Jon 1

Anjam a ŋambile unu. A tamo yusiqa gago ambleq di soqnej

1Tulaŋ nami iŋgi iŋgi kalil brantosaisonaqa Anjam soqnej. Anjam a Qotei ombla soqneb. Anjam a segi Qotei. 2Tulaŋ nami Anjam a Qotei ombla soqneb. 3Aqa baŋ na Qotei na iŋgi iŋgi kalil gereiyej. Iŋgi bei gam bei na brantosai. Iŋgi iŋgi kalil branteleŋeb qaji di Anjam a segi na marnaq branteb. 4Anjam a segi ŋambile qa utru. Ŋambile di puloŋ bul. Deqa ŋambile dena tamo uŋgasari naŋgi suwantnjreqnu. 5Puloŋ di ambruq di suwaŋejunu. Ambru na puloŋ di mosotosaieqnu.

6Tamo bei brantej aqa ñam Jon. Qotei na a qariŋyonaq bej. 7A anjam palontqa bej. A puloŋ qa anjam palontoqnej. Tamo uŋgasari kalil naŋgi aqa anjam qusib puloŋ qa naŋgo areqalo siŋgilatqajqa deqa palontoqnej. 8Jon a puloŋ sai. A puloŋ qa anjam palontqa bej. 9Puloŋ di puloŋ bole. A mandamq aisiqa tamo uŋgasari kalil naŋgi suwantnjreqnu.

10Ariya Anjam a mandamq di soqnej. Aqa baŋ na Qotei na mandam atej. Ariya tamo uŋgasari mandamq di soqneb qaji naŋgi a qa poinjrosai. 11A aqa segi qure utruq ainaqa aqa leŋ naŋgi a areiyosai. 12Ariya tamo uŋgasari qudei naŋgi a areiyeb. Tamo uŋgasari naŋgi di aqa ñam qa naŋgo areqalo siŋgilateb qaji. Onaqa a na naŋgi giltnjrej. Yim naŋgi Qotei aqa aŋgro sqajqa deqa. 13Naŋgo meani na ŋambabtnjro qaji dena naŋgi Qotei aqa aŋgro brantosai. Naŋgo segi areqalo na naŋgi Qotei aqa aŋgro brantosai. Tamo bei aqa areqalo na dego naŋgi Qotei aqa aŋgro brantosai. Qotei a segi na marej deqa naŋgi aqa aŋgro tiŋtiŋ branteb.

14Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru. 15A qa nami Jon na tamo uŋgasari naŋgi minjroqnsiqa endegsi leleŋoqnej, “E tamo deqa nami endegsi merŋgoqnem, ‘Tamo ijo qoreq na bqas qaji a na e tulaŋ buŋbejunu. Di kiyaqa? E ŋambabosaisonamqa a nami soqnej deqa.’”

16A iga kalil qa are tulaŋ boleiyoqnsiqa iga geregereigeqnu. 17Bole, nami Qotei a Moses aqa baŋ na iga dal anjam egej. Ariya Yesus Kristus aqa wau na Qotei a iga qa are tulaŋ boleiyeqnu. A segi anjam bole qa utru. 18Tamo bei na Qotei aqa ulatamu unosai. Qotei aqa Ŋiri qujai a segi Qotei. A aqa Abu Qotei aqa areq di sosiqa beteryejunu. A na qujai iga Qotei osorgej.

