JOHN 5

Bethesda Me Meitampu

1Tüophei me, Jehudilan mo ja ngoh, hüyange Jesu Jerusalem te ong. 2#Neh 3.1; 12.39.Jerusalem me Nyee Peten ü-o me Hebrew ngaome Beth-za-tha she nyikpu yeng-i ja panha nga pheipu ngoh. 3Tüopa panha me mükmüopa, yafaipa, hüyange yimtin dakpu mokye-okpu kahtalan maawe peiye ngoh. (Iman yeng popu tanne ngohyangki; 4hangjingne sha-a sha-a Kahwang shongmokpa yeng-i te yu hüyange yengte wuk. Ja jakihpu dak ne jeyapoi, yeng wukke potam wante aome shonge yengte yuwe jonlakei mei okke ngohyangki.) 5Tüome wangpeng delüm me tet dakpu kahta ja ngoh. 6Aope Jesuwe I lamyange nge, hüyange tüopa kahta hipak laowe dakyangki she Iye shing; tüokhei Iye Ite i, “Nang meihu nangkü a?”

7Dakpawe jan, “Üyongpa, aope yeng polakei hüwante tao laitamlak tüome ao-o yenang; aope tao laine yonglakei, kahta ütam üwangne yuteiye shaha ngohnangki.” 8#Mk 2.11; Mt 9.6; Lk 5.24.Jesuwe Ite i, “Yongtüoh, nang leng yayah, hüyange kemtüoh.” 9Hüwante muh tüopa kahta mei; Iye yoi shinleng aam yah, hüyange kem.

Tüopa nyih Sabbath ne ngoh, 10#Neh 13.19; Jer 17.21; Jn 7.23; 9.16; Mk 2.24.tüokhei Jehudilanne tüopa kahta te aowe meitam ei she tong, “Hatüowa Sabbath, hüyange nang shinleng aam paiyange kempu kaiye toman Ngaokeng mengnang.” 11Iye jan, “Aope kahtawe tao meiye tam Iye üte i, nang leng paiyah hüyange kemtüoh.”

12Iman-e Ite tong, “Aowe nangte lengpaiyah hüyange kemtüoh she i, tüopa kahta ao shi?”

13Hüyangpoi tüopa kahtawe aowe meiye tam yeshing, hangjingne tüopa me kahta üngang ngohpu nanjingne Jesu pitte taimah.

14 # Mk 2.5. Tüophei me, Jesuwe I khümjing me nge hüyange i, “Leihu, sha-a nang meiteki. Ünu shaaji tahling; yejema-a shemengpu nangte ngaine ok.”

15Tüophei me tüopa kahta tai hüyange I meiye tampuwa Jesu üja she Jehudilan te i.

Ha Kaiye Üyin

16Tüopa jingne Jehudilanne Jesu shange tamne wang, hangjingne tüopa meitampu toi Iye Sabbath me ling.

17 # Kaht 2.3. Hüpoi Jesuwe imante janne i, “Üpawe nyihjeih toi lingnang, hüyange Taowe-o linglak wongpong.” 18#Jn 7.1; 10.33.Tüopa ngao ipu kaiye ünyei ne Jehudilan ne I toihuwe teih; hangjingne Iye Sabbath shaha mengpu ne yeje, hüyangpoi I nying nyingke Kahwang phei ja ne menge Kahwang-a Ipa üja she i.

19 # Jn 5.30; 8.28; 14.10. Tüokhei Jesuwe imante janne i, “Üting tingha me Taowe numante ipha ning: Ühawe Iye mongpu toi hango yeling; Ipawe hanghe linge nge tüo hei Iye lingnang, Ipawe hanghe ling, Ihawe tüo lingnang. 20#Jn 14.12.Hangjingne Üpawe Üha te kennang hüyange Iye hangyin ling üshei hüonang. Iye Ite tüophei sheyongpu toi linglak hüolak. 21#Rom 4.17; 8.11; Jn 11.25.Hangjingne Üpawe lipulan yange yetam hüyange imante üyin pha, tüokih-e Üha-o aoyinte Iye mongyapeih üyin phanang. 22Üpawe ao te-o ngao yephün, hüyangpoi ngaophün lak wong khongkümpu Iye Üha te phayangki. 23#Lk 10.16; 1 Jn 2.23.Hümme nakshih Üpate wangshüm hüopu kih Ha te-o kahta üsheiye wangshüm hüolak. Aoyinne Ühate ye-i-yeshe, I shonpu Üpate ye-i-yeshe.

