Jon 5

Yesus a ya kuru bei aqa ñam Betesda dia tamo bei boletej

1Bati bei Yesus a Juda naŋgo yori bati koba unqa marsiqa Jerusalem aiej.

2Jerusalem dia ya kuru bei soqnej. Ya kuru di kaja naŋgo siraŋme qalaq di soqnej. Ya kuru di aqa ñam Betesda. Di Hibru anjam na mareqnub. Ya kuru areqsi jagwa oqajqa tal kiñilala 5-pela soqneb. 3Dia tamo ma ti, tamo ŋam qandimo, tamo siŋga uge, tamo jejamu lainjro qaji tulaŋ gargekoba soqneb. Naŋgi ya anŋilqajqa tariŋoqnsib soqneb. 4Bati qudei Tamo Koba Qotei aqa laŋ aŋgro ya kuru miligiq aioqnsiqa ya enteqnaqa anŋiloqnej. Ya anŋiloqnimqa tamo a namo yaq aiqas qaji aqa ma koboqas. Utru deqa naŋgi ya anŋilqajqa tariŋoqneb.

5Ariya Yesus a Jerusalem aiej bati deqa tamo bei wausau 38 ma ti soqnej qaji a di tariŋesoqnej. 6Onaqa Yesus na tamo di ŋeiesonaq unsiqa a bati olekoba ma de ti soqnej di qalieosiqa nenemyej, “Ni olo boleqajqa are unu e?”

7Onaqa minjej, “O Tamo Koba, ya anŋiloqnimqa tamo yai na e aqaryaibosim urur yaq osi aiqas? Tamo bei saiqoji. E aiqa yeqnam ma tamo qudei naŋgi na e buŋboqnsib namo yaq aieqnub.” 8Onaqa Yesus na minjej, “Ni tigelosim ino sapera qoboiyosim walwel.” 9Degsi minjnaqa bati qujai deqa aqa jejamu boleonaqa a tigeloqujatosiq aqa sapera qoboiyosiqa walwelosiq gilej.

Bati di Juda naŋgo yori bati. 10Deqa Juda tamo kokba naŋgi na tamo boleej qaji di unsib minjeb, “Bini gago yori bati. Iga wauqa getento. Deqa ni ino sapera qoboiyaim.” 11Onaqa a na kamba minjrej, “Tamo e boletbqo qaji a na merbqo, ‘Ni ino sapera qoboiyosim walwel.’” 12Onaqa naŋgi na nenemyeb, “Tamo yai na ni mermqo, ‘Ni ino sapera qoboiyosim walwel’?” 13Onaqa a na minjrej, “Tamo e boletbqo qaji aqa ñam di e qaliesai.” A naŋgi degsi minjrej. Di kiyaqa? Tamo gargekoba sonabqa Yesus a naŋgo ambleq na ulaŋej deqa.

14Onaqa nebeonaq Yesus a atra tal miligiq gilsiqa tamo a na boletej qaji a di sonaqa itosiqa minjej, “Ni que. E ni boletmonum. Deqa ni olo une bei ataim. Gulube kobaquja bei ino jejamuq di olo branto uge.” 15Onaqa tamo di aisiqa Juda tamo kokba naŋgi minjrej, “Tamo e boletbej qaji agi Yesus.”

16Onaqa Juda tamo kokba naŋgi Yesus ugeugeiyqajqa maroqneb. Di kiyaqa? A maŋwa di yori bati qa yoqnej deqa. 17Onaqa Yesus a naŋgo anjam di qalieosiqa naŋgi minjrej, “Ijo Abu a nami gaigai wauoqnej agi bini wauoqnsi unu. Deqa e dego waueqnum.” 18Onaqa Juda tamo kokba naŋgi Yesus aqa anjam di qusibqa naŋgi a qalib moiqajqa naŋgo areqalo torei siŋgilaeb. Di kiyaqa? A yori bati segi gentosai. A dego marej, “Qotei a ijo Abu.” Aqa anjam dena a segi qa marej, “Aqo Qotei wo ombla kerekere.” Utru deqa naŋgi Yesus qalib moiqajqa naŋgo areqalo torei siŋgilaeb.

