KAOBAK 11
11
Babel Laangshong Lapheishon
1Kho jiha kaodak khümboa ngühyem che hoba ngühang che kikei. 2Hobaje haoen chaangbou aeto shoongjung haujinei haoenei Shinar kaoa yo che hapbei, hoba khünei kikei. 3Hobaje haoen si haoen joyoko laukei, “Kaiya, senei tham nyatan ipan wana yingko juokkho.” Hibü haoenei laang jeila tham juokbü kho lekei, hoba khangyola bunai lekei. 4Hobaje haoenei laukei, “Kaiya, senei sangnyua laangshong lapheishon che müha jakko yaüakho, khei yingsi seneibü nyen kilabü hoba kaonyudak shenko alinlabü.”
5Lausikei Bunyubou khunak shousi shuongei yaübü sangnyu hoba laangshong lapheishon chühla louyenkei. 6Hobaje Bunyubouei laukei, “Chühashi, haoen pendou phang che, hoba haoen pendou ngühyem che ong ki, hoba haoenei kümsilei ho tou khangbü ong hoba tou haoenei ai kümla maangangda, haoenei pendou thüklabü haang. 7Kaiya, sen yanakho hoba haoen cheei che aditenlabü lele haoeneibü ngühyem lusaktikho.” 8#Lk 1.51 Hibü Bunyubouei haoen khüka kaonyudak shenko aatikei, hoba haoenei sangnyu yaübü nangkei. 9Hibü hoeibü nyen Babel dogo nyenkei, aieilausi khünei Bunyubouei khunakshousi ngühyem lusaktikukei hoba khüka Bunyubouei haoen kaonyudak shenko aatikei.
Shem Thensilen
(1 Ld 1.24-27)
10Habü ho Shem mütli. Yungsen phainei nyibou poa Shem po 100 jai kijinei Arpakshad hapbei. 11Hobaje Arpakshad bukan phaia Shem po 500 kijinei jayang nouyang shousi shuong kikei.
12Hobaje Arpakshad po 35 kijinei Shela hapbei; 13hoba Shela bukan Arpakshad po 403 lang kijinei jayang nouyangshousi bukkei.
14Shela po 30 kijinei Eber bukkei, 15kho phaia Eber bukan Shela po 403 kijinei jayang nouyangshousi kikei.
16Hobaje Eber po 34 kijinei Peleg kikei. 17Hobaje Peleg bukan phaia Eber po 430 kibü jiha jayang nouyangshousi kikei.
18Hobaje Peleg po 30 kijinei Reu kikei. 19Hobaje Reu bukan phaia po 209 kijinei toukei jayang nouyangshousi kikei.
20Hobaje Reu po 32 kijinei Serug kikei. 21Hobaje Serug bukan Reu po 207 kijinei jayang nouyangshousi kikei.
22Hobaje Serug po 30 kijinei Nahor kikei. 23Hobaje Nahor bukan Serug po 200 kian jayang nouyangshousi kikei.
24Hobaje Nahor po 29 kian Tera hapbei. 25Hobaje Tera bukan Nahor po 119 salang kijinei jayang nouyangshousi kikei.
26Hobaje Tera po 70 kijinei Abram, Nahor hoba Haran hapbei.
Tera Thensilen
27Habü ho Tera mütli. Tera ka Abram, Nahor hoba Haran pakkei; hoba Haran ka Lot pakkei. 28Haobou Tera lang kijinei Haran, hao bukbü kao Khaldi kabü Ur sanga haikei. 29Abram si Nahor chemdang yeikei, hoba Abrameibü yak nyen Sarai hoba Nahoreibü yak nyen Milka, sao kho Haraneibü shou hoba Isakeibü boukei hao ong kikei. 30Sarai kho angkongbü; saoei shousi akitei.
31Teraei haoshou Abram hoba Haran shou Lot haoeibü shi hoba haoeibü shoumaonyu Sarai, hao yoa leian Kanan kaodak to haula shanga Khaldibü Ur sangnyu ka meimeijung haukei. Lausikei Haran sühko hauan haoen khünei kikei. 32Tera po 205 kian Harana haikei.
Currently Selected:
KAOBAK 11: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
