ROME 5
5
Chingmei Hüyange Mongmei
1 #
Rom 3.28. Tüokhei ütinglakpuwe tinge tampu jingne, teman Youngwanpa Jesu Khrista kaiye teman-e Kahwang phei chingmei me mongmei hah. 2#Eph 2.18; 3.12; Heb 10.19-20.Hüyange hanghe shüpshe me teman-e yongnang tüopa shüpshe tangte I kaiye teman-e ütinglakpuwe onglak jingne tüoteki, hüyange teman-e Kahwang müktishiwa jingne monghümme mongmei hah. 3#Rom 5.11; 2 Kor 12.10; Jas 1.3.Tüophei shenyei she teman-e shangpongpu me-o mongmei hah, hangjingne, shangepongpu mepu nün okpu ngainang, hüyange nün okpu mepu monghümpu ngainang, 4hüyange wongnangpuwe nyoingoh ngaitam nang; hüyange nyoingoh kaiye monghümpu ngainang; 5#Tüo 119.116; Lam 2.33; Phi 1.20.hüyange monghümpuwe wüotüone yetam, hangjingne temante phapu Yaha Üjao kaiye Kahwang kenpu teman mongjang me wangman-e ngohnang.
6Hangjingne üne-o teman wong mannang wante, hipak khakshuwe Khrista ünulan jingne li. 7Hangjingne khakshupu kahta ja jingne kahta ütam lilaka wanlakpa; tüophei nehoi üne-o kahta ümei ja jingne shejawe lilakne-o mongyongne ok! 8#Jn 15.13; Rom 8.32; 1 Pet 3.18; 1 Jn 3.16; 4.10.Hüyangpoi teman üne-o ünupalan ne ngohwante, teman jingne Khrista lipuwe, hatüowe Kahwange I yoi kenpu jeng temante saki phanang. 9#Rom 3.5,24-25; Eph 1.7; 1 Thes 1.10.Sha-a Khrista iy kaiye teman tingetampu jingne, tüome monghah-e, Kahwang mongshih ngaipu mepu teman I kaiye yinyelak. 10#Kol 1.21.Hangjingne teman üne-o wepane ngohwante, I Ha lipu kaiye teman Kahwang phei mongken hahjiengpune mengma-a, tüome monghah-e teman mongken hahjieng küm-e, I Ha üyin kaiye teman yinyelak. 11#Rom 5.3.Hüyange hatüo shaha ne yeje, hüyangpoi üne-o teman Youngwanpa Jesu Khrista, ao kaiye teman-e mongken hahjiengpu ngeteki, I kaiye teman-e Kahwangte mongmei nang.
Adam Kaiye Lipu, Khrista Kaiye Üyin
12 #
1 Kor 15.21-22; Rom 6.23; Jas 1.15. Tüokhei, hangke kahta ja kaiye kahtoknyu te ünu pei, hüyange ünu kaiye lipu pei, hüke kahta lilite lipu peine tam; hangjingne üsheiye ünu om. 13Hangjingne ngaokeng mannang wante muh kahtoknyu me ünu ngoh; hüyangpoi ngaokeng mannang wante ünu ne ye-i. 14#1 Kor 15.22,45.Tüoyangpoi Adam-e Kahwangpa ngao yejaiwante ünu ompu kih aoyinne ünu ye-om, iman tangte-o Adam mepu Mosa ngoiye lipuwe wanglamlam. Adam-a peine ngohpupa te leppune ngohyangki.
15 #
Lam 15.11. Hüyange ünu hangke ngoh, hüke jajang japu hünghao yenangja. Hangjingne kahta ja ünuwe li she ima-a, hatüo phei shenyeipu, Kahwang shüpshe hüyange kahta ja, hüke Jesu Khrista shüpshe kaiye phapu hünghaowa maapu wangmanne ngai. 16#Rom 8.1.Hüyange jajang japu hünghaowa kahta ja ünu ngaipu leye yeje, hangjingne ja kaiye phalak jingne ngaophünpu pei, hüyangpoi ünu maapu kaiye tingetamlak jingne jajang japu hünghao pei. 17Hangjingne kahta ja ünuwe I kaiye lipupawe wanglam lamma-a, tüophei shenyei, shüpshe üyong hüyange jajang japu khakshupu hünghao yahpalan-e kahta ja, hüke Jesu Khrista kaiye üyin me wanglam lamlak.
18Hümma-a hangke ünu ja kaiye kahta üshei ümeng phalak jingne ngao phünpu pei, hüke khakshupu toishao ja kaiye kahta üshei tingetamlak hüyange kahtalan üshei jingne üyin phane pei. 19#Phi 2.8.Hangjingne hangke kahta jawe ngao yejaipu kaiye kahta maapu ünupa lanne mengtam, hüke kahta jawe ngao jaipu kaiye kahta maapu khakshupu lanne mengtamlak.
20 #
Rom 7.7-8; Gal 3.19; 1 Tim 1.14. Ngao yejaipalan maa ngailak jingne ngaokeng pei; hüyangpoi ümeken me ünu jaalun, shüpshe-o üshei tangme jaalun; 21#Rom 6.23.tüokaiye, ünupawe lipu tangme wanglam lam, hüke teman Youngwanpa Jesu Khrista kaiye jintepu üyin jingne khakshupu kaiye shüpsheye wanglam lam.
Currently Selected:
ROME 5: KONYBSI
Highlight
Share
Compare
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
