Luk 19

Basef Sakiusi

1Ea' Jisas nafe' nawis Jeriko, na'i nefe'. 2Ea' anona aman amamaga hiamunai nape, agel ananinai Sakius anan agilinai ma amam amama mofa' takisi. 3Anan na'i niti Jisasa nogawana anan emi egafuna. Ea' amam nematawa wambelisi hiesi saitu sili'akw. Sakius anan bandabandanai, ea' ina nati Jisas, owa'. 4Ea' nasagih nali' nafe' nalata natoma anona lawag fik ama niti Jisas niefi'i.

5Ea' Jisas nataga anama naniga nati ilif na'ipana na'i, “Sakius, dei' ae' efe' epe ipat ine'inai. Ine' sila'i mehip.”

6Ea' nisila'i mehip okom ananinai nandanifel, nao'wa Jisas nafe' ipat ananinai.

7Ea' esis amam nematawa sati amama, ukup aom endilisi sa'i basef mamumami sa'i, “Anan nafe' nape ipat anona aman nanda' waf aonai.”

8Ea' Sakius nehafel naitu na'ipa Dembinai na'i, “Dembinai, ine' neme'. Dei' ae' a'i ewala amamaga hiami ae'ami la'afen na'ama etin, ea' ese'as tu'wanim isima kwahusi. I'i ae' embaso'ma enin epena ekwalopa amamaga ananimi, nambimb ae' egwamana hiami bifibif.”

9Ea' Jisas na'ipana na'i, “Dei' God nefa' amam nematawa sape ipat anae'i sotanimani ea'. Dei' main, aman anama wapoti' akunamana Abrahami. 10Ae' ataga epen endilisiwei, ae' afi'i ma egolopa epes higilalasi efa'as setanimani.”

Basef womun etina amam manda' maoli 10-peleim mofa' moni

11Esis same' basef amama, ea' Jisas nafe' nataga felefele'ma Jerusalem, ea' epes hiesi ukup ma'i dei' atef God nifi'i numafi epes Ananisi nupe dembinai ma esis ea' epes hiesi sotolona. Na'ama Jisas na'i basef amama womun etin 12na'i, “Anona aman dembinai na'i nefe' anona wambel laogoma ma esis sonda'ana nope king. Anona nemaf anan notanima nifi'i. 13Ea' nofalai anom amam 10-peleim manda' maol ananinai, ea' natambe' moni 20 kina nandahama amam. Ea' na'ipam na'i, ‘Ipe' penda' maolana moni anama pefe' petagama ae' etanima iefi'i.’

14Ea' esis wambel atona aman anamai ukup aoma anan endilisi. Ea' nafe' sasapa' anom amam magi'mana mafe' ma'i, ‘Ape' mandaiwa'ma ine' nepe king ma ape'.’

15Owa'etin. Esis sanda'ana nataga nape king dembinai nape anom nimeguf, notanima nafi'i. Ea' na'i, ‘Falai amam amama manda' maoli fowa' ae' ase'ama moni. Ae' a'i ata' egawa moni wamanai ma'ufina amam hiami atona etin mofa'anai.’

16Ea' nali'i nafi'i na'ipana na'i, ‘Dembinai, ae' anda' maol 20 kina anama ine'inai anda' maolanana dei' efa'ai 200 kina wamanai.’

17Ea' dembinai na'ipana na'i, ‘Ine' nanda' maol andeande'. Ine' nimafi moni anama kwawie'una andeande'. Dei' ese'ena agel lu'unai ine' ma nimafi taun lu'wagoma 10-peleina.’

18Ea' anona nafe'ma biami nafi'i na'ipana na'i, ‘Dembinai, ae' anda' maola 20 kina ine'inai dei' etanima efa'ai 100 kina wamanai wapoti'.’

19Ea' dembinai na'ipana na'i, ‘Ae' enda'ena nimafi taun lu'wagoma 5-peleina.’

20Ea' anona nagi'i nafi'i wapoti' na'ipana na'i, ‘Dembinai, 20 kina ine'inai anae'. Ae' ewa'ana hankisip ambe'ana na'oh. 21Ae' egawa ine' aman la'ifinai. Anom amamaga enis epes sambe'am ma'ihi, amama ine' nefa'am. Gwa'aimi enin epen nawami, amama ine' nala'ami. Na'ama ae' ombamahe ma ine'. Ea' dei' ewa'ana moni anama na'omena.’

22Ea' dembinai na'ipana na'i, ‘Ine' nanda' maoli, ine' epen awinai natotopa' basefi. Basef ine'imi atom ewalogena. Dei' ine' negawa ae' aman la'ifiwei ala' gwa'aimi anona aman nawami. 23I'i ine' negawa na'amai, dei' nefa'ana nembe'ana benga ae' etanima ifi'i efa'ana neloma anona wamanai wapoti'.’

24Ea' na'ipa esis saitu na'ama felefele'i na'i, ‘Ipe' dalombana 20 kina aman anama pese'anana aman anama nofa' moni 200 kinai.’

25Ea' esis sa'ipana sa'i, ‘Dembinai, anan nofa' 200 kina ea'.’

