Luk 24

Yesus a olo subq na tigelej

1Ariya yori bati koboonaqa nebeonaq nobqolo ambru uŋgasari naŋgi di olo tigelosib ŋam so aqa ya quleq boledamu nami gereiyeb qaji di osib Yesus aqa jejamuq di liyqajqa deqa subq gileb. 2Naŋgi gilsib ŋam ateb meniŋ kobaquja sub me getenteb qaji di waqosiq taqalq di sonaq uneb. 3Unsib sub meq aisib Tamo Koba Yesus aqa jejamu unqajqa marsib ŋam ateb naŋgi aqa jejamu unosai. 4-5Deqa naŋgi are tulaŋ kobainjrej. Onaqa tamo aiyel brantosib uŋgasari naŋgo areq di tigelesonab unjrsib tulaŋ ulaugetosib turuosib mandamq di ŋam queb. Tamo aiyel di naŋgo gara tulaŋ minjalo. Onaqa tamo aiyel naŋgi na minjreb, “Niŋgi kiyaqa tamo moreŋo qaji naŋgo sawaq endia tamo ŋambile unu qaji a qa ŋameqnub? 6Yesus a endi sosai. A olo subq na tigelqo. A nami niŋgi koba na Galili sawaq di sosibqa bati deqa a niŋgi endegsi merŋgej, ‘E subq na olo tigelqai.’ Niŋgi aqa anjam deqa olo are qaliye. 7Agi a na niŋgi endegsi merŋgej, ‘E Tamo Aŋgro ojsibqa une tamo naŋgo baŋq di atib lubib moiqai. Bati qalub koboamqa e olo subq na tigelqai.’ A niŋgi degsi merŋgej. Niŋgi aqa anjam deqa olo are qaliye.”

8-9Onaqa uŋgasari naŋgi di Yesus aqa anjam deqa olo are qalsibqa subq dena olo puluosib aisib anjam kalil laŋ aŋgro na minjreb qaji di Yesus aqa aŋgro 11-pela naŋgi ti tamo qudei ti olo sainjreb. 10Uŋa bei aqa ñam Maria. A Makdala qure qaji. Bei Joana. Bei Maria. A Jems aqa aniqali. Ariya uŋgasari qudei naŋgi dego laŋ aŋgro naŋgo anjam di qusib aisib Yesus aqa aŋgro 11-pela naŋgi sainjreb. 11Sainjrnab qunab ugeinjrnaq mareb, “Uŋgasari naŋgo anjam di laŋa sa anjam.” 12Onaqa Pita a tigelosiqa urur ti gilsiq sub miligiq di tirosiq ŋam atej gara Yesus dalaeb qaji di segi sonaq unej. Unsiqa olo puluosiq aqa talq aisiq are koba qaloqnsiq maroqnej, “Yesus aqa jejamu qabi unu?”

Tamo aiyel naŋgi Emeus gamq dia Yesus iteb

13Ariya bati deqa Yesus aqa aŋgro bei wo bei wo naŋgi Jerusalem qure uratosib qure bei aqa ñam Emeus deq gileb. Jerusalem dena tigelosib qure deq gilqajqa kiñala isaq. 11-pela kilomita dego. 14Naŋgi aiyel giloqnsibqa kumbra kalil jeu tamo naŋgi na Yesus yoqneb qaji deqa saoqnsib giloqneb. 15Saoqnsib gileqnabqa Yesus a segi naŋgoq di brantosiqa naŋgi koba na walwelosib giloqneb. 16Naŋgi Yesus uneb naŋgi a qa poinjrosai.

17Deqa a naŋgi aiyel endegsi nenemnjrej, “Niŋgi anjam kie maroqnsib gileqnub?” Degsi nenemnjrnaqa naŋgi tigeleb. Yesus a moiej deqa naŋgi aiyel ulatamu ugeinjrej. 18Onaqa bei aqa ñam Kliopas a na kamba Yesus minjej, “Tamo gargekoba naŋgi Jerusalem qureq endi unub. Ariya ni segi qujai kio kumbra di brantej ni qaliesai?” 19Onaqa Yesus na kamba nenemnjrej, “Kumbra kie brantej?”

