Matyu 22

Basef womun etina esis safi'i sanda' gwa'aimi lu'wami ma bias seandase'amai

1Ea' Jisas na'ipana basef womun etin wapoti' na'i, 2“Epes siowis kingdom heveni si'i anona king dembinai etapanai. Nogalomana ananinai na'i noso' ano'w nemata'w, ea' king anama nanda' anom gwa'aimi lu'wami. 3Nemaf anama seagwa' gwa'aimi anai notaga, anan nasapa' amam amama manda' maola anani mafe' mofalai epes isima fowa' nali' nofalasi seafi'mai gwa'aimi amama. Ea' esis sandaiwa'ma seafi'i.

4Ea' anan nasapa' anom wapoti' manda' maola anani motambel mafe', ea' na'ipam na'i, ‘Ipe' fo'mago epes isima ae' andandepas sapani ea' pi'ipas na'ama pi'i, “Peme', ae' andandomba gwa'aimi ae'ami ea'. Mafis bulmakau suwafumi maloma mafis amama lu'wami ae'ami, ape' maham. Ea' amamaga hiami mandandombol ma'oh ea'. Ipe' pifi'mai gwa'aimi amama enda'ama nogalome noso' akwa'wi.” ’

5Ea' esis ukup aoma seme'ama seafe' ea' sandamboma safe' deindei ma opeh asasimi. Anona nafe' aof, anona nafe'ma bisnis ananimi. 6Ea' amam mapani mombalo' amama manda' maola kingi manda'am kwapete'am maham afum. 7Ea' king anama neme' amama okom wandafuna nasapa' soldia ananimi mafe' maha amam maha manda' maola anani afum hi'alam. Ea' makata nif maofa wambel amamunai wapoti'. 8Ea' king na'ipa amam manda' maoli na'i, ‘Gwa'aimi enda'ama nogalome noso' akwa'w ea' sandandombam ma'oh ea' epes isima ae' efalasi ina seme' basef ae'ami safi'i, owa'. 9Na'ama dei' ipe' pefe' eaf anama hianai dawalegefa piti isima epes hiesi pi'ipas pefalas sifi'mai gwa'aimi amama lu'wami dase'amaimi.’ 10Anan na'iam na'ama, amam manda' maoli mafe'agon gani gani eaf dawalegef mowa'aniesi epes isima matilisi hiesi, epes bu'wasi saloma sanda' waf aonai wapoti'. Ea' safi'i sape ipat anama sondase'ama ma si'ina endilisi.

11Esis sape ea' dembinai king nawis nomona nitilis. Ea' nati anona aman atotona ina nala luwaguf salama nemaf anama dase'amainai, owa'. 12Ea' king na'ipana na'i, ‘Alupinai, dei' maina ine' owa' nela luwaguf amama sandase'amaimi nifi'i niwisi na'ae?’ Ea' anan ina na'i anom basef, owa'.

13Ea' king na'ipa amam manda' maoli na'i, ‘Ipe' pewa' lagof maloma bo'wagaha ananimi pekwahona nefe' niwis nepe owamb ande'. Owamb anama nambimb anan nowa nelef nalelef tilili talala' kwapete' nepe.’ ”

14Ea' Jisas na'ipas na'i, “A'e, God nofala epes hiesi na'ama etin si'i king anama nofalas. Anan nofala hiesi, ea' nandandepa atona etin sifi'i siowis sope solomana.”

Amam mahali' Jisasa nese'ana takis gavman dembinai Sisar Romunai

(Mk 12:13-17; Lu 20:20-26)

15Ea' amam dambami Farisi mafe' manda' basef ma'iam mandame'mama membale'a Jisas mowa'ana. Amam ma'i mome' anom basef ananimi owa' andeande'i ma monda'mana basef mowa'ana si'i sowa' bogof. 16Ea' amam masapa' alupumi amamumi maloma amam Heroti amam mafe'ma Jisas ma'i, “Dembinai Tisa, afa' ogawena ine' aman bu'unai na'i basef endilisimi. Ina umbamehena owa'. Ina ni'ipasa anom basef isima enis agof lu'wamisi ea' anom basef isima agof a'asi falafisi, owa'. Ine' na'ipasa basef atifim endilisimi atom ma okom Godi amam nematawa hiesi dende' etin hi'alas. 17Ea' ine' ni'ipafa. Dei' ine' okom nape na'imama? Mi'uli ape'inai na'i andeande'ma ape' mose'ana takis Sisar gavman dembinai esis Romi o owa'?”

18Ea' Jisas nogawa ea' ma waf baso'omainai amamunai ea' na'i, “Ipe' amam pa'i malogof biamipei, dei' maina ipe' pagwamba ae'? 19Ipe' pihi'ambe anona moni ma ata' itolona.”

Ea' mofa'manai anona moni ma natolona. 20Ea' nahali'am na'i, “Ambal naloma agel anama mailanai eminai?”

21Ea' ma'i, “Anama Sisari gavman dembinai esis Romi.”

Ea' nagwamama basef na'ipam na'i, “Ea' amamaga Sisari, amama pese'anam Sisar. Ea' amamaga Godi, pese'anam God.”

