Aposel 7
7
Stiven nawalapa basefa amam dambami Juda mumafi koti
1Ea' pris dembinai nape nali'ma pris hiami nahali' Stiven na'i, “Basef amama endilisi?”
2Ea' Stiven na'ipama basef na'i, “Ipe' sahin owan paloma ipe' ahape wapoti' ipe' peme' ae'. Fowa' gani bafalomafa afa'inai Abraham nape etap hiagoma Mesopotamia ina dei' nafe' wambel Haran, ata' owa'. Nogota anama God Dembinai nihi'ambana nafifili howalagon ea' natagamana. 3Ea' God na'ipana na'i,
‘Ine' nekwaha wambel etap ine'inai neloma sahin owan ine'isi nefe' anagon laogoma nepe anona etap hiagoma ae' a'i ihi'ambenagoma.’
4Ea' dei' Abraham nakwaha etap hiagoma Kaldia ea' nafe' nafe' nataga nape wambel Haran. Ahalomana ananinai naga' ea' God nasapa'ana nafi'i nape etap anae' dei' ape' mapeinai. 5God ina dei' nase'ana anona etap anama Abraham ma nefa'ana, ata' owa'. Anona etap kwaie'una wapoti', owa'. Ea' God na'i basef endilisimi atoma anona nemaf owagama anan ea' nose'ana etap anama anona nefa'ana noloma esis bafasana ananisi owagama sigi' seatagai sefa'ana ea' sepaina. Nogota anama Abraham so'uso'win ata' a'ana God na'ipana basef amama. 6Na'ipana na'i,
‘Wombota bafasena ine'isi owagama sigi seatagai sope anona etap enis epesi. Ea' epes hiesi isima enis owagama sonda' epes hiesi ine'isi aowes sonda' maol ahifinai agof a'as sope owina esis ea' sonda'as kwapete'as sope sefe' sotaga nogota launai afagof 400-peleim. 7Ea' anona nemaf ae' egwamasa waf aonai esis Isip sonda'as kwapete'asi.’ Ea' God na'i, ‘Anona nemaf owagama wapoti' epes isima hiesi ine'isi sokwaha etap anama hiagoma sifi'i sope sonda' lotuma ae' etap anae'.’
8Ea' God na'ipa Abraham basef la'ifimi endilisi ma Abraham notopa' alop ananinai. Ea' Abraham name' basef amama nailam natopa' alop ananinai ea' nola Aisak nogalomana ananinai ma nataga nimeguf 8-peleim, ea' Abraham natopa'mana alop ananinai. Anom nimeguf mafe'ma ea' Aisak nataga ahalomana Jekopi, ea' Jekop ahalomana bafapapa amama dambami 12-peleim. 9Amam bafapapa 11-peleim nomonas aom kowalama Josep. Na'ama masapa'ana mafe' mofa' otambana enis epes Isip sao'wana nafe' nanda' maol aonai agel a'ana nape owina esis. Ea' sofa'ana safe' hiagoma Isip. Ea' God nape nalomana. 10Anan nagiambamana nahagofam nimanimi hiami ananimi nape bo'ona. Nemaf anama anan na'i basef naloma king Isipinai Fero, God nase'ana gawa bu'unai na'i basef nalomana ma nanda' king Fero okom nainailana. Ea' dei' king anama nanda'ana nataga nape dembinai gavmana etap hiagoma Isip ea' numafi amamaga hiami ma ipat anan kingi wapoti'.
11Anom nimeguf mafe' ea', nolomahas lu'unai nataga etap hiagoma Isip anama hiagoma nafe'agon hi'alagon nafe' nataga etap hiagoma Kenan wapoti' ea' esis sefa' nimanimi lu'wami. Ea' esis bafasapa ape'isi sape Kenani ina ata' sofa' anom gwa'aimi, owa'. 12Ea' Jekop name' basef sa'i gwa'aimi ma'oh gani etap hiagoma Isip. Ea' nasapa' amam bafapapa ape'imi mali' mafe' dambadamba. 13Ea' magi' motanima mafe'ma bif ea' Josep na'ipa amam sahopam ananimi na'i, ‘Ae' Josep.’ Dei' king nogawa amam wambota Josepi mafi'i.
14Ea' Josep nasapa' basef mafe' nofalai ahalomana Jekop nakwaha etap anama lu'unai Kenan nagi'mana nafe' Isip naloma esis wambota ananinai hiesi sataga 75-peleis. 15Na'ama Jekop nakini' Isip naloma bafapapa ape'imi. Anom afagof mafe' ea', amam maga'. 16Amam maga' ea', sefa'am sotanima safe' wambel Sekem sawam hi'agif anama fowa' gani Abraham nakwana otamba natalogoma ma awasi Hemoi.
