Luku 2

1Lomba pansiku isyo paliŵele ifunde ilyafumine kuli Kaisa Ogusito ati aŵantu ŵonse ŋgawalembwe. 2Ukulembwo'ko ekwakutaŋga, ili alukuŵekalika aŵaSilya Kulenyo. 3Peŋka aŵantu ŵonse ŵaliile mukulilemba, ŵonse mumisi mwaŵo mwaŵo. 4Na Iosefi naye alifumine kucalo caGalili ku musi waNasaleti, nekuya kucalo caludiya kumusi wakwe Dafidi, isina lyauo niBetelemi, pakuti ye ali wamucikoto namumukoka wakwe Dafidi; 5mukulilemba pamo naMaliya, uyu alukwambisya, ili ali nepafu. 6Lomba, ili ŵaikele kopele uko, nensiku syalikumene ati afyale. 7Peŋka alifyele umwana wakwe umwalalume umuŵele; nekumufimbilisya muŋguwo, nekumulalika mucililo caŋombe, pakuti tamwalipo umupunda muŋanda yakulala-mo aŵensu.

8Mucalo ico copele lomba mwali aŵembesi aŵalukwikala pacembelelo nekulukulaŋga-laŋga uŵusiku petaŋga lyaŵo lyambelele; 9neŋkalamba yaŵaSikulu yaliimakene pali ŵo, neŵuleme bwaŵaSikulu bwalituŵile ponse pali ŵo: naŵo ŵalitinine ukwakuti. 10Lomba iŋkalambe'yo yalilaŵile kuli ŵo ati: Mwitina; pakuti umfweni, ndukumuleteleni iceŵo iciweme icakusemba ukukulu, uko ukukaŵa kuŵantu ŵonse: 11pakuti lelo ŵafyalwa kuli mweŵo mumusi wakwe Dafidi aŵakupulusya, eŵaKlistu ŵaSikulu. 12Kaŵili akesiŵilo kuli mweŵo nikaka; mwakusaŋgo'lucece ulupambilwe muŋguwo, ululele mucililo caŋombe, 13Lomba kwalipulilile ukuŵoneka iŵumba ilikulu ilyaŵakwiulu pamo neŋkalambe'vo, ukulukuŵacindika ŵaLesa, ati:

14Uŵuleme bwikale naŵa Lesa kwiulu kwancimbwe,

Napansi pacalo uwutende bwikale newantunsi aŵo ŵalukutemwa.

15Peŋka'po, ili syafumine iŋkalambe' syo ukubwelela kwiulu, aŵembesi ŵalukulaŵilansyanya ati, Ŋgatuye ŵukumo kopele kuBetelemi, tukaciŵone icintu icicitilwe ici ŵatuŵula ŵaSikulu! 16Naŵo ŵalificile uluŵilo nekusaŋga nikuli Maliya na Iosefi nelucece lulilele mucililo caŋombe. 17Peŋka pakuciŵona, ŵalitulisye ifyamasiwi ayo alaŵilwe kuli ŵo ifyamwano'yo. 18Naŵo ŵonse aŵaumfwile'fyo, ŵalikaŋkamene pakuti pafintu ifyo ifi ŵalaŵile kuli ŵo aŵembesi. 19Sombi Maliya alukwalama amasiwi ayo onse, nekulukwaalakanya mumutima wakwe. 20Lomba aŵembesi ŵalibwelele, ili ŵaŵacindika nekuŵalemya ŵaLesa, pakuti pafintu ifyo fyonse ifi ŵaumfwile nekuwona, koti nifyo pele' fyo ifyalaŵilwe kuli ŵo.

21Lomba pakukumana insiku sisanu nasitatu isyelelwe ukumukopola, isina lyakwe lyaliilicilwe ati niYESU, lyopele'lyo ilyailicilwe kuŋkalamba, ili taaŋgemitwa munda.

22Peŋka'po, pakusila insiku syaŵo isyakuliswesya koti lifunde lyakwe Mose, ŵalimutwite kuJelusalemi mukumuposa kuli ŵaSikulu— 23koti nifyopele'fyo ifilembelwe mwifunde lyaŵaSikulu ati: Aŵalalume ŵonse aŵaŵele ŵakelikwa ŵaswetelele ŵaŵaSikulu— 24nekupelo' mulambu koti masiwi ayo alaŵilwe mwifunde lyaŵaSikulu ati: Ŵasikampele ŵaŵili neli twana twaŋkulimba tuŵili.

