Aposel 17
17
Esis Tesalonaika sa'i soha Pol noloma Sailas
1Amam biam mafe' mataga anona wambel Amfipolis ea' makwahagon mafe' mataga Apolonia. Ea' makwaha wambel anama wapoti' ea' mafe' mataga Tesalonaika. Anona ipat lu'unai esis Juda sa'i basef sapeinai notawa wambel anama. 2Ea' Pol nanda'am na'ama etin si'i la'ela'ef nanda'am ea' nafe' nawis ipat anama nalomas. Amam biam mape wikifah wanom ama nimeguf amama wanom sapoma noma'wanai sabat, ea' Pol na'i basef Godi mail buk Baibelia nalomas. 3Anan nawalapa basef ofagema Godi na'ipasam na'i, “Krais God nasapa'ana nafi'i anan nofa' nimanimi lu'wami ma naga' notanima nohafel wapoti'.”
Ea' anan na'i, “Jisas anama dei' ae' awalapa basefanai, anan Krais.”
4Ea' enis amam nematawa Judaisi sombale'efa Krais ea' saila Pol naloma Sailas sawis wambota Godi. Enis Grik sanda' lotuma Godi hiesi saloma anowa nematawa dembiwai hiawai esis wapoti' sawis wambota Godi saila amam biam.
5Ea' esis Juda kowalas opalef aoma esis hiesi sombale'efa basef Pol naloma Sailas ma'ipasami. Na'ama esis sofa' anom amam awami manda' waf aonai. La'ela'ef amam mape anama esis sandakolas etifigin sapoma. Ea' sa'ipa amam nematawa hiesi sape wambel anama safela ukup asasimi ma sopa'. Ea' safitap endilisi sa'i basef lupa'aimi safe' sawisi uta sawis ipat Jesoni ma suwis sogolopa Pol naloma Sailas. Sa'i sofa'am muwisi ande'ma sose'am amam nematawa hiesi. 6Ea' esis ina sati amam biam, owa'. Ea' sahonde'ai Jeson ipat anama naloma anom Kristen mafe'ma amam agufumi wambel anama. Esis sa'ipa agufumi amama mehip sa'i, “Amam amama biam manda' waf aonai nataga etap hiagoma ea' dei' mafi'i mape na'ae. 7Ea' Jeson nao'wam mape ipat ananinai. Amam mosambala lo dembinai gavman Romunai, ma'i anona king dembinai nape agel ananinai Jisas.”
8Esis amam nematawa hiesi saloma agufumi wambelimi same' basef amama, sohafel gegelalasis kwapete'as sa'i mehip. 9Ea' dei' agufumi manda' Jeson naloma anom Kristen amama mali' matala kot motagaha amam mafe' wafifim.
Pol naloma Sailas mafe' mawalipasa basef Godi Beria
10Owamb nataga amam Kristen masapa' Pol naloma Sailas mafe' anona wambel Beria. Amam mafe' mataga Beria, mafe' mawis ipat lu'unai esis Juda sa'i basef sapeinai. 11Epes sape Beriai ukup mohafel endilisi same' basef sanda' waf bu'unai sikila' esis sape Tesalonaikai. Dei' main, esis Beria sofa' basef sandanifelamam endilisi. Ea' la'ela'ef satalifa basef mail buk Baibeli ma sogawa basef Pol na'ipasami endilisimi o owa'. 12Ea' dei' amam nematawa Juda hiesi sombale'efa Krais. Ea' anowa nematawa hiawai agof lu'wami waloma anom Grik hiami wapoti' sembale'efana.
13Ea' anona nemaf esis Juda sape Tesalonaikai same' basef ma'i Pol nawalapa basef Godi Beria. Ea' safe' safela ukup esis amam nematawa sape Beriai aom. 14Na'ama dei' atef amam Kristen masapa' Pol nakini' nafe' naoh akata. Ea' Sailas naloma Timoti atom mape Beria. 15Ea' amam mofa' Pol mafe' eaf maitumana mafe' mahaponana Atens. Amam motanima mafe' ea', Pol nasapa' basef mafe'ma Sailas naloma Timoti na'i, “Ipe' bipa pifi'mai ae' mehip.”
Pol na'i basef Godi Atens
16Pol nape nahafa amam biam Atens ea' nati wambel anama nati god baso'amunai hianai endilisi. Ea' okom nandaiwa' endilisi ma esis sanda' lotuma anama. 17Ea' nimeguf hiami anan nafe' ipat esis Juda sa'i basef sapeinai na'i basef hiami naloma esis Juda saloma enis isima sanda' lotuma Godi. Nalomas sa'i basef sandahihianamam nahagofa ukup asasimi. Ea' nimeguf hiami nafe' anama esis sandatama etifigin sapoma na'i basef hiami nalomas sa'i sandahihianamam saloma enis safi'i sapani.
