YOUKOIKJAI 8
8
1Hao haitila maangangbü kümsilei khünei Saul kei yoan kikei.
Saulei Lashong Shieikoebü
Khünyet Jerusalem lashong khulimbo shieikoebü yaang longkei. Youkoikjai shuong to liman haoen pendou Jihuda hoba Samaria kaonyek to linkhümbei. 2Songlea khümbo kubü shuongei Stefen khünkei hoba hao shanga mang haapyobü yaang kikei. 3Kheijinei Saul lashong dan shian apbo paikei. Hao chem chemto atan bousu yaksa pendou senjung louan thüngdang to jinko paikei.
Samariaa Ngühlangmaibü Phinthonbü
4Linan kibü shuongei kaoen pendoua songlenkei. 5Filip Samaria sangnyu to yankei hoba haoen la Ngühlangmaibü lenkei. 6Mütshuongei ladang Filipei lenbü ditkei hoba tetsida sei kümbü hapbei, haoenei lenbü to khoyam ong liko maangangan nou haangko ditkei. 7Aishanga müt juong to asaopobü soushou kikei hoba haoen ka soushou shuong kho kaangbang ngekyoko longan apbei; hoba phei haibü hoba sokebü shuong juong maitikei. 8Hobaje sangnyu khünei olinyobü yaang longkei.
9Simon dogo nyenan sangnyua müt cheei sei jungeiko kikei, hoba hao kho khei phangche dogo lenko Samaria mütshuong pendou maangpangtikei; 10hoba hanbü yaangbü pendouei “Ho müt ho la Yaangenbou dogo laubou Mühghaüeibü sei kia” dogo lauko haoei lenbülebü to aeibou ngüha lekei. 11Haoenei hao to ngüha lekei aieilausi jih lounyu haoen kho haoei sei kümbüa maangpangtiko loukei. 12Lausikei Filipei haoen la Mühghaü Sangle hoba Jisu Khrista nyen shanga songlenkei, hoba haoenei hao to mailembei. Haoen bousu yaksa juong baptikukei. 13Simoneikei mailembei, baptikei hoba Filip yoa yangkei; tetsida hoba amaa- philabü kümbü kho hapan haokei aeibou maangpangkei.
14Ladang Jerusalema kibü youkoikjai shuongei Samariaa Ngühlangmaibü sungleda dogo ditkei haoenei haoen la Peter si Johan hautikukei; 15haosi yankei hoba Soushou Saopobü sunglettila shanga welaukukei; 16aishanga haoen yoa aothüktokei Soushou Saopobü mo alotko kiteikei. Khün sühkoje haoen kho Bunyubou Jisu Khrista nyena ong baptian kiteikei. 17Kheijinei Peter si Johanei haoeneibü khua shangkei, hoba haoenei Soushou Saopobü sungletkei.
18Ladang Simonei Soushou kho youkoikjaibüeibü ikei shangetbü danko louko hapbei, haoei haosila nam kuko 19laukei, “Ngei aoyou thükto ong ikei shangetlaje Soushou sunglettilabü lele külakei kho sei kho kubüma.”
20Peterei hao to laukei, “Kaibü nam kayoa maushi aishanga Mühghaüeibü maangmai jongsak kho nyi namei jekthetlabü dogo damda! 21No Ngühlangmaibü hanei janletbü phejan ai aki, aishanga Mühghaü junga kaibü maangpon atangkei. 22Kaibü amaibü haka maangpon sepeiashi, thükalonga kaibü dambü shuong kho aptila shanga Bunyubou to welauashi; 23#Isa 56.6 ka la khauekbü kom jinkuakei hoba no amaibüeibü aaola yeiakei dogo ngei chühenda.” 24Simonei jongaikei, “Nyi laubü khübü kho tetche ongkei kü to ayingtila Bunyubou to kü shanga welaukushi.”
25Haoenei aukabü haüko kukei hoba haoen la Bunyuboueibü ngühlang kukei. Kho phaia haosi Jerusalem to ngaikei hoba lamoua Samaria sang juonga Ngühlang Maibü songlenkei.
Filip si Ethiopiabü Yaangbü
26Khuthük hangangbü cheei Filip to lenkei, “Meimeiashi hoba Jerusalem ka Gaza to yanbü yungthang aekabü lamnyu to hauashi.” (Kho yamlamang lam.) 27Hao meimeikei hoba haukei. Tou Ethiopia kabü Kandake Chobasao phanga saoeibü nyaksinam pendou thüka chühbou, Ethiopiabü sungphatbü yaangbü müt che Jerusalem to lemla haukei. 28Hao kailonga setan longeijinei haoei Isaia thuseibü le weko kikei. 29Soushouei Filip to laukei, “Hauashi hoba khünei setyoashi.” 30Filip hao jungto laangkei, hoba hao Isaia thuseibü le weko ditan phekei, “Nyi weko ditbü kho nyi tükde ditendaoba lo?” 31Haoei laukei, “Atei alenshongkoje ngei lai küman ditenla?” Hobaje haoei Filip to lotan hao yoa setla shanga phekei. 32Haoei weko kibü Lai kho ho kiteikei:
“San che tegü hao haitila nangkei;
hoba sanlon shoushou haoeibü wi khebü junga
ngüh alongbü tegü hao haa akou.
33Hao himoutikei hoba ngühmai matjem sunglangkei.
Haoeibü thensilen aoei wanenla?
Aishanga haoeibü langkei kho kaodak ka langa.”
34Kheijinei sungphatbou khoei Filip to laukei, “Thuseibou khoei hao shangabü laungeida si ayingsi müt at shangabü laudaje sanoudaman kü la lenkai.” 35Filipei lau khangkei, hoba kho Lai ngüh ka khangan hao la Jisu Khrista shangabü Ngühlang Maibü lenkei. 36Haosi haujinei deikhün che sühlangkei, hoba sungphatbou khoei laukei, “Chüh- ashi, hanei dei kia. Ngo hanei baptikulabü ka aieije toketda sai?” 37(Filipei laukei, “Kaibü maangpon khümboei mailema longa ho kümla thükakei.” Haoei jongaikei, “Jisu Khrista kho Mühghaü Shou dogo ngei mailemda.”) 38Haoei kailong kho thaktikei hoba Filip si sungphatbou haosi ham deikhün khüto atkei; hoba Filipei hao baptikukei. 39Ladang haosi dei khüka longkei Bunyuboueibü Soushouei Filip kho leilangkei hoba sungphatbou khoei hao ühüp; hoba hao haolam to olinangko ngaikei. 40Lausikei Filip Azataa loushedkei hoba hao Kaisar to aloushongko haoei sangnyu pendoua Ngühlang Maibü songlenjung dankei.
Currently Selected:
YOUKOIKJAI 8: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
