Ezekela 36
36
Isira-elaq É Bùm Pê É Matú Myòqbyù Hkyô
1Haû Yhûmsîng Garai taî le, “Byù zo ê, Isira-elaq é bùm pé lé shî su nghû myìqhtoi htoi aq; ‘Isira-elaq é bùm pé ê, haû Yhûmsîng Garaî é dang lé gyo keq. 2Haû Ahko Ahkáng lhúnglháng wó Sû Yhûmsîng Garai shî su ga taî ri; gye pé gi, “Ha hâ! Góhkun lhê é myhang é kong pé gi, ngá-mòq sing é maumyî dùt bê nghut ri.” ga núngmòq eq séng luî taî ri.’ nghû àq. 3Haû mù, myìqhtoi htoi luî, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, myìt gyó tô é byù myû wui èq sing yu pyám mù, ashop dang taí bang taî kûn jung eq lùmù gànsâng hkyô dùt é maumyî dùt byùq shoq, yhángmòq gi, núngmòq lé lhînghkyùq mai lhoqhkyop pyám luî, chamchyuîyuì dùt nhâng bê nghut é yánmai, 4Isira-elaq é bùm pé ê, haû Ahko Ahkáng lhúnglháng wó Sû Yhûmsîng Garaî é dang lé gyo keq; bùm pé eq kong pé lé le, langhkung pé eq langhkaû pé lé le, lhînghkyùq má nyì mù, myìt gyó tô é byù myû wui èq wó lú lo é zè eq lùmù gànsâng hkyô dùt é, chamchyuîyuì htên byòq tô é jowò pé eq tô pyâm tô é wà pé lé le, haû Ahko Ahkáng lhúnglháng wó Sû Yhûmsîng Garai shî su ga taî ri. 5Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, myìt gyó tô é byù myû wuì eq Edom mau gón lé, i-myìt gyai nyé é mai htuqhtíng dang taí bê nghut lhê; hkâsu mù gâ le, yhángmòq gi, Ngá é mîngdán mâ é mhan nú yô lé wó lú sing yù râ matú, gyai gabú é myìt eq ashop é myìt mai Ngá é mîngdán lé yhángmòq sing é maumyî kut yu akô nghut ri.’ nghû taí aq. 6Haû mù, Isira-elaq eq séng luî myìqhtoi htoi mù, bùm pé eq kong pé lé le, langhkung pé eq langhkaû pé lé le, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, gótû byù myû wui èq lùmù gànsang é hui zo kô é yánmai, Ngò gi, myìt nò nhikmó-yô é mai dáng nyo nyi lhê. 7Haû mù, Ngò gi, náng é lhînghkyùq mâ é gótû byù myû wuì le lùmù gànsang é hui zo kôrâ nghut lhê nghû lòq tû dâkam é nghut lhê. Haû gi, Ahko Ahkáng lhúnglháng wó Sû Yhûmsîng Garai taî ri.
8Nghut kôlhang, Isira-elaq bùm pé ê, núngmòq gi, Ngá é Isira-elaq byu pê é matú, sikkoq pé yùq htoq mù, ashi zui byi kôrâ nghut lhê; hkâsu mù gâ le, yhángmòq gi, yhûm shut hân taû lò bekô râ nghut lhê. 9Hkâsu mù gâ le, Ngò gi, núngmòq é hkyam shut nghut lhê mù, núngmòq lé shogyo myìt wó shit râ nghut lhê; núngmòq chyáng, yò hpuq mù, kyô hkyó kôrâ nghut lhê. 10Ngò gi, núngmòq chyáng Isira-elaq byù bànshoq lé myô htâm nhâng râ nghut mù, yhángmòq gi, wà pé má tsing nyì luî, chamchyuîyuì dùt byùq é jowò lé dum saî xuq kôrâ nghut lhê. 11Ngò gi, núngmòq chyáng, byù eq shigu gaunyhaû pé lé lhoqmyo râ nghut mù, yhángmòq gi, zo myo myhû luî, ajùm ayò dùt kôrâ nghut lhê. Ngò gi, góhkun lhê é su, núngmòq chyáng byù nyì nhâng mù, núngmòq lé, hí lhê htoq je riyhang shimân byi râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 12Ngò gi, Ngá é Isira-elaq byu pé lé, núngmòq chyáng nyì nhâng râ nghut mù, yhángmòq gi, núngmòq lé sing yù kôrâ nghut luî, núngmòq gi, yhángmòq é silî wunlî maumyî dùt kôrâ nghut lhê. Núngmòq gi, hkâ-nhám le yhángmòq é zodù wuì lé, zò-mut luî shî nhâng râ a nghut lo.
