Luk 18
18
Basef womun etina nemata'w alifi'wi kofala dembinai jas
1Ea' Jisas nase'am basef wamon etin alupumi ananimi ma nihi'ambam monda' beten nimeguf hiami ma amam ina ala'uta neam, owa'. 2Ea' anan na'iam na'i, “Anona dembinai jas nape anona taun. Anan ina umbamahana ma God, ina okom napoma enis epes wapoti', owa'.
3Ano'w nemata'w alifi'wi kwape taun anama. La'ela'ef akwa'w kwafi'mai jas anama kwa'ipana kwa'i, ‘Naumbih ae'asi sa'i sohambombaga ae'. Ine' ata' nigiambame ma kot.’
4Jas anama nali' nandaiwa'ma niegiambama'w. Nogota launai nafe' ea', okom ananinai ma'i, ‘Ae' ina umbamahema God, ea' ina ila basef epesi, owa'. 5Ea' nemata'w akwama alifi'wi kwase'e nimanimi ae'. Ea' hapaimi, ata' igiambama akwa'w mehipa kot. Na'ama kwafi'i la'ela'ef konda' okom nalowe.’ ”
6Ea' Dembinai na'ipam na'i, “Ipe' peme' basefa jas anama aonai. 7Epes isima God nandandepas ea' ananisi, esis salef sakokowe la'ela'ef owamb alip. Dei' God nigiambamasa kot o owa'? Anan nigiambamas. Anan ina ni'ipas mamumami, owa'. 8Ae' a'ipipa endilisi, nambimb nigiambamas mehip. Ae' ataga epen endilisiwei. Ea' anona nemaf ae' iefi'i, nemaf anama iti amam nematawa etapesi sembale'efa ae', o owa'?”
Basef womun etina amam biam anona Farisi naloma anona nofa' takisi
9Enis epes ukup mapoma esis etis sa'i esis epes bu'wasi sanda' waf bu'unai, ea' sa'i enis sanda' waf aonai. Epes isima Jisas nase'asa basef womun etin na'i, 10“Anom amam biam ma'i mofe' monda' beten ipat lu'unai Godi. Anona Farisi, anona aman nofa' takisi. 11Farisi anama naitu okom napoma anan atona nanda' beten na'ama na'i, ‘Ae' anifelina God, ama ae' ina si'i enis epes sanda' waf aonai. Esis sambaso'mas sofa' wiga hiahaom enis epesi, sanda' waf aonai, sanda' waf aonai so'a waulanai. Ae' anifelina ma ae' ina si'i aman nanima aonai nofa' takisi. 12Wikifah hiami ae' akwaha gwa'aimi nimeguf bifa anda' beten. Ea' amamaga hiami ae' efa'ami, awala tu'wanim amamaga ase'enam ine'.’ ”
13-14“Ea' aman anama nefa' takisi naituwi laogon nandaiwa'ma niniga niti heven ilif, owa'. Naha mafata ananinai la'ela'ef na'i, ‘God, ae' aman anda' waf aonai, ine' niti ae' owahipiwi nigiambame.’
Ae' a'ipipa endilisi, aman anama nofa' takisi na'iam na'ama, anan bo'ona ma naep Godi. Ea' aman anama nali' nanda' beteni, owa'. Dei' main, emi egafis sefela agof asisimi atom, nambimb God nonda' agof asasimi mowala. Ea' emi egafis senda' agof mowala, nambimb God nefela agof asasimi lu'um.”
Jisas na'ipasa basef bu'wami mafe'ma awasi isima ata' sa'wisi
(Mt 19:13-15; Mk 10:13-16)
15Esis sao'wamanai enis awasi sofa'as safi'mai Jisas, sa'i anan nowamona lagofa ni'ipasa basef bu'wami ma God nofalo'mas. Ea' alupumi ananimi mati isima ea' minifalis esis sofa'as sifi'mai anan. 16Ea' Jisas nofala awasi isima safi'i felefele'ma anan ea' na'ipam na'i, “Ipe' kwahowas awasi isima sifi'mai ae'. Ipe' ina pindaiwa'mas. Fa'asi sifi'mai Ae'. Dei' main, esis amam nematawa siowis wambota Godi numafias esis same' basef ananimi sailam si'i awasi isima. 17Ae' a'ipipa endilisi. Emi egafis si'i a'e ma siowis wambota Godi numafias ama sese'ana ukup asasimi ma Anan si'i awasi isima sa'i a'e mana, isima sanda'am na'ama nambimb siowis wambota Godi numafias. I'i owa', owa'etin.”
Aman amamaga hiamunai
(Mt 19:16-30; Mk 10:17-31)
18Anona agilinai Judainai nahali' Jisas na'i, “Tisa bu'winai, ae' nambimb enda' maina efa' ambal namunai epe andeande' la'ela'ef?”