17Felefele'ma nemaf anama God na'i basef ananimi fowa' na'ipa Abraham ami mataga alihim, epes ape'isi Israel sataga amam nematawa hiesi endilisi sape etap anama hiagoma Isip. 18Ea' anona aman dambainai nataga dembinai king Isipunai, anan ina nogawa fowa' Josep nape dembinai ma Isip, owa'. 19King anama nambaso'mas nase'asa maol ahifinai ma epes hiesi ape'isi. Anan nanda' waf aonai ma esis bafasapa ape'isi, anan la'ifina endilisi na'i esis sokwaha awasi asasisi sope ande' ma afis. 20Nogota anama Moses mama'wana kolana. Anan so'uso'win bu'unai endilisi. Ea' mamasana sumafiana andeande' ipat asasinai ma aomb wanom. 21Ea' sofa'ana safe' sambaho'ana na'oh aolop ande'. Ea' king Fero nogamana anani'wi kwafi'i kwatolona kofa'ana nape si'i nogaloma'w akwa'unai endilisi. 22Ea' Moses nanda' skul nefa' gawa hianai esis Isipi ea' nataga aman dembinai nanda' maol naninani na'i basef la'ifimi ma seme'am sailam.
23Moses nape dambena ma afagof 40-peleim ea', okom na'i esis wambota ananinai Israel ea' nafe' natilis. 24Nati anona Isipinai naha anona Israelinai nanda'ana kwapete'ana endilisi. Ea' nagiambama Israelinai naha aman anama Isipinai afuna. 25Ea' anan okom na'i 'Epes ae'asi nambimb sogawa God nagiambama ape' ma lagof Mosesi ma nokwahepa mope andeande'.’ Owa'. Esis ina sagawa God nandandepa Mosesa nigiambamas, owa'.
26Wafilu Moses notanima nafe' natilis wapoti' ea' nati anom biam amam atom Israel mapa' wapoti'. Ea' nohape'am na'ipam na'i,
‘Ipe' etipa sahalomana owalomana penda'am na'ama owa'. Dei' maina ipe' pahambomaga ipe' etipa?’
27Ea' aman anama naha anona aman Isrelinai na'ipa Moses na'i,
‘Emi na'ipina ma nepe dembinai ma newaloga afa'? 28A'i ine' na'i nehe si'i nambati' naha aman anama Isipinai naga'?’
29Moses neme'ana na'ama, anan umbamahana nafa' nafe' anona etap hiagoma Midian laogoma. Nakwaha wambel ananinai nafe' nailas nape naloma esis Midian ea' nase' nemata'w nola awasi bias.
30Afagof 40-peleim mafe'ma ea', anona ensel Dembinai natagamana anona etap wafiguma fatauguma epes a'agoma felefele'ma halaf Sainai. Ensel nape nomona nif ilelowa fandom mataga anona lawag so'unai. 31Ea' Moses natolom okom ananinai natanea ma amama. Ea' nafe' felefele'ma natolom andeande', Dembinai na'ipana na'i,
32‘Ae' God amam bafapena ine'imi manda' lotumei. Ae' God Abraham naloma Aisak Jekop fowa' gani manda' lotumei.’
Ea' Moses gegelalasana umbamahana ma natologon.
33Ea' Dembinai na'ipana na'i,
‘Tagaha su mape bo'wagah ine'imi. Etap anae' ine' dei' naituma etap ae'anai. 34Ae' ati amam nematawa hiesi ae'asi sefa' nimanimi lu'wami etap anama hiagoma Isip. Ae' ame' lef asasinai ea' dei' bo'wes isila'i ma igiambamasa etofa nimanimi amama asasimi sope. Na'ama dei' ine' hafel. Ae' a'i esapa'ena netanima nefe' Isip.’
35Moses aman anama atona fowa' sosambalana sa'i,
‘Emi na'i ine' nepe dembinai ma newalogapa?’
Dei' aman anama atona God nasapa'ana nafe' si'i dembinai ma numafias nofa'as sotanimani. God nanda'ana la'ifina ma anama ensel natagamana nalomana na'i ma lawag anama so'unai. 36Moses nao'was safe' sakwaha Isip, nanda' pepel naninani ma ikwaf naninani si'i God nanda'anai ma etap hiagoma Isip ea' naoh embel akwahimi ea' anama etap wafiguma fatauguma epes a'agoma ma afagof amama 40-peleim. 37Moses aman anama ma'una anan na'ipa esis Israel na'i,
‘Anona nemaf God nosapa' anona sahalomepa ipe'inai nonda'ana nope profet si'i ae'.’
38Anom nimeguf mafe'ma ea', esis Israel safe' sandakolas etifigin anama wafiguma fatauguma Moses aman anama atona nape nalomas. Anan nape naloma bafapapa ape'imi wapoti'. Anan nape naloma ensel anama nase'ana basef Godi halaf anama Sainai ea' nofa' basef amama ambal namunai na'ipapa.
39Ea' bafasapa ape'isi sandaiwa'ma some' basef ananimi, owa'. Esis sosambalona ea' sa'i sotanima sefe' Isip ukup maimailagon. 40Ea' sa'ipa aman anama Aron sa'i,
‘Aman anama Moses nofa'apai Isip mafi'i, ina mogawana nafe' nape eti? Ea' ine' da'mapa anona god baso'amunai ape'inai ma anan nope numafiapa.’
