YOUKOIKJAI 6
6
Thuibü shuong Müt Nyet
1Khübü chaloua ladang eikshuong kho lühbaka haako haukei, Grik ngühyem laubü Jihudabü shuongei Aramaik ngühyem laubü Jihudabü shuong khulimbei aishanga chaangbou shausiyung janbüa haoen aekabü latnyu shuong khoje wailetkei. 2#Leiy 18.15-26 Youkoikjai Anthüknyi khoei eika yobü shuong kho ngaishaikei hoba laukei, “Kaodakbü nyakanama ikjai lejinei Mühghaü Ngühlang hangletan phokulabü kho kün shanga maangkhailabü che aying. 3Hibü jaisinasi shuong, kan yo ka Soushouei hoba songeidoei shenbü kanei maang angbü müt nyet pienashi, hoba künei haoen kho kümaleia ikjai letilabü. 4Künje, kün lolo welaua khümbo kulabü hoba Ngühlang künbüa khangenlabü.” 5Lenbü kho pendou shaibü shuong pendouei olinko sungletkei hoba haoenei habü ho pienkei: mailem hoba Soushou Saopobüei shenbü Stefen, Filif, Prokhora, Nikanor, Timon, Parmena hoba Jihuda songlebou Antiok kabü Nikhola. 6Haoenei haoen dan kho youkoikjai shuong jungto leiban lenkei hoba haoenei haoeneibü khua ikei shangetan welaukukei.
7Kho tegü ong Mühghaü Ngühlang aakei. Jerusalema eikshuong aei aei mütshang yaangko lühbak haakei, hoba ungshedbü shuongkei juong mailem khüto lotkei.
Stefen Lapbü
8Stefenei, onou hoba seiei shenan, mütshuong yoa maang- panglabü hoba seikümseilei juong kümbo paikei.
9Lausikei Alexandria si Kurini ka Solo sinagoga yobü dan hoba Kilikia si Asia kabü at yoan, ajiaphaiko Stefen to ngüh wetyokei; 10lausikei haoei Soushouei jinkubü songsihonei laubü ngüh kho haoenei atokngaienko apbei. 11Kheijinei haoenei müt at jekthetan hai lautikei, “Haoei Mosa hoba Mühghaü khulimbo laubü künei dida.” 12Haoenei mütshuong, jaishou shuong hoba Ngühkhüm lenbou shuong pühnyintikei hoba hao lapan Sanhedrin jungto sungbakei. 13Haoenei hao khulimbo amlangbü hai laukei, “Ho müt hoei Saopobü Lembüchem hoba Ngühkhüm khulimbo laubü athaksapda. 14Aishanga Nazaretbü Bunyubouei ho Lembüchem ho leilutilabü hoba Mosaei sen la kubü hangsilam kho jeileilabü dogo ho mütei laubü künei dida.” 15Hobaje Sanhedrina setbü mütshuong pendouei hao to chühkei hoba haoeibü thenyek kho khuthük hangangbüeibü thenyek tegütham hapbei.
Currently Selected:
YOUKOIKJAI 6: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