Onaqa naŋgi aiyel na minjeb, “Yesus Nasaret qaji a ŋamburbasq di qalnab moiej. Iga kumbra deqa mareqnum. Yesus a Qotei aqa medabu o qaji tamo bei. A Qotei aqa siŋgila ti sosiq deqa a Qotei aqa maŋwa gargekoba yeqnaqa tamo uŋgasari naŋgi unoqneb. A Qotei aqa siŋgila ti sosiq deqa anjam bolequja mareqnaqa tamo uŋgasari naŋgi quoqneb. 20Ariya a kumbra degyeqnaqa atra tamo kokba ti gago gate kokba naŋgi ti a ojsib Rom naŋgo tamo kokba naŋgo baŋq di ateb. Atnabqa naŋgi na a osib tigeltosib minjeb, ‘Ni une tamo. Deqa ni moiqam.’ Degsi minjsib a osib ŋamburbasq di qalnab moiej. 21Nami iga endegsi are qaloqnem, ‘Yesus a na qujai iga Israel tamo uŋgasari aqaryaigosim gago jeu tamo naŋgo baŋq dena iga eleŋqas.’

“Anjam bei dego unu. Jeu tamo naŋgi na Yesus qalnab moinaqa bati qalub gilsiq agi bini brantqo. 22-23Yqoqa nobqolo ambru gago uŋgasari qudei naŋgi subq gilsib Yesus aqa jejamu unqajqa marsib ŋam atonub naŋgi aqa jejamu unosai. Dena puluosib bosib iga mergonub, ‘Iga subq dia laŋ aŋgro aiyel unjronumqa naŋgi na mergonub, “Yesus a subq na tigelqo. Deqa a ŋambile unu.” ’ Uŋgasari naŋgi iga degsi mergonubqa iga tulaŋ prugugetonum. 24Gago was qudei naŋgi dego subq gilsib kumbra kalil uŋgasari naŋgi na unsib saigonub qaji di unonub. Unsib Yesus aqa jejamu unqajqa marsib ŋam atonub naŋgi dego aqa jejamu unosai.”

25Onaqa Yesus na kamba minjrej, “Nuŋgo areqalo tulaŋ truquiŋgwo. Qotei aqa medabu o qaji tamo naŋgo anjam nami maroqneb qaji di niŋgi poiŋgosai. 26Agi Qotei aqa medabu o qaji tamo naŋgi nami anjam endegsib maroqneb, ‘Kristus agi Qotei na giltej qaji a jaqatiŋ koba osim moiqas. Osim a laŋ qureq oqimqa Qotei na ñam kobaquja yqas.’ Qotei aqa medabu o qaji tamo naŋgi nami anjam degsib maroqneb. Naŋgo anjam di niŋgi qaliesai kio?” 27Yesus a naŋgi degsi minjrsiqa a segi qa anjam kalil nami neŋgreŋyeleŋeb qaji di sainjrsiq Moses aqaq dena utru atsiq gilsiq Qotei aqa medabu o qaji tamo naŋgo anjam kalil nami a qa neŋgreŋyeleŋeb qaji di geregere plaltosiq minjroqnej.

28-29Ariya naŋgi qalub koba na walwelosib qure naŋgi gilqa mareb qaji di jojomyoqnsib Yesus a naŋgi uratnjrsim gam bei dauryqa laqnaqa naŋgi aiyel na saidyosib minjeb, “Ni iga uratgaim. Qoloqas. Deqa ni iga koba na sqom.” Degsi minjnabqa a naŋgi aiyel daurnjrsiqa naŋgo talq aisib koba na soqneb. 30Sosib awoosib iŋgi uyoqnsib Yesus a bem osiq Qotei pailyosiqa bem giŋgeŋyosiqa naŋgi aiyel anainjrej. 31Anainjrnaqa bati deqa naŋgi Yesus qa poinjrnaqa mareb, “Bole, tamo endi Yesus.” Degsi marnabqa Yesus a naŋgo ambleq na loumosiq ulaŋej. 32Ulaŋonaq naŋgi mareb, “Bole, aqo aiyel gamq di walwelosi gileqnamqa Yesus a Qotei aqa anjam nami neŋgreŋyeb qaji di aqa utru geregere plaltosiq mergeqnaqa iga qusim tulaŋ arearetgoqnaj.”

33Naŋgi aiyel degsi marsib bati qujai deqa olo puluosib Jerusalem aisib Yesus aqa aŋgro 11-pela naŋgi tamo qudei ti koroesonab itnjreb. 34Itnjrnab minjreb, “Bole, Tamo Koba Yesus a subq na tigelqo. Agi a subq na tigelosiq Saimon aqaq di brantqoqa Saimon a bole unqo.” 35Degsi minjrnabqa naŋgi aiyel kamba gamq dia anjam kalil Yesus na minjrej qaji deqa ti a na bem giŋgeŋyosiq anainjrnaqa naŋgi aiyel a qa poinjrej deqa ti naŋgi sainjreb.