24 # Jn 3.18. “Üting tingha me Taowe numante iphaning: Aoyinne ü-ngao jai, hüyange Tao shonpupa te ütinglak, jintepu üyin tüolak. Ite ngaophünpu yengohlak, hüyangpoi lipu mepu üyin chingte taiteki. 25#Jn 4.21; 16.2,32.Üting tingha me taowe numante iphaning: hipak peiküki, hüyange hatüowa sha-a ngohnang; aope lipulanne Kahwang Üha ngaowüng jailakei, hüyange aoyinne tüopa jai üyin ngohlak. 26Hangkih-e Üpa Ime üyin ngoh, hatüokih Iye yoiha me üyin ngohlak pha. 27Hüyange Iha te ngaophünlak wong pha, hangjingne I-a Kahta Üha. 28Hatüo ngaote yatahshan: hangjingne liye mangkoksa me ngohpu üsheiye I ngao jailak hipak peiküki; 29#Dan 12.2; Lam 24.15; Jn 11.24; Mt 25.46; 1 Kor 15.52.hüyange iman üshei mangkoksa mepu ngailak; aoyinne ümei lingyangki yange yelak hüyange üyin ngohlak, hüyangpoi aoyinne ümeng lingyangki yange yelak hüyange ngaophün lak.”

30 # Jn 5.19; 8.16; 6.38. “Taowe ü-wonge hango yeling, Taowe hangke jai, Taowe hüke ngaophün nang; hüyange Taowe phünpu ngao shunang, hangjingne Taowe hanghe mong, linglak jingne Tao ye-ngang, hüpoi aowe Tao shon Iye mongpu ling.

Jesu Sakilan

31 # Jn 8.14-18. “Taowe üjing saki phama-a, ü-saki üting yeje. 32Hüyangpoi üjingne saki phapu ütam ngohnang, hüyange Taowe shingnang Iye hanghe üjingne saki pha üting ngohnang. 33#Jn 1.7,19.Numan-e John tangte shon, hüyange Iye ütingpa jingne saki pha. 34#1 Jn 5.9.Hanghe saki Taowe phanang hatüo kahta mepu ne yemeng; hüyangpoi numan yinyelak jingne Taowe hatüolan ngao inang. 35John I vüntük jakih tee; hüyange loonge ngoh, hüyange üten japu jingne I vüntee me numan mongmei. 36#Jn 10.25; 14.11; 15.24; Mt 11.4.Hüyangpoi üme ngohpu saki John jing phei sheyong, hangjingne Üpawe hanghe toi lingkümlak üte pha, hüyange hangyin toi Taowe lingnang, tüolanne Üpawe, Tao shon she üjeng saki phanang. 37Hüyange Üpa aowe, Tao shon, Iye üjing saki phayangki. Numan-e hangkih tingmo I ngao yejai, numan-e aope-o I sheta mannge; 38tüokhei numan me I ngao yenang, hangjingne Iye ao shon, numan-e Ite üting yelak. 39#Lk 24.27; Lam 13.27.Numan-e laingao yam hangjingne iman me jintepu üyin tüolak she numan-e teih. Hüyange tüolan laingaowe ü-jeng ngaonang! 40Tüoyangpoi numan üyin tüolak jingne ü tangte peilak yemong.

41“Taowe kahtalan mepu minyong pute yelei. 42Hüyangpoi Taowe numan shingnang; Taowe shingnang numan mongjang me Kahwang te kenpu yenang. 43#Mt 24.5.Tao Üpa min me pei, hüyangpoi numan-e Tao yeyah; hüyange aope ülao jawe yoi min me peilakeih, numan-e I yahlak. 44Aope numan-e eiha mepu minyong phapu teileng, hüyange Kahwang mepu peipu minyongpu yamne ye-ngang, hümma-a numan hangke ütinglak lak? 45#Jn 9.28; Rom 2.17.Üpa sheshao me Taowe numante ümeng phalak she tahteih; numante ümeng phapa ja ngohnang tüowa Mosa aote numan-e yoi monghümpu ang. 46Numan-e ütingme Mosa te ütinglakpu ngoh shihma-a, numan-e üte ütinglak hahshepu, hangjingne Iye ü-jeng nyan. 47#Lk 16.29,31.Hüyangpoi Iye hanghe nyan tüote numan üting yelakpute, numan-e ü-ngao hangke ütinglak lak?”

Currently Selected:

JOHN 5: KONYBSI

Highlight

Copy