak? Inyu seate I nishe ongyange puhlak ikü a?”

5 # Eze 36.25-27; Eph 5.26; Tit 3.5. Jesuwe janne i; “Üting tingha me taowe nangte ipha ning,” “Kahta ja yeng hüyange Yaha me yepuh pute Kahwang Ahngching te ongpu ye-oklak: 6#1 Kor 15.50.Hanghepa mei mepu puh hatüowa mei, hüyange hanghe yaha mepu puh hatüowa yaha. 7Taowe nangte ipukhei she ya tahshan: ‘numan üshei nishe puhlak yang.’ 8#Eze 37.9.Iye ümeken me mong tüoken me wangyang leinang; nange tüopa mepu wüng jainang, hüyangpoi hatüo ümeken mepu pei yejema-a ümeken te tai nange yeshing. Tüokih-e aoyin Yaha me puh iman jingne hatüo kih ngohnang.” 9Nicodemus Ite tong. “Hatüoyin hangke ngailak?” 10Jesuwe Ite jan: “Nang Israel konnyüopa üyong ja, hüyangpoi nange tüoyin yeshing? 11#Jn 8.26; 1.18; 3.32.Üting tingha me Taowe nangte ipha ning: toman-e hanghepa jeng shing toman-e inang, hüyange toman-e hanghepa nge tüopa jeng saki phanang; hüyangpoi numan-e toman saki yeyah. 12Taowe kahtoknyu jeng iwante nange üte üting yelak, hüma-a Taowe nangte wangdang jeng ima-a hangke ütinglak lak? 13#Rom 10.6; Eph 4.9.Hüyange Kahta Üha, ao wangdang mepu yu tüotokte kaiye ao-o wangdang te man ong.”

14 # Lung 21.9; Jn 8.28; 12.34. Phaonyu jongme hangke Mosawe shakphan yan pu yonge tam, tüokih-e Kahta Üha-o yonge tamlak yang, 15tüopa kaiye aoyinne Ite ütinglak jintepu üyin Imepu tüolak.

16 # Rom 5.8; 8.32; Eph 2.4; 1 Jn 4.9-10. Hangjingne Kahwange kahtoknyu te hüke kenpuwe aoyinne Ite ütinglak lakei yemahlak hüyangpoi jintepu üyin ngohlak jingne Iye yoi halom pha. 17#Jn 8.15; 12.47; Lk 19.10; 1 Jn 4.14.Hangjingne Kahwange Iha kahtoknyu ngaophünlak jingne yeje; hüpoi I toiye kahtoknyu yinlak jingne shon.

18Aoyinne Iha te ütinglak yapeih ngao yephünlak; aoyinne üting yelakyapeih ngaophün yangki, hangjingne Iye Kahwang üha ja min me üting yelak. 19#Jn 1.4; 8.12; Eph 5.11,13.Hatüokih ngaophünpu phanang: kahtoknyu te wangngai pei, hüyangpoi kahtalanne wangngai nanleiye wangnyak ken, hangjingne, iman-e ünu toilan ling. 20Hüyange aoyinne ünu toi ling wangngai te nunang, hüyange wangngaite yepei külak, hangjingne Iye lingyangpu ünu toi Iye yehüohu. 21#1 Jn 1.10.Hüyangpoi aoyinne ütingpa toiling, wangngai te peinang, tüopa kaiye Kahwangte nyimmei hüowe I toi lingpu she hüonang.

Jesu Jengme John Phapu Saki

22 # Jn 4.2. Tüophei me, Jesu hüyange I pinlan Judea kahtok te tai. Tüome I iman phei ngoh, hüyange baptitam. 23Sha-a Johnne Salim phei o-pu Aenon chingme baptiye ngoh; hangjingne tüoyeme yeng wangmanne ngoh. Kahtalan I tangte maawe pei hüyange Iye imante baptitam. 24#Mk 1.14; 6.17-18.Hatüowa John küpnok me angshao me ngohyangki.

25Sha-a wanglam me jaopu jengme Jehudi hei John pinlan pa me mop ngai. 26#Jn 1.7,28.Tüokhei iman John tangte pei hüyange Ite i: “Konnyüopa, leihu! Jordan jayekao me nang phei ao ngoh, ao jingne saki pha, Iye baptinangki, hüyange kahta lili I tangte tai nangki.”

27 # 1 Kor 4.7. Johnne jan: “Kahwange Ite yepha pute kahta jawe hango tüone ye-ok.” 28#Jn 1.20,23.Tao Messiah yeje, hüyangpoi taowa I sheshao me shonpupa ngohnang. Tüopa numante taowe iyangki, hüyange numan ü-saki ngohnang. 29#Mk 2.19-20; Mt 25.1; Jn 15.11.Nyemnyanyu nokpupa-a nyemthepa ngohnang; nyemthepa shümpa yongnang hüyange jainang, hüyange aope Iye nyemthepa ngao wüng jaiyapeih I mongmei nang. Hatüo kih-e ümong meipu wangteki. 30I sheyong she yonglak, hüyangpoi tao sheshoi she shoilak.

Ao Wangdang Mepu Yu

31 # Jn 3.13; 8.23; 1 Jn 4.5. Ao ütangye mepu yu I üshei phei sheyongpupa; ao kahtok mepu pei kahtok jingne hüyange Iye kahtoknyu jeng inang. Ao wangdang mepu pei I üshei phei ütahpa. 32#Jn 3.11.Iye hanghe nge hüyange hanghe jai tüopa jeng saki pha nang, hüyangpoi aowe-o I saki yeyah. 33Ao kahtawe I saki yahyapeih Iye Kahwang-a üting she shingteki. 34Ao Kahwange shon, Kahwang ngaolan inang; hangjingne Kahwange Yaha hünghao tokyange yepha. 35Ipawe Iha te ken, hüyange I yak me üshei phayangki. 36#Jn 3.16; 5.24.Aoyinne Iha te ütinglak lakei jintepu üyin tüolak; aoyinne Iha ngao yejailakei aope-o üyin yetüolak hüyangpoi Kahwang mongshihpu I tangme jinte ngohlak.

Currently Selected:

JOHN 3: KONYBSI

Highlight

Copy