Ifyacitilwe 15

1Lomba aŵantu ŵambi awafumine kucalo caŵena-Juda ŵaliisile nekuŵasambisya awana-ŵaŋkasi ati: Kani tamukopwelwe koti kwisiŵila kwakwe Mose, tesi mukapuluke. 2Popele, ili ŵapicisye ukwakuti Paulu naBanaba nekulukwipusyansyanya naŵo, ŵalisalulwile Paulu naBanaba naŵambi naŵo ati ŵaye kuJelusalemi kuntanjisi nakuŵakulu pakuti pacewo ico.

3Peŋka aŵekelesya ŵaliŵasindicisye pansila, naŵo ŵalipitile pafyalo fyaŵaPoinike neŵaSamalya, ili ŵatulisya ukwaluluka kwaŵenafyalo; naŵo ŵaliŵatemwesye ukwakuti awana-ŵaŋkasi ŵonse. 4Naŵo, pakufika kuJelusalemi, ŵalipokelwe kwikelesya nakuntanjisi nakuŵakulu; peŋka ŵaliŵulisisye ifintu fyonse ifyacitile naŵo ŵaLesa. 5Sombi ŵaliimine ŵambi aŵamukoka waŵaFalisi aŵalukucetekela, nekulaŵila ati ukwelelwa ukuŵakopola, nekuŵafunda ati ŵalame amafunde akwe Mose.

6Popele intanjisi neŵakulu ŵaliŵuŋgene mukwalakanya bwino iceŵo ico. 7Peŋka, ili ŵaipusyansyenye ukwakuti, Petilo aliimine, nekulaŵila kuli ŵo ati:

Mweŵakwasu, muliisi ati yalipitile impindi itali, lomba ŵaLesa ŵalisalulwile peŵumba lyenu ati mukanwa kanji aŵenafyalo ŵomfwe isiwi lyaCeŵo Iciweme, ŵacetekele. 8Popele ŵaLesa, aŵesiŵa umutima, ŵaliŵasimicile, ili ŵaŵapele Umupasi Uswetelele, koti nifyopele'fyo ifi ŵacitile nakuli fweŵo. 9Kaŵili taŵalekenye fweŵo naŵaŵo; ŵaliswesesye imitima yaŵo kukucetekela. 10Pakuti pali fyefyo, mbanindo mulukuŵesesya ŵaLesa, pakuŵike'cikoŋkoli pamikosi yaŵasambile, ico neli niŵawisifwe neli nifweŵo tatwaisiŵile ukupinta? 11Sombi fweŵo tulukucetekela ati tukapuluka pakuti paluse lwaŵaSikulu Yesu Klistu, koti nifyopele'fyo naŵaŵo.

12Peŋka iŵumba lyonse lyali ikele celele, naŵo ŵaliŵakuticile Banaba naPaulu, ili ŵalukuŵulisisya ifyatwisiŵilo nefimpelampela ifi ŵacitile naŵo ŵaLesa pakati paŵenafyalo.

13Popele, ili ŵacilekele ukulaŵila, J akobo aliasucile ati:

Mweŵakwasu numfweni! 14Simyoni aŵulisisya ifi ŵataticile ŵaLesa ukufika kuŵenafyalo mukusalulula pali ŵo aŵantu aŵapesina lyaŵo. 15Nemasiwi aŵakusimika nao alukupelelwa pamo nafifi, koti nifyopele'fyo ifyalembelwe ati: 16Panuma yafifi ŋkabwela,

Eli ŋkewakulula isema lyakwe Dafidi, ilyo ilyawile;

Kaŵili ŋkafiiwakulula ifisansamucile fyalyelyo,

Ŋkaliimika liŵili;

17Ati aŵantu aŵasyele-po ŵakafwayafwaye ŵaSikulu,

Neŵenafyalo ŵonse aŵalukwilikwa isina lyanji.

18Efilaŵile ŵaSikulu aŵatulisya ifintu ifi ukufuma kumpindi yakuleŋgwa kwacalo.

