Luk 11

Jisas nawalipapa ma waf meanda' betenanai

(Mt 6:9-15; 7:7-11)

1Anona nemaf Jisas nanda' beten nape anagon. Nanda' betena hi'alan, anona alupunai ananinai na'ipana na'i, “Dembinai, ine' nihi'ambafa onda' beten si'i fowa' Jon nihi'amba alupumi ananimi.”

2Ea' na'ipam na'i, “Nemaf anama ipe' pi'i penda' beten, ipe' pi'iam na'ama pi'i,

‘Ahalomapa, ape' ma'i agel ine'inai nope bo'ona ma hiesi sefela agel ine'inai lu'una. Ape' ma'i nemaf anama bu'unai nifi'i ma epes hiesi siowis wambota ine'inai numafias.

3Dei' ine' nese'apa gwa'aimi mondahama nemaf anae'.

4Ine' nekwahomapa waf aonai ape' manda'anai. Dei' main? Ape' wapoti' makwahomasa waf aonai enis sanda'mapanai. Ine' owa' nili'apa mefe'ma amamaga ahifimi meagwamba ape'i.’ ”

5Ea' na'ipam anom basef womun etin na'i, “I'i anona aman alupunai ipe'inai nefe' nie'ipa alupunai ananinai owamb amaneta ni'i, ‘Alupinai, ine' se'e bret wanifina 6ma imafi alupunai ae'anai nafi'i natagama ae', ea' ae' gwa'aimi a'e ma imafiana.’

7Ea', aman anama napani ipat nomon nagwa basef na'ipana na'i, 'Ae' andaiwa'ma nese'e noma'w ae', owa'. Ae' awasi sa'oh ea' ao'was ma'oh lehis. Ae' ina la'ifiwi ma esafel ease'ena gwa'aimi, owa'.’ 8Ae' a'ipipa, aman ahalomai ipat ina okom napomana na'i aman anama alupunai ananinai ma nohafel nease'ana gwa'aimi, owa'. Anan okom aona ma name' aman anama falafala la'ela'ef napomana. Amama atom dei' nohafel nase'ana amamaga hiami anan nahali'anami.

9Dei' ae' a'ipipa, ipe' pihali' God, nese'epa amamaga. Amama ipe' peagolopami, nambimb pitolom. Ipe' peha uta, nambimb God nusi'amepana. 10Dei' main, emi egafis sohali' Godi, sofa' amamaga. Emi egafis sogolopa amamaga, nambimb sotolom. Ea' emi egafis seha utai, nambimb God nuwisi'amasana esis.

11I'i enin so'uso'win nehali' ahalomana ma anona aol, anan ina nambimb nose'an anona yul aonai, owa'. 12I'i so'uso'win nihali' ahalomana ma anona kofemb, nambimb nose'ana anona aunil aonai? Amama wapoti', owa'. 13Ea' ipe' amam nematawa aopei pase'asa amamaga bu'wami atoma awasi ipe'isi, ahalomepa ipe'inai nape heven ilifi anan wapoti' nambimb nose'asa Ambal Bu'unai Ananinai esis sahali'anai.”

Esis sa'i Jisas nanda' maol naloma ambagof hiami awami dembinai amamunai agilinama Belsebul

(Mt 12:22-30; Mk 3:20-27)

14Ea' Jisas nogalo'mana ambal aonai nape nasopama malogel anona amani. Nafa' nafe', ea' aman anama ambo'ona noga na'i. Ea' esis amam nematawa hiesi ukup matamea ma aman anama nataga bo'ona. 15Ea' enis epes sa'i, “Anan natofa ambagof awami ma pepel anan dembinai ma ambagof awami agilinama Belsebul.”

16Ea' enis epes sa'i sogwambana sofalana sa'i anan ata' nonda' anona ikwaf la'ifinai nafi'i heveni ma sotolona sogawa endilisi God nagiambamana. 17Ea' anan nogawa ukup asasimi na'ipas na'i, “I'i enis epes hiesi sape etap hiagoma sondawaloga biefis sopa', ina nambimb la'ifis, owa'. I'i enis epes wambota atona sondawaloga biefis sopa, esis ina nambimb la'ifis sopa', owa'. 18I'i wambota Satani sondawal biefis sopa', nambimb wambota anama la'ifis sopa' si'imama? Owa'etin. Ipe' pa'i ae' atofa ambagof awami ma pepel ambal aonai Belsebul. Na'ama ae' dei' a'ipipa basef amama. 19I'i endilisi ae' atofa ambagof awami ma pepel Belsebuli, dei' emi nigiambama epes ipe'isi satofam? Owa'. Dei' epes isima sihi'ambepa basef amama ipe'imi owa' endilisimi. 20Pepel Godi atona nagiambama ae' atofa ambagof awami. Na'ama dei' ipe' pegawa nemaf anama epes siowis wambota Godi numafias nataga ma ipe' ea'.”