Yesus aqa aŋgro naŋgi na a uneb

36Degsi sainjreqnabqa Yesus a segi naŋgo ambleq di brantosiq minjrej, “Niŋgi are lawo na soqniye.” 37Degsi minjrnaqa naŋgi kalil ulaosib tulaŋ prugeleŋosib are qaleb, “Iga buga bei unonum kio?” 38Degsi are qalnabqa Yesus na minjrej, “Niŋgi kiyaqa e buga qa marsib ulaosib prugonub? 39Endi e di. Niŋgi ijo baŋ bile unsib ijo siŋga unsib baŋ waiysib ijo jejamu ojsib poiŋgwas, e damu ti tanu ti. Ariya buga a damu ti tanu ti saiqoji.” 40-41Yesus a na naŋgi degsi minjrsiqa aqa baŋ ti siŋga ti naŋgi osornjrnaqa naŋgi unsib tulaŋ areboleboleinjrej. Onaqa naŋgi olo areqalo aiyelteb. Tamo endi Yesus bole kio Yesus bolesai kio degsib are qaloqneb. Onaqa Yesus na minjrej, “Niŋgi iŋgi bei unu e?” 42-43Onaqa naŋgi qe bei koiteb qaji di gentosib mutu bei Yesus yonab osiq naŋgo ŋamgalaq di uyej.

44Uysiqa minjrej, “Nami e niŋgi koba na sosimqa bati deqa e niŋgi endegsim merŋgem, ‘Dal anjam kalil Moses na nami e qa neŋgreŋyej qaji di aqa damu brantqas. Anjam kalil Qotei aqa medabu o tamo naŋgi nami e qa neŋgreŋyeleŋeb qaji di aqa damu dego brantqas. Anjam kalil louqa buk miligiq di nami e qa neŋgreŋyeb qaji di dego aqa damu brantqas.’ E nami niŋgi degsi merŋgem.” 45Yesus a na naŋgi degsi minjrsiqa aqa anjam dena naŋgo areqalo waqtetnjrnaqa naŋgi Qotei aqa anjam nami neŋgreŋyeb qaji di aqa utru geregere poinjrej. 46Onaqa Yesus na olo minjrej, “Qotei aqa anjam bei nami endegsib neŋgreŋyeb unu, ‘Kristus a jaqatiŋ koba osim moiqas. Moisim bati qalub koboamqa a olo subq na tigelqas.’ Nami e qa anjam degsib neŋgreŋyeb unu. 47-48Deqa niŋgi gilsib e qa mare mare laqnsibqa sawa sawa kalilq dia tamo uŋgasari naŋgi anjam endegsib minjroqniye, ‘Niŋgi are bulyiye. Yibqa Qotei a Yesus aqa ñam na nuŋgo une kalil kobotetŋgwas.’ Niŋgi tamo uŋgasari naŋgi anjam degsib minjroqnsib kumbra kalil e nami nuŋgo ŋamdamuq di yoqnem qaji deqa naŋgi sainjroqniye. Niŋgi Jerusalem dia wau utru atsib dena walwelosib sawa sawa kalilq dia ijo anjam minjre minjre laqniye. 49Niŋgi quiye. Mondor Bole ijo Abu na nami nuŋgoq qariŋyqa marej qaji di e na qariŋyit nuŋgoq bqas. Deqa niŋgi qure endia tariŋoqniye. Tariŋosi soqnibqa laŋ goge dena siŋgila nuŋgoq bamqa niŋgi siŋgila osib sawa sawa kalilq dia ijo anjam minjre minjre laqniye.”

Qotei na Yesus osiq laŋ qureq oqej

50Yesus a na aqa aŋgro naŋgi anjam degsi minjrsiqa naŋgi joqsiqa Jerusalem qure uratosiq Betani qureq gilej. Gilsiq dia aqa baŋ soqtosiqa aqa aŋgro naŋgi qa pailyej. 51Pailyeqnaqa Qotei na a metonaq naŋgi uratnjrsiqa laŋ qureq oqej. 52A laŋ qureq oqeqnaqa aqa aŋgro naŋgi siŋga pulutosibqa a qa louosib tulaŋ areboleboleinjrej. Onaqa naŋgi olo puluosib Jerusalem qureq aieb. 53Aisib dia bati gaigai atra tal miligiq giloqnsibqa Qotei aqa ñam soqtoqneb.

Currently Selected:

Luk 24: bojNT

Highlight

Copy