Mako 16

1Peŋka, ili kapitile akasuŵa kasabata, Maliya uwakuMagadala, naumbi Maliya ŵanyina Jakobo, naSalome naye ŵaliulile ifinuncile bwino, ati tuye, tukaŵasufye-po. 2Lomba ulucelocelo pakasuŵa akakutatiko'muluŋgu, ŵaliisile kucilende, ili kafumine akasuŵa. 3Lomba ŵalukulaŵilansyanya ati: Mbaninani uwakutwalamwina-ko icibwe kumulyaŋgo wacilende? 4Popele ŵaliceŵucile, nekuŵona ati kale caalamuka-ko; pakuti co cikulu makosa. 5Naŵo, ili ŵainjile mucilende, ŵalimubwene umusaŋkwa, aliikele kulwine, alifwite icakufwala icituŵile; lomba ŵo nekukaŋkamana. 6Sombi naye alilaŵile kuli ŵo ati: Mwikaŋkamana! Mulukufwaya ŵaYesu aŵakuNasaleti, aŵatalicilwe; ŵaŵusiwa! Taŵa-mo muno. Ŵoneni apo apa ŵaŵalalicile-po! 7Sombi kamuyeni, muŵaŵule aŵasambile ŵaŵo naPetilo ati: Ŵalukumutanjilileni kuGalili; kopele uko mukaŵaŵona koti nifyopele'fyo ifi ŵalaŵile kuli mweŵo. 8Naŵo ŵalifumine, nekuŵundumuko'luŵilo ukufuma kucilende; pakuti ŵaliŵele nekututuma nekukaŋkamana: naŵo taŵalaŵile-po kantu kuŵantu ŵonse neli umo; pakuti ŵali nemwenso.

9Lomba waYesu, ili ŵaŵucile lucelocelo pakasuŵa akakutatiko'muluŋgu, ŵalitanjile ukulibwenesya kuli Maliya uwakuMagadala, uyo ŵatamfisye-mo ifiŵanda fisanu nafiŵili. 10Uyo wopele aliile nekuŵaŵula aŵo aŵalukwikala naŵa Yesu, ili ŵali nensoni, nekulukulile' minsosi. 11Naŵo, pakumfwa ati ŵali nemweo, nakaŵili ati ŵaŵonwa kuli ye, ŵalikanicile.

12Peŋka'po pantanjile ŵalibwenekele nemekalilo ambi kuli ŵambi naŵo ŵaŵili, pakulukwenda ŵo ukulukuya kumitala. 13Ŵopele aŵo ŵalikumbulucile nekuŵaŵula aŵo aŵasyele-po: sombi taŵaŵacetekele-po neli niŵaŵo.

14Lomba pantanjile napo ŵalibwenekele nakuli ŵaŵo ikumi naumo, ili ŵasamine ukulukulya; naŵo nekuŵapatila pakuti pakukanika kwaŵo nekukosa ukwamumitima yaŵo, pakuti taŵaŵacetekele aŵo aŵaŵabwene ili ŵaŵucile. 15Peŋka ŵalilaŵile kuli ŵo ati: Kamuyeni mucalo conse icapansi, mukalukutulisya leeŵo leiweme kuwaleŋgelwe ŵonse. 16Uyo ukacetekela nekuŵatisiwa akapuluka; sombi uyo utakacetekela akasininwa. 17Peŋka utwisiŵilo utu tukalukuŵalonda aŵo aŵakacetekela: mwisina lyanji ŵakalukutamfya-mo ifiŵanda, nemilaka iyaŵukumo ŵakalukulaŵila, 18nensoka nekulukusiikata; nakaŵili kani ŵakanwe-po ubwaŋga taŵukaŵasomesya-po neli panini; kaŵili ŵakalukutintila-po iminwe paŵalwele, naŵo ŵakatenduluka.

19Lomba icine ŵaSikulu Yesu, ili ŵalaŵile kuli ŵo, ŵalipokelwe kwiulu, nekwikala kulwine lwaŵaLesa. 20Peŋka aŵasambile ŵalikumbulucile ili ŵatulisya ponse ponse, naŵaSikulu nekulukuŵofwa-ko, nekukosya lsiwi netwisiŵilo utwalukulonda. Ameni.

Currently Selected:

Mako 16: AAL59

Highlight

Copy