Aposel 22
22
1Na'iam na'ama na'i, “Ipe' sahin owan poloma ahape, ipe' peme'. Ae' a'i egwa basefa' ipe' dei' ma pegawa ae' ina anda' anona waf aonai, owa'.” 2Esis same' Pol na'i diga Hibrui ea' malogof mase'as sape, ina ata' sanda'am de'inda', owa'. 3Ea' Pol na'i, “Ae' Juda. Mama'we ae'akwi kolae wambel Tarsus etap hiagoma Silisia, na'ama ae' ataga dambewe wambel lu'unai anama. Ae' anda' skula dembinai tisa Gameliel ea' nawalipi andeande'ma mi'uli anama hianai amam bafapapa ape'imi. Na'ama ae' okom nohafel la'ifiwi ma aila God si'i ipe' dei' pailana. 4Fowa' ae' anda' maol ahambombaga epes saila eaf anama sombale'efa Dembinaianai. Na'ama aha esis amam nematawa wapoti', a'i ehas soga'. Ea' ewa'as sen efa'as afe' ipat sanda' kalabusanai. 5Pris dembinai naloma amam agufumi hiami esis Judai mogawa andeande'ma mowalapa basef amama endilisimi. Amam mase'e pas manda'asa amam sahin owan amamisi Juda sape Damaskus, ea' ae' afe' Damaskus a'i embalo' esis sape wambel anama ewa'as sen. Ae' a'i efa' esis saila eaf anama sefe' Jerusalem sofa' nimanimi ma amam plisman mohas.
Pol na'i basefa anan nataga Kristen
(Ap 9:3-19; 26:12-18)
6Ae' afe' ataga felefele'ma Damaskus, aon nahagasom 12 klok. Mehip anagon howalagon nisila'i ilif heven howalagona ae'. 7Ea' ewa etap ame' anona maf na'i na'ama na'i, ‘Sol, Sol, dei' maina ine' nahambombaga ae'?’
8Ea' ae' agwa basef a'i, ‘Dembinai, ine' emi?’
Ea' na'ipi na'i, ‘Ae' Jisas Nasaratiwei ine' nahambombage.’
9Amam malome maituwi mati howalogon ea' amam ina mame' malogola aman anama na'ipei, owa'.
10Ea' ae' a'i, ‘Dembinai, dei' ae' atuwasi enda' main?’
Ea' Dembinai na'ipi na'i, ‘Ine' hafel nefe' niwis Damaskus ama atuwasi anona aman nofo'o ni'ipina maol hianai Godi na'i ine' neanda'menanai.’
11Howalagon endilisi, na'ama ae' ina ati anom amamaga, owa'. Naep mase'e. Ea' amam amama maitu maloma ae' mahapila lagof ae'ami mofa'e afe' Damaskus.
12Anona aman nape Damaskus agilinama Ananaias. Aman anama naila mi'uli Godi andeande'. Amam nematawa Juda sape Damaskus sa'i anan aman bu'unai.
13Anan nafi'i naitu felefele' ma ae' na'ipi na'i, ‘Owalome Sol, dei' naep inewapoti'.’
Ea' nogota anama atona naep ae'ami mati wapoti'.
14Ea' na'i, ‘God bafapapa ape'imi anan nandandepena ma negawa okom Ananinai ma niti Aman bu'unai. Ama nenda' maol Godi ma neme' basef Ananimi mataga malogel Ananinai. 15Nambimb ine' newalapa basef Ananimi ni'ipa amam nematawa hiesi ma amamaga amama ine' name'am natolom. 16Dei' maina ine' ata' nape nehafana etin? Ine' hafel nefalona nosa'opena nokwahomena waf aonai ine' nanda'anai ma nefa' baptais!’
God nasapa' Pol nafe'ma epes hiesi ina sogawa Godi
17Anom nimeguf mafe'ma ea', ae' etanima afi'i Jerusalem, ea' awis anda' beten nomon ipat lu'unai Godi sanda' lotuwanai, si'i a'oh andando'oh. 18Ea' ati Dembinai na'ipi na'i, ‘Ine' mehip nekwaha Jerusalem nefe'. I'i ine' newalapa basef Ae'ami na'ae, ina nambimb seme'ena, owa'.’
19Ea' a'ipa Dembinai a'i, ‘Dembinai, na'ama owa'. Esis sogawa ae' fowa' afe' ifagw hiami esis Juda sa'i basef sapeimi embalo' esis amam nematawa hiesi sombale'efa ine' ahas. 20Fowa' esis saha Stiven naga', aman na'ipasa basefa ine' nogota anama aitu felefele' okom ae'anai bo'onama amama. Ae' aitu imafi siogw amamumi amam mahana.’
21Dembinai na'ipi na'i, ‘Ine' fo'o. Nambimb ae' esapa'ena nefe' eaf laogoma ma enis amam nematawa hiesi owa' Judaisi sogawa ae'i.’ ”
Anona soldia dembinai Romunai numafi Pol
22Esis Juda same' basef Poli mafe' matagama basef amama ma'i epes isima ina Judaisi. Ea' esis sa'i mehip sa'i, “Epes amama ina mope etap, owa'. Hana ma afuna!”
23Ea' esis sa'i mehip sowali siogw lagof asasimi sakwaha sopof nalata ilif. 24Ea' soldia anama dembinai na'ipa amam soldia mehipa mo'wana mofe' muwis ipat amam soldiai nomon. Ea' na'ipa amam soldia mohana ma nowalapa basef amama ofagema. Anan na'i nogawa andeande' dei' maina esis sofalana na'ama.
25Ea' amam mowa'ana ma mohana anona let ea' Pol nahali' anona kepten dembinai naitu felefele' na'ama na'i, “A'i lo na'i ipe' wila ma penda' basef na'ama ma aman anama Romunai? Ae' Romuwei. Ipe' ina dei' panda'me kot ea' ma dei' ipe' pahe. Waf anama andeande'?”
26Ea' kepten anama name' basef amama, nafe' na'ipa soldia anama dembinai na'i, “Ine' na'i nanda' main? Aman anama anan Romunai!”
27Ea' soldia anama dembinai nafi'mai Pol na'ipana na'i, “Ine' kipa ae'. Ine' aman Romunai?”
Pol nagwamana basef na'i, “A'e.”
28Ea' soldia anama dembinai na'i, “Ae' akwaha otamba hiami atala pepa ma ataga aman Romuwei.”
Ea' Pol na'i, “Ae' owa'. Mamase esis Romisi. Ea' ae' wapoti' Romuwei.”
29Ea' amam amama mahali'ana ma'i meahanai, owa'. Amam umbamaham mandafa'mana. Ea' soldia anama dembinai okokoma Pol anan Romunai ea' na'ipama mowa'ana sen. Ea' anan wapoti' umbamahana. 30Wafilu soldia anama na'i nogawa andeande' amam Juda ma'i basefa maina waf Pol nanda'anai. Ea' soldia anama natagahamana sen ea' nasapa' basef mafe'ma amam pris dambami maloma amam Juda dambami mumafi koti mifi'i mondowa'anima mope. Ea' anan nao'wa Pol nafi'i nahaponana naitu naep amamumi.
Currently Selected:
Aposel 22: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
