Matyu 21

Jisas nafe' nawis Jerusalem si'i anona king dembinai

(Mk 11:1-11; Lu 19:28-40; Jo 12:12-19)

1Ea' amam mafe' mataga felefele'ma Jerusalem, mataga Betfage felefele'ma halaf Oliv. Ea' Jisas nasapa' alupumi ananimi biam na'ipam na'i, 2“Ipe' bipa pefe' piwis wambel nanima nape gani wa'ili felefele'ma na'ae. Ea' piti anona donki sa'unai esis sepana nail naloma noganai ananinai maitu. Ipe' petagahom ea' pefa'am pifi'mai ae'. 3I'i enin epen ni'i nihali'ipa ma anom basef, pi'ipan pi'i, ‘Dembinai afa'inai na'ipafa na'i nonda' maola anan ama atuwasi nosapa'am mutanimipei mehip.’ ”

4Amamaga amama amam mofa'i donki mataga dende' si'i basef amama fowa' gani anona profet na'iami. Anan na'i,

5“Ipe' pi'ipa epes sape Saioni pi'i, ‘Ipe' piti, dei' king dembinai ipe'inai anona nemaf nifi'mai ipe'. Anan nanda' waf sa'umbilifi, ea' notoma donki noganai nofa'ana nifi'i.’ ”

6Ea' alupumi Jisasi biam mafe' ea' manda'am si'i do'ok na'ipamam. 7Amam mofa' donki anama naloma noganai mafi'mai Jisas, mawamona sagwegw amamumi matoma ilifa donki amama biam. Ea' Jisas nandegia natoma donki anama.

8Ea' amam nematawa hiesi sambe'amonam sagwegw eaf, safela agel ananinai lu'una. Enis satopa' lawah agof apulima motawa felefele'i sase'wiam eaf sofalo'mana. 9Ea' esis amam nematawa hiesi sali' sagi' sanda' la kolo' na'ama sa'i,

“Hosana! Ine' akunamana Deviti! Ape' mandanifel endilisi ma ine'. Ape' ma'i God nofalo'ma ine' nafi'i agel ananinai nese'ena pepel ma neanda' maol ananinai. Ape' mofela agel dembinai God nape ilifi.”

10Nemaf anama Jisas nafe' nawis wambel Jerusalem, ea' amam nematawa hiesi sohafel gegelalasis kwapete' ea' soga sa'i mehip sandahali'ma sa'i, “Aman anama anan emi egalina?”

11Ea' esis amam nematawa hiesi safe' salomanai sa'i, “Aman anama anona profet Jisas, aman nape wambel Nasaret nape etap hiagoma Galili.”

Jisas nagalo'ma epes satala amamaga ipat lu'unai Godi nomon

(Mk 11:15-19; Lu 19:45-48; Jo 2:13-22)

12Ea' Jisas nawis ipat lu'unai Godi nagalo'ma esis hiesi sanda' bisnis saloma isima satalom ipat anama nomon. Anom amam mati otamba enis epesi ea' mindisila'mam. Ea' Jisas namboma tebol amamumi nakowasom. Enis sanda' bisnisa setala amiguf mai'unamb. Ea' namboma siaifah asasimi nakowasom wapoti'. 13Ea' na'ipas na'i, “Basef mape Baibeli God na'i,

‘Ipat ae'anai nondapoma epes hiesi sifi'i sopaina sonda' beten sohali' Ae. Ea' ipe' panda'ana nataga si'i ipat sanda' walanai.’ ”

14Jisas ata' napani ipat anama lu'unai nomon, sofa'manai epes isima naep mase'asi bo'wagah maim mondala'asi safi'manai, ea' nanda'as sataga bo'wes. 15Ea' amam pris dembami maloma anom mawalipasa mi'uli Godi mati anan nanda' maol la'ifinai bu'unai, ea' mame' esis awasi sandanifela anan gani nomon ipat lu'unai Godi sa'i, “Ape' mafela agel akunamana Deviti!”

Ea' amam dei' ukup aom kwapete' ma anan.

16Ea' mahali'ana ma'i, “Ine' negawa basef ofagema awasi isima sa'iami?”

Ea' Jisas na'ipam na'i, “A'e, ae' egawam.”

