Jon 20

Jesus eɗua hibaittom

1Sabat amu ukka male, mettidnu deɗ digmakppa Maria, Makdala ted, nug buttuanab gatatu ele moɗppa ukka, men naɗi moɗ ameg qehakkom amu, laa nug men amu buɗibɗib mette ukka, moɗ amegppa ii dayeye anttom. 2Anam antta, nug eɗua qaiqaɗ ukka, Saimon Pita, amu ippunittak awak danab laa, Jesus Nug nuhignu oo huanak mauhttom ele, nug aa amelahppa aum. “Ag Naɗi moɗppanu aon, adebtag meppig amu, ig ii doottem,” awa aum. 3Nug anam a amu, Pita, ippunittak awak danab laa ele aa ahaya, moɗppa gokkulahnu 4qaiqaɗ gopiɗ. Goyaya, ippunittak awak danab laa nug Pita eɗitta, nug tatam moɗ guguitta ukkom. 5Nug ukka ta, gomela neekke, moɗ ooppa ukke, nug linen lamen qatti elab, ag amuppa Jesus gaɗa itappig ele, nug amu niieye anattom, amge nug ooppa ii noum. 6Nug anam neekka dayeye, dimppa Saimon Pita nug ukka ta, nug ippu metta, moɗ ooppa ukka, nug ele linen lamen qatti amu anatta, 7nug lamen laa, ag lamen amuppa Jesus ikki hautppig ele, nug lamen amu ele anttom. Lamen amu qak daya, nukka anam dayeye, linen lamen qatti elab ele akka daaegeg anttom. 8Anam antte amu, ippunittak awak danab nug tatam moɗppa ukkom ele, nug ele ooppa noa antta, nug ooppa genab doyom.

9Aɗinu? Haen amu ii nak, ag Kayak naippa, Jesus Nug eɗua hippaidkkununab nai amuppa yaak daatte, ag nai amunu oolag ii maittom.

10Aa anam anttoya, ippunittak awak danab aɗit aa eɗuya, lakka gopiɗ.

Makdala ah Maria, nug Jesus anttom

11Ippunittak awak danab aɗit ukkaeh, Maria nug moɗ dimittim hibaitta gayaya dayaya, nug gomela neekke, men oɗe ooppa ukkom. 12Neekke ukke, engel aɗit lamen hakkab ele, aa Jesus gaɗa niiom, aben amuppa, laa igippa, laa baegppa anam heɗep neya daaeheh anatom. 13Anate, aa nug oɗ medapiɗ. “Ah na aɗinu gaattem?” aoya apiɗ. Anam aeh amu, nug aum. “Danab ag dahil Naɗi aon, adebtag meppig am, da ii doottem,” awa aum. 14Nug anam ana, nug eɗua, Jesus hibaitta dayeye anttom, amge Nug am Jesus amu, nug ii doyom. 15Maria eɗua Jesus antte, amu Jesus nug oɗ mettom. “Ah, na aɗinu gaattem? Aun madittem?” oɗ metta aum. Oɗ mette amu, Maria nug nukka, nug ooppa, danab amu nug dad amu mameg dabma, nug amegppa aum. “Danab naɗi, natai aon gome? Anam dayeb amu, na adeppa meme da amelppa appe, da ukken aokkul,” awa aum. 16Anam a amu, Jesus eɗua, ah onig diia, “Maria,” awa aum. Anam a amu, Maria nug eɗua Hibru naippa, “Rabonai,” awa aum. Amu diig am, “Ippunittak danab.” 17Nug anam a amu, Jesus aum. “Na da aib aɗailme, da Mame toppa ii gomi. Amge na da oɗel aona, da lailad gumadna gona, amelagppa inam a! ‘Da, da Mamel, Nug am ag Mamelag ele, da dahil Kayak, Nug am ahilag Kayak ele, da Nug gumitte gottem,’ ” awa aum. 18Jesus anam amegppa a amu, Maria, Makdala ted, nug ukka, ippunittak awak danab amelagppa aum. “Da Naɗi anidmi,” awa aum. Ana, nug nai Jesus nug amegppa aum amu, nug amu oh amelagppa aum.

19Aria, mettid digmakppanu deɗ, deɗ amuppa gatatu ne, Jesusnu ippunittak awak danab ag Juda dilag okkai baɗadna, lag ooppa od lok qak ele daaegeg, Jesus uɗia tula, ag oolagppa hibaitta, ag amelagppa aum. “Ag maɗoɗ ele dayeg!” awa aum. 20Nug anam awowa amu, Nug eppeg, qetti ele ippuanattom. Nug ippuanatte, ag Naɗi anidna amu, ag maɗoɗppan gamag ahak okkai dooppig. 21Ag anam doyeg amu, Jesus baula amelagppa aum. “Ag maɗoɗ ele dayeg! Mame Nug da meiɗe uɗimi, amubia da ele ag maatti gotteb,” awa aum. 22Anam awowa, Nug ouɗi ahilagppa iwala, Nug aum. “Ag Kayak Ouɗi aweg! awa aum. 23Ag danab laanu hipunin uhuqadna mettaglag dayeb, danab amunu hipunin am iitta mekkulag. Ag ii uhuqadna mettaglag dayeb amu, danab amunu hipunin iitta ii memana,” awa aum.

Jesus Nug Tomas gumitta tula beum

24Haen amuppa ippunittak awak danab laa Tomas, nuhignu ag Didimus ele atteb amu, nug ag ele ii daaegeg, Jesus Nug uɗiom 25amunu, ippunittak awak danab laikkud laa ag Naɗi anidppignu amegppa aeg, nug aum. “Ag Nug eppeg tutuippa atulppignu duɗupa da amelppa anttena, da duɗupa amu eppelppa aɗen, Nug qetti duɗupa ele eppelppa aɗe doyena amu, da oolppa genab dookkul,” awa aum.

26Nug anam a dimppa, mettid laippu uue, ippunittak awak danab ag baula Sabat deɗppa lakka qagmena daanna, haen amuppa Tomas nug ele oh daappig. Ge, lag od am lok qak daaegeg daappig, amge Jesus Nug uɗia, ag oolagppa dayaya aum. “Ag maɗoɗ ele dayeg!” awa aum. 27Nug anam awowa, Nug Tomas amegppa aum. “Na eppen doɗoppa da eppel nakok aɗan, amenppa ele da eppel antte! Na eppen bahin, da qettil ele nakok aɗe! Na ooppa genab ii doyak danab bia aib heme. Iitta! Na ootppa genab doye!” awa aum. 28Nug anam a amu, Tomas oɗeppa awa aum. “Na dahil Naɗi! Na dahil Kayak!” awa aum. 29Nug anam a amu, Jesus nug amegppa aum. “Na amu amenppanab da aniɗna, na ootppa genab doome. Laa ag da ii aniɗna, oolagppa genab dootteb amu, ag itittak ena aoppig daatteb,” awa aum.

30Jesus Nug nuhikkud ippunittak awak danab noolagppa Kayak dabmettaknu kobol danab haknu elele iitta iɗu iɗu kuɗum laa ele heum, amu buk imuppa oh ii yaak. 31Amge yaak imu daatte amu, ⌊ag ebqetteb ele,⌋ ag ebqenana, ag Jesus, Nug am Kristus, Kayak Bekka daatte, ag amu doona, oolagppa genab dooglagnu daatte. Amu yaak imu daatte amu, yaak amuam ag Jesusnu ooppa genab doyakppa ag bauklel hanhannu aotteb oolagppa genab dooglagnu ele daatte.

Currently Selected:

Jon 20: NB

Highlight

Copy