Aposel 23
23
Pol na'ipama basef amam Juda dembami mumafi koti
1Pol nati amam Juda dembami mumafi koti la'ifina ea' na'i, “Ipe' sahope, ae' afe' naep Godi ea' okom ae'anai bo'ona nafe'ma naep Godi, afi'i ataga dei'. Basef mape opaf ae'anai nomoni ma'iami ma'ipi basef mihi'ambe ma waf ae' anda'anai ina aona, owa'.”
2Anan na'iam na'ama, pris dembinai Ananaias nape nali'ma pris hiami na'ipa amam maitumana felefele' ma maha malogel ananinai.
3Ea' Pol na'ipana na'i, “Ine' aman aonai si'i anom endalelemb awami sanda' pen bu'unai afitinai sandisam ande' atogini. Atuwasi God nehena. Ine' nape na'ae naila mi'uli anama Godi ma nanda' kotima ae', ea' ine' etina nesambala mi'uli anama ma dei' na'ipam mahe!”
4Ea' amam maitu felefele' ma'ipana ma'i, “Ine' na'i basef findiwama aman pris dembinai Godi?”
5Ea' Pol nagwa basef na'i, “Ipe' sahope, ae' ina egawa a'i anan pris dembinai, owa'. Dei' main, basef mail buk Baibeli ma'i na'ama ma'i, ‘Ipe' ina pi'ipa agilinai numafi ipe'i pi'ipana basef awami, owa'.’ Amama ae' egawam.”
6Ea' Pol nogawa amam Juda dambami mumafi koti anom Sadyusi, anom Farisi. Na'ama anan na'ipam mehip na'ama na'i, “Ipe' sahope, ae' Farisiwei ea' ahalome ae'anai Farisinai. Ae' embale'ef a'i endilisi anona nemaf epes saga'i sohafel wapoti', dei' ape ehafa nemaf anama. Ofagema amama atom dei' esis sanda' kotima ae'.”
7Anan na'ipama basef amama, ea' amam atom mafitap la'afena amam Farisi maloma Sadyusi ea' mandawal biefim. 8Dei' main, amam Sadyusi membale'ef ma'i epes saga'i owagama ina sotanima sohafel wapoti', owa'. Amam ma'i ensel owa', ambagof owa'. Ea' amam Farisi membale'efa ambagof maloma ensel maloma epes saga'i sohafel wapoti' endilisi. 9Amama atom amam ma'i mehip. Ea' anom dambami mawalipasa mi'uli Godi amam Farisi mohafel maitu ma'iam mehip na'ama ma'i, “Afa' wati aman anama basef ofagema a'ana. I'i anona ambal bu'unai o anona ensel ni'ipana ma ni'ipasa basef amama, andeande'.”
10Ea' fitap nataga lu'una, soldia dembinai umbamahana ma Pol, na'i na'ama amam hiami mandawal biefimi mohonde'ana pele'atana biefina afuna. Ea' na'ipa amam soldia ananimi mikini' mombalo' Pol la'afena amam mofa'ana mofe' ipat amamunai.
11Wafilu owamb Dembinai nafi'i naitu felefele'ma Pol na'ipana na'i, “Ine' nitu la'ifina. Ina umbamehena, owa'. Fowa' nawalapa basef ae'ami Jerusalem, ea' nambimb ine' newalapam na'ama etin wambel lu'unai Rom wapoti'.”
Amam Juda ma'i basef mandame'mama moha Pol noga'
12Ea' wafilu kuhimbita amam Juda mandakolas ma'i basef mandame'mama mape atogon ma'i endilisi ilifa moha Pol afuna. Amam ma'i ina mea' gwa'aimi embel muli', na'ama ota' ma mohana afuna, ea' mea'am.
13Amam ma'i endilisi ilif mandame'ma basef amama, amam hiami mikila' 40-peleim. 14Amam mafe'ma amam pris dambami maloma agufumi Juda ma'ipam ma'i, “Afa' wa'i basef wandame'mama oha Pol afuna. Afa' wa'i endilisi ilif ina ata' wea' gwa'aimi embel, ota'ma oha Pol afuna. 15Na'ama dei' ipe' peloma amam Juda dambami mumafi koti pesapa' basef mefe'ma soldia dembinai Romunai ma nofa'i Pol nifi'mai ipe'. Ipe' pembaso'mana pi'i, ‘Afa' wa'i ata' ome' basef ofagema Poli andeande'.’ Ea' afa' wandandombam wape. Anan ina nifi'i notanimai ma ipe', ata' owa', afa' uli' ohana afuna.”