19Pakuti pali fyefyo, ukusololola kwanji nikuku: ati fweŵo tekuŵakatasya aŵo-ŵenafyalo aŵakwalulucila kuli ŵaLesa; 20sombi ati tuŵalembele iŋkalata ati ŵaleke ifiŵipile ifyafiŵumbwaŵumbwa, neŵucencemesi, nefinani ififwile pakufipoto'mukosi, nemilopa. 21Pakuti Mose, ukufuma kufitentekwa fyakale-kale lukoso, ali neŵantu mumisi yonse, aŵalukumutulisya, pakupende'fyakwe mumasunagoge patusuŵa twasabata tonse.

22Popele intanjisi neŵakulu nekelesya lyonse lyalilaŋgulucile ati ukwelelwa ukusalulula aŵantu peŵumba lyesu, nekuŵatuma kuAntioke pamo naPaulu naBanaba: niJuda uwailicilwe ati niBasaba, naSilasi, aŵantu aŵakulu paŵanaŵaŋkasi. 23Popele ŵalilembele pali ŵo ifi ati:

Intanjisi newana-ŵaŋkasi aŵakulu ŵalukusekela aŵakwaŵo aŵamukoka waŵenafyalo aŵakuAntioke nakucalo caSilya necaCilica ati: Mitende. 24Pakuti twaliumfwile ati ŵambi aŵafumine kuli fweŵo ŵalimukatesyeni kumasiwi, nekufutasya imitima yenu; sombi aŵo tatwaŵatumine; 25fweŵo twalaŋguluka nemutima umo ati ukwelelwa ukusalulula aŵantu, nekuŵatuma kuli mweŵo pamo naŵaBanaba naPaulu aŵo tutemenwe, 26aŵantu aŵatakete imyeo yaŵo pakuti pesina lyaŵaSikulu Yesu Klistu. 27Pakuti pali fyefyo, twatuma Juda naSilasi, aŵakamuŵuleni aŵene patunwa twaŵo ifintu fyopele'fi. 28Pakuti Umupasi Uswetelele nafweŵo twalukulaŋguluka ati tekwelelwa ukumutwikeni icipinto icakucila napafintu ifi ifyelelwe; 29ati muleke ifintu fyamilambu iyakufiŵumbwaŵumbwa, nemilopa, nefinani ififwile pakufipoto'mukosi, neŵucencemesi. Kani mukaleke'fyo, mukaŵa bwino. Ŋgalusyale-po!

30Naŵo, ili ŵatuminwe, ŵalificile kuAntioke; popele pakuwuŋganya iŵumba lyaŵantu, ŵaliŵapele iŋkalata, 31Aŵo, ili ŵaipendele, ŵalitemenwe pakuti pakusaŋgalasya kwaiyo. 32Peŋka Juda naSilasi, aŵene eŵakusimika, ŵaliŵacenjesye awana-ŵaŋkasi nemasiwi aenji, nekuŵakosya. 33Lomba, pakwikalo'ko impindi, ŵalituminwe neŵutende kuŵana-ŵaŋkasi, muku bwelela kuli ŵaŵo aŵaŵatumine. 34Naŋgawe'fyo Silasi alitemenwe ukwikala kopele uko. 35NaPaulu naBanaba naŵo ŵaciikele kuAntioke, ili ŵasambisya, nekutulisya lsiwi lyaŵaSikulu, pamo naŵambi aŵantu aŵenji.

36Pakupita simbi insiku, Paulu alilaŵile kuli Banaba ati: Ŋgatubwelele ŵukumo, tukaŵaŵone aŵakwasu mumisi yonse, umo umu twatulisye lsiwi lyaŵaSikulu, tukaŵone ukwikala kwaŵo. 37Popele Banaba alukufwaya ukuya nakwe Yoane, uwailicilwe ati niMako. 38Sombi Paulu alukulaŋguluka ati tekwelelwa ukuya nawoyo uwalekene nafweŵo kucalo caPamfulya, nekuŵulo'kuya nafweŵo kumilimo. 39Peŋka kwaliŵucile ukupicisya ukwakuti, fyopele'fyo ŵalilekene. Naye Banaba alimutwite Mako, nekuya mubwato kuKupilo; 40sombi Paulu alisalulwile Silasi, nekwima, ili ŵamusisisye kuluse lwaŵaSikulu aŵakwaŵo. 41Naye aJipitile pacalo caSilya necaCilica, ili aŵakosya aŵekelesya.

Currently Selected:

Ifyacitilwe 15: AAL59

Highlight

Copy