YOUKOIKJAI 3
3
Sokebü Müt Che Maitibü
1Peter si Johan welaubü jihsiphai chenei chasemlamto angh sem thünga Lembüchem to angko kiteikei. 2Kheijinei buknyet ka thama sokebü müt che kei leibako kikei. Chaangboua haoenei hao kho Hemaibü Bakou dogo laubou Lembüchem koukhüna Lembüchem to loubü shuong ka hishau hiyungtila shanga apyoko kikei. 3Haoei Peter si Johan Lembüchem to atla kümjinei hapbei hoba haosi ka hikei. 4Haosi hamei hao to tangko chühkei hoba Peterei laukei, “Küsi to chühkai.” 5Haoei haosi ka denche hapoulabü dogo daman nyek thean chühkei; 6lausikei Peterei laukei, “Ngei hon ayingsi chandinam aki, lausikei ngei ai ki kho ka la kuda: Nazaretbü Jisu Khrista nyena paiashi!” 7Haoei mae ikei hao jenan loentikei. Khoyam haoeibü you si youngümshang pendou hau kingaikei; 8#Isa 35.6 hao toman shatko loenkei hoba paikei, hoba hao haoen yoa Lembüchem to saiko lakko hoba Mühghaü nyen sangko paijung haukei. 9Müt pendouei hao paiko hoba Mühghaü nyen sangko hapbei, 10hoba haoenei hao kho Lembüchem Hemaibü Bakoua hishau hiyungko setbou kho yingkei dogo shenkei; haoenei hao to haüthükbü kho hapan haoen mokbü hoba maangpangbüei shenkei.
Peterei Lembüchema Songlenbü
11Ladang hao Peter si Johan yoa kakyoan hapbei, mütshuong maangpangbüa Solomoneibü chemsophang dogo laubü khüto lang- yoko yoshaikei. 12Ladang Peterei kho hapbei haoei mütshuong to laukei, “Israel mütshuong, kan aila ho to maangpangda, alausikei hao küneibü seiei hoba saopobüei paitikei laula maiko kanei aila kün to hainyu chühda? 13Abraham Mühghaü, Isak Mühghaü hoba Jakob Mühghaü, hoba sen pisibousieibü Mühghaüei, kanei Pilat thedanga asungletbou hoba khümbo kuan apbou haoeibü sambü Jisu soneikangtikei. Pilatei hao litila maangangkei, 14lausikei kanei saopobü hoba ngühmai kho asunglet. Kanei müt haitibou kho kan la litikula shanga phekei, 15hoba kanei ao ka langkei hapda hao bouje haitikei. Lausikei Mühghaüei hao haibü ka langngeitikei. Kün khoeibü aukabü shuong ki. 16Ho haoeibü nyen hoba kho mailem nyena ong kanei hao tou hapbü hoba ngebü tegü ho müt to hau kikei, hoba kan pendouei hapbü tegü kho müt la hao danko ong hau longeiko maitikei.
17“Hobaje tou, jaisinasi shuong, ngei ngeakei, kaneibü songdakbü shuongei kümbü tegü, kanei amin angeko kümbei. 18Mühghaüei kho tegü shaanglathama thuseibü shuong pendou danko haoeibü Messia khonkulabü dogo lenan phokubü loushedkei.
19“Hibü kanei shabü haman apla shanga maangpon kümetashi hoba Mühghaü jungto sepeiashi. 20-21Hibü shangiednyu Mühghaüei haoeibü thuseibü shuong danko lauan phokubü tegü, ao pendou kümetbü jihsiphai asüh shongko khuthüka sungletan kiteijan kho Jisu, kaneibü piensapbü Messia kho kan jungto hautiashi hoba Bunyubou yobü ka kan la maang pibülembü longtishima. 22Mosaei laukei, ‘Haoei ngo longtibü tegü Bunyubou kaneibü Mühghaüei kan jaisinasi shuong yoka thuseibü che longtilabü. Haoei ai ong lenlaje kanei haoei lenbü ditjan.’ 23#NA 18.19 Lausikei kho thuseibüeibü ngüha alebü danje müt yoka saopotham mautikulabü. 24Samuel hoba hao jeibü shuong ka khangan, thuseibü shuong pendouei laubü khokei habü chalou shuong shanga laukei. 25#Kao 22.18 Kan kho thuseibü shuongeibü shousi shuong ki hoba Mühghaüei Abraham to hai lauko kaneibü pisibousi shuong to theyolanyojinei, ‘Kaibü thensilen danko kaodak phangshou shuong pendou haükulabü’ dogo laubü phet kho kanei phanda. 26Kan mütpem weko lulueibü amaibü lam ka sepeitibü danko kan haütikulabü shanga Mühghaüei haoeibü sambü langngaitikei hoba kan jungto shaang hautikukei.”
Currently Selected:
YOUKOIKJAI 3: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
