LUK 1
1
Süowang
1Toman yo me hanghepa ngaiyapeih tüopa ngaolan shonlak jingne sheyongpu jinge yoiye okpu shinne lingyangki. 2#1 Jn 1.1; Lam 1.21; Heb 2.3.Üwang memuh aoyinne toishao nge hüyange pungao yan, tüopa jeng tomante hanghe ngaoyapeih, iman-e tüopa jeng nyanyangki. 3#Lam 1.1.Tüokhei, Theophilus, tüolan jeng üwang memuh taowe yeonge meiye teih-e leiyangki, hüyange nang jingne tüoyin khongkümpu yeonge meiye nyanlak she teihyangki. 4#Jn 20.31.Hanghepa ngaiyapei, tüopa ütingpa jeng nange shinglak jingne taowe tüopa nyannang.
Baptipa John Puhlak Shaotan Ngao
5 #
Mt 2.1; 1 Put 24.10; 2 Put 31.2. Judea ahngpa, Herod hipak me, Abijah üli mepu Zekharia she minpu ngengpaja ngoh; hüyange Aaron hayim mepu I sheko ne ja ngoh, hüyange yha min-a Elizabeth. 6Youngwanpawe tampu hüyange Ngaokeng üshei me ümeng yenangpe moini Kahwang sheshao me khakshupu me ngoh. 7Hüyangpoi imni hayim yenangpe ngoh, hangjingne Elizabeth heelang ne ngoh, hüyange imni moini wunyu wupa ne mengteiye ngoh.
8Hüwante tüo ngai, Iye yoi hipak me Kahwang sheshao me ngengpa toiling wante, 9#Woi 30.7.Iye ngengpa toishao wanglamke, Youngwanpa khümjing te onge sü jaklak jingne phongyengpu Ite ngai. 10Hüyange sü jakpu hipak mongme kahta üngang nokshao me yoppe ngoh. 11#Lk 2.9; Lam 5.19.Hüwante sü jakpu wümjong yakjah ye me Youngwanpa wangdang shongmokpa ja I sheshao me ngaiye yong. 12Aope Iye I nge, Zekharia mokh hüyange nyam. 13#Lk 1.30,60.Hüpoi, shongmokpawe Ite i, “Tahnyam, Zekharia, hangjingne nange yoppu jaiteki; nang shekonyu Elizabeth-e nang te moija pailak, hüyange nange I min John she nyiklak. 14Hüyange nang mongonglak hüyange mongmeilak, hüyange I puhpu te üngang mongonglak! 15#Lung 6.3; Lk 7.33.Hangjingne Youngwanpa sheshao me I üyongne menglak, hüyange Iye yu yejema-a wongnangpu hango yeyinglak; hüyange Inyu sea me ngohwante muh, I Yaha Üjaowe maawe ngohlak. 16Hüyange Iye Israel halan üngang iman Kahwang, Youngwanpa tangte lüpne tamlak, 17#Mt 11.14; 17.13; Mal 4.5.hüyange I sheshao me Elijah yaha hüyange üngan phei tailak, payonglan mongjang hayimlan tangte lüppe tamlak jingne, hüyange Youngwanpa jingne kahtalan tümme tamlak jingne.”
18 #
Lk 1.34. Hüwante Zekharia-e shongmokpa te i, “Hangke taowe tüopa shinglak shi? Hangjingne tao wupa hüyange ü-sheko-o wangpeng linnang.”
19 #
Dan 8.16; 9.21; Mt 18.10. Hüyange shongmokpawe janne Ite i, “Kahwang sheshao me yongpu Gabriel tao ngoh nang; hüyange nangte ngaolak hüyange nang tangte tüopa ngaolan ümei peilak jingne tao shon. 20Hüyange leihu, tüolan ngaipu nyih manpei manpei nang jünge ngao yengao okpe ngohlak, hangjingne ü-ngao hanghepa hipak khakshuwe ngailak ne ngoh, nange ütinglak-e yeteih.”
21Hüyange kahtalan-a Zekharia tanne ngoh, hüyange I khümjing me hipak laowe ngohpu jingne iman yashan. 22Hüyange aope I nokshaote yu, Iye iman phei ngao yengao ok, hüyange khümjing me Iye himang ja nge she iman-e shing. Hüyange Iye imante füo hüo hüyange I yishohpa kih-e ngoh. 23Hüyange aope Iye shaoshanpu nyih sho pei; Zekharia yoi nokte ye.
