Yoane 16

1Ifintu ifyo namuŵuleni mwiŋgesakulitutula. 2Ŵakamuposyeni mumasunagoge; icine, impindi ikesa, lomba aŵantu ŵonse ukamwipayeni akalaŋguluka ati ndukuŵapyunjila ŵaLesa. 3Kaŵili ifyo ŵakamuciteni pakuti taŵaŵesi ŵaTata, neli kunjisiŵa neŵo. 4Sombi ifintu ifyo namuŵuleni ŵukumo, ati pakwisa impindi yafiko mukafilaŋguluke ati nalimuŵulileni akale. Kaŵili pakutaŋga nsinamuŵulileni ifyo, pakuti kancili nenu. 5Sombi ŵukumo ndukuya kuli ŵaŵo aŵantumine; naŋgawe'fyo pali mweŵo tapali-po uwakunjipusya ati: Mbamulukuya kulipi? 6Sombi pakuti namuŵuleni ifyo, insoni syaisula mumitima venu.

7Sombi ndukumuŵuleni ŵucine, ati ukumwelelweni mweŵo ati ŋkakumbuluke; pakuti kani nsikakumbuluka-ko, Umupalamisi teti akese kuli mweŵo; sombi kani ŋkaya neŵo, ŋkamutuma kuli mweŵo. 8Naye ili akesa akalukwisiŵisya aŵapacalo capansi iceŵo cafyakuŵifya, necafyakuluŋgama, necafyakusololola: 9iceŵo cafyakuŵifya, pakuti taŵalukucetekela muli neŵo; 10iceŵo cafyakuluŋgama, pakuti ndukuya kuli ŵaTata, namweŵo tamukalukumbona-po liŵili; 11iceŵo cafyakusololola, pakuti imfumu yapacalo capansi ŵasololola nayo.

12Nafimbi ifintu ifinji ncili nafyo ifyakumuŵuleni, sombi mweŵo tamwisi ukufipoka ŵukumo. 13Sombi ili ukesa uyoMupasi wa Ŵucine, ukamutanjilileni mweŵo muli ŵucine ŵonse; pakuti tokalaŵila akufuma kuwine weŋka: sombi ifyo fyopele ifi ukomfwa kuli ŵaTata, efyo ukalaŵila; kaŵili ukamufisulwileni ifyo-fintu ifikesa. 14Nawo ukandemya neŵo, pakuti ukaŵula-ko ifyanji nekumufisulwileni mweŵo. 15Ifintu fyonse ifi ŵali nafyo ŵaTata fyanji: pakuti pali fyefyo efi nalaŵila ati: Ukaŵula-ko ifyanji, nekumufisulwileni mweŵo.

16Yasyala-ko impindi inini, lomba tamukambona-po; kaŵili naimbi Impindi inini, lomba mukambona liŵili; pakuti ndukuya kuli ŵaTata. 17Pakuti pali fyefyo aŵasambile ŵaŵo ŵambi ŵalukwipusyansyanya ati: Mbefyo fyasyani ŵalukulaŵila kuli fweŵo ati: Yasyalako impindi inini, lomba tamukambonapo; kaŵili naimbi impindi inini, lomba mukambona liŵili? nakaŵili ati: Pakuti ndukuya kuli ŵaTata? 18Peŋka ŵo ati: Mbefyo fyasyani ŵalukulaŵila ati: Impindi inini? Tatufiisi ifyo ifi ŵalaŵila. 19Naŵo ŵaYesu ŵaliisiŵile ati, ŵalukufwayo'kunjipusya fimbi, eli ŵalaŵile kuli ŵo ati: Kani mulukwipusyansyanya ifyo ifi nalaŵila ati: Yasyala-ko impindi inini, lomba tamukambona-po; kaŵili naimbi impindi inini, lomba mukambona liŵili? 20Cine cine, ndukumuŵuleni ati mweŵo mukalile'misowa, mukaaŵaila; sombi aŵapacalo capansi wakasaŋgalala: mweŵo mukaŵa nensoni, sombi insoni syenu sikaaluka kusaŋgalala. 21Umwanakasi, pakupotwa, ali nensoni, pakuti impindi yakwe yafika; sombi pakufyala umwana, taalaŋguluka-po liŵili ukukululuka kwakwe, pakuti pakusaŋgalala ati umuntu afyalwa mucalo. 22Pakuti pali fyefyo namweŵo ŵukumo muli nensoni; sombi ŋkamuwoneni liŵili, eli ikasaŋgalala imitima yenu; nakoko-kusaŋgalala kwenu tapali muntu ukakufumya-mo muli mweŵo.

23Akasuŵa ako tamukanjipusya-po neli kantu. Cine cine, ndukumuŵuleni ati ifintu fyonse ici mukalomba kuli ŵaTata ŵakamupeleni mwisina lyanji. 24Akale tamwalukulomba neli kantu mwisina lyanji: ŵukumo kamulukulomba, eli mukapoka, ati ukusaŋgalala kwenu kukakumane.

25Ifintu ifyo namuŵuleni mufyakupalanya; sombi impindi ikesa insikalaŵila-po nenu liŵili mufyakupalanya, sombi ŋkamuwulisisyeni apaswetele ifyakuli ŵaTata. 26Akasuŵa ako mukalukulomba mwisina lyanji; kaŵili nsilukulaŵila kuli mweŵo ati ŋkamupapatilileni kuli ŵaTata; 27pakuti ŵaTata aŵene ŵalukumutemweni; pakuti mwalukuntemwa neŵo, nekucetekela ati nalifumine kuli ŵaTata. 28Nalifumine kuli ŵaTata, nekwisa mucalo capansi; kaŵili ndukufuma-po pacalo capansi, nekubwelela kuli ŵaTata. 29Kumfwa aŵasambile ŵakwe ati: Ŵoneni, ŵukumo mulukulaŵilila apaswetele; tamulukupalanya lukoso, neli panini. 30Pano tuliisi ati mweŵo mulifiisi ifintu fyonse; kaŵili ati tamulukufwaya ati ŵamwipusyeni neli ŵantu ŵonse; pakuti pali fyefyo tulukucetekela ati icine mwalifumine kuli ŵaLesa. 31Naŵo ŵaYesu nekuŵaasuka ati: Kani cine mulukucetekela ŵukumo? 32Umfweni, impindi ilukwisa, icine kale yaisa, iyi mwakupalaŋganisiwa mwense ukuya mwenu mwenu, nekunsya neŋka; sombi nsili-po neŋka, pakuti ŵaTata ŵali naneŵo. 33Ifintu ifyo namuŵuleni, ati mwakulukuli neŵutende muli neŵo. Mucalo capansi muli nefyakukululuka; sombi koseni mumitima; neŵo ndicikomekele icalo capansi.

Currently Selected:

Yoane 16: AAL59

Highlight

Copy