Matyu 20
20
Basef womun etina amam manda' maola aof sawa mandelef wainanai
1“A'e, epes siowis kingdom heveni si'i anona aman nafamunagoma anona etap lu'wagoma. Ea' lala kuhimbita atona anan nafe'ma nufa'i anom amam monda' maol aof anama ananinai nawa su'utip mandelef wain napoma. 2Anan nafe' na'i naloma anom manda' maoli ea' nalomam ukup etifima otamba atuwasi meafa'ami, mofa' wan kina atona etina nemaf anama. Ea' nasapa'am mafe' manda' maol aof ananinai.
3Ea' anan nape ma aon nandegiai nape si'i 9 klok, anan nafe' ea' nati anom amam ata' tol maitu etin anama mondowa'anima mapoma. 4Ea' na'ipam na'i, ‘Ipe' wapoti' fo'o penda' maol aof ae'anai ma ease'epa otamba mondendaepa mondahama waf bu'unai.’ 5Ea' amam mafe'.
Ea' aon nahagasom 12 klok anan nafe' wapoti' ea' nanda'am na'ama etin si'i do'ok nanda'am.
Ama aon nasa 3 klok, nafe' nanda'am wapoti' si'i do'ok nanda'am.
6Ea' wambomota 5 klok, nafe' nati anom ata' maitu etin. Ea' na'ipam na'i, ‘Dei' maina ipe' ata' tol paitu etin na'ae nemaf anae' laona?’
7Ea' ma'ipana ma'i, ‘Ina anona aman nase'afa maol afa', owa'.’
Ea' anan na'ipam na'i, ‘Ipe' wapoti' fo'o penda' maol aof ae'anai.’
8Ea' wambomota felefele'ma owamb aman anama nafomona aofi nafi'i na'ipa aman numafi amam manda' maoli na'i, ‘Ine' fala manda' maoli amama hiami ea' nese'ama moni amam. Ine' nili' nese amam amama magi' matagai, nese'aman nefe' nefe' netagama amam amama mali' mataga manda' maoli.’
9Ea' amam amama mataga manda' maol wambomota 5 kloki, mataga mofa' wan kina atona etin. 10Ea' amam amama mali' mohafel kuhimbita manda' maoli, mafi'i ukup mandanda' ma'i atuwasi amam mofa' moni lu'unai nikila' anom. Owa'etin. Amam wapoti' mofa' wan kina na'ama etin. 11Ea' manda' megah mahana nafomona aofi.
12Ea' ma'iam na'ama ma'i, ‘Amam amama magi' matagai, amam mafi'i manda' maol nogota bandana si'i awa atitin, ea' ine' nase'ama moni anama na'ama etin si'i afa' ofa'anai. Ea' afa' wali' wanda' maol lu'unai endilisi ma nemaf launai, ea' owaf nahafa.’
13Ea' anan nagwamana basef anona aman amamunai na'ipana na'ama na'i, ‘Alupinai, ae' ina anda'ena awena, owa'. Afa' biafa wali' wa'iam ea' nomonas atifima pefa' wan kina etin. 14Ine' fa'a moni ine'inai ea' fo'o. Otamba ae' ase'enama ine'i, ea' ikwaf anama atona ae' ese'anama aman anama nagi' nafi'i nanda' maoli, pefa'am dende' etin. 15Ae' anda' maol si'i okom ae'anai na'iana moni ae'anai. Na'ama andeande'. Ae' anda' waf bu'unai ma imafi amam magi' mafi'i wambomota. Na'ama dei' ine' kowalena ma otamba amamumi ma main?’
16Anona nemaf na'ama etin, epes isima dei' sataga sagi'i agof a'asi sotaga agufisi sope sili', ea' epes isima sataga sali' agufisi, anona nemaf agof a'as sotaga sigi'.”
Jisas dei' na'iam wapoti' wenifa noga' notanima nehafel wapoti'
(Mk 10:32-34; Lu 18:31-33)
17Jisas na'i nondowasa' Jerusalem, anan nao'wa alupumi ananimi 12-peleim atom mafe'. Amam ata' mafe' etin eaf ea' na'ipam na'i, 18“Peme', dei' afa' ondowasa' Jerusalem. Ae' ataga epen endilisiwei nambimb anona aman nowalapa ae' ma amam pris dambami moloma amam dambami mawalipasa mi'uli Godi, ea' monda' kotimi ea' mi'i basef mondame'mam ma mohe eaga'. 19Ea' monda'e efe'ma esis sololama Godi ma sonda' findiwae ma basef awami sopagahowe sehe egaga' lawag usi'inai tu'wanainai. Ama nimeguf biam hi'ilam anona nefe'ma wanomi, God nefele ma hi'agif etanima ehafel wapoti'.”