Ea' na'ipam na'i, “Ipe' pitalifam basef amama mail Baibeli pegawam o owa'.? Basef amama fowa'imi ma'i na'ama ma'i, God,

‘Ine' owagama niwalipa awasi sa'wisi soloma isima ata' agunifisi sa' nomambeh atumi, ea' sofela agel ine'inai.’ ”

17Ea' anan nakwaha amam nawisi ande' nafe' nape anona wambel Betani ea' na'oh owamb anama.

Jisas na'ipa lawag fik alina

(Mk 11:12-14,20-24)

18Ama wafilu kuhimbita atona Jisas nohafel notanima nafe' nataga felefele' ma taun anama Jerusalem ea' nolomahana. 19Ea' nati anona lawag fik notawa eaf ea' nafe' natolona. Ea' ina nati anom su'utip mailana, owa'. Apul atom. Ea' na'ipana na'i, “Ine' ina ata' anom su'utip milina wapoti'. Owa'.” Ea' mehip lawag anama bowana ea' alina hi'alana.

20Ea' amam alupumi ananimi mati lawag anama alina, gegelalasom endilisi. Ea' ma'i, “Dei' maina lawag anama fik bowana ea' alina mehip?”

21Ea' Jisas nagwamama basef amam na'ipam na'i, “Ae' a'ipipa endilisi. I'i ipe' pembale'efa ae' endilisi ma ipe' ina ukup biembiefim mupeipa, nambimb ea' penda'am si'i ae' anda'ama lawag anama fik. Ea' ipe' ina penda' amama atom, owa'. I'i ipe' pi'ipa halaf nanima pi'i, ‘Ine' degia nefe' newala naoh,’ nambimb neme'epa nilam si'i ipe' pa'iam. 22I'i ipe' pembale'ef endilisi ma penda' beten, amamaga amama ipe' panda' betena pa'i pefa'ami, nambimb ipe' pefa'am.”

Esis sahali' Jisas sa'i, “Emi nase'ena pepel ma agel lu'unai ma nenda' opeh ine'imi?”

23Ea' Jisas notanima nafe' nawis ipat lu'unai Godi nape nawalipasa basef etin, amam pris dambami maloma agufumi Judai mafi'mai anan mahali'ana ma'i, “Emi na'ipina dei' nape dembinai nanda' opeh amama?”

24Ea' Jisas nagwamama basef na'i, “Ae' wapoti' a'i ihali'ipa ma anom basefa ipe' ata' pili' pi'ipa ae' ama atuwasi i'ipipa emi na'ipi ape dembiwei anda' opeh amama. 25Aman anama Jon napisi'as embeli, emi na'ipana ma nanda' opeh amama? God nape heveni na'ipana napisi'as o enin epen etapanai na'ipana?”

Ea' mame' basef amama manda'ipama ma'i, “Afa' wi'i, ‘God nape heveni na'ipana,’ atuwasi anan ni'ipafa ni'i, ‘Dei' maina ipe' owa' pembale'efana?’ 26Ea' afa' wi'i, ‘Enin epen etapanai na'ipana,’ na'ama esis amam nematawa sohafa. Afa' umbamahafama esis. Dei' main, esis hiesi sa'i Jon anona profet dembinai.”

27Ea' magwamana basef ma'i, “Afa' ina ogawana.”

Ea' Jisas na'ipam na'i, “Na'ama etin ae' ina i'ipipa ma emi nase'e agel lu'unai anda' opeh amama Ae'ami, owa'.”

Basef womun etina nogamana biam anona amani

28“Ipe' ukup mape ma'imama? Anona aman nogamana biam. Anan nafe'ma nogalomana dambena ma na'ipana na'i, ‘Nogalome ae'inai, dei' ine' fo'o nenda' opeha aof ae'anai newa mandelef wainim.’ 29Ea' nogalomana nagwamana basef na'ipana na'i, ‘Ae' andaiwa'.’ Anom nimeguf mafe'ma ea', namboma okom ea' nafe'. 30Ea' ahalomana nafe' na'ipa anona wapoti' na'ipana na'ama etin si'i do'ok nali' na'i. Ea' nagwamana basef na'i, ‘A'e, ahalome.’ Ea' anan ina naila basef ananimi nafe', owa'.

31Ea' dei' nogamana amama biam ananimi mamanama naila basef ahalomanai?”