21“I'i anona aman la'ifinai nohapila wambawa maim nopoma ipat ananinai andeande', amamaga ananimi hiami mopen andeande'. 22Ea' i'i anona aman la'ifinai endilisi nikila' aman anama ma anan notaga la'ifina nifi'i nonda' wandaf nolomana nikila'ana wambawa maim aman anama nawamona okomami, nofa' amamaga ananimi nowalogam mefe'ma anom amam.

23Emi egafis owa' alupisi ae'asi owa' sepe la'ela'ef neloma ae'i, esis naumbih ae'asi. Ea' emi egafis owa' sekolasa sipsip moloma ae'asi, esis satofa sipsip mafa' mefe' atona etin.

Ambal aonai anotanima nafi'i nawis epen inima

(Mt 12:43-45)

24Nemaf anama anona ambal aonai nakwaha enin epen nawisi nafi'i, anan nafe' anama fatauguma nogolopa anagon na'i neapoma noma'w. Nagolopagon owa' niti anagone ea' ni'i, ‘Ae' etanima efe' ipat fowa' apeinai.’ 25Ea' nafi'i nati ipat anama sambefana andeande' sofalo'mana nape. 26Ea' notanima nafe' nao'wai anom ambagof awami 7-peleim wapoti' mafi'i mawis mape ipat anama. Ambagof amama awami endilisi manda' waf aonai nikila' waf aonai fowa' nali' nanda'anai. Fowa' epen inima nape awen, ea' dei' nape awen endilisi nikila' pe fowa' nali' napeinai.”

Waf esis sofa' danifel endilisinai

27Jisas ata' na'i basef amama etin, enis epes hiesi safi'i salipana. Ea' ano'w nemata'w kwape la'afena esis kwa'i na'ama kwa'i, “Nemata'w akwama fowa' kolaena ma kwase'ena nomambeh ine'i, akwa'w kwandanifel.”

28Ea' Jisas na'i, “Owa'etin. Ipe' amam nematawa pame' basef Godi ma pagi'mami, ipe' pandanifel ea'.”

Enis sa'i siti ikwaf la'ifinai si'i God nanda'anai

(Mt 12:38-42; Mk 8:12)

29Amam nematawa hiesi safi'i sandakolas sape, Jisas na'ipas na'i, “Ipe' amam nematawa dei' pape etap anae', ipe' epes aopei. Dei' pa'i piti anona ikwaf la'ifinai. Ae' owa' enda'ana. Ikwaf anama fowa' gani God nihi'amba profet Jonai atona anona nemaf ihi'ambepana ipe'. 30Anona profet Jona nataga si'i anona ikwaf nihi'amba esis amam nematawa Ninivaisi. Ea' na'ama etina ae' ataga epen endilisiwei ataga ape si'i anona ikwaf Godi ma ipe' amam nematawa pape nogota anae'. 31Anona nemaf God nowaloga epes, nemaf anama ano'w nemata'w kwin dembe'wi kwapani gani wa'ol aon nowalama lambihilifinama kohafel koloma ipe' pape na'ae kogwamepa basef motanima milipa kwi'i ipe' epes aopei. Dei' main, kwin akwama kwapani gani etap nafe' netambela, ea' kwafi'i kwame' basefa gawa lu'unai dembinai king Solomon nawalipasanai. Ea' dei' anona nikila' Solomon nape na'ae. 32Nemaf anama God nowaloga esis amam nematawa esis epes Ninivaisi sohafel sola' basef motanima milipa ma waf aonai ipe' panda'anai. Dei' main? Esis Ninive same' basef Godi Jona na'ipasami, ea' samboma opalef sakwaha waf aonai safe'ma God. Ea' dei' anona aman nikila' Jona nape na'ae.

Lam nanda' alop si'ina howalana

(Mt 5:15; 6:22-23)

33Epes ina sokata lamifah nomon ifagw sosapa'am sombaho'am mafe' owina maloh, owa'etin. Esis sawamonam matoma balatagw ilifa sawis sati howalagon. 34Naep nomon ukup ipe'imi si'i lama alop si'ina ipe'inai. I'i ukup ipe'imi bo'om mupe, alop si'ina ipe'inai nififil hi'ilana. Ea' i'i ukup ipe'imi aom, nambimb alop ipe'inai hi'ilana akutina. 35Dei' ipe' pindumafuma andeande'. Na'ama nafifili nape nomona ipe'i akotina. 36I'i alop ipe'inai nififil hi'ilana, ina anagon kwaie'ugun akotigin, owa'. Ea' nambimb alop ipe'inai howalana hi'ilana endilisi si'i lamifah matoma mafifil mafifimipa.”