22Amam mame'anama basef amama ea' gegelalasom kwapete'am makwahona mafe'.

Amam mahali' Jisasa epes saga'i sotanima sohafel wapoti'

(Mk 12:18-27; Lu 20:27-40)

23Nemaf anama atona anom amam Sadyusi mafi'mai Jisas. Amam hiami mombale'ef saga'i ina anona nemaf sotanima sohafel wapoti', owa'. Ea' amam mafi'mai Jisas mahali'ana 24ma'i, “Dembinai Tisa, fowa' gani Moses na'i, ‘I'i anona aman noga' ma anan awasi a'ana ea' waulu'mana ata' kope, owalomana ananinai nose'akw nola enis awasi ma soho'ofana.’ 25Ea' fowa' amam wambota atotona 7-peleim mape. Nali'i sahalomam nase'akw awani a'akw naga', nakwaho'w kwape. Ea' owalomana nase'akw naga' nakwaho'w kwapani awani a'akw.

26Ea' owalomana nandatu'ulanai wapoti' nanda'am na'ama etin, ea' anona nandatu'ulomi nase'akw manda'am na'ama etin mafe' mafe'ma matagama owagufunai akutainai. 27Amam amama wambota atotona ea' maga' hi'alam. Anom nimeguf mafe'ma ea', akwa'w kwaga' waulu'mam. 28Ea' anona nemaf esis saga'i sohafel wapoti', nemata'w akwama kwaso' amam 7-peleimi emi egafuna nose'akw? Amam 7-peleim mase'akw hi'alam.”

29Ea' Jisas nagwamama basef na'i, “Ipe' owa' pegawa basef Baibel na'iami, owa' pegawa pepel Godi. Ea' ipe' dei' ina pa'i basef endilisimi, owa'. 30Nemaf anama sa'i sokwaha hi'agilif sotanima sohafel wapoti', amam nematawa ina ata' sondase'ama wapoti', owa'. Sopan etin si'i ensel mape heveni. 31Basef amama esis saga'i sotanima sohafel wapoti', ipe' patalifa basef amama God na'iam mape Baibeli o owa'? Anan na'ipipa na'ama na'i, 32‘Ae' God Abrahami, Aisaki maloma Jekopi.’ Basef amama ma'i God ina Dembinai ma epes isima saga'i, owa'. Anan God epes isima ambal napeis sape namusi.”

33Esis amam nematawa hiesi same' na'ama sohafel gegelalasisa basef ananimi.

Mi'uli nali'i Godi

(Mk 12:28-31; Lu 10:25-28)

34Ea' Jisas nasopama malogofa amam amama dambami Sadyusi ma basef amama. Ea' anom amam Farisi mame' basef amama mondowa'anima mafi'i felefele'ma anan. 35Ea' anona naloma amam nogawa mi'uli Godi andeande' na'i nogwamba Jisasa ni'i anom basef owa' andeande' ma monda'mana basef mowa'ana si'i sowa' bogof. Ea' nahali'ana na'i, 36“Dembinai Tisa, maina mi'uli Godi lu'unai nikila' mi'uli hianai nape nali'i?”

37Ea' Jisas na'ipana na'i, “Ukup ipe'imi mohafela Dembinai God ipe'inai mimilana na'ama. Ukup ipe'imi mimilana hi'ilam, pese'ana ambagof opalef ipe'imi pese'anam hi'ilama Dembinai God atona. 38-39Mi'uli anama lu'unai, nali' endilisi. Ea' mi'uli nagi'i anama, ‘Ipe' ukup mimila enis epes sape felefele'ma ipe'i, si'i ukup maimaila ipe' etipa.’ 40Basef ofagema ma mi'uli hianai Godi maloma basef amam profet manda'ami hiami mape nomona mi'uli anama biefina.”

Jisas nahali' amam dambami Farisi ma Krais, anan God nandandepana nasapa'ana nafi'i

(Mk 12:35-37; Lu 20:41-44)

41Amam Farisi ata' munduwa'animai etifigin maitu, Jisas nahali'am na'i, 42“Ipe' ukup mape ma'imama ma Krais anan God nandandepana ea' ma nesapa'ana niefi'i? Anan nogalomana emi?”

Ea' ma'ipana ma'i, “Devit nogalomana.”

43Ea' nahali'am na'i, “Dei' maina Ambal Bu'unai Godi nafela okom Deviti ma na'i Krais Anan Dembinai? Ea' Devit fowa' gani na'i,

44‘Dembinai God na'ipa Dembinai Ae'anai na'i, “Ine' nepe lagel kwahisinai Ae'anai la'ela'ef nefe' netagama anona nemaf Ae' enda' naumbih ine'isi sefe' owina bo'wagah ine'imi.” ’

45Devit fowa' nofala Krais na'i, ‘Dembinai.’ Amama atom dei' Krais ina aman atona falafunai, owa'. Anan Dembinai.”

46Ea' dei' ina anona aman la'ifina ma nogwamana anom basef Jisas, owa'. Nemaf anama nafe' nafe' owagama wapoti' amam hiami umbamahama meahali'anama anom basef, owa'.

Currently Selected:

Matyu 22: aojF

Highlight

Copy