“Amam ma'i, ‘Nali'i.’ ”

Ea' Jisas na'ipam na'i, “Ae' a'ipipa endilisi, amam amama mofa' takisi manda' waf aonai maloma nematawa wanda' waf aonai wanda' so'a wauli esis ea' sefe' suwis wambota Godi numafias sili' ma ipe'. 32Ipe' pegawa aman anama Jon napisi'as embeli. Anan nali' nafi'mai ipe' ea' nihi'ambepa wafa eaf bu'unai, ea' ipe' owa' peambale'efana. Ea' epes isima sanda' waf aonai anom mofa'asa takisi maloma anowa nematawa wanda' waf aonai so'a waulanai esis sembale'efana. Ipe' pati esis sembale'efana na'ama, ea' ipe' ina pamboma opalef pakwaha waf aonai pambalelefana, owa'.

Basef womun etina amam awami mumafi aof sawa mandelef wainim

(Mk 12:1-12; Lu 20:9-19)

33Ipe' peme' anom basef womun etin. Anona aman dembinai nanda' anona aof nawa wain nahopana. Aof anama nomon anan nanda' anona tang notawa ma sofa'asa su'utip amama wainim, ea' nala' anona ipat launai notawa sope sumafiagon. Ea' nakwahomama aof anama anom amam ma'i monda' maola aof anama mofa' monianai. Ea' nafe' napani anona wambel laoguma.

34Nogota su'utip mailanai, nasapa' anom manda' maola anani mafe'ma amam manda' maol aof ananinai. Anan na'i amam mose'ana anom su'utip gwa'aimi aof anama.

35Ea' amam amama manda' maol aofi mofa' amam amama nafomona aof anamai naspa'am mafi'i mombalo'am maham, anona mahana afuna endilisi, anona makwaha otamba mahana, ea' anona mahana etin nafa' nafe'. 36Ea' anan nafomona aofi nasapa' anom amam mafe' wapoti'. Nasapa' amam hiami mikila' amam mali' nasapa'ami. Ea' amam amama manda' maol aofi manda'am na'ama etina amam si'i mali' mafi'i. 37Ea' nagi' nasapa' nogalomana ananinai nafe'ma amam manda' maol aofi. Ea' anan na'iam na'i, ‘Nambimb amam mome' malogel nogalome ae'anai.’

38 # Mt 27:18 Owa'etin. Amam mati nogalomana ananinai nafi'i, manda'ipama etin ma'i, ‘Aman anama anona nemaf nofa' amamaga hiami ahalomanai. Afa' ohana afuna ma afa' atofa ofa' aof anama.’ 39#Hi 13:12Ea' mombalo'ana mofa'ana mawisi aof ande'ana mahana afuna.

40Ea' nambimb aman nafamona aofi nonda' maina amam?”

41Ea' amam pris dembemi maloma amam agufumi Judai magwamana ma'ipana ma'i, “Namanani anan nonda'mam waf aonai endilisi ma amam amama manda' waf aonai noham moga'. Ea' nose'asa aof anama nefe'ma enis epes sumafiana ama nogota gwa'aimi mieilana esis sose'ana anom gwa'aimi anan.”

42 # Sam 118:22-23; Ap 4:11; Ro 9:33; 1 Pi 2:6-8 Ea' Jisas na'ipam na'i, “Ipe' patalifa basef Godi pegawam o owa'? Basef Baibeli ma'i na'ama ma'i,

‘Owap#21:42 Basef amama ma owap ma'i Jisas. anama mala' ifagwi magwase'ana dei' nataga nape owap nape nali'i ma nembalo' ipat. Dembinai God nanda' amama mataga, ape' matolom bo'om endililsi.’

43Ea' ae' dei' a'ipipa. God nambimb nelefata basefa waf bu'unai ma ipe' piowis kingdom Ananinai ea' nose'asam enis epes nambimb sombale'efana sonda' waf bu'unai. [ 44#Dan 2:44,45Ea' emi egafis sanda' sisi'ip sowa owap anama, pepe'etas. Ea' i'i owap anama nowa nosali'as, esis loloweas si'i sopof atona.]”

45Ea' amam pris dambami maloma amam Farisi mame' basef amama womun etin Jisas na'iami ma'i anan nondala'wifa amam na'i basef amama. 46#Mt 21:26Ea' mape magolopa eaf mombalo'ana ea' amam umbamahama esis amam nematawa. Dei' main, esis hiesi sombale'efana la'ifis sa'i Jisas anona profet.

Currently Selected:

Matyu 21: aojF

Highlight

Copy