Yesus a Qotei aqa Ŋiri deqa kumbra kalil aqa Abu na yeqnu qaji di a dego yeqnu

19Onaqa Yesus na kamba minjrej, “Niŋgi quiye. E bole merŋgwai. E Qotei aqa Ŋiri. E ijo segi areqalo na kumbra bei yqa keresai. Kumbra ijo Abu na yeqnaq e uneqnum qaji di segi e yeqnum. E Qotei aqa Ŋiri deqa kumbra kalil ijo Abu na yeqnu qaji di e dego yeqnum. 20E ijo Abu aqa segi Ŋiri deqa a na e tulaŋ qalaqalaiboqnsiqa kumbra kalil a na yeqnu qaji di e olo osorbeqnu. Bunuqna ijo Abu na kumbra tulaŋ siŋgila kokba dego osorboqnqas. Yimqa niŋgi unsib tulaŋ prugeleŋqab. 21Ijo Abu na tamo moreŋo qaji naŋgi olo ŋambile enjroqnsiqa subq na tigeltnjreqnu. Deqa e Qotei aqa Ŋiri e kamba dego ijo segi areqalo na tamo naŋgi ŋambile enjreqnum. 22Ijo Abu na tamo naŋgo une qa naŋgi peginjrosaieqnu. E aqa segi Ŋiri deqa a na wau di e ebej. Deqa e na tamo naŋgo une qa naŋgi peginjreqnum. 23E wau di yeqnum deqa tamo kalil naŋgi ijo Abu aqa ñam soqteqnub dego kere naŋgi ijo ñam dego soqtetboqnqab. Di kiyaqa? E Qotei aqa Ŋiri deqa. Tamo naŋgi ijo ñam soqtosaieqnub qaji naŋgi ijo Abu e qariŋbej qaji aqa ñam dego soqtosaieqnub.

24“Niŋgi quiye. E bole merŋgwai. Tamo a ijo anjam qusim ijo Abu e qariŋbej qaji a qa aqa areqalo siŋgilatqas di a ŋambile gaigai sqas. Deqa e aqa une qa a pegiyqasai. A moio gam uratqo deqa a olo ŋambile unu.

25“Niŋgi quiye. E bole merŋgwai. Bati bei brantqas agi brantqo. Deqa tamo uŋgasari moreŋo qaji naŋgi ijo kakoro qusib dena naŋgi ŋambile oqab. Di kiyaqa? E Qotei aqa Ŋiri deqa. 26Ijo Abu a segi ŋambile qa utru. E aqa Ŋiri. A na e siŋgila ebej deqa e dego ŋambile qa utru. 27E Tamo Aŋgro. Deqa ijo Abu na e ñam ebej. Ñam dena e na tamo uŋgasari naŋgo kumbra qa peginjrqai. 28Niŋgi ijo anjam di qusib deqa are koba qalaib. Bati bei brantimqa tamo uŋgasari kalil subq di unub qaji naŋgi ijo kakoro quqwab. 29Qusib olo sub uratosib tigelqab. Tamo uŋgasari kumbra bole bole yoqneb qaji naŋgi tigelosibqa ŋambile sqab. Tamo uŋgasari kumbra uge uge yoqneb qaji naŋgi tigelabqa e na naŋgo kumbra uge deqa naŋgi peginjrsiy naŋgi padaltnjrqai.”

Iŋgi qudei na Yesus aqa ñam ubteqnub

30Yesus a degsi marsiqa olo marej, “E ijo segi areqalo na wau bei yqa keresai. Ijo Abu na e anjam merbeqnaq dauryoqnsim tamo uŋgasari naŋgi peginjreqnum. E kumbra tiŋtiŋ na naŋgi peginjreqnum. Di kiyaqa? E ijo segi areqalo dauryosaieqnum. Ijo Abu e qariŋbej qaji aqa areqalo dauryeqnum.

