Aposel 8
8
Sol naha esis Kristen
1Ea' Sol okom atotona naloma amam maha Stiven naga'i.
Nogota anama esis amam nematawa sandaiwa'ma esis Kristen sape Jerusalemi, sahas sase'asa nimanimi lu'wami. Ea' amama atom dei' esis sombale'efanai safa' safe' anama etap hiagoma Judia naloma Samaria. Ea' amam aposel atom ata' mapani la'ela'ef Jerusalem. 2Anom amam maila waf Godi andeande'i mofa' Stiven mawana malopana endilisi. 3Ea' Sol nafela maol nanda'ana naha esis Kristen. Anan nafe' nawis ifagw hiami atona etin nofa'ai amam nematawa hiesi sembale'efa Kraisi. Ea' nahonde'as nofa'as nafe' nanda'as sanda' kalabus.
Amam mawalapa basef bu'wami etap hiagoma Samaria
4Esis Kristen safa' safe' wambel hiagoma sawalapa basef bu'wami Godi sa'ipasam. 5Ea' Filip nowala nafe' anona wambel etap hiagoma Samaria nawalipasa basef bu'wami na'i Jisas anan Krais, God nandandepana nasapa'ana nafi'i. 6Amam nematawa hiesi same' basefa anan ea' sati ikwaf la'ifinai hianai naninani anan nanda'anai ea' seme'am andeande'ma basef ananimi. 7Ikwaf anama na'ama. Amam nematawa hiesi ambagof awami mapaisi, ambagof amama malef wigo' kwapete'am endilisi ea' makwaha esis mawisi mafa' mafe'. Ea' epes isima lagof bo'wagah awamisi, enis isima bihiguf mondala'asi, esis hiesi sataga bo'wes wapoti'. 8Ea' dei' esis wambel anama sofa' danifel lu'unai.
9Ea' anona aman nape wambel anama agilinama Saimon. Aman anama fowa' nanda' ambagofi nape la'ela'ef nafi'i nataga dei' nemaf anama. Ea' nanda' ukup esis amam nematawa Samariaisi ukup matamea mafe'. Anan Saimon na'iam na'i, “Ae' aman dembiwei.” 10Ea' esis amam nematawa hiesi agof a'asi saloma agufisi, esis hiesi seme'am andeande' basef Saimoni. Sa'iam sa'i, “Aman anama anan nofa' pepel anama dembinai Godi sofalana sa'i pepel lu'unai.”
11Ea' esis la'ifisa saila basef ananimi. Dei' main, nimeguf hiami anan nanda' waf naninani hianai la'ifinai nanda' ambagof nahapila mu'uhup. Ea' satolom ukup matamea mafe'.
12Ea' Filip nawalipasa basef bu'wami esis hiesi. Nawalipasa agel Jisas Kraisi ma siowis wambota Godi numafias. Ea' sombale'efa basef amama sofa' baptais. Esis amam nematawa wapoti'. 13Ea' aman anama Saimon wapoti' nembale'efa Jisas ea' nofa' baptais nape naloma Filip. Anan nati Filip nanda' ikwaf anama la'ifinai naninani ea' okom natanea nafe'.
14Amam aposel mape Jerusalemi mame' basefa esis Samaria sefa' basef Godi. Na'ama masapa' Pita naloma Jon mafe'ma esis. 15Amam biam mafi'i mataga manda' betena God nigiambamasa sofa' Ambal Bu'unai Ananinai. 16Dei' main, Ambal Godi ina dei' nape nalomas, ata' owa'. Esis sofa' baptais etina agel Dembinai Jisas. 17Ea' amam biam mawamona lagofa esis ea' sofa' Ambal Bu'unai Godi napais. 18Ea' Saimon nati aposel amama biam mawamona lagof atoma esis sofa' Ambal Godi. Na'ama anan nofa' moni ananinai nafi'mai amam na'ipam na'i, 19“Ipe' bipa pese'e pepel anama ma ae' wapoti' ma ae' i'i ewamona lagofa enin epen, nefa' Ambal Bu'unai Godi.”
20Ea' Pita nagwamana basef na'ipana na'i, “Ae' a'i otamba ine'imi moloma ine' pefe' wambel aonai hel. Amamaga bu'wami God nase'asam etin si'i presen, amama ine' okom na'i wilama netalom otamba ine'imi? Owa'. 21Ine' owa' bo'wena neanda' maol anama Godi afa' wanda'anai. Owa'! Dei' main, okom ine'inai ina bo'onama naep Godi, owa'. 22Ine' newa' alafugama waf anama aonai ine'inai nemboma opaf nefe'ma God. Ea' nenda' betena Dembinai ma nokwaha waf aonai nape okom ine'inai. 23Dei' main, ae' ati ine' kowalena endilisi ma presen bu'unai God nase'afa anai. Ea' ae' egawena, waf anama aonai nembale'ena la'ela'ef nape si'i kalabus.”