18Anom amam tisa mogawa gawaimi anom Epikurian maloma anom Stoik ma'i basef mandahihianamam maloma Pol ma'i, “Aman anama okom nahaga nagaoli na'i basef mamumami, anan na'i ni'i main?”
Pol nawalapa basef bu'wami Jisasi na'ipasa Jisas nohafel hi'agif.
Ea' anom amam ma'i, “Anan na'i nowalapa basefa anom god dambami anona wambili?”
19Ea' amam magawa gawai mefa' Pol mafe' maloma anom gawaimi mandatama etifigin anona domota agel Areopagus. Amam ma'i, “Afa' wa'i ogawa basef amama dambaimi ine' nawalapama esis amam nematawai. 20Afa' wagahembe'ma basef ine'imi ma ogawam. Owa', anom basef. Ea' dei' afa' wa'i ogawa basef amama ofagema.”
21Esis Atens hiesi saloma epes anona wambelisi safi'i sape Atensi, ina safi'i sanda' anona maol, owa'. Esis sape nimeguf hiami sape sa'i basef atom dambaimi ma seme' anom basef dambaimi.
22Ea' Pol naitu la'afena amam gawaimi mandatama etifigin halaf Areopagusi na'ipasam na'i, “Ipe' epes Atensipei, ae' ati ipe' la'ifipa endilisi ma amamaga hiami panda' lotumami. 23Do'ok ae' afo'o ati amamaga amama ipe' panda' lotumami ea' ati anona otam ipe' panda' ofa panda' lotumanai wapoti', esis sanda' anom basef mail otam anama ma'i na'ama ma'i, ‘god anama ape' owa' mogawa agilinamae.’ Ipe' panda' lotuma anama ipe' owa' pegawa agilinama, dei' ae' awalapa basef alihim a'ipipana.
24God nanda' etap naloma ape' epes maloma amamaga mape etap anae', anan Dembinai ma ilif etapi. Anan ina nape nomona ifagw lotumi epes sanda'am lagufi, owa'. 25Anan atona nase'asa ambal namunai naloma hiami epes hiesi. Ea' Anan ina anom amamaga a'ana ma epes sigiambamana sose'ana anom amamaga, owa'. 26Aman atona anan God nanda' epes amam nematawa hiesi sataga etap anae'. Ea' nanda'as sape etap hiagoma. Anan atona nanda' nimeguf ma'uma'um mandahama esis sape eti. Ea' nandandepa etap nafe' neatambela naloma wambel asasima. 27God nanda'am na'ama ma esis sogolopa anona sombale'efana. I'i esis sogolopana sefe' sombale'efana o owa'? Anan ina nape laogona ape' hiapai atona etin, owa'. Nape felefele'ma ape' hiapai. 28Si'i anona aman ipe'inai na'i basef na'i, ‘Ape' mofa' ambal namunai ma anan ea' nase'apa pepel, dei' maitu mafe'.’ Si'i anom amam gawaimi ma'i na'ama ma'i, ‘Ape' wapoti' awasi ananipai.’ ”
29Ea' Pol na'ipam wapoti' na'i, “Ape' mape awasi Godi. Na'ama ape' ina ukup mi'i anan si'i ambal atona epes sanda' otamba gol siliwa sanda'anai, owa'. Anama ina ukup epesi atom ma'i sanda'ana gawa asasinai, owa'. 30Fowa' gani epes owa' seagawanai, God ina na'i basef mamumami ma amamaga hiami esis sanda'am nogota anama, owa'. Ea' dei' anan na'ipas na'i mehip epes hiesi ma wambel etap hiagoma na'i, ‘Ipe' pemboma opalef pila Ae'.’
31Anan nandandepa anona nemaf ea' ma nonda' basefa kot, nowaloga waf amam nematawa hiesi sanda'anai. Basefa kot ananinai mofe' bo'om andeande'. Anan nandandepa anona aman ea' ma nohapila kot anama. Aman anama naga' ea' God nafelona wapoti' hi'agif. Amama atom dei' epes hiesi sape etap hiagomai sogawa basef amama endilisimi atoma anan anona nemaf nonda'mas kot anama.”
32Esis same' basef amama ma epes sohafel wapoti' hi'agif ea' enis sa'i basef sanda' iafana. Ea' enis sa'i, “Wila, ape' ma'i nambimb mome' basef ine'imi wapoti' ma amamaga amama.”
33Ea' Pol nakwaha amam mogawa gawai mandatama etifigin mapeinai ea' nafe'. 34Ea' enis epes kwaie'wis sombale'efa Jisas saila Pol safe'. Epes isima Dionisius, anan nagawa gawai ma amam mandatama etifigin Areopagus naloma ano'w nemata'w agili'wa Damaris saloma enis epes wapoti'.
Currently Selected:
Aposel 17: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
