SAN MARCOS 10
10
Jesús imiari yomombo regua
(Mt 19.1-10; Lc 16.18)
1Jayave Jesús ojo Capernaum güi Judea pe ɨ̈aka Jordán jovaicho pe. Joko pe jeta oyemboatɨ ye jae oïa pe. Jayave Jesús omboe reta, oporomboeñoi rami.
2Jayave fariseo reta oyakatu Jesús re, oparandu reta oyavɨuka vaerä chupe jupi ra kuimbae omombo vaerä jembireko vae re.
3Jesús jei chupe reta:
—¿Mbae pa peokuai Moisés?
4Jae reta jei:
—Moisés omaeño ko kuimbae ipuere vaerä oikuatía tupapire yomombo pegua, jembireko omombo vaerä.#Dt 24.1-4; Mt 5.31.
5Jesús jei:
—Moisés oikuatía peve kuae mborookuai pepɨa täta ramo. 6Ërei iyɨpɨ ete pe Tumpa oyapo ko kuimbae jare kuña.#Gn 1.27; 5.2. 7Jáeramo kuimbae oeya tu jare ichɨ, oyogüɨreko vaerä jembireko ndive. 8Jare mókoi reve toyogüɨreko metei ramiño. Jáeramo mbaetɨ ma ko mókoi rami. Metei ramiño ma ko.#Gn 2.24. 9Jáeramo agüɨye kia ave tombosɨrɨ oyougüi Tumpa etei omboya oyoe vae reta.
10Jare o pe ñogüɨnoi yave, jemimboe reta oparandu ye Jesús pe jókuae re. 11Jayave Jesús jei chupe reta:
—Kuimbae omombo jembireko jare omenda ïru kuña ndive yave, iyoa ko jembireko kotɨ, oyuvanga ko menda re. 12Jare kuña ojo ime güi jare omenda ïru kuimbae ndive yave, oyuvanga vi ko menda re.#Mt 5.32; 1 Co 7.10-11.
Jesús jei ñee kavi michia reta re
(Mt 19.13-15; Lc 18.15-17)
13Jare amogüe vae güeru Jesús oïa pe michia reta, Jesús oñono vaerä ipo jese reta. Ërei jemimboe reta oñeengata güeru vae reta pe. 14Jesús kuae oecha yave, pochɨ jemimboe reta pe, jare jei chupe reta:
—Pemaeño michia reta re yogüeru vaerä chekotɨ. Agüɨye peyopia. Echa kuae nunga reta ko yogüɨreko Tumpa iporookuaía pe. 15Añete che jae peve, mbaetɨ yave pemboresive Tumpa iporookuaía metei michia rami, ngaraa peike Tumpa iporookuaía pe.#Mt 18.3.
16Jayave Jesús ovoɨ michia reta, oñono ipo jese reta, jare jei ñee kavi ikotɨ reta.
Taɨrusu oikokatu vae
(Mt 19.16-30; Lc 18.18-30)
17Jare Jesús jaema ojo yave, metei osɨi ou ikotɨ, jare oyetavatɨka Jesús jóvai jei reve:
—Oporomboe vae, jupi vae, ¿mbae pa chepuere ayapo anoi vaerä tekove opambae vae?
18Jare Jesús jei chupe:
—¿Maera pa chereenɨi jupi vae pe? Mbaetɨ kia jupi vae, jaeño ko Tumpa. 19Nde reikuaa ko mborookuai reta: Agüɨye eyuvanga menda re.#Ex 20.13; Dt 5.17. Agüɨye eporoyuka.#Ex 20.14; Dt 5.18. Agüɨye ndemonda.#Ex 20.15; Dt 5.19. Agüɨye ere añetembae nderapicha kotɨ.#Ex 20.16; Dt 5.20. Agüɨye eporombotavɨ. Emboete nderu jare ndesɨ.#Ex 20.12; Dt 5.16.
20Jayave jae jei chupe:
—Oporomboe vae, chetaɨrusu güive aiko opaete kuae mborookuai reta jeigüe rupi.
21Jesús omae jese oiparareko oaɨu yae reve, jare jei chupe:
—Metei mbae oata ndeve: Ekua emee opaete mbaembae renoi vae, jare jepɨgüe emee iparavete vae reta pe, jayave renoita mbaembae ara pe. Javoi eyu cherupíe, evoɨ ndekurusu.
22Ërei kuae oendu yave, kuimbae ojo ipɨatɨtɨ reve. Echa jeta mbaembae güɨnoi.
23Jayave Jesús omae iyɨ́vɨri jare jei jemimboe reta pe:
—Yavai yae ko oike vaerä Tumpa iporookuaía pe#Pr 11.28. mbaeyekou güɨnoi vae reta.
24Jemimboe reta ipɨakañɨ Jesús jei vae re. Ërei Jesús jei ye:
—Cheraɨ reta, yavai yae ko mbaeyekou re oyeko vae reta oike vaerä Tumpa iporookuaía pe. 25Camello yavaiä oike yuu jesakua rupi oikokatu vae oike vaerä Tumpa iporookuaía pe vae güi.
26Jayave jae reta ipɨakañɨ yae, jare oparandu oyoupe:
—Jökorai yave, ¿kia pa ipuereta oyemboasauka?
27Jesús omae jese reta jare jei:
—Ɨvɨ pegua reta pe yavai yae vae, Tumpa pe mbaetɨ ko. Echa Tumpa pe opaete mbaembae yavaiä etei ko.
28Jayave Pedro jei Jesús pe:
—Mase, ore roeya opaete mbaembae royu vaerä nderupíe.