24Ea' Saimon nagwa basef na'i, “Ipe' bipa penda' betena Dembinai ma anan nigiambame. Na'ama amama ipe' pa'iami motagame.”
25Ea' Pita naloma Jon ma'ipasa basef ea' na'ipasam maloma amamaga amama Dembinai nagiambamam ea'. Ma'ipasam ea', motanima mafe' Jerusalem. Ata' nafe' eaf, mawalapa basef bu'wami Godi etap hiagoma esis Samaria.
Filip nawalapa basef bu'wami ma aman Itiopiainai
26Ea' anona ensel Dembinai na'ipa Filip na'i, “Ine' nefe' lambihilifinama kwa'waha Jerusalem nikini'i Gasa. Eaf anama fowa' esis safe'anai. Dei' owa'. Eaf anama nape anama wafiguma fatauguma epes a'agoma.”
27Ea' Filip nohafel nafe'. Ea' natagama anona aman Itiopiainai eaf anama. Anan aman dembinai numafi otamba hiami ma kwin akwama dembe'wi gavman kumafi esis etap hiagoma Itiopia, sofala'w sa'i Kandasi. Aman anama anom amam matopa'mona alop ananinai. Nimbewa' nafi'i Jerusalema nanda' lotu, 28dei' na'i notanima nefe'. Anan natoma karis ananinai si'i wilkar ea' natoma nati basef mape buk Baibeli fowa' gani profet Aisaia nanda'am ea' nafe'. 29Ea' Ambal Bu'unai Godi na'ipa Filip na'i, “Ine' fo'o felefele'ma aman anama nefe' neloma karis nanima.”
30Ea' Filip nasagih nafe' felefele'ma karis anama, ea' name' aman anama natalifa basef amama Aisaia nanda'ami.
Ea' Filip nahali'ana na'i, “Ine' negawa basef amama ofagema dei' natalifam nafi'i?”
31Ea' aman anama nagwamana basef na'i, “I'i enin epen owa' nihi'ambe, dei' egawa basef amama i'imama?”
Ea' na'ipa Filip na'i, “Ine' letowi netoma karis neloma ae'.”
32Basef amama tu'wanim Godi anan natalifimi ma'iama Jisas ma'i,
“Esis sao'wana nafe' si'i sipsip ama sa'i sohana noga'. Anan si'i sipsip noganai esis sahapilana satopa'mana awif ananimi, tol napan. Ea' na'ama etina aman anama, ina na'i anom basef, owa'. 33Esis sasambalona endilisi ea' ina sanda'mana basef andeande' ma kot ananinai, owa'. Anan awasi bafasana a'ana ma enis epes sitilis si'ipa enis epesa esis, owa'. Dei' main, sahana naga' ma ina ata' napan etap anae' wapoti', owa'.”
34Ea' aman anama Ithiopianai na'ipa Filip na'i, “Ae' a'i ihali'ina. Profet anama na'i emi ma dei' nanda' basef amama? Na'iama anan atona o na'iama anona epen?”
35Ea' Filip na'i basef nawalapama aman anama. Nahafel na'ipama basef amama tu'wanim Godi aman anama na'iami mafe' mafe' ea' nawalapai basef bu'wami Jisasi.
36Amam biam mafe', matagama anona dumb. Ea' aman anama na'ipa Filip na'i, “Niti dumb notah anama. Ine' na'i a'e ma ae' efa' baptais?”
37[Ea' Filip na'i, “I'i ine' nembale'efa Dembinai endilisi ma okom ine'inai, wila.”
Ea' nagwamana basef na'i, “Ae' embale'efa Jisas Krais anan nogalomana Godi.”]
38Na'iam ea', karis notawa ea' Filip naloma aman anama dembinai misila' mafe' mowala dumb anama. Ea' Filip napisi'ana. 39Ea' amam biam makwaha dumb mandegiai wata'ita, mehip Ambal Bu'unai Dembinai nofa' Filip ea' nafe'. Ea' aman anama Ithiopiainai ina ata' natolona wapoti', owa'. Ea' anan nandanifel endilisi naila eaf ananinai nafe'.
40Ea' Filip nafe' nataga Asdot. Anan nafe' taun anama hiagoma ganigani nawalapa basef bu'wami Godi. Nafe' nafe', notanima nafe' nataga taun Sisaria.
Currently Selected:
Aposel 8: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
