Ifyakutaŋga 8
8
1Popele ŵaLesa ŵalilaŋgulucile Noa nefintu fyonse ifyamweo, nenama syonse isi ali nasyo mubwato: popele ŵaLesa ŵalipupisye icipupu pacalo, popele amenda alicilekele; 2netuntupuntupu nato utwamucisiŵa icitali netumbeluka utwakwiulu nato twalisineile, kaŵili nemfula iyakwiulu nayo yalikalicile; 3popele amenda alibwelele ukufuma pacalo impindi yonse: popele pakusile'nsiku umwanda umo nemakumi asanu, amenda alicepele. 4Popele ubwato bwaliikele pamapili aAlalati umwensi waŵuisanu naiŵili, pakasuŵa akakuleŋga ikumi nasisanu nasiŵili isyamwensi uyo. 5Popele apo amenda alukucepa-cepa impindi yonse ukufika pamwensi wekumi; pamwensi wekumi, pakasuŵa akakutatiko'mwensi uyo, peulu pamapili palibwenekele.
6Popele lomba, pakupite'nsiku amakumi ane, Noa waliiswile-po pakambeluka akamubwato, ako acitile: 7naye alitumine cikwaŋgala, naye cikwaŋgala walukupitana ukuya nekubwela, ukufika kumpindi iyo apwile pacalo amenda. 8Kaŵili Noa alitumine naciŵa, mukwesya ati kani amenda alitelele kumenso amusili; 9sombi ciŵa taabwene apakutusisyo'lukasa lwakwe, naye alibwelele kuli Noa kubwato pakuti amenda aliikele pamenso pacalo conse: popele Noa alitambicile ukuŵoko kwakwe, nekumupoka ciŵa, nekumwinjisya mubwato. 10Popele alipembelele insiku nasimbi sisanu nasiŵili; popele alitumine liŵili ciŵa, ukumufumya mubwato; 11popele ciŵa aliinjile kuli ye iciŋgulo; lomba mumulomo wakwe mwali iŵula lyalyolife iliswilwe: fyopele'fyo Noa waliisiŵile ati amenda alitelele pacalo. 12Popele apo alipembelele nasimbi insiku sisanu nasiŵili; eli aŋgamutuma ciŵa; naye taabwelele kuli ye liŵili.
13Popele apo lomba, pamwaka uwakuleŋga imyanda isanu naumo nemwako'mo peulu, pamwensi wakutaŋga, pakasuŵa akakutatiko'mwensi uyo, amenda alipwile ukufuma pamenso acalo: popele Noa alifimbulwile pabwato, nekucencenta, popele lomba pamenso pamusili paliumine. 14Popele pamwensi waŵuiŵili, pakasuŵa akakuleŋga amakumi aŵili nensiku sisanu nasiŵili peulu, akamwensi uyo, icalo caliumine.
15Popele apo ŵaLesa ŵalilaŵile kuli Noa ati: 16Fuma-mo mubwato, weŵo, nemukasi woŵe, neŵana ŵoŵe aŵalalume, neŵakasi ŵaŵana ŵoŵe pamo naweŵo. 17Fumya pamo naweŵo ifintu fyonse ifyamweo ifili naweŵo, ifyaminefu yonse, nefyuni, nenama, nefiloŋgolo fyonse ifikalaŵa pacalo; ati fikafyaluluke ukwakuti pacalo, fifunuke, fifule pacalo. 18Popele Noa walifumine-mo, neŵana ŵakwe aŵalalume, nemukasi wakwe, neŵakasi ŵaŵana ŵakwe pamo nakwe; 19kaŵili inama syonse, nefintu fyonse ifikalaŵa pansi, nefyuni fyonse, fyonse'fyo ifienda pacalo, koti fikoto fyafifyo, fyalifumine mubwato.
20Popele Noa waliŵeŵacile ŵaYawe iconto; nekuŵula-po panama syonse isiliwa, napafyuni fyonse ifiliwa, nekupose'milambu iyakoca paconto. 21Popele apo ŵaYawe ŵaliumfwile ukunuŋka ukuweme; popele ŵaYawe ŵalilaŵile mumutima waŵo ati: Tesi ŋkafiŋge liŵili umusili pakuti paŵantu, pakuti ukulaŋguluka ukwamumitima yaŵantu kuliŵipile ukufuma nakubwanice bwaŵo; kaŵili tesi ŋkapame liŵili ifintu fyonse ifyamweo, koti nifyefyo ifi naci ta. 22Ili cikalukuciikele icalo capansi, impindi yambuto neyakuloŋgela, nempepo nekukaŵa, nelusuŵa nemwe la, nekasuŵa neŵusiku, teti fikasile.
Currently Selected:
Ifyakutaŋga 8: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.
