Mako 14

1Lomba, ili syapitile insiku siŵili, calificile icitenje icaMuciluko necafimpwampwa ifyakuwulo'musuŋga. Peŋka aŵapapatilisi aŵakulu neŵalembesi ŵalifwaile apakuŵekatila ukuwoŋgola; 2pakuti ŵalilaŵile ati: Tepampindi yacitenje ciiŋgesa-kuwuka icipupa icaŋkondo.

3Peŋka, ili ŵali kuBetania ŵa Yesu, muŋanda yakwe Simoni uwamanata, ili ŵasamine ukulukulya, aliisile umwanakasi uwaletele umusasi uwaalabasita uwali-mo amafuta anado amakweŵo akosele ukwakuti; naye alitoŵele umusasi nekwetulwila mumutwi waŵo. 4Sombi epo ŵali ŵambi aŵafitilwe peŵumba lyaŵo ukweŵa ati: Mbanindo aonawila amafuta aya? 5Pakuti aya-mafuta, ŋga aliulilwe, ŋga alipokele indalama imyanda itatu nasimbi peulu, nekuŵapela awapeŋgele! Peŋka ŵalimunyitile ifinwinwi umwanakasi uyo. 6Sombi ŵa Yesu ŵalilaŵile ati: Mulekeni! Mbanindo mulukumukatasisya? Ancitila neŵo ifiweme. 7Pakuti awapeŋgele muli naŵo insiku syonse, peŋka ili mulukufwaya, muliisi ukuŵacitile'fiweme, sombi neŵo nsikalukuli-po nenu insiku syonse. 8Ifyo ifi esi ukucita, efi acita; ansufisya limo umuŵili wanji pakuti pakuŵikwa kwanji. 9Icinenene ndukumuŵuleni ati: Apo ponse pacalo capansi apa cikatulika leeŵo leiweme, nafifi ifi acita uyu-mwanakasi fikalaŵilwa koti cakwanusya ifyakwe.

10Lomba Juda Isikaliote, uwapali ŵaŵo ikumi naŵaŵili, aliile kuŵapapatilisi aŵakulu, mukuŵaloŵela kuli ŵo. 11Naŵo, ili ŵaumfwile, walisaŋgalele, nekulayana ukumupela indalama. Popele naye alifwaile apakuŵaloŵela pampindi ielelwe.

12Peŋka pakasuŵa akakutaŋga akafimpwampwa ifyakuwulo'musuŋga, pakwipaya imbelele iyaMuciluko, aŵasambile ŵaŵo ŵalilaŵile kuli ŵo ati: Mbakwisa mulukufwaya ati tuye mukwansika ati mulye Umuciluko? 13Lomba ŵalitumine aŵasambile ŵaŵo ŵaŵili ati: Kamuyeni kumusi, kopele uko mwakukumana nakwe umwalalume upintile umutondo wamenda; mumulonde; 14peŋka apakwinjilila, ye, mulaŵile kumwine wananda ati: WaSikulu ati: Cili kulipi icipinda canji icaŵensu, umo umu nakulila umuciluko pamo neŵasambile ŵanji? 15Peŋka ye umwine akumulaŋgeni icipinda icikulu icapeulu icansicilwe limo; mopele umo emo mwakutwansicila. 16Lomba ŵalikumbulucile aŵasambile aŵo nekwinjila mumusi, nekusaŋga-mo koti nifyefyo ifi ŵaŵaŵulile; peŋka ŵaliansicile umuciluko.

17Lomba iciŋgulo ŵalificile pamo naŵaŵo ikumi naŵaŵili. 18Peŋka ili ŵasamine ukulukulya, ŵaYesu ŵalilaŵile ati: Icinenene ndukumuŵuleni ati: Apo apa muli mweŵo, umbi akundoŵela neŵo, eulukulya naneŵo. 19Naŵo ŵalitaticile ukuŵa nensoni, nekulukulipendulula kuli ŵo umo umo ati: Kani nineŵo? 20Naŵo kaŵalaŵila kuli ŵo ati: Niumbi uwapekumi naŵaŵili, wopele ulukutanta naneŵo pacikuŋku, 21Pakuti icine Umwana waMuntunsi alukuya koti nifyefyo ifyalembelwe ifyakuli ye; sombi akasyama uyo-muntu uwakumuloŵela Umwana waMuntunsi! Ŋga taafyelwe, ŋga alisyucile uyo-muntu!

