KAOBAK 33
33
Jakobei Esau to Haüyobü
1Jakobei chühangtisi Esau haoeibü mütshuong saongao lei yoa louko hapbei, hibü haoei Lea si Rachel hoba sambüsao nyi yoa shousi shuong jankei. 2Hobaje haoei sambüsao hoba haoeibü shousi shuong thedang letikei, hoba kho phaia Lea si saoeibü shousi shuong hoba Rachel si Josef pendou to phaibou. 3Hobaje hao haoen thedang to haukei, hoba haojai asühtoua hao lolo kaoa nyetnei khüpetkei. 4Lausikei Esauei haoeibü insiaubu litian hao to haüyola laangjung haukei, hoba hao to sembung shepbei; hoba haosi haapyokei. 5Kheijinei Esauei tangko chühkei hoba yaksa shuong shousi shuong yoa hapan laukei, “Kayoa kibü habü ho aoyou?”
Jakobei jongaikei, “Kaibü sambü la Mühghaüei onouko kubü shousi shuong.” 6Kheijinei sambü sao hoba shousi shuong lousühkei hoba khüpetkei. 7Hobaje Lea si saoeibü shousi shuongkei nyangko louan khüpetkei. Thonla phaila Rachel si Josefkei lousühkei hoba khüpetkei.
8Esauei phekei, “Ngei haüyobü tan pendou kho ai tetlabü?” Jakobei jongaiko laukei, “Ngeibü bunyu thedanga üeisanou hapla shanga.”
9Lausikei Esauei laukei, “Küna, ngei souko kia, nyi kibü nyi lela phoashi.”
10Jakobei laukei, “Aying sanoudambo, nyi kü to maangshika longa ngeibü jongsak kü ik ka sungletshima, aishanga kaibü thenyek hapbü kho Mühghaüeibü thenyek hapbü phatkei, hoba nyi ngo maangshikko sungleda. 11Ngeibü jongsak laobou kajungto jungan loukei, sungletashi dogo ngei sudajada, aishanga Mühghaüei kü to onouko jungeisije ngei souko kia.” Kho tegü Jakobei susijasije Esauei sungletkei.
12Hobaje Esauei laukei, “Sen meimeian seneibü lama haukho hoba ngo ka thedangto haukho.”
13Lausikei Jakobei hao to laukei, “Ngeibü bunyuei ngeakei, nashousi shuong hau aki, hoba kü yoa kibü sanshuong si masu shuong haoen senyopbü shoushou ki hoba khübü kho chalou che to aeian leialonga sanshuong pendou hailabü. 14Ngeibü Bunyubou, kaibü sambü thedang to hauteishi hoba ngo yenko yenko küyoa kibü samkeisamuk shatsinam paibü hima hoba nashousi shuong paibü youyaüa leian ngei ngeibü bunyu jungto Seir shongh asühshongko loulabü.”
15Esauei laukei, “Khülonga ngei kümüt at kayoa apyokho.” Lausikei Jakobei jongaiko laukei, “Khei ai kümla? Ngei ngeibü bunyu thedanga maangshik ong haptibü.” 16Hibü Esau khünyet Seir to haubü lamto sepeinyu ngaikei. 17Lausikei Jakobei Sukot to hauan hao shanga chem che dangkei, hoba haoeibü shatsinam shanga dip che dangkukei. Khoei kho kaoen la Sukot nyenkukei.
18Jakob Padan Aram ka louan phaia, hao Kanana Shekhem sangnyu to louan sangnyu nyangko neichem dangan kikei. 19#Jn 4.5 Hobaje laobou kaoena haoei neichem dangkei; kho kao haoei Shekhemeibü bou Hamor thensilen ka sempak saongaoei jekkei. 20Khünei haoei lemshang che yaükei hoba khoto El-Elohe Israel dogo laukei.
Currently Selected:
KAOBAK 33: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
