Matyu 19
19
Jisas na'i waf anama satopa' dase'amainai
(Mk 10:1-12; Lu 16:18)
1Jisas na'i basef amama mafe' ea', nakwaha etap anama hiagoma Galili nafe' anona etap hiagoma Judia gani wa'ol walemb Jordan gani fisana. 2Ea' amam nematawa hiesi sailana safe' ea' nanda' epes hiesi ambo'wes.
3Ea' anom dambami Farisi mafi'mai anan mahali'ana anom basef magwambana ma'i, “Mi'uli ape'inai andeande'ma anona aman nondaiwa'ma nemata'w anani'wi nokwaho'wa okom ananinai atona o owa'?”
4Ea' anan nagwamama basef amam na'i, “Ipe' patalifa basef amama Godi pagawam ea'. Basef amama ma'iam na'ama ma'i, ‘Fowa' gani dambadamba God nanda' amamaga hiami nanda' epes sataga amam nematawa.’
5Ea' God na'i, ‘Na'ama esis bias ina ata' sope si'i sape deindei, owa'. Aman nokwaha mamasana ananisi nefe' noloma waulu'mana anani'wi, esis bias sope alop atotona.’ 6Ea' esis bias sondase'ama sotaga si'i alop etifina. Esis ina ata' sape biasa sape deindei, owa'. Ea' esis God nakolasis sape la'ifis, isima God na'i enin epen ina nehape'as, owa'.”
7Ea' Farisi amama ma'ipana wapoti' ma'i, “Moses na'ipapa mi'uli anama na'i, aman nonda' anom basef mil okwatip nose'akwana nokwaho'w kofe'.”
8Ea' Jisas na'ipa amam na'i, “Ipe' patopa' basefi. Dei' Moses na'i a'e ma eaf anama dei' pailana pagalo'ma wauhiamepa patopa' waf dase'amainai. Fowa' gani dambadamba ina anom basef mape na'ama, owa'. 9Ae' a'ipipa a'i, I'i ano'w nemata'w anona amani owa' konda' waf aonai so'a waulanai, ma anan nogolo'makw noso' ano'w wapoti', anan nanda' waf aonai so'a waola nemata'w akwama nali' nase'akwi.”
10Ea' amam alupumi ananimi ma'ipana ma'i, “I'i waf anama endilisinai ma owa' neape la'ela'ef noloma akwa'w, dase'ama hapainai. Ea' andeande'ma nemata'w a'ana nope etin.”
11Ea' anan na'ipam na'ama na'i, “Ina nambimb amam nematawa hiesi la'ifis sofa' basef amama sombale'am, owa'. Epes isima God nase'as pepel ea', esis etis sofa'am.
12Dei' main, amam na'amaimi mape amam owa' la'ifima mease' nematawai. Ea' anom mamalawa amamuwai olam ea' la'ela'ef mape na'ama. Ea' anom, amam matopa'am alop amamunai. Ea' amam ina la'ifima measo' nematawa, owa'. Ea' anom, okokoma miegiambama epes hiesi siowis kingdom heveni. Na'ama mandaiwa'ma mease' nematawa. Emi aman la'ifina niela basef amama, anan nilam andeande'.”
Jisas nase'asa basef bu'wami esis awasi
(Mk 10:13-16; Lu 18:15-17)
13Nemaf anama esis sao'wamanai enis awasi sofa'as safi'mai anan, sa'i anan nowamona lagof ananimi ma awasi isima ni'ipasa basef bu'wami ma God nefalo'mas. Ea' alupumi ananimi ma'ipa esis owa' sofa'as safi'mai anan.
14Ea' Jisas na'i, “Ipe' kwahowas awasi isima sifi'mai ae'. Ipe' ina pindaiwa'mas. Fa'asi sifi'mai Ae'. Dei' main, esis amam nematawa siowis kingdom heveni, esis same' basef Godi sailam si'i awasi isima.”
15Ea' nawamona lagof ananimi balagah asasimi, nakwaha esis nafe'.
Aman sa'unai amamaga hiamunai
(Mk 10:17-31; Lu 18:18-30)
16Ea' anona aman nafi'i na'ipa Jisas na'i, “Dembinai Tisa, ae' nambimb enda' maina waf bu'unai ma efa' ambal namunai epe andeande' la'ela'ef?”