22Lomba ili ŵalukulya, ŵa Yesu ŵaliŵulile siŋkwa; lomba ili ŵacindicile, ŵalimukumawile, nekuŵapela; nekulaŵila ati: Pokeni, uyu muŵili wanji. 23Naŵo ŵaliŵulile iŋkomeci, peŋka, ili ŵatotele, ŵaliŵapele; naŵo ŵonse ŵalinwine-mo. 24Peŋka ŵalilaŵile kuli ŵo ati: Iyi milopa yanji iyakulayana, ipokomokele pakuti paŵenji. 25Icinenene ndukulaŵila kuli mweŵo ati: Nsikanwa-po liŵili mufyafisepo ifyamufaina, ili takaŋgafika ako-kasuŵa ako ŋkalukunwa-mo ifyaŵukumo muŴufumu bwaŵaLesa.

26Peŋka ili ŵaimbile, ŵalifumine-mo, nekuya kulupili lwaMaolife.

27Lomba ŵaYesu ŵalilaŵile kuli ŵo ati: Mweŵo mwense mwakulitutula pakuti pali neŵo; pakuti fililembelwe ati: Ŋkamupama umwembesi, lomba nembelele sikapalaŋgana. 28Sombi ili ŋkawuka, eli ŋkamutantilileni kuGalili. 29Sombi Petilo alilaŵile kuli ŵo ati: Naŋgaŵa ati ŵonse ŵakulitutula, sombi neŵo neŵone. 30ŴaYesu naŵo nekumweŵa ati: Icinenene ndukukuŵula ati: Lelo lyopele, uŵusiku ŵuno, ili taaŋgalila liŵili kombolwe, wakuŋkana litatu. 31Sombi naye alikosesye ukwakuti amasiwi akwe ati: Naŋgawa ati nakufwa pamo namweŵo, tesi mukaneni-po neli panini! Fyopele'fyo naŵo ŵonse ŵalilaŵile.

32Lomba ŵalificile apo apailicilwe ati niGesemane: naŵo nekuŵeŵa'ŵasambile ŵaŵo ati: Ikaleni pano, ili ncitembela. 33Peŋka ŵaliŵatwite naPetilo naJakobo naYoane, nekutatika ukukaŋkamuka, nekulukuŵombomene. 34Naŵo ŵalilaŵile kuli ŵo ati: Umutima wanji uli nensoni isyakuti syapalufu: ikaleni pano, mulukupembelele. 35Naŵo nekuya-ko kuntanjile panini, nekuwila pansi, nekulukutembela ati: Kani impindi iyi iliisi ukufuma kuli neŵo, ŋgaipite. 36Kaŵili naŵo nekulaŵila ati: Aba, Tata, fyonse ifintu filiisiŵilwe ukucitwa kuli mweŵo; mufumye kuli neŵo iŋkomeci iyi! Sombi tekoti kufwaya kwanji, koku; sombi kuŵe koti kufwaya kwenu, 37Peŋka ŵaliisile, nekuwasaŋgana ŵalilele mutulo, nekulaŵila kuli Petilo ati: Simoni, uli mutulo weŵo? Tawisiŵile ukupembelela impindi imo? 38Mulukupembelela nekutembela, mwiŋgesakuponena mukwesiwa; umutima icine ulukusumina, sombi umunefu ulinacile. 39Nakaŵili ŵaliile, nekulukutembela, ili ŵalaŵila amasiwi antu amo. 40Naliŵili ŵaliisile nekuwasaŋgana ŵalilele mutulo, pakuti iŋkope syaŵo syalilemene ukwakuti; naŵo taŵaisiŵile-po ifyakuŵaasuka.

41Naŵo ŵaliisile litatu, nekulaŵila kuli ŵo ati: Kansi kamulukucilele pano nekulukutusya. Fyakumana! Impindi yafika! Ŵoneni, Umwana waMuntunsi aloŵelwa muminwe yambifi! 42Imeni, tulukuya! Ŵoneni, uyo uwandoŵela apalamina.

43Lomba impindi iyo yopele, ili ŵacilaŵila, aliisile Juda, umbi uwapekumi naŵaŵili, pamo neŵumba lyaŵantu, aŵali nempoko neŋkoli, aŵafumine kuŵapapatilisi aŵakulu neŵalembesi newakulu. 44Lomba uyo uwawalowele, kale aŵapele akesiŵilo ati: Uyo unakufyonta-po ewoyo; mumwikate, mumutwale bwino. 45Lomba, ili aficile, alipulilile ukuwasiŋkamana, nekulaŵila ati: MweŵaSambisi! Peŋka nekuŵafyonta-po. 46Lomba aŵantu ŵalikanticile pali ŵo iminwe nekuŵekata.

