JOHN 7

Jesu Hüyange Inaolan

1Tüophei me, Jesu Galilee yekaote kem; I Judea me yekemhu, hangjingne I toihupu Jehudilan tüome ngoh. 2#Lev 23.34; Hin 16.16.Sha-a Jehudilan panha mo oteiye ngoh. 3#Mk 3.21,31; Mt 12.46.Tüokhei Inaolanne Ite i: “Tüopa nyoi tüohyange Judea te taitüoh, hüyange nang pinlanne nange lingpu toi ngelak. 4Hangjingne Iye lingpu shingne tamhuküma-a aowe-o lowe yeling. Nange tüolan toi lingpu ne mengma-a; kahtoknyu khongkümpu te tüolan nge ne tamtüoh!” 5Hangjingne Inaolanne nehoi Ite üting yelak.

6 # Mt 26.18; Jn 2.4; 7.30. Jesuwe imante i, “Ü-hipak manngoi, hüyangpoi numan hipak jinte ngohnang. 7#Jn 15.18-21.Kahtoknyuwe numante yekhahlak, hüyangpoi üte khahnang, hangjingne tüolan toi ünu üja she tüopa jingne Taowe saki pha. 8Numan mo te ongtüoh. Tao tüopa mo te min ong; hangjingne ü-hipak wangngoi-e manpei.” 9Imante Iye tüopa ngao i, hüyange Galilee me ngoh.

Panha Mo Me Jesu

10Hüyangpoi Inaolan mo te ong te phei me Jesu-o ong. Tüoyangpoi ütahte ngaiye ye-ong, lowe ongyangki. 11Mo me Jehudilanne I yam. Iman-e i, “I üpu?” 12#Jn 7.40-43.Ükhong yo me I jingne yeonge mongpongpu ngoh, kahta ütam-e i, “I kahta ümei üja,” ütam-e i, “Yejeja, Iye kahtalan ünyong yete woinang ja she i.” 13#Jn 19.38; 20.19.Hüyangpoi I jeng ütahte ngaiye aowe-o yengao ok, hangjingne iman Jehudilan te nyam.

14Mo üwo nanjing hipak me Jesu khümjing te ong hüyange konnyüo ne wang. 15Jehudilan yeonge yashan hüyange i, “Iye nyüopu yenangpeta, tüo kahtawe teshinne hangke shingpu shi?” 16Tüokhei Jesuwe imante jan, “Taowe hanghe nyüo, üjing yeje, hüyangpoi tao aowe shon I mepu. 17Kahta ütam-e Iye mongpu linghuküma-a, hatüowa Kahwang mepu heiya, yejema-a taowe ü-nying nyingke ngaopu tüopa nyüopu jeng Iye shinglak. 18I aowe yoi wong okpu me ngao, Iye yoi müktishiwa yamnang; hüyangpoi aowe I shonpupa müktishiwa yamyapeih tüopa-a üting; Ime ütingpa yejepu hango yenang. 19#Jn 1.17.Mosawe numante ngaokeng yepha a? Phayapoi numan aowe-o ngaokeng yejon. Numan-e Tao toine hangne yamnangki?” 20#Jn 8.48; 10.20; Mt 11.18; Mk 3.22.Ükhonge janne i, “Nang me laa ngohnangki! Aowe nang toine yampu?” 21#Jn 5.2-9.Jesuwe imante jan: “Taowe kahnyingwüngha ja ling hüyange numan üshei yashan. 22#Lev 12.3; Kaht 17.10; 21.4.Mosawe numante shokhüplak pha, tüoyangpoi Mosawe yeje numan puyimlanne ükong wang, hüyange numan-e Sabbath me shokhüp. 23#Mk 3.5; Lk 13.12; 14.4.Naha ja Sabbath me shokhüppu kaiye Mosa Ngaokeng yemengpune mengma-a, Taowe Sabbath me kahta ja lanshe meiye tampu jingne numan-e üte hangne mongmengpu? 24#Jn 8.15; Isa 11.3; Zekh 7.9.Ütah me leiyange numan-e ngao tahphün, hüyangpoi ütingpa me ngao phüntüoh.”

I Messiah Jeya?

25Tüokhei Jerusalem mepu kahta ütam-e hüke i: “Iman-e toine yampu kahta tüo yejepu a? 26Hüyange leihu, hatüome Iye yelope ngao nangki, hüyange iman-e Ite hango ye-i: woipa lanne ütingme Iya Messiah she shingyapushi? 27#Jn 6.42; 7.41; 9.29.Hüyange aope Messiah peilakeih, I ü-mepu aowe-o yeshinglak; hüyangpoi tüopa kahta ümeken mepu pei teman üsheiye shingnang.”

