SAN LUCAS 17
17
Oyavɨuka ïru pe vae
(Mt 18.6-7,21-22; Mc 9.42)
1Jayave Jesús jei jemimboe reta pe: “Oime tai ko mbaemboavai reta. Paravete jókuae, mbaemboavai oñono ïru vae pe vae. 2Ikavi ko oñapɨti iyayu re metei ita tuicha vae oyembaeso pɨpe vae, jare oyemombo ɨguasu pe, agüɨye vaerä mbaemboavai oñono metei michia güɨrovia cheré vae pe. 3Peyeandu. Nerëtara iyoa yave ndekotɨ, emboeta chupe. Jare jae oyembopɨambuae yave jeko re, neɨ̈ro chupe.#Mt 18.15. 4Jare metei ara pe chiu iyoa ndekotɨ yave, jare chiu vi jókuae ara pe ou jei ndeve yave: ‘Ngaraa ma ayavɨ ndekotɨ’, neɨ̈ro chupe.”
Mborogüɨrovia re
5Jayave yandeYa jemimondo reta jei chupe:
—Emoïru oreve oreporogüɨrovia.
6Jayave yandeYa jei:
—Peporogüɨrovia michi yae metei mostaza jäɨgüe michi yae rami yave mona, pepuereta pere kuae ɨvɨra sicómoro jee vae pe: Esɨrɨ kuae güi ekua ɨguasu pe, jare ɨvɨra oyapota pere vae.
Tembiokuai jembiapo
7“¿Kia pa pegüi reta güɨnoi metei jembiokuai vae ombaeara ani mɨmba reta omongarúa güi ou vae pe jei: ‘Eyu eguapɨ kuae mesa pe ekaru’? 8Mbaetɨ ko, jaeño pere: ‘Ekua räri eñemimo cheve, javoi opa ma akaru yave, ndepuereta rekaru.’ 9Jare tembiokuai oyapo vae re ¿pemee ra yasoropai? Arovia mbaetɨ. 10Jaeramiño vi pe reta peyapo ma opaete Tumpa jei peve peyapo vaerä vae yave, pere: ‘Ayapoä mbae ayemboeteuka vaerä. Echa jaeño ayapo, cheokuai ayapo vaerä vae.’ ”
Payandepo kuimbae ipire mbaerasɨ ókui vae
11Jare Jesús ojo Jerusalén kotɨ yave, oasa Samaria jare Galilea ipäu rupi. 12Jare ojo metei tëta raɨ pe oväe yave, oë oövaiti payandepo kuimbae ipire mbaerasɨ ókui vae reta. Ërei jae reta mombɨrɨño oyemboɨ reta Jesús güi, 13jare osapúkai reta jei reve:
—¡Jesús, oporomboe vae, oreparareko!
14Jare Jesús oecha reta yave, jei chupe reta:
—Pekua peyeechauka sacerdote reta pe.#Lv 14.1-32.
Jare yogüɨraja ramboeve, okuera reta imbaerasɨ güi. 15Jayave metei chugüi reta oecha ma okuera yave, osapúkai reve omboete Tumpa ou ye oiko, 16Jare oyetavatɨka itindɨasɨ reve Jesús jóvai jare omee yasoropai chupe. Jare jókuae jae ko Samariaɨgua. 17Jayave Jesús jei:
—¿Payandepoä yera okuera vae reta? ¿Jama pa chau vae reta? 18¡Jaeño kuae metei judiombae vae ou ye omboete vaerä Tumpa!
19Jayave jei jókuae kuimbae pe:
—Epüa jare ekua. Rekuera ma, rerovia cheré ramo.
Tumpa iporookuaía outa vae regua
(Mt 24.23-28,36-41)
20Jare fariseo reta oparandu Jesús pe kërai yave ra outa Tumpa iporookuaía vae. Jayave Jesús jei chupe reta:
—Tumpa iporookuaía ngaraa oyekuaa ou. 21Jaeramiño vi ngaraa kia jei: “Mase, ko oï”, ani “mase, pe oï.” Echa Tumpa iporookuaía oime ma pepɨte pe oï.
22Jayave Jesús jei jemimboe reta pe:
—Outa ara reta peipota yae vaerä chereecha tëi che kuimbaerä ayeapo vae metei ara yepe, ërei ngaraa chereecha. 23Jayave ïru vae reta jeita peve: “Mase, ko oï”, ani “mase, pe oï.” Ërei agüɨye pekua ani peeka. 24Echa ama overa vae oyekuaa opaete rupi. Jökoraita vi che Kuimbaerä ayeapo vae cheara oväe yave. 25Ërei aiporara yaeta räri ko, jare añave yogüɨreko vae reta chereröɨrota. 26Noé#Gn 6.5-8. oiko yave ɨvɨ pegua reta ndive oasa rami. Jökoraita che Kuimbaerä ayeapo vae cheara oväe yave. 27Iarete reta, okau reta, omenda reta jare oyomomenda reta, Noé oike regua arca pe. Jayave ou ɨporu guasu jare opa omokañɨtei reta.#Gn 7.6-24. 28Jökoraiño vi Lot#Gn 18.20—19.25. oiko yave, Sodoma pegua reta iarete reta, okau reta, ombaegua reta, omaemee reta, omaetɨ reta jare omopüa reta jorä. 29Ërei jókuae ara Lot oë Sodoma güi yave, oa ara güi tata azufre ndive jare opa omokañɨtei Sodoma pegua reta. 30Jökoraita vi oasa che Kuimbaerä ayeapo vae ayekuaa yave.
31Jókuae ara, o iárambo ipe kavía pe oï vae, agüɨye togüeyɨ güɨraja vaerä imbaembae jo pe güɨnoi vae. Jaeramiño vi iko pe oï vae, agüɨye toyerova ye.#Mt 24.17-18; Mc 13.15-16. 32Pemaendúa Lot jembireko#Gn 19.26. kërai oasa vae re. 33Echa opaete oipota oñovatu jekove vae, okañɨteita ko. Ërei jókuae omee jekove chereko pegua vae güɨroasayepeta.#Mt 10.39; 16.25; Mc 8.35; Lc 9.24; Jn 12.25.
34Che jae peve, jókuae pɨ̈tu mókoi vae oyapakuata ñogüɨnoi jupa pe. Metei oyererajaukata jare ïru oyeeyata. 35Jaeramiño vi mókoi kuña ombaesota ñogüɨnoi. Metei oyererajaukata jare ïru oyeeyata. 36Jaeramiño vi mókoi kuimbae ñogüɨnoita kó pe. Metei oyererajaukata jare ïru oyeeyata.
37Jayave Jesús jemimboe reta oparandu chupe:
—OreYa, ¿kia pe pa oyeapota kuae?
Jayave Jesús jei chupe reta:
—Maerëogüe oïa pe oyemboatɨta uruapúa reta.
Currently Selected:
SAN LUCAS 17: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
