Luku 4

1Lomba ŵaYesu ŵaliiswile Umupasi Uswetelele, nekubwela ukufuma kuJodeni, nekutanjililwa kuMupasi mumpaŋga lukoso insiku amakumi ane, 2ili ŵalukwesiwa kumusensesi. Isyonsiku taŵalukulya-po neli panini; peŋka pakusile'syo ŵaliumfwile insala. 3Lomba umusensesi aliŵeŵele ati: Kani muli ŵana ŵaŵaLesa, laŵileni kwibwe ili ati lisaŋguke nisiŋkwa. 4Kumfwa ŵa Yesu kaŵamwasuka ati: Fililembelwe ati—Umuntu tekwikala-po nemweo kuli siŋkwa eŋka, sombi nikumasiwi onse aŵaLesa. 5Peŋka umusensesi aliŵaninicile peulu palupili ulukulu, nekuŵalanjisya uŵufumu ŵonse ubwapansi, pakapindi kanini lukoso; 6nave umusensesi nekulaŵila kuli ŵo ati: Uŵukulu uŵu ŵonse nakumupeleni mweŵo, newuleme bwaŵuko; pakuti uŵo bwalipelwe kuli neŵo; kaŵili ndaŵupela kuli woyo undukufwaya. 7Peŋka kani mukalukundambila, fyonse fikaŵa fyenu. 8Sombi ŵaYesu ŵalimwasucile ati: Koya kunuma yanji, weSatana, pakuti fililembelwe ati—Ulukucindika ŵaSikulu Lesa woŵe, nakaŵili ŵo ŵeŋka ulukuŵapyunjila.

9Peŋka'po aliŵatwite kuJelusalemi, nekuŵekalika pali sunsa uwakwitempuli, nekulaŵila kuli ŵo ati: Kani muli ŵana ŵaŵaLesa, musotokele-po pansi ukufuma kuno, 10pakuti fililembelwe ati—

Ŵakasifunda iŋkalamba syaŵo ifyakuli mweŵo ati silukumulameni bwino!

11Nakaŵili ati—

Sikamupinteni paminwe yasisyo,

Mwiŋgesa-kukoneka ulukasa kwibwe.

12Kumfwa ŵaYesu kaŵamwasuka ati: Fililaŵilwe ati—Tekwesya ŵaSikulu Lesa woŵe!

13Peŋka'po umusensesi, ili akonsesye ukwesya konse, alikumbulucile tanje ukufuma kuli ŵo.

14Lomba ŵaYesu ŵalibwelele nemakosa aMupasi kuGalili: nempupo syaŵo syaliumfwanicile monse mucalo icasiŋgulucile. 15Naŵo ŵalukusambisya mumasuŋgoge aŵo, nekulukucindikwa kuli ŵo ŵonse.

16Lomba ŵalificile kuNasaleti uko uku ŵakulile, nekwinjila mwisunagoge pakasuŵa kasabata, koti kwisiŵila kwaŵo, nekwiminina ukulukupenda. 17Peŋka ŵaliŵapele nebuku lyawakusimika Yisaya. Naŵo walifuŋgulwile ibuku, nekuŵona apalembelwe-po ati:

18Umupasi waŵaSikulu uli pali neŵo,

Pakuti ŵalinsufisye neŵo ati mbulisisye iceŵo iciweme kuŵapeŋgele:

Ŵalintumine mukukutulisya kuli ŵakaili ukuŵakakulula,

Nakumpofu nasyo ukuŵabwesesya ukulukulaŵa,

Nekuŵaluŵula aŵapuminwe,

19Nekutulisya umwaka usumininwe waŵaSikulu.

