SAN LUCAS 4

Aña guasu omomiari Jesús oyavɨuka vaerä tëi chupe

(Mt 4.1-11; Mc 1.12-13)

1Jesús ou ye ɨ̈aka Jordán güi. Jae tɨnɨe Espíritu Santo pe. Jayave Espíritu Santo güɨraja Jesús ñuu pe. 2Jare Jesús opɨta ñuu pe cuarenta ara, jare aña guasu omomiari oyavɨuka vaerä tëi chupe. Opaete jókuae ara reta rupi Jesús mbaetɨ etei jou mbae ave. Jáeramo jókuae jaɨkue rupi iyɨmbɨaɨ. 3Jayave aña guasu jei Jesús pe:

—Nde ko Tumpa Taɨ yave, ere kuae ita pe oyepoepɨ vaerä mbɨyaperä.

4Ërei Jesús jei chupe:

—Tumpa Iñee pe oyekuatía oï körai: “Mbɨyape reñoä ko kuimbae oikoveta, jaeño opaete Tumpa Iñee re.”#Dt 8.3.

5Jayave aña guasu güɨraja Jesús metei ɨvɨtɨ guasu ɨvate vae re jare metei jeia pe oechauka chupe opaete mburuvicha guasu reta iporookuaía ɨvɨ pegua reta. 6Jayave aña guasu jei Jesús pe:

—Tamee ndeve opaete kuae mbaepuere iyemboetea reve reve, echa kuae mbaepuere oñemee ko cheve jare chepuere amee aipota amee chupe vae pe. 7Nde reyetavatɨka chemboete yave, toï ndembaerä opaete.

8Jayave Jesús jei chupe:

—Esɨrɨ chegüi, Satanás. Echa Tumpa Iñee pe oyekuatía oï körai: “NdeYa Tumpa emboete, chupeño eyeokuai.”#Dt 6.13.

9Jayave aña guasu güɨraja Jesús Jerusalén pe jare omboyeupi tupao iyapɨte re. Jayave jei chupe:

—Nde ko Tumpa Taɨ yave, ea kuae güi. 10Echa Tumpa Iñee pe oyekuatía oï körai:

“Tumpa oyokuaita iaraɨgua reta oyangareko vaerä nderé.#Sal 91.11.

11Jare ipo pe ndeoko retata, agüɨye vaerä

nepɨ̈sa-yeyuka ita re.”#Sal 91.12.

12Jayave Jesús jei chupe:

—Tumpa Iñee pe oyekuatía oï körai: “Agüɨye ejäa ndeYa Tumpa ipɨaguasu.”#Dt 6.16.

13Jare aña guasu opa güire imiari oyavɨuka vaerä tëi chupe yave, osɨrɨ chugüi mbovɨ ara rupi.

Jesús omboɨpɨ iparavɨkɨ

(Mt 4.12-17; Mc 1.14-15)

14Jayave Jesús ou ye Galilea pe tɨnɨe Espíritu Santo imbaepuere pe. Jare jërakua opaete jókuae ɨvɨ rupi. 15Jare jae oporomboe judío reta itupao ñavo rupi jare opaete vae omboete.

Jesús Nazaret pe

(Mt 13.53-58; Mc 6.1-6)

16Jayave ou ye Nazaret pe, jókuae jae okuakuaa pe. Jare ara mbutuu pe oike judío reta itupao pe, oyapoñoi rami, jare opüa Tumpa iñee omongeta vaerä. 17Jare oñemee Jesús pe ñeemombeúa Isaías jembikuatía. Jare Jesús oipea tembikuatía yave oväe oyekuatía oï vae körai:

18“YandeYa iEspíritu oï cheré,

echa cheparavo amombeu vaerä ñee ikavi vae

iparavete vae reta pe.

Chembou ambogüera vaerä ipɨatɨtɨ vae reta,

amoërakua vaerä yeyora tembipɨɨ reta pe,

jare amomae vaerä jesambae reta.

Chembou vi ayora vaerä yogüɨrekoasɨ katu vae reta.

19Chembou vi amoërakua vaerä yandeYa ipɨakavi re.”#Is 61.1-2.

20Jayave Jesús oyokenda ye tembikuatía jare omee ye tembikuatía iyangarekoa pe. Javoi oguapɨ ye. Jare opaete tupao pe ñogüɨnoi vae reta omae ngatu ñogüɨnoi jese. 21Jayave Jesús jei chupe reta:

—Kuae ara etei oyembopo peróvai kuae Tumpa Iñee.

22Jare opaete joko pe ñogüɨnoi vae reta imiari kavi jese. Echa ipɨakañɨ reta ñee ikavigüe jei vae re, jei reta:

—¿Jaeä yera kuae José taɨ?

23Jayave Jesús jei chupe reta:

—Arovia pereta cheve jókuae ñee jei vae: “Nde ko jae metei oporopoano vae. Jáeramo eñepoano.” Echa roikuaa jeta mbaembae reyapo Capernaum pe, eyapo vi kuae ndeɨvɨ pe.