Jisas na'i basef maila amam Farisi maloma amam mawalipasa mi'uli Godi ma waf aonai amam manda'anai

(Mt 23:1-36; Mk 12:38-40; Lu 20:45-47)

37Jisas nanda' basef amama hi'alam, anona aman Farisi nofalana na'i nifi'i nea' gwa'aimi nolomana. Ea' Jisas nafe' nawis nomon ipat natoma tebol. 38Ea' Farisi anama nati anan nafe' nape na' gwa'aimi owa' nesa'opa lagof muli' si'i waf amam Farisi mailanai. Ea' anan okom natanea ma waf anama.

39Ea' Dembinai na'ipana na'i, “Ipe' Farisi, ipe' pandombasa kapi plet ande'am atom andeande'. Ea' nomon owa'. Ipe' opalef nomon si'ipama waf walanai naloma anona waf aonai wapoti'. 40Ipe' epes ukup mahipei. Ae' a'ipipa endilisi, God nanda' amamaga ande'am, nomonam wapoti'. 41Ea' amamaga mala nomon kahi plegw ipe'imi, amama ipe' penda'am pese' epes kwahusi pigiambamas. I'i ipe' penda'am na'ama, nambimb amamaga hiami ambo'om andeande'.

42Ipe' Farisi uwahipipa ma nimanimi lu'wami nambimb meatagamipei. Ipe' pawaloga nambawa lombo maloma akwal mamumami hiami pase'ana tu'wanim God. Ea' ipe' pindihi'ama waf bu'unai ukup maimaila Godanai ukup mase'epana nape. Waf anama naloma waf pindalali pese'ana amamaga maim Godanai, anama pekolasana pihapilana etin pilana.

43Ipe' Farisi, ae' a'i uwahipipama nimanimi awami anona nemaf meatagamipei! Ukup ipe'imi mase'epa pa'i pepe siaifah bu'wami naep epesi nomon ifagw pa'i basef papeimi. Ea' esis amam nematawa seanifelipa sonda'mepa nemaf bu'unai ipe' anama epes hiesi sandatama sapoma.

44Ae' a'i uwahipipa endilisi ma nimanimi awami anona nemaf meatagamipei! Ipe' si'i hiegilif mape mandambaho' etap owin, epes ina sogawam, owa'. Esis satoma safe' ilif ande' atogon.”

45Anona aman gawainai nawalipasa mi'uli Godi nagwamana basef na'i, “Dembinai, ine' na'iam na'ama, na'i basef la'ifimi na'i afa' epes aofai.”

46Ea' Jisas nagwamana basef na'i, “Ipe' amam dembipei gawaipei pawalipasa mi'uli Godi, ae' a'i uwahipipa ipe' wapoti' ma nimanimi awami anona nemaf meatagamipei. Ipe' panda' amamaga nimanimi mapei'as esis amam nematawai, noma'w nahas. Ea' ipe' owa' pigiambamas pefa' nimanimi amama lagof ipe'imi, owa'etin.

47Ae' a'i uwahipipama nimanimi awami anona nemaf meatagamipei! Esis akusipa ipe'isi saha amam profet maga', ea' ipe' pala' hi'agilif amamumi. 48Waf anama nawalapa basef alihim na'i ipe' pa'i a'e ma esis saha amam profet fowa'imi maga'. Ea' dei' pala' hi'agilif amamumi, 49panda'am na'ama si'i God anan gawa bu'unai napeinai na'i, ‘Anona nemaf ae' esapa' anom profet moloma Aposel mefe'mago esis, ea' soha anom moga' ea' anom sonda'am kwapete'am.’

50Ea' dei' amam nematawa nogota anae'isi, anona nemaf God nose'asa nimanimi ma ofagema amama saha profet hiami afum hi'alam fowa' gani dambadamba God nanda' ilif etap ea' nafi'i nataga nogota anae'. 51Nali'i esimbel mali'i Abeli nafi'i natagama profet esimbel Sakaraiai sahana afuna la'afena ipat lu'unai Godi sanda' lotuwanai naloma balata saofa mafis sase' Godami. Amama ofagema nambimb mila ipe' etipa dei' pape etap anae'.

52Ipe' amam gawaipei pegawa mi'uli Godi, ae' a'i uwahipipa ma nimanimi lu'wami anona nemaf meatagamipei. Dei' main, ipe' pakwaha ki anama pefa' gawanai. Ipe' etipa ina pawisi' uta pawis nomon, owa'. Ipe' pahopa eafa enis sa'i siowis nomoni.”

53Ea' Jisas nakwaha ipat anama nawis ande', amam mawalipasa mi'uli Godi maloma amam Farisi wandafum kwapete'am endilisi ma magolopa anona eafa meanda'mana basef. Amam ma'i mogwamba malogel ananinai ma basef mamumami mahali'anami. 54Amam mape mati anan la'ela'ef ma'i mome' anan ni'i anom basef motaga malogel ananinai ma monda'mana kot.

Currently Selected:

Luk 11: aojF

Highlight

Copy