47Popele umbi uwaimakene apepi alisomwene impoko, nekumupama umuntu wamupapatilisi umukulu, nekumukwempula ukutwi. 48Peŋka ŵaYesu ŵaliŵaasucile ati: Kani mwafumina koti nikuli silumfundi nempoko neŋkoli mukunjikata? 49Nali nenu mwitempuli insiku syonse ukulukusambisya, sombi tamwanjikete-po, mweŵone; sombi ifyalembelwe ŋgaficitwe. 50Peŋka ŵonse aŵasambile ŵaliŵasile, nekuŵutuka.

51Naumbi umusaŋkwa aliŵalondele, uwalikumbanisisye iŋguwo inacile veŋka: naŵo ŵalimwikete: 52sombi alisile iŋguŵo yakwe, nekuŵutuka uwalondwa.

53Lomba ŵo ŵaliŵatwite ŵa Yesu kumupapatilisi umukulu; lomba nekuŵuŋgana aŵapapatilisi aŵakulu ŵonse pamo neŵakulu neŵalembesi. 54Sombi Petilo aliŵalondele patali patali, nekufika nekwinjila namwilaŵililo lyamupapatilisi umukulu, nekulukwikele pamo neŵapyunjisi, ukulukonto'mulilo. 55Lomba aŵapapatilisi aŵakulu pamo naŵo ŵonse aŵamucilye campemba ŵalukufwaya-fwaya ŵumboni ubwakuŵepaila-ko ŵaYesu, sombi taŵaŵubwenepo. 56Pakuti aŵenji ŵaliŵasimicile ifyakuŵepa, sombi ŵumboni bwaŵo tabwapelelwe pamo. 57Lomba ŵambi ŵaliimakene, nekuŵasimicila ifyakuŵepa ati: 58Twalimumfwile ye ukulaŵila ati: Ŋkalionala itempuli ili ilyaiŵekwe kuminwe, peŋka pansiku sitatu, ŋkaliiŵaka limbi ilitalili lyakuminwe. 59Sombi neli niŵumboni bwaŵo tabwapelelwe pamo. 60Peŋka umupapatilisi umukulu aliimakene pakati pali wo, nekuŵepusya ŵaYesu ati: Tolukwasuka-po neli kantu? Findo ifi-fintu ifi ŵalukukusinina aŵa-ŵantu? 61Sombi ŵaliikele celele ŵakuŵulo'kwasuka-po neli kantu. Nakaŵili umupapatilisi umukulu aliŵepwisye ati: Kani niweKlistu. Umwana waCileme? 62Naŵo ŵaYesu ati: Eneŵo; nakaŵili, mukaŵona Umwana waMuntunsi aliikele kulwine lwaŵukulu, nekulukwisa nemakumbi akwiulu. 63Lomba umupapatilisi umukulu alilikwamwinine ifyakufwala fyakwe, nekulaŵa ati: Mbanindo tulukufwaila nemboni simbi? 64Mwaumfwa umucobwe; syani mulukulaŋguluka? Naŵo ŵonse ŵaliŵasinine ati ŵo ŵelelwe ukufwa. 65Lomba ŵambi ŵalitaticile ukulukuŵasipila nemate, nekuŵafimba pamenso, nekulukuŵapama, nekulaŵila kuli ŵo ati: Kosimika! Neŵapyunjisi naŵo ŵaliŵapamine kumapi.

66Peŋka, ili aikele Petilo mwilaŵililo ilyamunsi, aliisile umbi umwanakasi, umupyunjisi wamupapatilisi umukulu. 67Peŋka, ili amubwene Petilo alukonta, alimutontomekele, nekulaŵila ati: Naweŵo nawe wali nawoyo uwakuNasaleti, Yesu. 68Sombi naye alikene ati: Nsifiisi-po neli kufiumfwa ifi ulukula ŵila! Peŋka alifumine ukuya munsense; lomba nakombolwe nekulila. 69Popele uyo-mwanakasi, ili amubwene, alitaticile ukulaŵila liŵili kuli ŵaŵo aŵaimakene apo, ati: Uyu ewapeŵumba lyaŵaŵo! 70Naye alikene liŵili. Peŋka ili yapitile impindi ice, aŵo aŵaimakene apo ŵalilaŵile liŵili kuli Petilo ati: Icinenene weŵo uli wapeŵumba lyaŵo; pakuti naweŵo uli muGalili. 71Sombi alitaticile ukulifiŋga nekulapa ati: Nsimwisi-po uyo-muntu uyu mulukulaŵila ifyakwe! 72Impindi iyo yopele nakombolwe nekulila liŵili; naye Petilo alilaŋgulucile isiwi ilyo ili ŵalaŵile ŵaYesu kuli ye ati: Ili taaŋgalila liŵili kombolwe, wakuŋkana litatu. Peŋka, ili alukwalakanye'fyo alililile neminsosi.

Currently Selected:

Mako 14: AAL59

Highlight

Copy