Luk 10
10
Jisas nasapa' alupumi ananimi 72-peleim mafe'
1Dembinai nandandepa anom alupumi ananimi 72-peleim nasapa'am mafe' biam atom mali'ana mafe'. Anan nasapa'am mafe' taun wambel hiagoma anan na'i neafe'agoma. 2Ea' na'ipam na'i, “Ipe' piti aof hianai gwa'aimi hiami maof ea'. Ea' epes sanda' maoli owa' hiase, kwawie'is. Ea' ipe' penda' beten pihali' Dembinai ofagonama aofi. Pihali'ana ma nosapa' epes hiesi sefe' sonda' maola sola gwa'aimi ananimi sembe'am etifigin. 3Ipe' fo'o. Peme', ae' esapa'epa pefe' si'i sipsip nogami la'afena nombagw wandafumi aolopumi. 4Ipe' ina pefa' paos manisi soloma brasbeli su, owa'. Ipe' ina penda'masa nemaf bu'unai enis amam nematawa eaf, owa'. Pefe' mehip. 5I'i ipe' pefe' piwis anona ipat, ata' pili' pi'i na'ama pi'i, afa' wa'i God nonda' opalef ipe' hipei pape ipat anae' mope awanem. 6I'i enin epen opaf awanena nepe ipat anama, ea' basef bu'wami ipe'imi mopoma epen inima. I'i owa', hapaimi, basef amama bu'wami motanimani mopomepa la'ela'ef. 7Ipe' peape ipat anama atona. Ina pepe pefe' ifagw mamumami, owa'. Pepe ipat anama atona pea' gwa'aimi embel esis sasi'ipami. Dei' main, epes sanda' maoli andeande'ma mofa' otamba ma maol amam manda'anai.
8I'i ipe' pefe' piwis anona taun ama esis sofa'epa pefe' ifagw asasimi, ipe' pefa' gwa'aimi esis sase' ipe'ami. 9Ea' penda' isima awes nanda'asi bo'wes wambel anama. Ea' pi'ipa esis pi'i, ‘Nemaf anama felefele'ma neataga ma ipe' piowis wambota Godi numafipa.’ 10Ea' ipe' i'i pefe' piwis anona taun ama esis owa' seafa'epa pefe' ifagw asasimi, ipe' pefe' pitu eaf taun anama pi'i, 11‘Etap ma taun anama ipe'inai maila bo'wagah afa'imi, ea' afa' upati'am motanima mefe'mago ipe'. Ama ipe' ukup mondanda' pegawa basef amama andeande'. Nemaf nataga felefele'ma epes siowis wambota Godi. Ea' ipe' pandaiwa'.’ 12Dei' ae' a'ipipa, nemaf anama lu'unai God nowaloga epesanai anan anona nemaf niti esis fowa' gani sape Sodomi uwahipis andeande'. Ea' epes isima wambel anama anan ina niti uwahipis, owa'. Nimanimi lu'wami endilisi anona nemaf motagamas.”
Wambel biefina uwahipis esis owa' somboma opalef sombale'efanae
(Mt 11:20-24)
13“Ae' ati ipe' Korasinipei paloma Betsaidaipei uwahipipa endilisi! Nimanimi lu'wami anona nemaf meatagamepa. Epes isima fowa' gani sanda' waf aonai sape wambel biefina Tair naloma Saidoni, esis ina sati ikwaf la'ifinai naninani si'i dei' anda'ana wambel ipe'inai, owa'. I'i esis siti pepel anama, esis sowaho'am begah pepe'atami si'i luwaguf tol sope nif agambeh. Ama sihi'amba enis epes esis samboma opalef endilisi safe'ma God. Owa'etin. 14Anona nemaf God nowaloga esis amam nematawa hiesi, niti esis fowa' gani sape Tair naloma Saidoni uwahipis andeande'. Ea' ipe' owa'. Anona nemaf pefa' nimanimi awami endilisi. 15Ea' ipe' Kaperneam, anona nemaf esis sefela agof ipe'imi molata ilif? Owa'etin. Anona nemaf God nokwahipa pefe' pewala wambel aonai hel.”
16“Emi egafis seme' malogof ipe'imi, esis same' malogel Ae'anai wapoti'. Ea' emi egafis sese'epa alafugah ipe', esis saso' alafugah ma Ae' ea' sase'ana alafugah Anan nasapa'e afi'i wapoti'.”
Alupumi Jisasi mafe' manda' maoli 72-peleim motanima mafi'i
17Ea' amam amama mafe' manda' maoli 72-peleim motanima mafi'i mandanifel endilisi ma'i, “Dembinai, afa' wahapila agel ine'inai, ambagof awami mame' basef afa'imi.”
18-19Ea' anan na'ipam na'i, “Ae' ati Satan nowai heven si'i otaga holala ma dililimbugwalag. Peme', ae' ase'epa pepel ipe' ma nambimb la'ifipa pefa'asa iguf awami wandafumi moloma awisiguf. Ama la'ifipa pili'amona epen aonai Satan naloma pepel hianai ananinai. Ea' ina nambimb anom amamaga mohambombagepa, owa'. 20Ea' ipe' ina pendanifel ma ambagof awami mame' basef ipe'imi, owa'. Ipe' pendanifel ma God nanda' agof ipe'imi mail buk ananinai gani heven ilif.”
Jisas nanifela Ahalomana God
(Mt 11:25-27; 13:16-17)
21Nogota anama atona Ambal Bu'unai Godi nawalapa danifela opaf Jisasi ea' Jisas na'i, “Ahalome, ine' Dembinai ma ilif etapi. Ae' afela agel ine'inai anifelina. Dei' main? Ine' nambaho' amamaga amama ma esis epes gawaisi sofa' gawa lu'unai, ea' nambomam nihi' ambasam epes isima gawa a'asi falafisi isima sape si'i awasi. Ahalome, okom ine'inai na'i, ea' amama atom.