24Tüolan nyih hipak linphei me I shekonyu Elizabeth püm yekengpe ngai, hüyange lekeng nga mongme yhawe yoi nying nyingke lowe i, 25#Kaht 30.23; Isa 4.1.“Kahta yo me tao wüotüopu winlak jingne Youngwanpawe üte leipu hipak me hüke üte jamyangki.”
Jesu Puhlak Shaotan Ngao
26Sha-a lekeng wok shepupa me Kahwang mepu wangdang shongmokpa Gabriel Galilee mepu chingnyu ja min Nazareth te shon. 27David nokli mepu kahta ja min Joseph-e khamyangpu yhashaoha (wangngoipu) naoyha ja min Mary tangte Gabriel shon. 28Hüyange wangdang shongmokpa yha tangte peiye i, “Nangme toloimei ngohtüoh, nang shüpshe yeonge tüopu nyu! Youngwanpa nang phei ngoh nang.” 29Hüpoi ngao ngaoyangpu jingne yha yeonge mongshang, hüyange mongsa me hatüowa hangkihpu salam ngao she yashan. 30#Lk 1.13.Hüyange wangdang shongmokpawe yha te i, “Tahnyam Mary, hangjingne Kahwang mepu nange monghahpu tüo. 31#Lk 2.21; Mt 1.21.Hüyange hüowü, nang yoi naonyoi me püm yekengpe ngailak, hüyange moija pailak; hüyange nange I min Jesu she nyiklak. 32I üyongpa ne menglak, hüyange Ite ütahpa jing Ha she nyiklak; hüyange Youngwanpa Kahwange Ipa David ahngpa shotjing Ite phalak; 33#Mt 28.18; Dan 2.44.hüyange Jacob nokphong tangme Iye jinte ahnglak; hüyange Iye wanglam lampu üküm yenanglak.”
34 #
Lk 1.18. Hüyange Mary-e wangdang shongmokpa te i, “Taowe netan manshingpute hatüo hangke oklak?”
35 #
Mt 1.20. Hüyange wangdang shongmokpawe yha te i, “Yaha Üjao nang tangme peilak, hüyange ütahpa üngan yashüm me nangte küplak; tüokhei puh ne ngohpu naha te üjaopa, hüyange Kahwang üha she nyiklak. 36Hüyange hüowü, nang pheipu Elizabeth, yha wunyu ne ngohyapoi, püm yekengpe ngaiye netanha ja puhlak; hüyange ao te ükengnyu she nyik, yha lekeng wok shepupa ngohnang. 37#Kaht 18.14.Hangjingne Kahwang jingne ye-oklak hango yenang.”
38Hüyange Mary-e i, “Hüowü, tao Youngwanpa shaoshan nyu; ü-jeng nang ngaoke ngohne tamtüoh.” Hüyange hüwante wangdang shongmokpa yha mepu yan.
Elizabeth Tangte Mary Pei
39Tüophei me Mary yayonge kahtang yemepu Judea chingnyu ja te mamshe tai: 40hüyange Zekharia nokte onge Elizabeth te salam ngao pha. 41Hüyange tüo ngai, aope Elizabeth-e Mary mepu salam ngao jai, yha naonyoi me naha-a hom; hüyange Elizabeth Yaha Üjaowe maa; 42#Lk 11.27-28.yhawe ngao üyong phei üngwünne i, “Sheko yo me nang moimannyu, hüyange nang naonyoi ülick shemoimanpu! 43Ü Youngwanpa ünyu ü-tangte peilak ne hangne üte ngailak shi? 44Hangjingne hüowü, aope nang mepu salam ngao ü-na sa te pei, ü-naonyoi me naowe mongmei puwe homnang. 45Aowe ütinglak yangki yha moimanpu hangjingne Youngwanpawe yha te hanghe jan tüopa ngaine tam.”
Marywe Yihlupu Hem
46 #
1 Sam 2.1-10. Hüyange Mary i,
“Ü üyin yaha-e Youngwanpa yongne tamnang;
47 #
1 Tim 2.3; Tit 2.10; Jud 25. hüyange ü Yinyepa Kahwang jingne ü yahawe mongmei,
48hangjingne Iye yoi shaoshannyu innyaipu leiyangki.
Hangjingne hüowü, sha-a me peiye jin üsheiye üte moimannyu she nyiklak;
49hangjingne ütahpawe üjingne toi üyong lingyangki;
hüyange üjaopa-a I min.
