Aposel 4
4
Amam dambami Juda mumafi koti manda' Pita naloma Jon manda' kalabus
1Pita naloma Jon ata' ma'i maloma esis amam nematawa, amam pris maloma kepten dembinai ma amam soldia mumafi ipat lu'unai Godi maloma amam Sadyusi mafi'i. 2Amam mogawa amam biam mawalapa basef ma'ipasa Jisas notanima nohafel hi'agif wapoti'. Ea' ma'i epes hiesi sali' saga'i anona nemaf sohafel wapoti'. Amam dambami Juda ma'i basef amama amam biam ma'iami ina endilisi. Na'ama amam mandaiwa'mam endilisi ma ma'i basef amama. 3Ea' dei' amam mafi'i mombalo' amam biam wambomota aon nowala. Ea' manda'am manda' kalabus owamb anama mahafa wefilu kuhimbita. 4Esis amam nematawa hiesi same' basef amama Jisas nohafel hi'agif wapoti' sombale'efana. Amama atom dei' esis sombale'efanai sataga hias, amam atom mataga felefele'ma 5,000-peleim.
Amam Juda manda' kotima Pita naloma Jon ma naep dambami Juda
5Nemaf nagi'i amam dambami Judaimi maloma agufumi esis Judai maloma amam Juda mawalipasa mi'uli Godi, mandakolas etifigin Jerusalem. 6Dembinai pris Anas nape nali'ma pris hiami naloma Kaiafas maloma Jon Aleksander ea' anom amam wapoti' wambota Anasi mafi'i hi'alam mandakolas etifigin maloma amam dambami Juda. 7Ea' amam hiami manda' amam aposel biam maitu naep amamumi mahali'am mehip ma'i, “Ipe' pefa' maina pepel pa'i maina agel dei' panda' amamaga amama? Kiam!”
8Ea' Ambal Bu'unai Godi nape si'ina ma Pita nanda'ana la'ifina na'ipam na'i, “Ipe' Israel amam dembipei peloma ipe' agufipei, 9ipe' dei' pahali' afa' biafa ma wanda' waf bu'unai wagiambama aman anama bo'wagah awomunai. Ipe' pa'i pegawa anan nataga bo'ona na'imama. 10Ipe' hipei peme' basef ae'ami pegawa andeande'. Esis hiesi Israel wapoti' seme'ama sogawam andeande' ma pepel agel Jisas Krais Nasaretinai atona dei' aman anama ambo'ona endilisi nohafel naitu naep ipe'imi. Jisas ipe' paundana lawag usi'inai tu'wanainai pahana afuna, ea' dei' God nafelana nohafel hi'agif wapoti'.
11 # Sam 118:22; Mt 21:42 Basef amama mail Buk Baibeli ma aman anama ma'i,
‘Owap#Basef amama ma'i owap mandahama olalef mala' ifagwami. Basef amama womun etina owap ofagema ma'i Krais atona.
anama ipe' pala' ifagwi pandaiwa'mana pelefatana na'oh, dei' nandamboma nataga nape nali' nanda' ipat anama la'ifina.’
12 # Mt 1:21 Ina anona epen la'ifina nofa'apa motanimani, owa'. Ea' anan atona. Ama ganima etap hiagoma, fowa' gani dei' wapoti' God ina nawalapa agela anona aman ma nigiambamapa nefa'apa motanimani, owa'. Ea' Anan atona.”
13Amam agufumi mati Pita naloma Jon maitu la'ifim ma'i basef amama. Ea' agufumi mogawa amam biam ina manda' skul, owa'. Amam lelaimi atom. Ea' amam agufumi ukup mohafel kwapete'am ukup matamea ma amam. Ea' mogawa amam biam ma'i fowa' mape maloma Jisas.
14Ea' agufumi Judai amama mati aman anama nali' bo'wagah mondala'anai dei' nataga bo'ona naitu naloma Pita naloma Jon. Ea' amam ina ma'i anom basef magwamamam amam biam, owa'. 15Ea' ma'ipa amam biam ma mokwaha ipat anama mandakolasanai muwis ande'.
Amam biam mawis ande', amam atom ma'i basef mandame'mam ma'i, 16#Jo 11:47; Ap 4:18; Ap 5:28,40“Afa' nambimb ata' onda' amam amama biam wi'imama ma osopama malogof? Dei' main, amam manda' maol la'ifinai si'i God nanda'anai ea' epes hiesi sape Jerusalemi sogawam. Afa' ina la'ififa ma ombaso'mas wi'i, ‘Amam ina manda' maol anama’, owa'. 17Afa' wi'i basef la'ifimi ma amam biam ina ata' mi'ipasa basef wapoti' enis epesa agel anama, owa'. Na'ama basef amama mefe'agon hi'ilagona esis amam nematawa hiesi.”