19Ea' Jisas na'ipana na'i, “Dei' maina ine' na'i Ae' bu'uwei? God atona bu'unai. 20Ine' negawa mi'uli God naso' Mosesanai na'i, ‘Ina nenda' waf aonai so'a waulanai, ina neha enis epes soga' nenda' wal, owa', ina nembaso'ma enis epes, ine' neme' basef mamasinai nembale'am nilam ea' nimafias andeande'.’ ”
21Ea' na'ipana na'i, “Mi'uli anama hianai ahapilana ailana fowa' ata' sa'owe afi'i afi'i ataga dei'.”
22Ea' Jisas name' basef amama na'ipana na'i, “Ine' anona waf bu'unai atotona ata' owa' neanda'ana. Ine' fo'o nese'asa amamaga ine'imi hiami enis epes sotaluma ine' nefa' moni anama nenda'ana neso' isima kwahusi. Nenda'am na'ama ma anona nemaf nefa' amamaga bu'wami gani heven ilif. Ea' nifi'i nembale'efe ae' nila ae'.”
23Anan name' basef amama, opaf ananinai nimanina endilisi. Anan amamaga hiamunai. Na'ama dei' anan okom nimaninai.
24Ea' Jisas natolona na'i, “Epes isima hiahaom moni hianaisi, sanda'am ahifim endilisi ma siowis wambota Godi numafias. Atona etin sefe' siowis. 25Anona mafin lu'unai kamel nuwis nil nagala sagundisa luwagufanai, anama wila ma niowis. Ea' amam nematawa amamaga hiamisi i'i suwis wambota Godi, sonda'am ahifim endilisi ma siowis. Maol anama ahifina endilisi nikila' maol kamel niowis nil nagala.”
26Ea' epes isima same' na'ama sa'i, “I'i na'ama, anona nemaf God nofa' emi egafis setanimani sopen andeande' la'ela'ef? Owa'etin.”
27Ea' Jisas na'ipas na'i, “Amamaga epes owa' la'ifisa seanda'ami, amama God atona la'ifinama nonda'am.”
28Ea' Pita na'ipana na'i, “Neme', afa' wakwaha amamaga afa'imi hiami ea' dei' wafi'i wambale'efa basef ine'imi wailina.”
29Ea' Jisas na'ipas na'i, “Ae' a'ipipa endilisi, ipe' emi egafipa pekwaha ifagw ipe'imi ma penda' maola epes siowis wambota Godi numafias, 30anona nemaf God nogwamepa amamaga hiami mikila' amama pali' pefa'ami. Anona nemaf nogota bu'unai neataga, ipe' pefa' ambagof namumi ma peape andeande' la'ela'ef.”
Jisas na'iam wenifa noga' notanima nohafel wapoti'
(Mt 20:17-19; Mk 10:32-34)
31Ea' Jisas nao'wa alupumi ananimi 12-peleim na'ipam na'i, “Peme', dei' afa' ondowasa' Jerusalem. Ama basef amama hiami amam profet fowa' gani manda'am mail buki ma'i ae' ataga epen endilisiwei motaga alihim mondawalap hi'ilam. 32Nambimb amam monda'e efe'ma enis epes sololama Godi. Ea' sonda'e findiwae sehe sonda'me waf aonai sisisi'wafe sopagahowe sehe ega'. 33Ama nimeguf biam mefe' hi'ilam ama anona nefe'ma wenifi ae' etanima ehafel wapoti'.”
34Ea' amam alupumi ananimi ina mogawa basef amama, owa'. Basef ofagema ma'iam ata' mandambaho'ma amam, ea' ina ukup mandanda'mam andeande'ma amamaga Jisas na'i neanda'ami, owa'.
Jisas nagiambama anona aman naep mase'anai ambo'ona
(Mt 20:29-34; Mk 10:46-52)
35Jisas nafe' nataga felefele'ma anona wambel Jeriko, ea' anona aman naep mase'anai nape eaf wa'ana dawalegef nandailasa gwa'aimi moni maim. 36Ea' name' esis hiesi safi'i sikila'ana safe', nahali'as na'i, “Esis sanda' main notaga?”
37Ea' sa'ipana sa'i, “Jisas Nasaretinai anama dei' nafi'i nikila'ena nafe'.”
38Ea' nofalana na'i, “Jisas, ine' akunamana Deviti, niti ae' uwahipiwi!”
39Epes isima sali' safi'i sinifalana na'ama sa'i, “Ine' feso'mena!”
Ea' anan fala etin nape na'i, “Ine' Devit akunamana, niti ae' uwahipiwi.”
40Ea' Jisas nafi'i naitu na'ipas na'i, “Kipana nifi'mai ae'.”
Anan nafe' felefele', Jisas nahali'ana na'i, 41“Ine' na'i ae' enda'mena main?”
Ea' na'ipana na'i, “Dembinai, ae' a'i iti andeande' wapoti'.”
42Ea' Jisas na'ipana na'i, “Naep ine'imi miti. Ine' nembale'efa ae' la'ifina. Amama atom dei' nataga bo'wena wapoti'.”
43Ea' mehip naep matiana andeande', naila Jisas nafe' eaf nafela agel Godi. Ea' esis amam nematawa sati amama safela agel Godi wapoti'.
Currently Selected:
Luk 18: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