17Ea' Jisas na'ipana na'i, “Dei' maina ine' nahali' ae' ma amamaga amama? Anona aman atotona nape ilifi Anan bu'unai. I'i ine' ni'i nefa' ambal namunai, andeande'ma nila basefa mi'uli fowa' God naso' Mosasanai hianai.”
18Ea' aman anama nahali' Jisas na'i, “Maina mi'uli?”
Ea' Jisas nagwamana basef na'ipana na'i, “Ina nenda' waf aonai so'a waulanai, neha enis epes sega' nenda' wal, owa'. Ina neambaso'ma enis epes, 19ine' nepe owina mamasena ine'isi neme' basef asasimi nilam ea' nimafias andeande'. Ine' okom ninila enis sape felefele'ma ine'i, si'i ine' okom nainaila ine' etina ma nimafi ine'.”
20Ea' aman anama ata' sa'unai awaminai na'ipa Jisas na'i, “Mi'uli anama hianai ae' embale'efana ailana afi'i ea'. Dei' maina waf ata' nape?”
21Ea' Jisas na'ipana na'i, “I'i ine' ni'i neataga bu'winai endilisi, ine' fo'o nese'asa amamaga ine'imi ma enis epes sotalinama nefa' moni anama nenda'ana nese isima kwahusi. Nenda'am na'ama ma anona nemaf nefa' amamaga bu'wami gani ilif heven. Ea' ine' nifi'i nila ae'.”
22Ea' aman anama sa'unai name' basef amama, okom ananinai nimanina ea' nandamboma megah atogah nafe'. Dei' main, anan amamaga hiamunai.
23Ea' Jisas na'ipa alupumi ananimi na'ama na'i, “Ae' a'ipipa endilisi, epes isima wiga moni hianaisi, sanda'am ahifim endilisi ma sefe' siowis kingdom heveni. Atona etin sefe' siowis. 24Ae' a'i i'ipipa wapoti', anona mafin lu'unai kamel nuwis nil nagala sagundisa luwagufanai, anama wila ma niowis. Ea' amam nematawa amamaga hiamisi sefe' siowis kingdom Godi, sonda'am ahifim endilisi ma sefe' siowis. Eaf anama ahifina endilisi nikila' maol kamel nuwis nil nagala.”
25Ea' alupumi ananimi mame' basef amama, amam gegelalasom kwapete'am endilisi. Ea' ma'i, “I'i na'ama, anona nemaf God nefa' emi egafis sotanimani seape andeande' la'ela'ef? Owa'etin.”
26Ea' Jisas naniga nati amam na'ipam na'i, “Amamaga epes owa' la'ifisa seanda'ami, amama God atona la'ifinai ma nonda'am. Anan la'ifinai nonda' amamaga hiami.”
27Ea' Pita nagwamana basef na'ipana na'i, “Neme', afa' ea' wakwaha amamaga afa'imi hiami, ea' dei' wafi'i wambale'efa basef ine'imi wailina. Afa' anona nemaf ofa' maim amamaga?”
28Ea' Jisas na'ipam na'i, “Ae' a'ipipa endilisi. Owagama nemaf anama neataga ma amamaga hiami meataga dambaim wapoti', nemaf anama ae' ataga epen endilisiwei, efa' pepel howalagon atoma balata king ae'anai. Nemaf anama ipe' amam ae'ipei pail ae'i ipe' 12-peleipa petoma siaifah bu'wami amam dambami kingi 12-peleim, ea' pewaloga wambotagw 12-peleim amam nematawa ape'isi Isrel. 29Ea' emi egafis ukup asasimi mopoma ae' sokwaha ifagw moloma sahin owan ahapas mamasas batawisas moloma aof amamaga maim asasimi, anona nemaf sofa' amamaga hiami endilisi mikila' asasimi fowa'imi. Ea' anona nemaf sofa' ambagof namumi sopan andeande' la'ela'ef hihif. 30Ea' epes hiesi dei' sataga sali'i agof lu'womisi, anona nemaf owagama agof a'as sotaga sigi'. Ea' epes isima sataga sagi' owagama sofa' agof lu'wami sotaga sili'.”
Currently Selected:
Matyu 19: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
