SAN JUAN 20

Jesús oikove ye

(Mt 28.1-10; Mc 16.1-8; Lc 24.1-12)

1Tenondegua ara semana iyɨpɨ pe, ndei köe kavi mbove María Magdalaɨgua ojo tɨvɨa pe, jare oecha ita oyembosɨrɨ oï tɨvɨa güi. 2Jayave osɨi ojo Simón Pedro jare ïru temimboe Jesús oaɨu vae ñogüɨnoia pe, jare jei chupe reta:

—Güɨraja reta ma yandeYa tɨvɨa güi, jare mbaetɨ roikuaa kia pe ra oñono reta vae.

3Jayave Pedro jare ïru temimboe ñogüɨnoe yogüɨraja tɨvɨa kotɨ. 4Mókoi reve osɨi päve yogüɨraja, ërei ïru temimboe iñäkua yae Pedro güi, jare ojo tenonde oväe tɨvɨa pe. 5Jare omae japɨpe kotɨ yave, oecha nieso reta joko pe oï, ërei mbaetɨ oike. 6Jayave Simón Pedro ojo oväe jaɨkue rupi, jare oike tɨvɨa pe. Jare oecha nieso reta joko pe oï. 7Oecha vi nieso Jesús iñäka re oñeñono vae oyemboyeapa jare oï tee ïru nieso reta güi. 8Jayave jókuae ïru temimboe, Pedro jenonde ojo oväe vae oike vi tɨvɨa pe, oecha jare oporogüɨrovia. 9Echa ndei vɨteri oikuaa kavi reta Tumpa Iñee jei vae, kërai Jesús oikove ye tai ko omanogüe reta ipɨte güi vae. 10Jayave temimboe reta yogüɨraja ye tëta pe.

Jesús oyekuaa María Magdalaɨgua pe

(Mc 16.9-11)

11Ërei María oyaeo oï tɨvɨa iyɨpɨ pe. Jare oyaeo oï ramboeve, omae tɨvɨa japɨpe kotɨ yave, 12oecha mókoi araɨgua reta jemimonde tïiasɨ vae oguapɨ ñogüɨnoi Jesús jetegüe oñeñonoa pe. Metei oguapɨ oï Jesús iñäka jendagüe kotɨ jare ïru oï Jesús ipɨ jendagüe kotɨ. 13Araɨgua reta jei María pe:

—Kuña, ¿maera pa reyaeo?

María jei chupe reta:

—Güɨraja reta cheYa, jare mbaetɨ aikuaa kia pe ra oñono reta.

14Kuae jei ma yave, María oyerova jare oecha Jesús oyemboɨ oï joko pe. Ërei mbaetɨ oikuaa Jesús ko vae. 15Jayave Jesús jei chupe:

—Kuña, ¿maera pa reyaeo? ¿Kia pa reeka?

María oyemongeta kó raɨ iyangarekoa ko vae. Jáeramo jei chupe:

—Cheya, nde reraja yave, emombeu cheve kia pe reñono, jare che arajata.

16Jesús jei chupe:

—¡María!

María oyerova ikotɨ jare jei chupe:

—Raboni (kuae oipota jei: “Oporomboe vae”).

17Jayave Jesús jei chupe:

—Agüɨye chepɨɨ. Echa ndei ayeupi cheRu pɨri. Ërei ekua emombeu cherɨvɨ reta pe che jae körai: “Ajata ma cheRu pɨri, jae ko peRu vi. Jae ko cheTumpa, jae ko peTumpa vi.”

18Jayave María Magdalaɨgua ojo omombeu jemimboe reta pe, jei:

—Aecha yandeYa.

Jayave omombeu chupe reta Jesús jei chupe vae.

Jesús oyekuaa jemimboe reta pe

(Mt 28.16-20; Mc 16.14-18; Lc 24.36-49)

19Jare jókuae pɨ̈tu voi tenondegua ara semana iyɨpɨ pe, Jesús jemimboe reta oyemboatɨ jare oyokenda jöke reta, okɨɨye reta judío reta güi jeko pegua. Jayave ou Jesús oyemboɨ ipɨte pe, jare jei chupe reta:

—Mbɨakatu toï pe ndive.

20Kuae jei güire, Jesús oechauka chupe reta ipo jare iyɨke. Jayave jemimboe reta oyerovia oecha iYa vae re. 21Jayave Jesús jei ye chupe reta:

—Mbɨakatu toï pe ndive. CheRu chembou rami, che pomondo vi.

22Jare kuae jei ma yave, oipeyu ikotɨ reta jei reve:

—Pemboresive Espíritu Santo. 23Peɨ̈ro yave oipotagüe vae pe iyoa re, Tumpa omboaita ko iyoa. Jare peɨ̈roä yave oipotagüe vae pe iyoa re, iyoa ngaraa oyemboai.#Mt 16.19; 18.18.

Tomás mbaetɨ güɨrovia Jesús regua

24Jare jókuae doce jemimboe reta güi metei Tomás jee vae jae ko Chaguakiri oyeero vae mbaetɨ oï joko pe ïru reta ndive Jesús ou yave. 25Jare ïru Jesús jemimboe reta jei Tomás pe:

—Roecha yandeYa.

Ërei Tomás jei:

—Aecha yave oyekutu rendagüe ipo re jare amoingeä yave chepoäka clavo jendagüe pe jare amoingeä yave chepo iyɨke pe, ngaraa arovia.

26Juri ara ma oasa yave, temimboe reta ñogüɨnoi ye jókuae o pe. Tomás joko pe oï vi. Yepe tëi öke reta oyeokenda ñogüɨnoi, ërei Jesús ou oyemboɨ ipɨte pe jare jei chupe reta:

—Mbɨakatu toï pe ndive.

27Jayave jei Tomás pe:

—Emae chepo re. Eñono kuae pe nepoäka. Embou ndepo, emoinge cheɨke pe. Agüɨye eiko ndeporogüɨroviambae. ¡Eporogüɨrovia!

28Jayave Tomás jei:

—¡CheYa jare cheTumpa!

29Jayave Jesús jei chupe:

—Rerovia ma Tomás, chereecha ramo. Oyeroviata ko jókuae chereechambae reve güɨrovia vae reta.

Maera oyeapo kuae tembikuatía

30Jesús oyapo vi jemimboe reta jovake jeta ïru mɨakañɨ reta, yepe tëi mbaetɨ oyekuatía oï kuae tembikuatía pe. 31Ërei kuae oyekuatía ko, perovia vaerä Jesús ko jae Cristo, Tumpa Taɨ, jare penoi vaerä tekove jese perovia yave.

Currently Selected:

SAN JUAN 20: GUABD

Highlight

Copy