16Ea' taganamana Poli name' amam Juda ma'i mofe' mopoma Pol eaf ma mohana noga', nafe' ipat amam soldiai nawis na'ipa Pol. 17Ea' Pol nofala anona soldia dembinai na'i, “Akwolanago aman anama so'unai nefe'mago kepten dembinai ma amam soldia hiami. Anan anom basefa na'i ni'ipanam.”
18Ea' soldia anama nao'wana nafe'ma kepten dembinai na'ipana na'i, “Aman anama nanda' kalabusi Pol nofala ae' na'ipi ao'wai aman anama so'unai nafi'mai ine'. Anan anom basef ni'ipinam.”
19Ea' kepten anama nahapila lagel ananinai nao'wana nafe' wa'ol, amam atom mape nahali'ana na'i, “Ine' na'i ni'ipi maim basef?”
20Ea' so'unai na'ipana na'i, “Amam Juda ma'i basef mandame'mam ea' ma ma'i mohali'ina ma naman nefa' Pol nefe'ma amam Juda dambami mumafi koti. Amam mambaso'am ma'i ata' mohali' Pol atona ma basef ofagema ananimi. 21Ea' ina nila basef amamumi, owa'. Dei' main, anom amam amamumi hiami mikila' 40-peleim ma'i basef la'ifimi mandame'mam ma'i endilisi ilif ina mea' gwa'aimi embel, owa'. Ota' ma muli' moha Pol afuna. Amama atom dei' amam mape eaf mohafana. Amam mandondombam mape mohafa ine' ma ni'i aho'ma basef amamumi.”
22Ea' Kepten anama nasapa' anan so'unai nafe' na'ipana basef la'ifimi na'i, “Ina nefe' ni'ipa enin epen atitina basef amama, owa'.”
Kepten dembinai nasapa' Pol nafe'ma gavman dembinai Feliks
23Ea' kepten anama nofala anom soldia dambami biam na'ipam na'i, “Ipe' bipa pefa'ai soldia hiami 200-peleim moloma anom soldia 70-peleim matoma hos ea' 200-peleim mahapila wambawai. Ipe' pendondombama pefe' Sisaria atuwasi owamb 9 klok. 24Ea' pendondomba anom hosa Pol wapoti' notomam ea' pefa'ana andeande' pefe'ma gavman dembinai Feliks.”
25Kepten anama nanda' anom basef mafe'ma Feliks na'ama ma'i,
26“Ae' Klodius Lisias anda' basef amama mafe'mago ine' gavman dembinai nape nali'i Feliks. Nemaf bu'unai. 27Amam Juda ma'i mombalo' aman anama ma'i nohana noga'. Na'ama ae' ame'anama basef anan na'i anan aman Romunai. Ea' ae' aloma amam soldia wafe' watagama amam Juda wandalombamana lagof amamumi. 28Ae' a'i ata' egawa basef ofagema amam mambaso'amanami, na'ama ae' ao'wana akini' ma amam Juda dambami mumafi koti. 29Ea' ma'ipi anom basefa mi'uli amamunai mambaso'mana ma basef amama. Na'ama amam ina manda' kotimana ma anom amamaga ma ohana noga', o onda' kalabusimana, owa'. 30Na'ama dei' anom basef matagama ae' ma amam ma'i anom basef mandame'mama ma'i mohana noga'. Ea' dei' ae' mehip asapa'ana nafe'mago ine'. Ea' ae' a'ipa amam amama mambaso'manai ma mofo'o mowalapa basef alihima naep ine'imi ma ine' negawa amamaga amama amam ma'i monda' kotimanami.”
31Ea' amam soldia mame' basef mofa' Pol mafe' anona wambel Antipatris owamb. 32Lala soldia amama motanima mafe' ifagw amamumi Jerusalem. Ea' amam 70-peleim matoma hos atom mofa' Pol mafe' Sisaria. 33Mafe' mataga Sisaria, mase'ana pas basef amama gavman dembinai ea' mofa'ai Pol wapoti' nafi'i naitu naep ananimi. 34Ea' dembinai gavman anama nafi'i nati pas amama ea' nahali' Pol na'i, “Ine' etap lu'unai agel lu'unai eti?”
Ea' Pol na'ipana na'i, “Ae' Silisiaiwei.”
35Ea' anan na'ipa Pol na'i, “Nambimb amam amama mambaso'ma ine'i mufi'i motaga, ae' eme' basef ine'imi.”
Ea' na'ipa amam manda' kalabusima Pol ipat lu'unai gavman dembinai Heroti.
Currently Selected:
Aposel 23: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