Jems naloma owalomana Jon ma'i motaga mope dambami
(Mk 10:35-45)
20Nemaf anama Sebedi waulu'mana mama'wana Jemsi Jon kwao'wai batawisa'w akwa'umi biam safi'mai Jisas. Ea' kwindiwa nembawa kotawa etap kwa'ipana anom basef.
21Ea' Jisas nahali'akw na'i, “Ine' na'i ae' enda'mena main?”
Ea' kwa'ipana kwa'i, “Ine' ni'i anona nemaf netaga dembinai, nemaf anama ae' a'i batawisi amama ae'ami biam mope dembem felefele'ma ine', anona nil wa'ol egagili, ea' anona nil wa'ol da'isinaima.”
22Akwa'w kwa'iam na'ama, Jisas nagwama'w na'ipa amam na'i, “Ipe' ina pegawa andeande'ma amamaga ipe' pahali'imami, owa'! Ipe' bipa la'ifipama pegwa' embela kap anama dei' ae' egwa' embelanai, o owa'?”
Ea' magwamana ma'ipana ma'i, “Afa' wila la'ififa.”
23Ea' Jisas na'ipam na'i, “Endilisi, ipe' bipa nambimb pegwa' embela kap anama ae' egwa' embelanai. Ea' pepe lagel da'isinai o egagili ae'ami, amama ina maol ae'anai, owa'. Ahalome atona ni'i esis isima nandandepas ea'i, esis etis sope lagof da'isinai o egagili ae'ami.”
24Ea' alupumi Jisasi tu'wanim 10-peleim mame' amam biam ma'iam na'ama, manda' megah mahama amam sahalomana owalomana. 25#Lu 22:25-26Ea' Jisas nofala alupumi Ananimi 12-peleim mafi'mai anan, ea' na'ipam na'i, “Ipe' pegawa, anom king mape dambami ma isima sololama Godi, amam mape ilifa esis endilisi manda'as kwapete'as. Ea' amam dambami mape la'ifim endilisi ma manda' esis amam nematawa saila malogof amamumi. 26#Mt 23:11; Mk 9:35; Lu 9:48Ea' waf anama ina nepoma ipe', hapainai. Emi aman nope dembinai ma ipe', anan ata' nili' nope si'i nanda' maol etina ipe' hipei. 27Ea' emi aman ni'i notaga dembeni ma ipe', anan ata' nopan si'i agel a'anai nanda' maol etin nape owina hiesi. 28#Lu 22:27; Fl 2:7; 1 Ti 2:6Ae' ataga epen endilisiwei, ae' wapoti' na'ama etin. Ina afi'i ma esis sonda'me maola siegiambame, owa'. Ae' afi'i enda' maola igiambama ipe' hipei. Afi'i ma sehe ega' etala ipe' peloma epes hiesi etagahipama waf aonai ipe' panda'anai.”
Jisas nanda' amam biam naep mase'ami bo'om mati andeande'
(Mk 10:46-52; Lu 18:35-43)
29Ea' Jisas naloma alupumi ananimi makwaha wambel anama Jeriko ma'i mefe', amam nematawa hiesi sailana safe'. 30#Mt 9:27, 15:22Ea' amam biam naep mase'ami tol mape felefele'ma eaf. Ea' mame' basef sa'i Jisas nafi'i ea' mofalana mehip ma'i, “Dembinai, ine' akunamana Deviti,#20:30 Niti futnot Matyu 12:23. niti afa' uwahipifa!”
31Ea' esis amam nematawa hiesi sinifalom sa'i mosopama malogof. Owa'etin. Amam mofalana mehip endilisi ma'i, “Dembinai ine' akunamana Deviti, niti afa' uwahipifa!”
32Ea' Jisas naitu nofala amam biam na'i, “Ipe' bipa pa'i ae' enda'mepa main?”
33Ea' amam ma'ipana ma'i, “Dembinai, afa' wa'i ine' newalamafa naep afa'imi ma witi andeande'.”
34Ea' Jisas nati amam owahipim nasa lagof ananimi naep amamumi, ea' dei' etef amam biam mati andeande' wapoti', ea' magi'ma Jisas mafe'.
Currently Selected:
Matyu 20: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
