LUK 23

Jisu Pilat Thedanga

(Mt 27.1-2,11-14; Mk 15.1-5; Jn 18.28-38)

1Haoen shuong pendou loenkei hoba Jisu Pilat thedangto leibakei. 2Hobaje haoenei hao attila khangko laukei, “Ho mütei kün mütli ayingbü to leilangko, Kaisar la khüm kubü shiletko, hoba hao lolo hao Khrista choba ki dogo lauko künei hapbei!” 3Pilatei hao to phekei, “No Jihudabü Choba lo?” Haoei hao to jongaikei, “Kho nyi lauda.” 4Pilatei ungshedbou shuong si noknyüh to laukei, “Ngei ho müt to shedbü ai alapenda;” 5lausikei haoenei aei ong kaangbou laukei, “Haoei Judea pendoua lenko mütshuong pühnyintida; haoei Galila khangkei hoba tou hao hanei kia.”

Jisu Herod Thedanga

6Ladang Pilatei kho ditkei haoei kho müt Galilbü yinglaoje dogo phekei, 7hoba ladang haoei Jisu kho Herod songdak kommang kabü dogo damenkei, haoei hao Herod jungto leian hautikei, aieilausi haokei kho jihsiphaia Jerusalema kiteikei. 8Ladang Herodei Jisu hapbei, hao aeibou olinkei; haoei chalou lounyu ka hao chühmang sühko kikei, aieilausi haoei hao shangabü ditan kikei, hoba haoei amaaphilabü at kümbü to chühla haoei dambo kikei. 9Haoei hao to ngüh juong phekei, lausikei Jisuei hao to ai ajongai. 10Ungshedbou shuong si Ngühkhüm lenbou shuong maangshat lamlam hao attiko khünei lokei. 11Herod hoba haoeibü sepai shuongeikei hao aeibou aweasüngko hoba nyikuko jungeikei; kheijinei haoei hao thükto soneibü nei neikukei hoba hao Pilat jungto leian ngaitikei. 12Khünyet Herod si Pilat cheei che to thangbou la yeikei; thedangtoje haosi dangbou kikei.

Jisu Haitila Ngühkhüm Kubü

(Mt 27.15-26; Mk 15.6-15; Jn 18.39—19.16)

13Pilatei ungshedbou shuong, leiyeibü shuong hoba mütshuong pendou chela ngashaikei, 14hoba haoen to laukei, “Kanei ho müt kü jungto mütshuong ayinglamto leilangbou che tegü leibuakei. Ngei hao kan thedanga phanan chüha hoba ngei kanei hao khulimbo sungbabü khünei hao shedlabü lele aikei ühüpou; 15ayingsi Herodeikei alapen aishanga haoei hao sen la leian ngaitikuakei. Haoei haila muko aikei akümbei. 16Hibü ngei hao semeilabü hoba litilabü.” 17(Püetbülem weko Pilatei haoen la thüngdang kabü che litikujan.) 18Lausikei mütshang pendouei ngekkei, “Kho müt haitiashi; kün la Baraba litikuashi.” 19Baraba kho haoei sangkhu limbo khüpyobü shanga hoba müt haitibü shanga thüngdang to jinkei. 20Pilatei Jisu litimang sühko haoen to nyibou la joyokei; 21lausikei haoenei, “Peiseia thüngashi, hao peiseia thüngashi!” dogo ngekdang lekei.

22Haoei haoen to semboula lenkei, “Aila, haoei ai amaibü kümbei? Ngei hao to hailabü kayang muko ai ühüpenda. Hibü ngei hao to semlabü hoba litilabü.” 23Lausikei haoenei kaang ngekko hao haoenei mangsühbü tegü peiseia thüngashi dogo aeibou thungeikei, hoba haoenei ngekbüei thükan apbei. 24Hibü Pilatei haoenei mangsühbü sakkula janthetkei. 25Haoei haoenei mangsühbü müt, ao khüpyobü hoba müt haitibü shanga thüngdang to jinan kibou kho litikukei; lausikei Jisu, haoenei mangsühbü tegü haoei kuan apbei.