Jon yansnjro qaji a anjam palontosiq tamo uŋgasari naŋgi minjroqnej

19Bati bei Juda tamo kokba naŋgi na atra tamo kokba ti Livai naŋgi ti qariŋnjrnabqa naŋgi Jerusalem qure uratosib Jon aqa areq gilsib nenemyeb, “Ni tamo yai?” 20Ariya Jon a anjam ulitosai. A segi qa ubtosiqa minjrej, “E Kristus sai.” 21Onaqa naŋgi na olo nenemyeb, “Di ni tamo yai? Ni Elaija kio?” Onaqa a na minjrej, “Sai.” Onaqa naŋgi na olo minjeb, “Ni Qotei aqa medabu o qaji tamo kobaquja iga a qa tariŋeqnum qaji tamo de kio?” Onaqa a na kamba minjrej, “Sai. E a sai.” 22Deqa olo nenemyeb, “Ni tamo yai? Ni segi qa kiersi mareqnum di geregere mergimqa iga olo aisim tamo naŋgi iga qariŋgonub qaji di minjrqom.” 23Onaqa Jon na minjrej, “Nami Qotei aqa medabu o qaji tamo Aisaia a anjam endegsi neŋgreŋyej, ‘Tamo bei a wadau sawaq di sosimqa a tulaŋ koba leleŋosim tamo uŋgasari naŋgi endegsi minjroqnqas, “Tamo Koba a bqas. Deqa niŋgi na aqa gam gereiyetiye.” ’ Aisaia a nami anjam degsi neŋgreŋyej. Gam gereiyetqa tamo agi e.”

24Farisi naŋgi na atra tamo naŋgi di qariŋnjrnab Jon aqaq gileb. 25Onaqa naŋgi na olo Jon nenemyeb, “Ni Kristus sai. Ni Elaija sai. Ni Qotei aqa medabu o qaji tamo di sai. Deqa ni kiyaqa tamo uŋgasari naŋgi yansnjreqnum?” 26Onaqa Jon na kamba minjrej, “E ya na naŋgi laŋa yansnjreqnum. Ariya nuŋgo ambleq di tamo bei unu. Niŋgi a qa qaliesai. 27Agi e nami a qa endegsi merŋgoqnem, ‘A ijo qoreq na bqas.’ E nami niŋgi degsi merŋgoqnem. Tamo di a ñam ti. E ñam saiqoji. Deqa e na a kaŋgalyqajqa e tamo bolesai.” 28Jon a Betani qureq dia anjam di minjroqnej. Betani qure di Jordan ya taqal beiq di unu. Dia Jon na tamo uŋgasari naŋgi yansnjroqnej.

Yesus a Qotei aqa Kaja Du

29Nebeonaqa Yesus a walwelosiq Jon aqa areq beqnaqa unsiqa marej, “Niŋgi uniye. Tamo di a Qotei aqa Kaja Du. A na qujai tamo uŋgasari mandamq endi unub qaji naŋgo une kobotetnjrqajqa bej. 30E tamo deqa nami endegsi merŋgoqnem, ‘Tamo ijo qoreq na bqas qaji a na e tulaŋ buŋbejunu. Di kiyaqa? E ŋambabosaisonamqa a nami soqnej deqa.’ 31E nami a qa qaliesai. Ariya Israel tamo uŋgasari naŋgi a qa qalieqajqa deqa e bosim ya na tamo naŋgi yansnjreqnum.”

32Jon a na naŋgi degsi minjrsiqa olo endegsi minjrej, “Qotei aqa Mondor a laŋ qure uratosiq binoŋ bulosiqa mandamq aisiqa Yesus aqa gateq di awoonaq e unem. 33E nami a qa qaliesai. Ariya Qotei agi e ya na tamo uŋgasari naŋgi yansnjrqajqa qariŋbej qaji a na merbej, ‘Ijo Mondor Bole aisim tamo bei aqa gateq di awoamqa ni unqam. A na qujai Mondor aqa siŋgila na tamo uŋgasari naŋgi yansnjroqnqas.’ 34Qotei a na e degsi merbonaqa e tamo di unsimqa marem, ‘Bole, tamo di a Qotei aqa Ŋiri.’”