20Peŋka ŵalilifunjile ibuku nekulibwelesya kuŵakupembelela, popele nekwikala; lomba nemenso aŵantu ŵonse aŵamwisunagoge aliŵatontomekele. 21Naŵo ŵalitaticile ukulaŵila kuli ŵo ati: Lelo amalembo aya apelelwa pamo mumatwi enu. 22Lomba ŵonse ŵaliŵacitile naŵumboni, nekukaŋkamana pakuti pamasiwi aluse ayo afumine mukanwa kaŵo; nekulaŵila ati: Kansi uyu temwana wakwe Josefi? 23Naŵo nekulaŵila kuli ŵo ati: Cipale muŋgalawila kuli neŵo icisimi ici ati—Wemulaye ŋgoliwusye wemwine: ifyo fyonse ifi twaumfwile ifyacitilwe kuKapanaumi, uficite namucalo cakwenu muno! 24Naŵo ati: Icinenene ndukumuŵuleni ati aŵakusimika ŵonse neli umo taŵasumininwapo mucalo mwaŵo. 25Sombi icine ndukumuŵuleni ati emo ŵali muŵena-Isilaeli ŵamukakusyala aŵenji pansiku syakwe Elaija, ili lyaiselwe-po iulu imyaka itatu nemyensi isanu naumo peulu, nekwisa nensala yakawumbo ponse pacalo; 26sombi Elaija taatuminwe-po kuli ŵo ŵonse, sombi kweŋka kumusi waSalefati, mucalo caSidono, kumwanakasi umbi mukakusyala. 27Kaŵili emo ŵali muŵena-Isilaeli aŵamanata aŵenji pampindi yakwe Elisya uwakusimika, sombi aŵo ŵonse taŵaŵusiwe-po sombi eŋka Namani umuSilya. 28Peŋka ŵonse aŵamwisunagoge ŵaliŵele nekufitwa ukwakuti, pakumfwe'fyo-fintu; 29naŵo ŵaliimine, nekuŵasukatila kwi sonde lyamusi, nekuŵatwala kumpelo yalupili ulo ulwaiŵekwe-po umu si waŵo, ŵati ŵakaŵasindicile ukuŵalosyo'mutwi pansi. 30Sombi naŵo ŵalipitile pakati pali ŵo, nekukumbuluka.

31Peŋka'po aliile kuKapanaumi, umusi uwakuGalili. Peŋka ŵalukuŵasambisya pakasuŵa kasabata: 32neŵantu walikaŋkamene pakuti paŵusambisi bwaŵo; pakuti amasiwi aŵo ali neŵukulu. 33Lomba mwisunagoge emwali umuntu uwali nemupasi uwaciŵanda iciŵipile; naye aliŵilicisye nesiwi'likulu ati: 34A! Mbasyani ciŵele pali fweŵo namweŵo, mweŵaYesu ŵakuNasaleti? Kani mwaisa mukutonala? Neŵo ndimwisiŵileni, mweŵaswetelele ŵaŵaLesa! 35Sombi ŵaYesu ŵalimukenye ati: Celele! Fuma-mo muli ye! Peŋka iciŵanda, ili camuposele pansi pakati paŵantu, califumine-mo muli ye, apakuŵulo' kumusomesya neli panini. 36Peŋka ŵonse ŵaliŵele nekukaŋkamana, nekulukulaŵilansyanya ati: Mbesiwi ili lyasyani? Pakuti ŵalaifunde'mipasi iŵipile neŵukulu nemakosa, nayeyo nayo ilafuma-mo. 37Lomba syaliumfwanicile impupo syaŵo ponse pacalo icasiŋgulucile.

38Naŵo ŵaliimine mwisunagoge nekuya kwinjila muŋanda yakwe Simoni. Lomba ŵanyina-fyala Simoni ŵaliiketwe neŵulwele ubwampepo ukwakuti; naŵo ŵaliŵakombetele pakuti pali ŵo. 39Peŋka walitoŋgamisye-po pali ŵo, nekukanya uŵulwele; naŵo bwaliŵalekele; impindi iyo yopele ŵaliŵucile, nekulukuŵataŵataŵila.

40Peŋka ili kalukuwa akasuŵa, ŵonse aŵali neŵalwasi aŵalukutenda'malwele namalwele ŵaliŵaletele kuli ŵo, naŵo ŵalitintile-po iminwe yaŵo pali ŵo ŵonse, nekuŵaŵusya. 41Kaŵili nefiŵanda fyalifumine-mo muŵenji, nekulukuŵilicisya ati—Mweŵo muli ŵana ŵaŵaLesa! Sombi naŵo ŵalifikenye, taŵafisumine ukulaŵila; pakuti fyaliisiŵile ati ŵo niŵaKlistu.

42Lomba ulucelo, pakuca, ŵalifumine nekuya kumbi mumpaŋga lukoso: peŋka nemaŵumba aŵantu ŵaliŵafwaile, nekuŵatuluka, nekufwayo'kuŵekalika ati ŵeŋgesa-kufuma kuli ŵo. 43Sombi kaŵalaŵila kuli ŵo ati: Ukuŋgelelwa neŵo ukuŵulisisya iceŵo iciweme icaŴufumu bwaŵaLesa namumisi imbi nayo: nalituminwe pakuti pali fyefyo.

44Naŵo ŵalukuŵaŵulisisya mumasunagoge amucalo caGalili.

Currently Selected:

Luku 4: AAL59

Highlight

Copy