31“E segi na ijo wau ti ijo kumbra ti ubtsiy marqai di tamo naŋgi ijo anjam qusib bole qa maraib. 32Ariya tamo bei unu agi Qotei. A na dego ijo wau ti ijo kumbra ti ubtsiq mareqnu. E qalieonum, anjam a mareqnu qaji di anjam bole.

33-34“Mandam tamo bei aqa anjam na ijo anjam siŋgilatqajqa e deqa are qalosaieqnum. Ariya e qalieonum, niŋgi nami tamo qudei qariŋnjrnab naŋgi Jon aqaq gilnabqa Jon na naŋgi anjam minjroqnej. Ariya niŋgi Jon aqa anjam qa are qaliye. Yimqa anjam dena Qotei na niŋgi oqas. Jon a ijo wau ti ijo kumbra ti ubtsiq maroqnej. Niŋgi deqa are qaliye. Di kiyaqa? Jon a anjam bole ubtsiq maroqnej deqa. 35Jon a lam puloŋ bul sosiqa tamo naŋgi suwaŋtnjroqnej. Yeqnaqa niŋgi aqa suwaŋoq di sokiñalayoqnsib deqa areboleboleiŋgoqnej.

36“Ariya anjam e palonteqnum qaji dena Jon tulaŋ buŋyejunu. Wau kalil ijo Abu na e yosiy kobotqajqa ebej qaji wau dena Jon aqa wau tulaŋ buŋyejunu. E wau di yeqnum deqa tamo uŋgasari naŋgi unoqnsib endegsi poinjreqnu, ijo Abu na e qariŋbonaq bem. 37Ijo Abu e qariŋbej qaji a segi e qa anjam mareqnu. Ariya niŋgi aqa kakoro nami quosaioqneb. Aqa ulatamu dego niŋgi nami unosaioqneb. 38Qotei aqa anjam dego nuŋgo are miligiq di sosai. Di kiyaqa? Tamo Qotei na qariŋyonaq mandamq aiej qaji aqa anjam niŋgi nuŋgo areqaloq di siŋgilatosaieqnub.

39“Niŋgi are qaleqnub, Qotei aqa anjam neŋgreŋq di so qaji dena niŋgi ŋambile gaigai sqab. Niŋgi degsib are qaloqnsib deqa niŋgi Qotei aqa anjam di gaigai sisiyoqnsib peleiyeqnub. Ariya anjam di e qa mareqnu. 40Ariya niŋgi ŋambile oqa marsib e qa bqajqa urateqnub.

41“E mandam tamo naŋgoq dena ñam koba oqajqa e deqa are qalsim anjam endi marosaieqnum. 42Ariya e niŋgi qa qalieonum. Nuŋgo are miligiq dia niŋgi Qotei qalaqalaiyosaieqnub. 43E ijo Abu aqa ñam na bonamqa niŋgi ijo anjam osai. Tamo bei aqa segi ñam na bqas di niŋgi aqa anjam oqujatqab. 44Niŋgi nuŋgo segi was naŋgoq dena ñam koba oqajqa are qaleqnub. Ariya Qotei a segi qujai unu. Niŋgi aqaq dena ñam koba oqajqa are qalosaieqnub. Niŋgi kumbra degyeqnub deqa niŋgi kiersib e qa nuŋgo areqalo siŋgilatqab? Di keresai.

45“E ijo Abu aqa ŋamgalaq dia nuŋgo une qa pegiŋgwai edegaib. Nuŋgo une qa pegiŋgwajqa tamo qujai agi Moses. Niŋgi are qaleqnub, Moses a na niŋgi aqaryaiŋgwas. Di sai. 46Niŋgi Moses aqa anjam nuŋgo areqaloq di siŋgilatonub qamu ijo anjam dego nuŋgo areqaloq di siŋgilatonub qamu. Di kiyaqa? Moses a e qa anjam neŋgreŋyej deqa. 47Ariya niŋgi Moses aqa anjam nami neŋgreŋyej qaji di nuŋgo areqaloq di siŋgilatosaieqnub. Deqa niŋgi kiersib ijo anjam dego nuŋgo areqaloq di siŋgilatqab? Di keresai.”

Currently Selected:

Jon 5: bojNT

Highlight

Copy