Aposel 18
18
Pol nanda' maol Godi wambel Korin
1Ea' Pol nakwaha Atens nafe' anona wambel Korin. 2Ea' nati anona aman Judainai agilinama Akwila. Mamasana solana nataga Pontus. Nimbewa' nakwaha etap hiagoma Itali nafi'i naloma waulu'mana Prisila. Dei' main, Klodius nape dembinai gavman Romunai na'ipa esis Juda mehipa sokwaha Rom sotanima sefe'. Ea' Pol nafe' na'i niti esis bias. 3Ea' nape nanda' maol naloma esis. Dei' main, anan nanda' maol anama atona naloma esis sofa' otamba maima sagundisa sel sanda'am sala' ifagwami. 4Nimeguf hiami esis Juda sapoma noma'wanai, Pol nafe' ipat esis Juda sa'i basef sapeinai ea' na'i nofela ukup asasimi ma sombale'efa Jisas, esis Juda saloma esis Grik wapoti'.
5Sailas naloma Timoti makwaha etap hiagoma Masedonia mafi'i Pol napoma, nogota anama Pol nakwaha maol anama nagundisa sel ea' la'ela'ef nawalapa basef bu'wami Godi nimeguf hiami. Nawalapa basef la'ifimi esis Juda na'ama na'i, “Jisas anan Krais, God nandandepana nasapa'ana nafi'i.”
6Ea' esis Juda sosambala basef ananimi sanda' anan findiwana. Ea' nanda'masa anona ikwaf nihi'ambasa waf aonai esis sanda'anai. Nandilama sopof usas mail luwaguf ananimi ma'oma esis na'ipasa basef la'ifimi na'i, “I'i ipe' hegililipa, ofagema ipe'imi atom. Ae' basef a'e ma amama. Dei' ae' efe'ma iwalipa amam nematawa isima owa' Judaisi.”
7Ea' Pol nakwaha ipat esis Juda sa'i basef sapeinai nawisi ande' nafe' anona ipat notawa felefele'ma ipat anama ea' nape la'ela'ef. Ipat anama anona amani, agel ananinai Titius Jastus. Aman anama nogawa God nanda' lotumanai. 8Anona aman agilinai numafi lotu esis Judai Krispus. Anan naloma esis wambota ananisi hiesi sombale'efa Dembinai. Ea' esis Korin hiesi same' basef Pol nawalipasami sombale'efa Jisas sofa' baptais.
9Anona owamb Pol nati anom amamaga si'i na'oh nandondo'oh, Dembinai na'ipana na'i, “Ina umbamahena nesopama malogel, owa'. Newalapa basef ni'iam. 10Dei' main, ae' ape alomena. Amam nematawa hiesi sape taun wambel anama esis ae'asi. Na'ama ina enin epen nehafel nehambombagena, owa'.”
11Ea' Pol nape wambel anama Korin nogota launai afagel si'inai tu'waninai ea' na'ipasa basef Godi nawalipasam.
12Anona nemaf anona aman agilinama Galio nataga nape gavman dembinai ma etap hiagoma esis Grik sapoma. Nogota anama esis Juda sa'i basef sandame'mam sombalo' Pol sofa'ana safe'ma kot sambaso'mana sa'i, 13“Aman anama nafela ukup esis amam nematawai ma sosambala basefa mi'uli God fowa' naso' Mosesanai ape'inai sanda' lotuma Goda anona waf.”
14Pol na'i nogwa basef, Galio na'ipa esis Juda na'i, “I'i aman anama nowala lo nonda' anona waf aonai ma pa'i penda'mana basef, ae' eme' basef ipe'imi. 15Ea' owa'. Ipe' pafi'i pahali'ima enda' kota basef maloma anom agofa mi'uli ipe'inai atona. Ea' hapaimi, ipe' etipa penandondombam. Ae' andaiwa'ma eme' kota amamaga na'amaimi, owa'.”
16Ea' anan natofa esis sakwaha kot safe'.
17Ea' esis sombalo' Sostenes agilinai numafi lotu esis Judai, sahana felefele'ma anama esis wambelisi sanda' kota. Ea' Galio ina okom napoma amamaga amama, owa'. Nape natolom etin.
Pol notanima nafe' Antiok etap hiagoma Siria
18Pol ata' nape nimeguf hiami wambel anama Korin naloma esis Kristen. Ea' nanda'masa nemaf bu'unai esis nakwahis nalata sip. Sip nakwaha wambel anama na'i nefe' etap hiagoma Siria. Akwila naloma Prisila safe' salomana. Nemaf anama Pol owa' ata' nolata sip, anan natopa' auf balaga wambel anama Senkria. Dei' main, anan na'i basef la'ifimi naloma Goda na'i nonda' anom amamaga. 19Esis safe' sataga Efesus, Pol nakwaha esis Prisila kwaloma Akwila wambel anama. Ea' anan atona nafe' nawis ipat esis Juda sa'i basef sapeinai naloma esis Juda sa'i basef nawalipasa basef Godi ma nefela ukup asasimi sombale'efa Jisas. 20Ea' sa'ipana sa'i, “Ine' nepe nogota laona nelomapa.”
Ea' na'i, “Ae' nambimb wila.”
21Ea' na'i nemaf bu'unai ma esis na'i, “I'i God ni'i aho'me, anona nemaf itanimai ifi'i itilipa.”
Ea' nakwaha Efesus nafe' sip.
22Sip nafe' nail Sisaria, Pol nisila' nafe' Jerusalem nanda'mas nemaf bu'unai naloma esis Kristen hiesi. Ea' nafe' Antiok.
Apolos nawalapa basef Godi Efesus
23Pol napani nogota launai kwaukwawie' Antiok ea' notanima nafe' wapoti' anona wambel hiagoma ganigani ma etap hiagoma Galesia naloma Frigia fowa' nali' nafe'ma. Ea' nanda' maol nanda' esis Kristen hiesi sataga la'ifis ma sombale'efa Krais.
24Anona Judainai aman Aleksandriainai nafi'i nape Efesus. Agel ananinai Apolos. Anan na'i basef bu'wami atom, nogawa buk Baibel andeande'. 25Fowa' enis sawalipana ma eaf Dembinai ea' dei' la'ifina endilisi ma na'ipas andeande' amamaga Jisas nanda'ami. Ea' anan nogawa basefa baptais Joni atom. 26Ea' nafe' ifagw esis Juda sa'i basef sapeimi nawalipasa basef. Anan ina umbamahana ma esis amam nematawa, owa'. Prisila kwaloma Akwila same' anan sao'wana safe' ipat asasinai sihi'ambana anom basef wapoti' ma eaf Godi ma nogawa basef ofagema.
27Ea' Apolos na'i nefe' esis Krik sapoma ea' esis Kristen sape Efesusi sanda' okom ananinai nataga la'ifina ma nanda'as na'ama. Esis sanda' anom basef mafe'ma esis Kristen Grikisi sa'ipasa sofa'ana. Apolos nafe' nataga Grik sapoma, nati enis amam nematawa sombale'efa Jisasi. Fowa' God nati uwahipis nagiambamas sembale'efana. Dei' Apolos nanda' maol nagiambama Kristen isima andeande' nanda'as sataga la'ifis ma sombale'efa Krais. 28Anan la'ifina endilisi ma nagwa basef esis Judai ma naep esis amam nematawai. Anan la'ifina nalomas nandahihianama natalogofas nikila'as. Ama nihi'ambamasa basef alihima buk Baibela Jisas Anan Krais God nasapa'ana nafi'i.
Currently Selected:
Aposel 18: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