25Lomba ekwali kuJelusalemi umuntu umbi isina lyakwe niSimyoni; uyomuntu waliluŋgeme, utekenye, uwalukupembelela ukwisa kwakuwasaŋgalasya aŵaIsilaeli: neMupasi Uswetelele wali pali ye. 26Nakaŵili fyalibwenekele kuli ye kuMupasi Uswetelele ati tokaŵona-po imfwa ili tauŋgawawona ŵaKlistu ŵaŵaSikulu. 27Naye aliinjile neMupasi mwitempuli; lomba umwano'yo Yesu ŵalimwinjisye ŵawisi naŵanyina, mukumucitila koti kwisiŵila kwefunde; 28peŋka Simyoni alimupokelele mumaŵoko, nekulukuŵacindika ŵaLesa, nekulaŵila ati:

29Ŵukumo, mweŵaSikulu, ŋgamusumine ati nemuntu wenu inje neŵutende,

Koti masiwi enu;

30Pakuti amenso anji aŵona ukupulusya kwenu,

31Uko kopele uku mwaansicile pamenso aŵantu ŵonse;

32Ekutuŵa ukwakutuŵa paŵenafyalo,

Neŵuleme bwaŵantu ŵenu aŵaIsilaeli.

33Lomba ŵawisi naŵanyina ŵalukukaŋkamana pakuti pafintu ifyo ifyalaŵilwe pali ye; 34naye Simyoni aliŵacindicile nekulaŵila kuli Maliya ŵanyina Yesu ati: Umfwa, uyu alisalulwilwe mukuleŋgesya ukuwa nekwima kwaŵantu aŵenji aŵaIsilaeli; nakaŵili kesiŵilo akaleŋgululwa. 35Icine nempoko nayo ikakulasa namumutima woŵe wemwine; ati ifyakwalakanya mumitima iinji fikafisuluke.

36Kaŵili ekwali naumbi, Ana, umwanakasi uwalukusimika, umwana wakwe Fanweli, uwamukoka wakwe Asyali. (Wopele uyo walicekwile ukwakuti: aliikele nemulume wakwe imyaka isanu naiŵili ukufuma kuŵusice bwakwe; 37kaŵili aliikele ŵumukamfwilwe imyaka amakumi asanu naatatu nemyaka naimbi ine peulu); wopele taalukufuma-ko kwitempuli; alukupyunjila ŵaLesa, nekukano'kulya, nekulukupapata paŵusiku napakasuŵa. 38Peŋka pampindi iyo yopele walipalamine nekulukuŵatota ŵaLesa, nekulukulawila ifyaŵo kuli ŵaŵo ŵonse aŵalukupembelela ukuluŵulwa kwaJelusalemi.

39Peŋka'po, pakufikonsya ifintu fyonse koti mafunde aŵaSikulu, ŵalibwelele kuGalili, kumusi kwaŵo kuNasaleti. 40Nemwano'yo alikulile, nekuŵa nemakosa, nekwisula amano; kaŵili uluse lwaŵaLesa lwali pali ye.

41Lomba ŵawisi naŵanyina ŵalukuya imyaka yonse kuJelusalemi, pampindi yacitenje icaMuciluko. 42Peŋka ili yakumene imyaka yakwe Yesu ikumi naiŵili, ŵaliile-ko koti kwisiŵila kwacitenje. 43Lomba ili ŵakumanisye insiku isyo, pakulukubwela ŵo, Yesu umwanice alisyele muJelusalemi; sombi ŵawisi naŵanyina taŵafiisiŵile-po ifyo; 44ŵalukucetekela ati emwali mwiŵumba: lomba ŵaliendele akasuŵa kamo, popele nekulukumufwaya-fwaya pakati paŵakwaŵo neŵaŵyaŵo. 45Peŋka, pakuŵulo'kumuŵona, ŵalibwelele kuJelusalemi, ili ŵamufwaisya. 46Lomba, ili syapitile insiku sitatu, ŵalimubwene mwitempuli, aliikele pakati paŵasambisi, alukuŵomfwa, nekulukuŵepusye'fyakwipusya. 47Peŋka ŵonse aŵamumfwile walikaŋkamene pakuti pakalaŋgo kakwe nekwasuka kwakwe. 48Naŵo pakumusaŋga, ŵalikaŋkamene; naŵanyina nekumweŵa ati: Wemwana wanji, mbanindo watucitile'fi? Ŵona, ŵawiso naneŵo twalukukufwaya-fwaya nensoni! 49Naye aliŵaasucile ati: Mbanindo mwalukumfwaya-fwaila? Kansi tamwaisiŵile ati ukwelelwa neŵo ukulukuli muŋanda yaŵaTata? 50Sombi ŵo taŵaumfwilisye bwino amasiwi ayo alaŵile kuli ŵo. 51Peŋka alikumbulucile ukuya naŵo, nekufika kuNasaleti; nekulukukomekwa kuli ŵo: naŵanyina naŵo ŵalukufilama mumutima fyonse'fyo ifyalaŵilwe.

52Lomba ŵa Yesu ŵalikulile nemano nefumbi neŵutemwe bwaŵaLesa nebwaŵantu.

Currently Selected:

Luku 2: AAL59

Highlight

Copy