13Haû Ahko Ahkáng lhúnglháng wó Sû Yhûmsîng Garai shî su ga taî ri; gótû a-myû wuì ra-am gi, núngmòq lé, “Núngmòq gi, byu pé lé myhui pyám mù, núngmòq mâ é mingbyû wuì lé shi byùq nhâng bekô nghut ri.” ga taí kô é yánmai, 14núngmòq gi, byu pé lé myui pyám râ a nghut lo; núngmòq mâ é mingbyû wuì lé le shi byùq nhâng râ a nghut lo; haû gi, Ahko Ahkáng lhúnglháng wó Sû Yhûmsîng Garai taî pyo ri. 15Ngò gi, núngmòq lé, gótû a-myû wuì mai lùmù gànsang é lé wó gyo nhâng râ a nghut lô é htoq agó, byu pê èq núngmòq lé taî hpoî pyâm é lé le hpu zo nhâng râ a nghut lo, núngmòq é byù myû lé, lèqbàt nhâng râ le a nghut lo; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
Isira-elaq Byu Pé Wó Dum Nyì Ngón Yùq Yò Râ Hkyô
16Haû Yhûmsîng Garaî é mungdang ngá chyáng dum jé é gi, 17“Byù zo ê, Isira-elaq byu pé gi, yhûmsing ming má nyi to kô é hkûn, yhángmòq é nyì yàp sâmlai eq yhángmòq é hkyîzó lòqzó pê èq mîngdán haú lé agòt a-û kut pyám bekô nghut ri. Yhángmòq é nyì yàp sâmlai gi, Ngá é hí má, lhôhking chung é myiwe myhî é a san a séng hkyô eq du ri. 18Haû mù, mîngdán haú má yhángmòq byù sat sui lhoqhtoq kô é yánmai le, yhángmòq é hparà hpôlhô pê èq haú lé agòt a-û kut kô é yánmai le, Ngò gi, yhángmòq é ahtoq má Ngá é nhikmó-yo hkyô hut hkyô kat é nghut lhê. 19Ngò gi, yhángmòq lé byù myû wui chyáng hkat pyo hâng kat é nghut mù, yhángmòq gi, mîngdán pé má lhoqpyo hâng kat é hui bekô nghut ri. Ngò gi, yhángmòq é nyì yàp sâmlai eq yhángmòq é hkyîzó lòqzó má cháng luî, yhángmòq lé jéyáng bê nghut lhê. 20Byù myû wui chyáng yhángmòq byo myín wang lé kô é hkûn, ‘Shí bang gi, haû Yhûmsîng Garaî é byu pé nghut kôlhang, Yhâng é mîngdán mai htoq ló byùq ra kôrâ nghut lhê.’ ga maigan byu pê èq taî é hui zo bekô nghut mù, yhángmòq é yánmai, Ngá é chyoiyúng myîng lé lhoqhpoî pyám bekô nghut ri. 21Ngò gi, Isira-elaq byu pé jé é jang mâ é byù myû wui chyáng lhoqhpoî pyám huî é, Ngá é chyoiyúng myîng lé myìt hâ ri.
22Haû mù, Isira-elaq byu pé lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq byu pé ê, Ngò gi, núngmòq lé myìt tê luî shí pé kut é a nghut é za, núngmòq jé é jang mâ é byù myû wui chyáng núngmòq lhoqhpoî pyâm é Ngá é myìng lé myìt tê luî shèq, kut râ ru nghut lhê. 23Ngò gi, gótû byù myû wui chyáng núngmòq lhoqhpoî pyám bê nghut é myìng, yhángmòq chyáng hpoî byùq bê nghut é, Ngá é myìng mó haû chyoiyúng é hkyô lé tûn shit râ nghut lhê. Yhángmòq é hí má núngmòq dông Ngò chyoiyúng é hkyô lé tûn shit é hkûn, Ngò gi, haû Yhûmsîng Garai nghut é lé, gótû byù myû wuì sé kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
