Aposel 5
5
Ananaias naloma Safaira sambaso'ma amam aposel
1Anona aman agilinama Ananaias, anan nape naloma waulu'mana anani'wi Safaira. Anan nase'asa anona etap asasinai enis epes satalona. 2Ea' nofa' otamba tu'wanim atom nase'amama aposel, tu'wanim ma'oma esis. Anan nambaso'ma amam na'i otamba ea' ma'um nase'amama si'im. Waulu'mana wapoti' kogawa amama. 3Ea' Pita na'ipana na'i, “Ananaias, ine' na'i a'e ma Satan nafi'i nawis nape si'ina ma okom ine'inai ma dei' nambaso'ma Ambal Bu'unai Godi nambaho' otamba tu'wanim ma etap anama? 4Fowa' esis ata' owa' sotala etap, nogota anama ata' etap ine'inai atona. Ama dei' satalona ea', otamba ine'imi nimafiam. Dei' maina ine' okom na'i waf anama aonai? Ina nambaso'ma afa' atofa, owa'. Ine' nambaso'ma God.”
5Ananaias name' basef amama, nowa etap afuna. Ea' esis same' basef amama ma naga', umbamahas kwapete' endilisi. 6Ea' anom amam so'umi mafi'i mofa' alop ananinai mowa'ana lowaf mofa'ana mafe' mawana.
7Ama nogota bandana awa wenifin nafe', akwa'w waulu'mana kwafi'i kwawisi. Akwa'w ina kogawa amamaga matagama anan, owa'. 8Ea' Pita na'ipakw na'i, “Ipe' pefa' moni anama nandahama etap anama ea' ma'una?”
Ea' akwa'w kwambaso'mana kwa'i, “Ma'una anama atona.”
9Ea' Pita na'ipakw na'i, “Dei' maina ipe' bipa pa'i basef baso'maimi pandame'mam pambaso'ma Ambal Bu'unai Dembinai? Neme'! Amam amama mefa' waulunamena ine'inai mafe' mawana, amam mafi'i maitu uta. Atuwasi mofa' ine' wapoti' nigi'mana nefe'!”
10Ea' mehip akwa'w kowa etap felefele'ma bo'wagah Pitai afu'w. Ea' amam so'umi mawisi nomon mati akwa'w afu'w ea' mofa'akw mafe' mawa'w felefele'ma waulunama'w akwa'unai. 11Ea' esis Kristen hiesi saloma esis amam nematawa same' basefa amamaga amama, ea' umbamahas kwapete'!
Amam aposel manda' pepel naninani si'i God nanda'anai
12Amam aposel manda' pepel naninani hianai si'i God nanda'anai la'afena esis amam nematawa. Ea' epes isima hiesi sombale'efanai ukup etifim sandatama etifigin sape atogon ilaf ipat Solomoni felefele'ma ipat lu'unai Godi sanda' lotuwanai. 13Enis amam nematawa hiesi umbamahas, ea' ina safi'i sandatama etifigin salomas, owa'. Ea' isima sape ande'i safela agof esis Kristeni sa'i esis epes bu'wasi. 14Ea' enis amam nematawa hiesi sombale'efa dembinai, ea' safi'i timbi tambel sawisa epes hiesi Ananisi la'ela'ef sape.
15Esis saloma enis epes wapoti' sati pepel anama amam aposel manda'anai. Ea' sofa' awesisi safi'i sambe'as sa'oh ande' eaf, salas balatagw mamumami sofa'as safi'i. Esis ukup ma'i, i'i Pita ina nefe'ma esis, ea' hapaimi. Esis sa'i owaf nonda' ambal ananinai atona nefe' naolo'mas. 16Ea' esis amam nematawa hiesi wambel hiagoma sape felefele'ma Jerusalemi wapoti' safi'i sandatama etifigin salomas. Esis sofa'ai awesisi safi'i salomai epes isima ambagof awami mapaisi mahambombagasi. Ea' epes isima hiesi sataga bo'wes wapoti'.
Ensel natagaha amam aposel mape kalabusi
17Ea' pris dembinai nape nali'ma pris hiami naloma amam amama hiami alupumi ananimi amam Sadyusi, amam kowalam endilisi ma maol bu'unai amam aposel manda'anai. Dei' main amam mati esis hiesi saila basef amamumi. 18Amama atom dei' amam mohafel mombalo' amam aposel mase'am kalabus lu'wami. 19Ea' owamb anona ensel Dembinai nafi'i nawisi' uta lu'unai endalelemba kalabus ea' nafelai amam aposel mawisi ande' na'i, 20“Ipe' fo'o pitu ipat Godi lu'unai sanda' lotuwanai nomon pewalapa basefa amam nematawa hiesi ma waf hianai dambainai ma ambal namunai.”
21Ea' amam aposel mame' basef amama, kuhimbita mafe' ipat Godi lu'unai sanda' lotuwanai ma'ipa esis amam nematawa.
Pris anama dembinai naloma amam alupumi ananimi mafi'i mofalai agufumi hiami Israeli mafi'i mandakolas etifigin. Ea' masapa' basef mafe' ipat sanda' kalabusa, mofa'ai amam aposel mafi'i. 22Ea' amam plisman mafe' ipat sanda' kalabusa, ina mati amam aposel, owa'. Ea' motanima mafe' ma'ipa amam dambami ma'i, 23“Afa' wati uta ipat kalabusi sowalowana la'ifina, ea' amam plisman mumafianai maitu mumafi utagw hiami andeande'. Afa' wawisi' uta wawis nomon, ina wati enin epen, owa'.”