24Añete che jae peve, opaete rupi ñeemombeúa imboetea, ërei jëtaɨgua reta mbaetɨ omboete.#Jn 4.44. 25Añete che jae peve, Elías oiko yave jeta kuña imemano vae reta Israel pe. Mboapɨ año jare ova yasɨ mbaetɨ okɨ jare karuai opaete rupi yave,#1 R 17.1. 26ërei Tumpa mbaetɨ omondo Elías metei kuña imemano vae Israel pegua pe ave. Jaeño omondo metei kuña imemano vae tëta guasu Sarepta Sidón#1 R 17.8-16. pegua pe. 27Jaeramiño vi, jeta ipire mbaerasɨ ókui vae reta yogüɨreko Israel pe ñeemombeúa Eliseo oiko yave. Ërei mbaetɨ okuera metei ave ipire mbaerasɨ ókui vae Israel pegua. Jaeño okuera Siriaɨgua Naamán.#2 R 5.1-14.

28Kuae oendu reta yave, opaete tupao pe ñogüɨnoi vae reta iyarasɨ yae Jesús pe. 29Jayave jae reta opüa jare omombo Jesús tëta guasu güi ikatu pe, güɨraja reta ɨvɨtɨ iyapɨte re omombo vaerä tëi ɨvɨ kotɨ joko güi. Jókuae tëta guasu oï jókuae ɨvɨtɨ guasu re. 30Ërei Jesús oasa jae reta ipäu rupi jare ojo chugüi reta.

Kuimbae aña oya jese vae

(Mc 1.21-28)

31Jayave Jesús ojo tëta guasu Capernaum Galilea pegua pe. Joko pe Jesús oporomboe opaete ara mbutuu pe. 32Jare oyeapɨsaka jese vae reta ipɨakañɨ iporomboe re. Echa omboe reta mbaepuere#Mt 7.28-29. reve.

33Jare oï judío reta itupao pe metei kuimbae aña oya jese vae. Jae iñeeäta reve jei:

34—¿Maera pa reyu oremoambeko, Jesús Nazaret-ɨgua? ¿Reyu pa oremokañɨtei vaerä? Che rokuaa. Nde ko jae Iyoambae Tumpa güi ou vae.

35Jayave Jesús oñeengata chupe.

—¡Nekïrii! ¡Eë chugüi!

Jayave opaete vae jovake aña oitɨ ɨvɨ re kuimbae jare oë chugüi. Mbaetɨ maratu oyapo. 36Jare opaete oecha vae reta ipɨakañɨ, jare oparandu oyoupe:

—¿Mbae nunga ñee pa kuae? Echa mbaepuere reve jei aña reta osɨrɨ vaerä oya jese vae reta güi, jare jae reta oyapo jae jei vae.

37Jare jërakua jesegua opaete jókuae ɨvɨ rupi.

Jesús ombogüera Pedro jaicho

(Mt 8.14-15; Mc 1.29-31)

38Jare Jesús judío reta itupao güi oë ye yave, oike Simón jo pe. Jare Simón jaicho täta jaku oï. Ïru joko pe ñogüɨnoi vae reta omoñera Jesús ombogüera vaerä. 39Jayave Jesús itindɨ ikotɨ, jare oñeengata taku pe. Jayave jaku opɨta chugüi. Jupiveiño kuña opüa jare omee mbae jou reta.

Jesús jeta ombogüera imbaerasɨ vae kuaraɨ oike ma yave

(Mt 8.16-17; Mc 1.32-34)

40Jare kuaraɨ oike ma yave, opaete jëtara imbaerasɨ vae güeru Jesús oïa pe. Jare jae oñono ipo metei ñavo re jare ombogüera reta. 41Jare aña reta osɨrɨ oya jese vae reta güi. Osapúkai reve jei:

—Nde ko jae Tumpa Taɨ.

Ërei Jesús oñeengata chupe reta. Mbaetɨ omaeño aña reta imiari. Echa jae reta oikuaa jae ko Cristo.

Jesús oë omombeu Tumpa iñee ɨvɨ Galilea rupi

(Mc 1.35-39)

42Pɨareve pe Jesús oë tëta guasu güi ojo kïrii ngatúa pe. Jare tëta guasu pegua reta yogüɨraja oeka. Jare yogüɨraja oväe yave jae oïa pe, omoñera agüɨye vaerä ojo chugüi reta. 43Ërei Jesús jei chupe reta:

—Ikavi ko aja vaerä ïru tëta guasu reta pe amombeu vaerä vi ñee ikavi vae Tumpa iporookuaía regua. Echa jaerä ko Tumpa chembou.

44Jare ojo opaete ɨvɨ Galilea rupi, jare omombeu Tumpa iñee judío reta itupao ñavo rupi.

Currently Selected:

SAN LUCAS 4: GUABD

Highlight

Copy