22Ahalome ae'anai nanda' amamaga hiami hi'alam mape lagel ae'anai. Ina enin epen negawa ae' Nogalomana Godi, owa'etin. Anan atona nogawe. Ea' owa' enin epen negawa Ahalome, owa'. Ae' Nogalomana ananiwei atowe egawana. Ea' emi egafis ihi'ambasa Ahalomei, isima wapoti' esis etis sogawana.”
23Ea' anan nandamboma nati alupumi ananimi atom mape malomana na'ipam na'i, “Epes sati amamaga ipe' patulumi esis sandanifel. 24Dei' main? Fowa' gani amam king dambami hiami maloma amam profet hiami ma'i miti amamaga amama dei' ipe' patulumi. Owa'. Ukup amamumi maimailam endilisi ma mame' basef amama ipe' pame'ami, owa'. Amam ina mame'am.”
Aman Samariainai nati naumbihinai uwahipina
25Anona aman gawainai nawalipasa mi'uli Godi nohafel na'i nogwamba Jisas nememe'mana. Ea' na'ipana na'i, “Dembinai, ae' enda' maina nambimb efa' ambal namunai eape andeande' la'ela'ef?”
26Ea' Jisas na'ipana na'i, “Maim basef mapoma mi'uli Godi? Ine' natalifam na'imama?”
27Ea' anan nagwamana basef na'i, “Ukup ipe'imi mohafela Dembinai God ipe'inai mimilana na'ama. Ukup ipe'imi mimilana hi'ilam, pese'ana ambagof opalef moloma pepel ipe'inai pese'anam hi'ilama Dembinai God atona. Ea' ukup mimila enis epes sape felefele'ma ipe'i si'i ukup maimaila ipe' etipa.”
28Ea' Jisas na'ipana na'i, “Amama ine' nagwa basef andeande'. Ine' nenda'am na'ama ma nambimb neape ambal namunai la'ela'ef.”
29Aman anama na'i nondanda' agel ananinai atona nope bo'ona. Ea' na'ipa Jisas na'i, “Epes sape felefele'ma ae'i, esis emi egafis?”
30Ea' Jisas nagwamana anom basef na'i, “Anona aman nakwaha Jerusalem nafe' nakini' Jeriko. Ea' anom manda' wali matolona eaf, mahana kwapete'ana mola'ipana amamaga hiami luwaguf maim ananimi. Amam manda'am na'ama makwahona mafe'. Anan nataga si'i naga'i.” 31Nemaf anama anona aman pris naila eaf anama nafe'. Ea' nati aman anama, nisila'ana naila eaf wa'ol atogon nafe'. 32Ea' anona aman wambota Livai naila eaf anama nafi'i wapoti'. Nafi'i nati aman anama nisila'ana naila eaf wa'ol atogon nafe'. 33Ea' anona aman Samariainai#Esis Sameria naumbih esis Judai. Basef amama Jisas nihi'ambapa ma ape' ina ukup mila esis alupisi etis, owa'. Ukup mila naumbih wapoti'.
naila eaf anama nafi'i natagama aman anama. Anan natolona nati owahipina endilisi. 34Ea' nafe' felefele'ma anan nakolo'wa wel marasin naloma embel waina melegw ananimi, ea' nowa'manam. Ea' nafelana nawamonana natoma donki ananinai nofa'ana nafe' nahaponana nape ipat esis fi'ife' sapeinai ea' na'ipa aman numafi ipati ma numafiana andeande'. 35Ama wafilu anan nase'ana otamba siliwa biam aman numafi ipat anamai na'ipana na'i, ‘Ine' nimafi aman anama andeande'. Ama i'i enin moni ine'inai nese'anana, nambimb itanimai egwamenana.’ ”
36Jisas na'ipana basef amama ea' nahali'ana na'i, “Dei' ine' okom nape na'imama? Amam wanom maila eaf mafi'i, emi nanda'am si'i aman nape felefele'ma aman anama amam awami mahanai?”
37Ea' nagwamana na'ipana na'i, “Aman anama Samariainai nati anan uwahipina nagiambamana.”
Ea' Jisas na'ipana na'i, “Ine' fo'o nenda'am na'ama etin.”
Marta kwaloma Maria
38Jisas naloma alupumi ananimi mafe' eaf, ea' nataga anona wambel nafe' nawis. Ano'w nemata'w agili'wa Marta kofa'ana kwafe' ipat akwa'unai. 39#Jo 11:1; 12:2,3Owama'w akwa'ukwi agili'wa Maria. Maria kwafi'i kwape felefele'ma bo'wagah Dembinai, kwame' basef ananimi. 40Ea' Marta kwanda' maol hianai ma kwandondomba gwa'aimi. Okom natanea ma amamaga mamumami. Ea' kwafe'ma Jisas kwa'ipana kwa'i, “Dembinai, ine' niti uwahipiwi. Owame ae'akwi kwa'waha ae' atowe anda' maola andondomba gwa'aimi. Ine' kipa'w kufi'i kwigiambame.”
41Ea' Dembinai nagwama'wa basef na'i, “Marta, Marta, okom ine'inai napoma amamaga mamumami ma opaf ine'inai nafe' aona ma amamaga hiami. 42Ea' waf bu'unai atotona ine' a'ena. Maria kwa'i kofa' amamaga amama bu'wami mikila' anom. Ina enin epen la'ifinama nili'amona amamaga amama bu'wami ma akwa'w, owa'.”
Currently Selected:
Luk 10: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