50Hüyange I shüpshe Ite nyampalan tangme jintokte jin ngohlak.
51Iye yoi yakke yoi wong hüo,
mongjang me ota teihpu kahtalan Iye yanne tamyangki.
52Iye ahnghalan iman ahng shotjing mepu yeine tamyangki,
hüyange üjoihalan yongne tamyangki;
53Seanyaopalan Iye shemei pupawe moh ne tam,
hüyange hakpalan Iye ükeng me tei.
54Yoi yayeng shüpshe teihtüowe
Iye yoi shaoshanpa Israel te paowe tükyangki,
55 #
Mik 7.20; Kaht 17.7; 18.18; 22.17. teman puyimlante, Abraham hüyange I ülilante
jintepu jingne Iye ngao.”
56Hüyange Mary yha phei lekeng lüm nanjing ngoh, hüyange yha nokte ye mah.
Baptipa John Puhpu
57Sha-a Elizabeth moi pailak hipak ngoipei, hüyange yhawe netan naha ja puh. 58Hüyange yha yupilan hei yha pheipulan-e yhate Youngwanpawe shüpshe üyong hüopu jai, hüyange iman yha phei mongmei.
59 #
Lev 12.3; Kaht 17.12. Hüyange tetshepupa nyih me iman-e naha-a shokhüplak jingne yah pei. Hüyange iman-e Ite yoipa minleiye Zekharia she nyik hu, 60hüpoi Inyuwe i, “Yeje, I min John she nyiklak.”
61Hüyange iman-e yhate i, “Nenok yo me tüopa min me nyikpu ao-o yenang.” 62Hüwante Iye Ite hangke nyikne tamhupu she iman-e Ipa te füo hüowe tong. 63#Lk 1.13.Hüyange nyanlak longsheng yuwe Iye nyan, “I min John.” Hüwante iman üsheiye yashan! 64Hüwante muh I ju epne tamme yee lanne tam, hüyange Iye Kahwang min yonge ngao ngao. 65Hüyange iman neikonne ngohpu üshei nyam, hüyange Judea kahtang ching üshei me tüolan ngao ngaopu khongküm pute yan; 66hüyange tüolan jaipu üsheiye yoi mongjang me ange i, “Hümma-a tüopa naha hangne menglak?” Hangjingne Youngwanpa üngan wong I phei ngoh.
Zekharia Hi-ngao
67Hüyange John üpa Zekharia me Yaha Üjaowe maawe itte i:
68“Israel Kahwang Youngwanpa te yihlutüoh,
hangjingne Iye yoi phei pulan tangte pei, hüyange iman jingne yinne tampu ling,
69teman jingne I shaoshanpa David nokli mepu
okpupa Yinyepa Iye phatam;
70yoi üshong wante üjao hipalan ju kaiye Iye ngaopuke,
71hüke teman wepalan mepu teman,
hüyange aoyinne temante nunang iman yak mepu yinlak;
72teman payimlante shüpshe hüolak,
hüyange I üjaopa jiengjeppu teihtüolak jingne,
73teijanpu hanghepa Iye teman üpa Abrahamte janne tam;
74teman wepalan yak mepu yintam yange,
yenyampe I shaoshanlak jingne temante lingtamlak jingne;
75I sheshao me üjaopa me hüyange khakshupu me teman üyin hipak khongkümpu yin.
76 #
Lk 7.26; Mal 4.5. Hüyange nang, üha, nangte ütahpa hipa she nyiklak;
hangjingne Youngwanpa lam tümlak jingne nang I sheshao me tailak;
77 #
Mk 1.4. yoi kahtalan te iman ünu winpu kaiye
Yinyepu shinge okpu phalak jingne,
78 #
Mal 4.2; Eph 5.14. teman Kahwang innyaiye shüpshe teihpu kaiye
ütangpa mepu nyih üla ngaipu kaiye teman ngoikülak,
79 #
Isa 9.2; Mt 4.16. wangnyak hüyange lipu yashüm me shotpulan tangme wangngai lak jingne,
chingmei lamnyute teman yah woilak.”
80 #
Lk 2.40; 2.52. Hüyange naha-a jong, hüyange yaha me wongnange ngai, hüyange Israel te I hüopu nyih manngoi manngoi I wanwüng jeng me ngoh.
Currently Selected:
LUK 1: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