18Ea' agufumi motanima mofala amam biam mawisi wapoti' ma'ipam basef la'ifimi ma'i, “Ipe' bipa ina ata' pi'ipasa basef amama ma agel Jisasi, ina ata' piwalipasa agel Jisasi ma enis amam nematawa, owa'.”
19 # Ap 5:29 Ea' Pita naloma Jon magwama basef ma'i, “I'i afa' okwaha basef Godi ma ugi'ma basef ipe'imi, na'amai andeande'ma naep Godi? Ipe' ata' ukup mondanda'ma amama pegawam pewalogam. 20Afa' biafa ina feso'mafa malogof, owa'. Afa' owalapa basef hiami ma amamaga watolom wame'am.”
21-22Ea' agufumi mowatania anom basef la'ifimi ma'ipam amam biam ma mosopama malogof, ea' makwahom mafe'. Esis hiesi safela agel God lu'una ma amamaga amama sati amam biam manda'ami. Na'ama agufumi amama Judai ina mati anom basef ofagema ma mose'ama nimanimi amam, owa'. Aman anama amam biam manda'ana nataga bo'ona, afagof ananimi mikila' 40-peleim.
Esis Kristen sanda' betena sofa' pepel Godi ma sowalapa basef Ananimi
23Agufumi Judai matagaha amam biam motanima mafe'ma esis sombale'efanai, ea' ma'ipasa basef hiami amam pris dambami maloma agufumi Judai ma'ipamami. 24Esis same'am ea', hiesi ukup etifim sanda' beten safela agel Godi na'ama sa'i, “Dembinai, ine' nahapila ilif etapi, ine' nanda' etap otaga naoh maloma amamaga amama hiami mape. 25Fowa' gani ine' nanda' akunamapa ape'inai Devit na'i basef. Anan nanda' maol ine'inai ea' Ambal Bu'unai Ine'inai nafelona nahali'as na'i,
‘Dei' maina esis owa' Judaisi ukup wandafum endilisi? Dei' maina esis epes hiesi ukup aom endilisi ma Dembinai? Owa'. Esis ina la'ifis, owa'.
26Amam king ganima etap hiagoma mandandombol maloma amam agufumi mandatama mape etifigin manda' wandafa motofa dembinai God noloma Krais Dembinai, God nondandepana nosapa'ana nifi'i. Owa', ina la'ifim.’
27Herot naloma Pontius Pailat maloma enis epes hiesi owa' Judaisi saloma esis Israel saila basef amama Deviti sanda' kolas wambel anama atona sasombala basef Jisasi, aman anama bu'unai nanda' maol ine'inai, fowa' gani nesahe'ana ea'. 28Esis sandakolas sape etifigina sonda' amamaga hiami si'i fowa' gani ine' la'ifina okom ine'inai na'i neataga dei'. 29Dembinai, ine' okom nepoma basef hiami wandafumi esis sa'iami ea' nigiambama afa' wanda' maol ine'inai. Nenda'am na'ama ma afa' otaga la'ififa endilisi owalapa basef ine'imi, ma afa' ina umbamahafa, owa' 30Ine' newamona lagof ine'imi nihi'amba esis ine' la'ifinai ma nigiambama esis awes nanda'asi sotaga bo'wes wapoti'. Ea' nenda' pepel ine'inai neloma ikwaf naninani la'ifinai ma agel Jisasi, Anan bu'unai nanda'mena maoli.”
31Esis sanda' betena ea', same' ipat anama sapeinai nandakoto'. Ea' Ambal Bu'unai Godi si'inama esis hiesi sataga la'ifis ea' sawalapa basef Godi. Esis ina umbamahasa amam agufumi Judai, owa'.
Kristen hiesi ukup etifim
32Epes hiesi sombale'efi ukup etifim. Ina enin epen atitin nati anom amamaga ananimi atom, owa'.
Amamaga hiami asasimi, amama esis hiesi. 33Amam aposel mawalapa basef ma'ipasama Jisas Dembinai ape'inai notanima nohafel, ea' basef amamumi la'ifim endilisi. Ea' God nagiambamas endilisi ma epes isima hiesi sombale'efana. 34Esis sandagigiambanama etin. Ea' ina enin epen atitin la'afena esis amamaga gwa'aimi maim a'an, owa'. Esis hiesi ofagesa etapi ifagwi, esis sase'asam enis epes satalom sase'asa otamba. Ea' sofa'ai otamba amama safi'i, 35sase' amam aposel. Ea' amam manda'am maso' isima gwa'aimi hiahaom a'asi. 36Ea' anona aman agel ananinai Josep amam aposel manda'mana anona agel Barnabas. Agel anama ofagena na'ama, “Epen nenda' ukup epesi la'ifim.” Anan anona Livai, aman anama ailan Saiprusinai. 37Anan nase'asa etap ananinai enis epes satalona sase'ana otamba nofa'am nafi'i naso' amam aposel.
Currently Selected:
Aposel 4: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