41Nemaf anama esis sanda' anona bulmakau ea' sondolalima god anama baso'amunai. Ea' sandanifel ma god anama sanda'ana lagof asasimi atom. 42Ea' God nase'asa alafuga esis nakwaha esisa sonda' lotu sefela agofa aon owambunai alipunai maloma ondowa, si'i basef mape buk profeti ma'iam ma'i,
‘Ipe' epes Israel, ipe' paha bulmakau maloma sipsip pendolali ma ae' pape anama wafiguma fatauguma epes a'agoma afagof 40-peleim? Owa'! 43Ipe' pefa' ipat selinai panda' lotuma Molokanai, ea' pefa'ana naloma ikwaf si'i ondo'w god baso'amunai Refani, ambagof god baso'amunai hianai ipe' panda'ana panda' lotumana. Na'ama anona nemaf ae' egalo'mepa pefe' pepe laogoma peloma wambel Babilon gani wa'ol.’
44Fowa' gani bafasapa ape'isi sape anama wafiguma fatauguma epes a'agoma, nogota anama sowalo'a sel si'i ipat sanda' lotuwanai. Ipat anama nihi'ambapa anama God napainai. Ipat anama God na'ipasa basef ananimi. Esis sala' ipat anama selinai nandahama ikwaf anama God fowa' nihi'amba Mosesanai. God na'ipana ma nanda'ana na'ama etin. 45Ea' amam bafapapa ape'imi mafi'i maloma Josua ma mofa' etap lu'unai enis epesi. Ea' God nagalopa esisa naep esis bafasapa ape'isi. Nemaf anama sofa'ai ipat anama selinai, sanda'ana na'ae la'ela'ef nape nafi'i nafi'i nogota Devit nataga king. 46Devit nanda' waf bu'unai ma God nagiambamana nanda'ana la'ifina. Ea' nanda' betena Goda anan na'i howalagon anona ipat bu'unai ma God anama fowa' gani Jekop nanda' lotumanai. 47Ea' nogalomana Solomon nanda' ipat anama lu'unai Godi nala'ana. 48Owa'. Dembinai Edilisinai ina nape ifagw amama epes sala'am lagof asasimi, owa'. Basef amama mail Buk Baibeli si'i anona profet na'iam na'i,
49‘Dembinai na'i na'ama na'i, “Heven si'i balata Ae' apeinai, etap anae' Ae' ahapona bo'wagah matomama. Maina ipat nambimb pelana ma Ae'? Owa'. Ae' ina epoma noma'w ipat anama. Owa'. 50Lagof ae'ami atom anda' amamaga amama hiami hi'alam,” ’
51Ipe' epes pesambala basefi. Ipe' owa' pegawa basef Godi si'i enis epes owa' sogawa Godi. Ipe' pandaiwa' ma peme' basef Godi ma opalef aligah ipe'imi. La'ela'ef ipe' pesambala Ambal Bu'unai Godi. Ipe' panda'am na'ama etin si'i fowa' gani bafasepa ehasepa ipe'isi sanda'am. 52Amam profet hiami fowa' gani mapani esis akusepa ipe'isi sanda' waf aonai ma amam hiami saham sanda'am aom. Saha amam profet ma'ipasa Aman Bu'unai anona nemaf neafi'i. Ea' dei' ipe' pawalapana ma amam naumbih mahana naga' ea'. 53Fowa' gani God nase'epa mi'uli ananinai ipe'. Ea' amam ensel atom ma'ipipa mi'uli anama, ea' ipe' ina pame'ana pailana, owa'.”
Amam maha Stiven otamba afuna
54Amam mame' basef amama maha opalef amamumi endilisi. Amam mona' nalelef tilili telele' ukup wandafum endilisi ma Stiven. 55Ea' Ambal Bu'unai Godi napaina endilisi, naniga nati heven ilif. Nati nafifili Godi ea' nati Jisas naitu lagel da'isinai Godi. 56Ea' Stiven na'ipam na'i, “Peme'! Ae' ati heven nandawisi' ea' Dembinai nataga epen endilisinai naitu lagel da'isinai Godi.”
57Ea' amam ma'i basef la'ifimi mehip endilisi masopama aligah amamumi mandaiwa'ma mome' basef amama. Ea' mohafel masagih mafe' etin mombalo' Stiven. 58Ea' mogwasi'ana nawis ande'. Amam do'ok mali' mambaso'mana basefi mowalia siaogw amamumi mambe'am wa'ol felefele'ma anona aman so'unai naituma agilinama Sol. Mowaliam ma'oh mokwaha otamba mehip maha Stiven.
59Makwaha otamba mahana etin, nanda' beten na'ama na'i, “Dembinai Jisas, ine' fa'ago ambal ae'anai!” 60Ea' nindiwa nembawa notawa na'i mehip na'i, “Dembinai, ine' owa' negwamama waf anama aonai ma amam, owa'.” Stiven na'iam na'ama, ea' naga'.
Currently Selected:
Aposel 7: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
