Ifyakutaŋga 20
20
1Popele apo Ablaamu waliendele ukufumo'ko ukulukuya kucalo icakusaufu, nekulukwikele pakati paKadesi naSyuli; nekusyala kuGelala.
2Popele Ablaamu walilaŵile ifyakwe Sala umukasi wakwe ati niŋkasi yanji: lomba Abimeleci, imfumu yakuGelala, yalitumine aŵantu mukumupoka Sala. 3Sombi ŵaLesa ŵaliisile kuli Abimeleci mumuloto wapaŵusiku, nekulaŵila kuli ye ati: Ŵona, weŵo niwemuntu ufwile lukoso pakuti pamwanakasi uyo wapoka; pakuti ye nimuka-muntu. 4Lomba Abimeleci taaŋgapalamina kuli Sala: naye ati: MweŵaSikulu, kani mwakwipaya nemukoka waŵantu uluŋgeme? 5Kansi taalilaŵile umwine kuli neŵo ati niŋkasi yanji? Naye umwanakasi umwine walilaŵile ati uyo nindume yanji; koti kuluŋgama ukwamumutima wanji, nakoti kuŵulo'mulandu kwaminwe yanji, eko nacite'fi. 6Popele ŵaLesa ŵalilaŵile kuli ye mumuloto ati: Cine, ndiisi ati wacite'fi koti kuluŋgama ukwamumutima woŵe, kaŵili naneŵo nalikukenye ati tekuŵifya kuli neŵo; pakuti pali fyefyo nsinakusumine ati ukume-ko kuli ye. 7Pakuti pali fyefyo lomba umubwesesye umuntu uyo umukasi wakwe, pakuti ye ewakusimika, akalukukutembelela, eli ukalukwikele nemweo: sombi kani tesi umubwesye, wisiŵe ati cine wakufwa, weŵo neŵoŵe ŵonse.
8Popele Abimeleci waliimine ulucelocelo, nekuŵeta aŵantu ŵakwe ŵonse, nekuŵulisisya fyonse'fyo pamatwi aŵo: lomba ŵalitinine ukwakuti aŵantu. 9Popele Abimeleci walimwitile Ablaamu, nekulaŵila kuli ye ati: Mbamwatucita syani fweŵo? Mbanipando namuŵifisyeni, kamubwene mwandetela neŵo neŵufumu bwanji icakuŵifya icikulu? Mwancita neŵo ifitafyelelwe ukuficita. 10Kaŵili Abimeleci walilaŵile kuli Ablaamu ati: Mbanindo mwabwene, mwacitile'fi? 11Popele Ablaamu ati: Pakuti nalilaŋgulucile ati: Apo ukuŵatonda ŵaLesa tamuli muno; lomba ŵakanjipaya pakuti pamukasi wanji. 12Nakaŵili cine ye niŋkasi yanji, mwana waŵatata, sombi taali mwana waŵamama; 13popele aliŵele mukasi wanji; popele apo lomba, ili ŵamfumisye ŵaLesa kunanda yaŵatata mukwendaenda, eli nalaŵile kumukasi wanji ati: Ukutemwa uku wakulukundanjisya nikuku: konse uko tukalukuficila, ukanjeŵa ati uyu nindume yanji.
14Popele Abimeleci waliŵulile imbelele neŋombe, neŵapyunjisi aŵalalume neŵanakasi, nekumupela Ablaamu, nekumubwesesya Sala umukasi wakwe. 15Popele Abimeleci ati: Ŵoneni icalo canji cili pamenso enu: mwikale kopele uko uku mutemenwe. 16Kaŵili nakuli Sala alilaŵile ati: Ŵoneni, naipele'ndume yenu indalama imyanda ikumi: ŵoneni isyo syakukufimba pamenso isyakuli ŵaŵo ŵonse aŵo muli naŵo; kaŵili pamenso aŵantu ŵonse mulilunjicilwe. 17Popele Ablaamu alitembele ŵaLesa: popele ŵaLesa ŵalimuŵusisye Abimeleci, nemukasi wakwe, neŵapyunjisi ŵakwe aŵanakasi; naŵo ŵalifyele aŵana. 18Pakuti ŵaYawe kale ŵaŵasincisye munda syaŵo ŵonse aŵamuŋanda yakwe Abimeleci, pakuti pali Sala, umukasi wakwe Ablaamu.
Currently Selected:
Ifyakutaŋga 20: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