Tamo qalub naŋgi Yesus aqa aŋgro sqa marsib a dauryeb

35Olo nebeonaqa Jon a na aqa aŋgro aiyel joqsiqa naŋgi koba na tigelesoqneb. 36Sonabqa Yesus a walwelosiq gileqnaqa unsiqa naŋgi aiyel minjrej, “Niŋgi uniye. Tamo di a Qotei aqa Kaja Du.” 37Degsi minjrnaqa naŋgi aiyel Jon dauryqa uratosib Yesus dauryosib gileb. 38Onaqa Yesus a bulosiqa naŋgi aiyel a dauryosib beqnabqa unjrsiqa nenemnjrej, “Niŋgi aiyel kiyaqa e daurbeqnub?” Onaqa minjeb, “Rabai, ni tal qabia unum?” Ñam “Rabai” di Hibru anjam. Gago anjam, “Qalie Tamo Koba.” 39Ariya Yesus na naŋgi aiyel minjrej, “Niŋgi aiyel bosib ijo tal uniye.” Ariya naŋgi aiyel Yesus dauryosib gilsib tal a soqnej qaji di uneb. Unsib seŋ bati 4 onaq bilaqtej deqa naŋgi a ombla soqneb.

40Tamo aiyel Jon aqa anjam qusib Yesus dauryeb qaji bei aqa ñam Andru. A Saimon Pita aqa was. 41A Yesus uratosiq aqa was Saimon itosiq minjej, “Iga Mesaia unonum.” Ñam “Mesaia” di Hibru anjam. Gago anjam, “Kristus.” 42Degsi minjsiqa Saimon osiq Yesus aqa areq osi gilej. Onaqa Yesus na Saimon unsiqa minjej, “Ni Saimon, Jon aqa ŋiri. Bunuqna ino ñam Sifas mermoqnqab.” Ñam “Sifas” di Hibru anjam. Gago anjam, “Pita.” Aqa damu, “Meniŋ.”

Yesus a na Filip wo Nataniel wo naŋgi metnjrej

43Olo nebeonaqa Yesus a Galili sawaq gilqa osiqa Filip itosiq minjej, “Ni e daurbe.” 44Filip a Betsaida qure qaji. Di Andru wo Pita wo naŋgo qure utru. 45Ariya Filip a mati olo aisiqa Nataniel itosiq minjej, “Ni au. Iga tamo a qa nami Moses a dal anjam neŋgreŋyej qaji a unonum. Qotei aqa medabu o qaji tamo naŋgi dego a qa osib neŋgreŋyeleŋeb. Tamo di Yesus Nasaret qure qaji. A Josep aqa ŋiri.” 46Onaqa Nataniel na kamba Filip minjej, “Nasaret di qure kobaquja sai. Di qure kiñala. Kristus a qure dena bqa kere kio?” Onaqa Filip na minjej, “Ni bosim tamo di unime.”

47Onaqa Nataniel a walwelosiq Yesus aqa areq beqnaqa unsiqa a qa marej, “Niŋgi uniye. Tamo di a Israel tamo bolequja. A gisaŋ anjam marosaieqnu.” 48Onaqa Nataniel na Yesus nenemyej, “Ni kiersim e qa qalieonum?” Onaqa Yesus na kamba minjej, “Filip a ni metmosaisonaqa ni qura utruq di awesonamqa e ni numonum.” 49Onaqa Nataniel a Yesus aqa anjam di qusiqa minjej, “O Qalie Tamo Koba, ni degsi maronum deqa e poibqo, ni Qotei aqa Ŋiri. Ni Israel naŋgo Mandor Koba.” 50Onaqa Yesus na kamba minjej, “Ni qura utruq di awesonam e ni numonum e degsi ubtsi mermonum deqa ino areqalo e qa siŋgilatonum e? Di e ijo siŋgila kiñala segi babtonum ni unonum. Bunuqna e ijo siŋgila kokba babtoqnit ni unoqnqam.” 51Osiqa marej, “Niŋgi quiye. E bole merŋgwai. E segi Tamo Aŋgro. Deqa bunuqna laŋ waqamqa Qotei aqa laŋ aŋgro naŋgi ijo jejamuq na laŋ qureq oqoqnsib olo mandamq aioqnib niŋgi unqab.”

Currently Selected:

Jon 1: bojNT

Highlight

Copy