Jisu Peiseia Thüngbü

(Mt 27.32-44; Mk 15.21-32; Jn 19.17-27)

26Haoenei hao leilangjinei Kurinibü Simon, yen ka louko kibü lapbei, hoba Jisu phainei pean semtila shanga peisei kho hao la tonan jinkukei. 27Mütshang yaang hao phainei yangkei, hoba yaksa shuong khüklang to jangngailangko hao shanga manghaapbo sembei. 28Jisuei haoen ae sepeikei hoba laukei, “Jerusalem nouyangshou shuong, kü shanga tühaap, aeiko kan shanga hoba kaneibü shousi shuong shanga bouje haapashi, 29aishanga jihsiphai che louada, laonei mütshuongei hai laulabü, ‘Angkongbü shuong, ladangkei na abukbü shuong, hoba ladangkei na ayopbü shuong olinbou.’ 30Kheijinei haoenei shongh shuong to laulabü, ‘Kün thükto lotkai’, hoba shonghshou to laulabü, ‘Kün küplepkai.’ 31Aishanga mütshuongei bunyu sangtinga khei kümsije, kho linan phaia ai kümla?”

32Amaibü kümbü shuong, lubü müt nyi, hao yoa haitila shanga leian haukei. 33Hobaje ladang haoen “Khulo”, dogo nyenbü kaoen to loukei, haoenei hao khünei peiseia thüngkei, hoba amaibü kümbü müt nyi che maenei hoba che nanaenei peiseia thüngkei. 34#NC 22.18 Jisuei laukei, “Abou, haoen la amai apbushi; haoenei ai kümdaje kho haoenei angekei.” Haoenei phaang pakko haoeibü neisimei haoen yoa jankei. 35Mütshuongei khüto chühko lokei. Leiyeibü shuongeikei nyikuko laukei, “Haoei lubü shuong püetkei; ho müt Mühghaüei pienbü Khrista yinga longa, hao lolo püetashi.” 36Sepai shuongeikei hao to nyikukei. Haoen hao jungto loukei hoba hao la haijepbü dei kuko 37laukei, “No Jihudabü Choba yingsije, no lolo püetashi.” 38Khünei tokei hao thüka, “HO JIHUDABÜ CHOBA” dogo doan kikei.

39Amaibü kümbü peiseia saüan phobü cheei hao khulimbo nyikula khangko laukei, “No Khrista aying si? No lolo püetashi hoba küsikei püetkai.” 40Lausikei che khoei hao to hakko laukei, “Nyije Mühghaü to ongkei ühütda lo? Nokei hao to jeteibü kayanga kia. 41Seti shangaje ho janbü ki, aishanga setieije setieibü kümsilei mubü hapngaida, lausikei ho müteije ai shedbü akümbei.” 42Hobaje haoei laukei, “Jisu, no kaibü Sanglea loujinei ngo damenashi.” 43Jisuei hao to laukei, “Ngei ngühmaia kato lenda, tat no kü yoa Paradaisa kilabü.”

Jisu Haibü

(Mt 27.45-56; Mk 15.33-41; Jn 19.28-30)

44Tou ho chajihbou kikei. Kaonyek pendoua angh sem jih asühshongko nakthüh lotkei, 45hoba chanyu ngesakbü ohauko apbei; hoba lembüchema thangbü nei jenyu ka jitthetkei. 46Jisuei ngüh yaangbüei ngekko laukei, “Abou, ka ik to kü soushou kuda”; hoba haoei kho lauan phaia hao haikei. 47Ladang saongao thükkabouei haüthükbü kho hapbei haoei Mühghaü la soneikangbü kuko laukei, “Maimaitham ho müt saopobü kiteikei.” 48Khünei jichühko shaibü mütshang pendouei ai haüthükkei kho hapbei hoba haoeneibü khüklanga jangngaiko haapbo ngaikei. 49Lausikei hao ngean kibü shuong pendou heebüa lokei. Kho tegü Galil ka hao phai sembü yaksa shuong pendouei tangkünga khübü pendou to chühko lokei.

Jisu Khünbü

(Mt 27.57-61; Mk 15.42-47; Jn 19.38-42)

50Müt che Josef dogo nyenan, daman chühbou che kikei. 51Ho mütei haoeneibü huonsiyou hoba kümsilei aineikei ayo. Hao Jihudabü sangnyu che, Arimathia ka kikei, hoba hao Mühghaü Sangle haiyeiko kikei. 52Hao Pilat jungto haukei hoba Jisueibü mang hiletkei. 53Haoei kho sungletan nei inyaibüei shokei, hoba aokei khünan achühbü laang ka jakenbü hee chenei hao khünkei. 54Ho Lamlebü chalou kikei, hoba Nounyet sühko kikei. 55Hao yoa Galil ka loubü yaksa shuong phainei sembei, hoba haoenei hee hoba haoeibü mang lai khünkei kho hapbei. 56Hobaje haoen ngaian ponlem si onang lamlekei. Lausikei haoenei ngühkhümei sakkubü tegü Nounyet haksokei.

Currently Selected:

LUK 23: CHANGBSI

Highlight

Copy