Aposel 1
1
Jesus hab aabppa teum
1-2O Tiopilus, yaak dahil da tatam yaami amu, da yaak amuppa Jesus Nug uɗat oh heumnu, Nug danab ah keeke ippuanattomnu ele yaami. Nug uɗat amu digme uɗie, deɗ Nug hab aabppa teum batak, Nug uɗat amu oh heum. Amge ii ukkom haenppa Nug gokkunu haaha, tatam Nug nuhikkud totol danab 11, Nug tituanattom ele amu, ag aɗi aɗi hekkulagnu, Nug Kayak Ouɗi ɠagattagppa nai mattom. 3Aria, Nug guittak nau amu awa mauhowa, dimppa Nug genab eɗua hibaittom Nug nuhikkud totol danab 11 ippuanadkkunu, eɗuak hibaittak dimppa Nug nuhikkud totol danab 11 haen gamag deɗ 40 amuppa gumatta ona, ib kuɗumppa keeke amu ippuanattom. Nug deɗ 40 amuppa Kayaknu ɗo maɗoɗnu nai ele mehuqe dooppig. 4Amu ele deɗ 40 amuppa Nug ag ele oh haen laa ee lanan daanna, Nug amelagppa aum. “Ag Jerusalem paha aib uuppig. Iitta. Ag Kayak Ouɗi da Mamel Nug madakkunu nai qakka aum, da ele nuhignu ag ai dooppig amu, ag Nug ameg mekkulag. 5Am genab Jon nug danab ah leppa layattom, amge haen elab iitta Kayak Nug nuhig Ouɗippa ag layadkku,” awa aum.
6Anam amunu, haen laa ag oh qagmena, ag Nug oɗ medappig. “Naɗi, haen imuppanab na heppe, Rom ag ahappeg, ig Israel ig eɗut wan ihinig gumagnigte?” aon appig. 7Aeg amu, Nug ag amelagppa aum. “Amu ahilagte keeke amunu, ag da Mamel Nug haen deɗ ele aum amu ag dooglag? Iitta. Nug nukka keeke amu gumatte. 8Amge geha dimppa Kayak Ouɗi Nug ahilagppa neeb, ag ɠagattag aon, geha ag dahil aɗi heehe anttomnu mattiak danab daanna, ag dahilnu Jerusalem mehuqna, ag gona, Juda wan ohppa, Samaria appa ele mehuqna, ag wan atu ohppa ele gona mehuqkkulag,” awa aum. 9Am Nug nai amu amelagppa ana male, ag neegna daaegeg, Kayak he, Nug attan teum. Teete, lombig laa haute, ag baula Nug ii anidppig. 10Nug ukke, ag habppa neegna daaegeg am danab aɗit, aa lamen hakkab ele, aa tulai doeh, ag ele hippaidna daanna, 11aa apiɗ. “Galili danab, aɗinu ag hippaidna daanna, habppa neegna daatteb? Amu gemu Kayak Nug Jesus ahilagppanu awe, hab aabppa ukkom. Aria, geha Nug hab aabppa ugekke anidppig bia eɗua uɗikku,” aoya apiɗ.
Totol danab ag Judas ou otippig
12Aria, ag qauko nakok laa, Olipnu Qauko atteb, ag appanu eɗun Jerusalem wappig. Qauko amuppanu Jerusalem wanak amu miag, 1 kilomita bia. Juda dilag ɗoppa danab nug ahilag Sabat deɗppa tappa ukkak elab amubia gokkunu elele. 13Haen ag aab okkaippa tena amu ag gona, ag lag oo attan, ag daappig ele amuppa teppig. Ag onilag amu Pita, Jon, Jems, Andru, Pilip, Tomas, Bartolomyu, Matyu, Alpius bekka Jems, Saimon, nug am Selot, amu Jems bekka Judas aakku. 14Danab amu ag oh oolag laippu mena, haen kuɗum danab ah laala ele oh qagmena, unuqidnana daappig. Danab ah amuam Jesus anig Maria, Jesus amakkud amu ah laala ele.
15Ag anam daanna, haen amuppa Pita nug danab ah ag Jesusnu oolagppa genab dooppig ele, ahilag ebqak 120 anam amu, nug ag oolagppa aha hibaitta Judasnu inam mattiom. 16“O lailad, Kayak Ouɗi Nug Dawit oɗeppa keeke laa Judas, nug danab ag Jesus aɗaglagnu ib dayom amu, nuhigppa bekkunu a, Kayak nai amuam bekkununab dayaya aakku beum. 17Danab amu nug ig ele daatta, ig ele oh uɗat laippu hemut.” Pita nug anam mattion. 18(Judas nug eheɗ ha, uɗat amunu men doɗo awom ele amuppa ag wan laih laa daden meppig. Aria, nug nukka wan amuppa nug beɗu aiha na qe, beɗu aoɗe, biig oh wanppa ne, 19dimppa danab Jerusalem daappig ag oh amu dooppig amunu, ag ahilag naippa ag aben amunu onig Akeldama ataɗppig. Amu eɗuak am, Wan Tiig ele.) 20Aria, Pita nug tuɗitta inam ele aum. “Kayak Ouɗi Nug Judas anam hekkunu doya amu Nug he, Judasnu nai imu Dawit oɗeppa be, buk Samppa inam yaak daatte.
‘Na heppe, nuhig aben hamu, danab ah iitta daakkunu oɗ medattem.
Ao, na heppe, auntai laa appa ii daamanu unuqidttem.’
Amu Sam laappa yaak daatte, amuam, ‘Na heppe, laa nug ikki danab daakkunu uɗat nuhig awa daakkunu unuqidttem.’ 21Anam amunu, gemu ig danab laa, nug Naɗi Jesus Nug ig oonigppa oiya, ukkak uɗiak heum, danab amu nug haen amu ohppa ig ele oidmut amu, nug Judas aben aokkunu tituankkunigoitte. 22Haen Naɗi Jesus Nug Jonnu layattak awe uɗie uɗie, deɗ Kayak Nug Jesus awe, hab aabppa teum batak amu, danab laala ag ig ele laippu oimut, ag oolagppanu laa tituankkunig. Amu nug ig ele, Jesus eɗua hibaittom, nai amu mehuqkkunig,” awa aum.
23Pita nug anam a, aria ag danab aɗit otiatppig. Laa amu Sabas bekka Josep, onig laa Jastus. Am danab laa amu Matias. 24-25Ag danab aɗit otiatona, ag inam unuqidppig. “Naɗi, na danab oh oolag diig doottem amunu, danab aɗit imu oolahppan na aun nug Judas abenabppa ba, totol uɗat imu aokkunu tituanme amu, na ig ippunigkkutnu oɗ medattem. Judas nug nuhig abenppa gokkunu uɗat amu uuom,” unuqidna anam appig. 26Anam unuqittona, aria ag oom ena yaak hena, Matias anam daakkunu anidppig. Ag anam anidna, totol danab 11 amu ele tuɗidppig.
Currently Selected:
Aposel 1: NB
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