29Jesús jei chupe reta:
—Añete che jae peve, oime yave kia oeya jo, tɨkeɨ reta ani tɨvɨ reta, ani jeindɨ reta, ani tɨke ani ipɨkɨɨ ani ikɨvɨ, ani tu, ani ichɨ, ani jembireko, ani imichia reta, ani iɨvɨ reta chereko pegua jare Tumpa Iñee ikavi vae jeko pegua vae, 30cien rupi jekoviata ko chupe ɨvɨ pe oiko ramboeve. Jekoviata jo reta, tɨkeɨ reta, tɨvɨ reta, jeindɨ reta, tɨke ani ipɨkɨɨ ani ikɨvɨ, ichɨ reta, imichia reta, iɨvɨ reta jare ikavimbae reta vi. Ërei taɨkue rupi Tumpa omeeta chupe tekove opambae vae. 31Ërei Tumpa omomichita oyembotuicha vae reta, jare ombotuichata oñemomichi vae reta.#Mt 20.16; Lc 13.30.
Jesús jekuae omombeu ye omanota ko vae
(Mt 20.17-19; Lc 18.31-34)
32Jesús jare jae ndive ñogüɨnoi vae reta yogüɨraja tape Jerusalén kotɨ ojo vae rupi, Jesús ojo jenonde. Jare jaɨkue yogüɨraja vae reta ipɨakañɨ jare okɨɨye. Jayave Jesús oenɨi ïkotɨa jókuae doce jemimboe reta jare omboɨpɨ omombeu chupe reta mbae oasata jae ndive vae: 33“Mase, ko yaja Jerusalén kotɨ. Jare che Kuimbaerä ayeapo vae chemeeta sacerdote reta itenondegua reta jare mborookuai re oporomboe vae reta ipo pe vae, jare jae reta jeita amano vaerä jare chemeeta judiombae vae reta pe, 34jae reta cheyóyai yoyaita, chenupa retata chikote pe, jare ondɨvɨ retata cheré, cheyuka retata. Ërei mboapɨ araa pe aikove yeta.”
Jacobo jare Juan oiporu vae
(Mt 20.20-28)
35Kuae jaɨkue rupi Zebedeo taɨ reta Jacobo jare Juan oyakatu Jesús re jare jei reta chupe:
—Oporomboe vae, roipota reyapo vaerä oreve roiporuta ndeve vae.
36Jesús jei chupe reta:
—¿Mbae pa peipota ayapo vaerä peve?
37Jae reta jei:
—Ndeporookuaía pe, toroguapɨ ndeɨpɨ pe; metei ndeakatu kotɨ jare ïru ndeasu kotɨ.
38Jayave Jesús jei chupe reta:
—Mbaetɨ peikuaa mbae peiporu vae. ¿Pepuereta pa peiporara che aiporarata vae? ¿Pepuereta pa peiporara yae, che aiporara yaeta rami?#Lc 12.50.
39—Orepuereta ko —jei reta.
Jare Jesús jei chupe reta:
—Añete pe reta peiporarata che aiporarata rami, jare pe reta peyembobautisaukata che ayembobautisaukata rami; 40ërei mbaetɨ chepuere jae peve peguapɨ vaerä cheɨpɨ pe. Echa Tumpa omokätɨro ma joko pe oguapɨta vae reta peguarä.
41Jare ïru payandepo Jesús jemimboe reta kuae oendu yave, pochɨ reta Jacobo jare Juan kotɨ. 42Jayave Jesús oenɨi reta, jare jei chupe reta:
—Pe reta peikuaa ko mburuvicha guasu reta jare ïru mburuvicha reta tëtaguasu pegua güɨnoi mbaepuere iɨvɨ pegua reta re. 43Ërei pe reta ndive mbaetɨta jökorai. Oime yave kia pepɨte pe oï vae oipota tuichagüe oiko vae, toyeokuai ïru reta pe.#Lc 22.25-26. 44Jare oime yave kia pepɨte pe oï vae oipota tenondeguarä oiko vae, toyeokuai ïru reta pe.#Mt 23.11; Mc 9.35; Lc 22.26. 45Echa che Kuimbaerä ayeapo vae ayu ko ayeokuai vaerä ïru vae reta pe.#Lc 22.27; Jn 13.12-15. Mbaetɨ ayu ïru vae reta oyeokuai vaerä cheve. Ayu amano vaerä, jeta vae reta aepɨ vaerä.
Bartimeo jesa mbae vae okuera
(Mt 20.29-34; Lc 18.35-43)
46Jayave yogüɨraja tëta guasu Jericó pe. Jare Jesús oë ye ojo Jericó güi jemimboe reta jare jeta vae reta ndive yave, jesambae vae Bartimeo, Timeo taɨ oguapɨ oyerure oï mbae re tape jembeɨ pe. 47Jare oendu Jesús Nazaret pegua oasa jokoropi yave, osapúkai jei reve:
—¡Jesús, David taɨ, cheparareko!
48Jare jeta vae oñeengata chupe, omokïrii vaerä. Ërei jae jeiete iñeeäta reve jei:
—¡Jesús, David Taɨ, cheparareko!
49Jayave Jesús oyemboɨ, jare oenɨiuka; jayave oenɨi reta jesambae, jei reta chupe:
—Eñemoäta ngatu. Epüa. Nereenɨi ma oï.
50Jayave jesambae vae omombo oeya jemimonde iarambogua, jare opüa ou Jesús kotɨ. 51Jesús oparandu chupe:
—¿Mbae pa reipota ayapo ndeve?
Jesambae vae jei:
—Oporomboe vae, aipota amae.
52Jayave Jesús jei chupe:
—Ekua. Rerovia cheré ramo rekuera.
Jupiveiño okuera, jare ojo Jesús jaɨkue tape rupi.
Currently Selected:
SAN MARCOS 10: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