26Ea' anan na'i, “Ae' a'ipipa, emi egafis sohapila amamaga amama nambimb ese'asa anom amamaga wapoti' esis. Ea' emi egafis owa' sehapila anom amamaga, amamaga kwawie'um esis sahapilami, amama nambimb ae' endalombasam. 27Ea' esis isima satago naumbih ae'asi, sandaiwa'ma ae' epe dembiwei king asasiwei imafias, ipe' fa'as fi'i na'ae pehas ma naep ae'ami.’ ”

Jisas nafe' nawis Jerusalem si'i anona dembinai king

(Mt 21:1-11; Mk 11:1-11; Jo 12:12-19)

28Jisas na'i basef amama ea' nali' nafe' naila eaf nafe' Jerusalemi nondowasa'. 29Ea' nataga Betfagei Betani wambel anama felefele'ma halaf anama oliv motawama ea' nasapa' alupumi ananimi biam mali' mafe'. 30Na'ipam na'i, “Ipe' bipa pefe' wambel nanima nape gani wa'ili felefele'ma na'ae. Pefe' piwis piti anona mafin donki sa'unai esis saundana nail. Ina dei' enin epen natomana, ata' owa'. Petagahona pefa'ana pifi'mai ae'. 31I'i enin epen nihali'ipa ni'i, ‘Patagahona ma main?’ ea' pegwaman pi'ipan pi'i, ‘Dembinai afa'inai na'ipafa na'i nonda' maolanana.’ ”

32Ea' amam biam mafe' mati amamaga amama na'ama etin si'i do'ok na'ipam. 33Ea' matagaha mandofa donki anama sa'unai. Matagahona etin, amam mumafi donki anamai ma'ipam ma'i, “Dei' maina ipe' patagaha donki anama?”

34Ea' amam ma'ipam ma'i, “Dembinai na'i nonda' anona maolanana.”

35Ea' amam mofa' donki anama mafi'mai Jisas mawamona sagegw amamumi matoma ilifa donki anama. 36Ea' magiambama Jisas nalata natoma donki anama nafe', ea' esis amam nematawa sa'i sefela agel ananinai lu'una. Ea' dei' sambe'amanam sagegw sase'wiam eaf sofalo'mana.

37Anan nafi'i felefele'ma eaf nakini'i halaf lawah oliv motawama, alupusi ananisi hiesi sandanifel, ukup mapoma amamaga amama pepel fowa' nanda'anai. Ea' sanda' la kolo' sa'oh mehip, safela agel Godi lu'una.

38Sa'iam na'ama sa'i,

“Ape' mefela agel God nape ilifi lu'una, howalagon anan atona. Ma'i anan nofalo'ma ine' dembinai king nafi'i agel Ananinai nese'ena pepel ma nenda' maol Ananinai. Esis sape heveni opalef awanem.”

39Ea' anom dambami Farisi mape maloma epes hiesi ma'ipa Jisas ma'i, “Dembinai Tisa, ine' ninifala alupusi ine'isi ma ata' sosopama malogof.”

40Ea' Jisas nagwamasa basef na'i, “Ae' a'ipipa endilisi, i'i esis seasopama malogof, atuwasi otamba atom ma'oh etapi mope mi'i mehip.”

Jisas nalopa Jerusalem

41Ea' Jisas nataga felefele'ma Jerusalem natologon nalopagon. Nalopa esis amam nematawa sape taun anamaisi. 42Ea' na'i, “I'i dei' nemaf anae' atona ipe' pegawa basef ofagema ma pepe opalef awanem, amama andeande'. Owa'etin. Basef amama ata' mandambahe', dei' ipe' owa' ata' pegawam. 43Anona nemaf netaga, naumbih ipe'isi sifi'i sola' indalelemb sonda' wandaf sili'akwepa. Ea' sili'akwepa endilisi ma anama hiagoma. 44Ea' sehepa sohambombagepa endilisi, peloma awasi ipe'isi sape nomona wambel ipe'inai. Esis sohambombaga wambel awagon hi'ilagon endilisi, ea' ina nambimb otamba sala' ifagwami mondapapei'ma etin mope, owa'. Mo'oh deindei'. Dei' main? Ipe' owa' pegawa nemaf dei' God niefi'anai ma nefa'epa pitanimani pepe andeande', owa'.”

Jisas nagalo'mas amam manda' bisnisi ipat lu'unai Godi sanda' lotuwanai nomon

(Mt 21:12-17; Mk 11:15-19; Jo 2:13-22)

45Ea' Jisas nehafel nawis ipat lu'unai Godi sanda' lotuwanai ea' nagalo'mas amam amama manda' bisnisi matala amamaga ipat anama nomon. 46Anan na'ipam na'i, “Basef mape Baibeli, God na'i, ‘Ipat ae'anai nondapoma esis sifi'i sopama sonda' beten sohali' Ae'.’ Ea' ipe' panda'ana nataga si'i sanda' walanai.”

47Nimeguf hiami Jisas nawalipasa basef ipat anama nomon. Ea' amam pris dambami maloma amam agufumi Judai maloma amam mawalipasa mi'uli Godi magolopa eafa mohana neaga'. 48Ea' esis amam nematawa hiesi ukup bo'om endilisi ma seame' basef ananimi. Na'ama amam ina mati anona eafa meahana, owa'.

Currently Selected:

Luk 19: aojF

Highlight

Copy