28 # Jn 8.42. Tüokhei Jesuwe khümjing me nyüowante Iye üngwünne i; “Tao ümeken mepu pei, numan-e ütingme shingya? Tüoyangpoi Tao ü-nying nyingke peipu ne yeje. Aowe Tao shon, I ütingpa hüpoi numan-e I yeshing, 29#Jn 8.55; 17.25; Mt 11.27.hüpoi Taowe I shingnang; hangjingne Tao I mepu pei hüyange Iye Tao shon.” 30#Jn 7.44; 10.39; Mk 12.12; Jn 8.20.Tüophei me iman-e I phone ngang; hüyangpoi aowe-o Ite yak yeyu ok, hangjingne I hipak manngoipe ngoh. 31#Jn 8.30; 10.42; 11.45.Hüyangpoi ükhong yomepu maawe Ite ütinglak, hüyange i, “Aope Messiah peilakeih, tüopa kahtawe lingpu shinne kahnyingwüngha füo lingyalak?”

Yompalan Jesu Phone Tei

32I jeng iye ükhong mongpongpu Phariseelanne jai, tüokhei iman hüyange ngengpa üjenglanne khümjing yompalan ütam Jesu pho ne shonne tei. 33#Jn 8.21; 12.35; 13.33; 14.19; 16.16-19.Jesuwe i: “Tao numan phei hipak tenha ja laowe ngohlak, tüophei me aowe Tao shon I tangte Tao tailak. 34Numan-e Tao yamlak, hüyangpoi numan-e Tao ye-ngelak, hangjingne Tao ümeken me ngohlakei numan yepei oklak.” 35#Jas 1.1; 1 Pet 1.1; Jn 12.20; Lam 11.20.Jehudilanne iman yo me hüke teingaowe i: “Teman-e ye-nge oklakne I ümeken me tailak ipu shi? I Greek chingnyulan me taiye Greeklan ngohjing me nyüo ne ipu a? 36Numan-e yamlak hüyangpoi Tao ye-ngelak, hüyange Tao ümeken me ngohlakei, tüokente numan yepei oklak she Iye ipuwa hanghe te leppu?”

Üyin Yenglok

37 # Lev 23.36; Jn 4.10,14. Mo üküm nyih, nyih üyong me Jesu yongyange hüke i: “Aowe yengle nang I ü-tangte peiye yingtam tüoh. 38#Isa 44.3; 55.1; 58.11.Ngaolaiye ipuke, ‘Aowe üte ütinglak lakei üyin yengyin yenglok I mongjang mepu yinlak.’ ” 39#Jn 20.22; 12.23.Iye hatüowa Yaha jeng ngaoyangki, aoyinne Ite ütinglak iman-e tüolak, hangjingne hüwante yaha üne-o manpha, hangjingne Jesu üne-o müktishiwa ne mantam.

Kahta Yome Teitampu

40 # Jn 1.21; Mt 21.11. Aope ükhong yo mepu kahta lanne tüopa ngao jai, ütam-e iyangki, “Hatüo kahta ütingme Hipa yang!” 41Ülao lanne i, “Iya Messiah yang!” Hüyangpoi ülaolanne i, “Messiah Galilee mepu peilak ne yeje! 42#Mik 5.2; Mt 1.1; Lk 2.4.Ngaolai me Messiah David nokli mepu, hüyange David ngohpu Bethlehem mepu peilak she ye-i a?” 43Tüokhei I jingne ükhong yo me tampu ngai; 44#Jn 7.30; 10.39.Ütam jawe I pho huwe teih, hüyangpoi aowe-o Ite yak yeyu ok.

Üting Yelakpu Jehudi Woipalan

45Ngengpa üjenglan hüyange Phariseelan tangte khümjing yompalan leihye, aoyinne imante tong, “Hangne numan phei jamme I phowe yepei ei?” 46#Mt 7.28.Yompalan ne jan, “Tüopa kahtawe ngaopu kih aowe-o manngao ja!” 47Phariseelanne imante tong, “Numan-o ünyong yete woitampu a?” 48“Woipalan yejema-a Phariseelan ütam Ite ütinglakpu ngaipu numan-e shingya shi? 49Hüyangpoi tüolan ükhonge Mosa Ngaokeng yeshing, tüokhei Kahwang mepu phoipu ngohnang!”

50 # Jn 3.1; 19.39. Nicodemus, iman yo me ja ao üshongpe Jesu I tangte pei, imante hüke i: 51#Hin 17.6; Woi 23.1.“Kahta ja, I mepu manjai hüyange Iye hanghe ling man yampute teman Ngaokeng me ngao phünpu ngohlak a?”

52 # 2 Ahng 14.25. Iman-e jan, “Nango Galilee mepu a? Ngaolai me yamtehu hüyange Galilee mepu hipa aope-o yengai she nange shinglak.” 53Tüophei me iman yoi yoi nok te ye.

Currently Selected:

JOHN 7: KONYBSI

Highlight

Copy