24Ea' kepten numafi ipat Godi naloma amam pris dambami mome' basef amama ea' nomonas matamea hiahias ma'i, “Maim amama atuwasi dei' motaga?”
25Amam mape nomonas matamea mafe', anona aman nafi'i nataga na'ipam na'i, “Peme', amam amama ipe' panda'am mape kalabusi dei' maitu nomon felefele'ma ipat lu'unai Godi ma'ipasa basef esis amam nematawa.”
26Ea' kepten naloma amam plisman mafe' mofa'ai amam aposel mafi'i. Ea' amam ina maham, owa'. Amam umbamaham ma'i, “Na'ama esis amam nematawa sokwaha otamba sohafa.”
Amam aposel Jisasi ina umbamahama mowalapa basefa amam dambami esis Judai, owa'
27Amam mofa'ai amam aposel maitu naep amam dambami esis Judai la'afen. Ea' pris anama dembinai nape nali'ma amam prisi na'ipam na'i, 28#Ap 4:18; Mt 27:25“Afa' wa'ipipa basef la'ifimi wa'i ipe' ina pewalapa basef pi'ipasam amam nematawa ma agel anama, owa'. Ea' ipe' panda' basef amama mape mafe'agon hi'alogon Jerusalem asi'igina basef ipe'imi. Ea' pa'i basef mailafa pa'i ofagema afa'imi, afa' waha aman anama naga'.”
29 # Ap 4:19 Ea' Pita naloma amam aposel magwa basef ma'ipam ma'i, “Afa' ina ugi'ma basef epesi, owa'. Afa' ugi'ma basef Godi atom. 30#Ap 3:15Ipe' paunda Jisas lawag usi'inai tu'wanainai ea' pahana naga'. Ea' God anama bafapapa ape' Juda manda' lotumanai nafelona nohafel wapoti' hi'agif. 31#Ap 2:33-34; Ef 1:20; Hi 2:10; 12:2Ea' God nofa'ana nalata ilif nahaponana nape lagel da'isinai ananinai. Ea' nape agilinai ma nigiambama ape' Israel hiapai. Anan na'i nofa'apa ma momboma opalef mila God nokwaha waf aonai ape' manda'anai. 32#Ap 1:8Dei' afa' waloma Ambal Bu'unai Godi wawalapa basefa amamaga amama hiemi afa' watolom ogawami. God nase'asa Ambal Bu'unai Ananinai ea' ma amam nematawa saila basef ananimi.”
Gameliel na'ipa amam dambami Juda ma monda' amam aposel sa'ombemam
33 # Ap 7:54 Amam mame' basef amama, ukup wandafum kwapete'am endilisi ma'i moha amam aposel moga'. 34#Ap 22:3Ea' anona dembinai naitu la'afena amam dambami esis Judai, anan Farisi agilinama Gameliel#Nogota anama Pol owa' ata' Kristen, aman anama nagawa gawai Gameliel nape dembinai tisa nawalipana basef Godi.
anan dembinai tisa mawalipasa mi'uli Godi, ea' esis amam nematawa sanifela agel ananinai. Na'ipa amama mokwaha amam aposel miowis ande' nogota bandana.
35Ea' na'ipa amam dambami Juda na'i, “Ipe' amam Israelipei, ipe' pindumafuma andeande'ma amam amama. Ipe' ata' ukup mi'i andeande' pili'. 36#Ap 21:38Ipe' pegawa nogota anama fowa', anona aman Teudas nohafel na'i, ‘Ae' aman dembiwei, agiliwei.’ Ea' amam hiami felefele' ma 400-peleim mafe' mailana. Ea' enis epes sahana naga' ea' amam mombale'efanai mafa' mafe' atona etin. Ea' maol amamunai nowala.
37Anom nimeguf mafe'ma ea', nogota anama gavman nofa'asa agof esis amam nematawa hiesi, anona aman Judas Galilinai nohafel nambomefa ukup enis epes hiesi. Ea' safe' sailana safela wandaf sapa' saloma gavman sa'i sogalo'mana. Ea' sahana naga' wapoti' ea' epes isima hiesi sombale'efanai safa' safe' atona etin hi'alas. 38Na'ama dei' ae' a'ipipa, ipe' umbamehepama amam amama pekwahom mopano. I'i amam monda' maola epes etis, nambimb maol anama aonai nowala si'i maol amam biam do'ok ali' a'ipipami. 39Ea' i'i God atona nonda' amam la'ifima basef amama, ipe' ina nambimb la'ifipama pesopama amam, owa'. Na'ama ipe' pepa' peloma God!”
Amam aposel mandanifela amam dambami Juda manda' ambagof amamumi aoma manda' maolan Jisasi
40Ea' amam dambami Juda maila basef Gamelieli ma'i, “Afa' oham etin.”
Ea' mofala amam aposel mafi'i, ma'ipa amam plismana moham. Ea' ma'ipam basef la'ifimi ma'i, “Ipe' ina ata' pi'i basef amama ma agel Jisasi wapoti', owa'.”
Ea' makwaha amam mafe'.
41Ea' amam aposel makwaha amam dambami Juda mumafi koti ea' mafe' mawis ande'. Manifela God na'i aho'ma mofa' nimanimi ma agel Jisasi. 42Amam ina makwaha maol anama mawalipasa basef bu'wami ma Jisas Anan Krais, God nandandepana nasapa'ana nafi'i, owa'. Nimeguf hiami amam mawalipa esis amam nematawa hiesi ipat lu'unai Godi, ifagw asasimi wapoti'.
Currently Selected:
Aposel 5: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