24Hkâsu mù gâ le, Ngò gi, núngmòq lé byù myû wui chyáng mai shuî htoq yû râ nghut lhê; Ngò gi, núngmòq lé mîngdán pé bànshoq mai shuî tsîng yù mù, núngmòq é mau má shuî jé wâng râ nghut lhê. 25Ngò gi, núngmòq lé sân-yúng é wuì ko gyun râ nghut mù, núngmòq gi, sân-yúng byùq râ nghut lhê. Ngò gi, núngmòq lé, núngmòq é a sansêng é hkyô bànshoq mai le, núngmòq é hparà hpôlhô pé bànshoq mai le, lhoq sansêng yù râ nghut lhê. 26Ngò gi, núngmòq lé i-myìt asik byi mù, núngmòq chyáng sô asik kat byi râ nghut lhê; Ngò gi, núngmòq chyáng mai lùqgòk i-myìt lé huî sêng pyám byi mù, gùngsho i-myìt kat byi râ nghut lhê. 27Ngò gi, núngmòq chyáng Ngá é Sô kat byi mù, Ngá é hkunmó pé lé cháng nhâng luî, Ngá é târâ pé lé rago châng kut nhâng râ nghut lhê. 28Haú hkûn, núngmòq gi, núngmòq é îchyí îwâ pé lé Ngò byî tô é mîngdán má myang nyì kôrâ nghut lhê; núngmòq gi, Ngá é byu pé dùt kôrâ nghut mù, Ngò gi, núngmòq é Garai Gasang dùt râ nghut lhê. 29Ngò gi, núngmòq é agòt a-û hkyô bànshoq mai núngmòq lé lhoqlhut yû râ nghut lhê. Ngò gi, núngmòq chyáng mùtmó a gyó loshoq, kyôshi myuishi ngaí nhâng mù, agùn agó lhoqmyo byi râ nghut lhê. 30Núngmòq gi, mùtmó gyó é yánmai gótû byù myû wui pê chyáng hoq hpû é a hui zo loshoq, Ngò gi, shigâm mâ é ashi pé lé le, yò mâ é kyôshi myuishi pé lé le, lhoqmyo byi râ nghut lhê. 31Haú hkûn, núngmòq gi, núngmòq é agè alhô é hkyô pé eq agè ashop é múzó pé lé myìtbun luî, yhûmsing é yubàk mara pé eq achaq achyut é múzó pê é yánmai, yhûmsing gùng yhûmsîng lháng chaq pyám kôrâ nghut lhê. 32Ngò shí hkyô kut é gi, núngmòq lé myìt tê byi mù kut é a nghut é hkyô lé, Ngò, núngmòq lé sé nhâng nau ri; Isira-elaq byu pé ê, núngmòq é nyì yàp sâmlaî é yánmai hoq hpû ngha nyì keq! Haû gi, Ahko Ahkáng lhúnglháng wó Sû Yhûmsîng Garai taî pyo ri.
33Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq é yubàk mara bànshoq lé Ngò chî sân pyám byî é buìnyì má, Ngò gi, núngmòq lé, núngmòq é wà pé má tsing nyì nhâng mù, chamchyuîyuì dùt byùq é jowò pé lé dum saî xuq nhâng râ nghut lhê. 34Sô laî ló bâng é myòq hí má chamchyuîyuì dùt tô é maumyî gi, kyôzo muilhum hkyô é maumyî dùt byùq râ nghut lhê. 35Haú hkûn, yhángmòq gi, “Chamchyuîyuì tô sâ tô é maumyî shî gi, Edin hkyâm su dùt byùq bê nghut ri; byòq yèq tô é, chamchyuîyuì dùt tô é eq htên byòq tô é wà pé gi, ahkuî, gingtíng jowò dùt mù, byù nyi é wà pé dùt bê nghut ri.” ga taí kôrâ nghut lhê. 36Haú hkûn, Ngò, Yhûmsîng Garai gi, lhoqhtên pyâm to bê nghut é lé dum saî saí bê nghut é lé le, chamchyuîyuì tô sâ to bê jang má dum ho bê nghut é lé le, núngmòq é awui ayàm má nyi myìt gyó tô é byù myû wuì wó sé kôrâ nghut lhê. Haú hkyô lé, Ngò, Yhûmsîng Garai taî é nghut mù, Ngò gi, haú hkyô lé kut râ nghut lhê.’ nghû taí aq.
37Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Isira-elaq byu pé dûng tôngbán é lé radàm dum gyo byi mù, yhángmòq é matú shí hkyô kut byi râ nghut lhê. Ngò gi, yhángmòq é byu pé lé, sau pé su ajùm ayò dùt nhang é htoq agó, 38Yerusalem wà mó mâ é ding tô é poî buìnyì pé má lé nhông byî é sau hpúng pé su ajùm ayò dùt nhâng râ nghut lhê. Haû mù, byòq yèq tô é wà pé má byu pê é sau hpúng mó pé byíng to râ nghut lhê. Haú hkûn, Ngò gi, Yhûmsîng Garai nghut é hkyô lé, yhángmòq sé kôrâ nghut lhê.” gâ ri.
Currently Selected:
Ezekela 36: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
