Ezekela 37
37
Showui Kângsoq Dum Bo Lo É Hkyô
1Haû Yhûmsîng Garaî é lòq gi, ngá é ahtoq má jòq nyì mù, Yhûmsîng Garaî é So èq ngo lé shuî htoq yû luî, langhkaû agùng má ngo lé nyhi tô ri; langhkaû haú má showui pé byíng zan tô ri. 2Yhang gi, ngo lé showui bùm haú má ê ê lò lò kut nhang é nghut mù, ngò gi, langhkaû haú má showui pé myo myo jòq tô é lé myang ri; haú pé gi, gyai yhang kyuq huî tô é chyat nghut ri. 3Yhang gi, ngo lé, “Byù zo ê, showui shí pé wó dui lò râ lhú?” ga myî ri.
Haú hkûn, ngò gi, “Ahko Ahkáng lhúnglháng wó Sû Yhûmsîng Garai ê, Nàng za ru sê lhê.” nghû tû taî é nghut lhê.
4Haú hkûn, Yhang gi, ngo lé, “Showui haú pé eq séng luî myìqhtoi htoi mù, yhángmòq lé, ‘Kyuq huî é showui pé ê, haû Yhûmsîng Garaî é dang lé gyo keq! 5Showui shí pé lé haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, núngmòq chyáng kângsoq#37:5 Kângsoq gâ é lé, laì nghû le ge taî é nghut lhê. wàng nhâng râ nghut mù, núngmòq gi, chyungxe duî kôrâ nghut lhê. 6Ngò gi, núngmòq chyáng shogyi gyan nhâng mù, sho toq nhâng luî, sho-kuq yùp byi râ nghut lhê. Ngò gi, núngmòq chyáng kângsoq kat byi râ nghut mù, núngmòq gi, chyungxe duì kôrâ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.’ nghû taí aq.” ga taî ri.
7Haû mù, Ngò gi, ngo lé hkunmó hkyô é eq rajung za, myìqhtoi htoi bê nghut lhê. Ngò myìqhtoi htoî nyi é u, htê htoq lo ri; haû gi, layàng nún htê nghut ri; haú hkûn, showui pé gi, dui lû lò mù, rahkat eq rahkat xoq lhûm lo bum ri. 8Ngò wú tô le, shogyi pé gyân lò mù, haú pé má sho toq lô luî, sho-kuq pé yùp tô bum é lé myang ri; nghut kôlhang, haú pé má kângsoq a bò shi nghut ri.
9Haú hkûn, Yhang gi, ngo lé, “Byù zo ê, myìqhtoi htoi aq; kângsoq lé myìqhtoi htoi mù, haú lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; kângsoq ê, maumyî myi chyûn mai lé mù, shi tô é màng shí pé chyungxe wó dui lò shoq, yhángmòq chyáng mùt háng byi aq.’ nghû taí aq.” ga taî ri. 10Haû mù, ngò gi, Yhâng èq ngo lé hkunmó hkyô é eq rajung za myìqhtoi htoi bê nghut lhê; haú hkûn, kângsoq gi, yhángmòq chyáng wàng bê nghut ri; yhángmòq gi, chyungxe dui lò mù, toq yàp bùm bekô nghut luî, gyè hpúng mó dùt to bê nghut ri.
11Haú hkûn, Yhang gi, ngo lé, “Byù zo ê, showui shí pé gi, Isira-elaq byu pé nghut lhê. Yhángmòq gi, ‘Ngá-mòq é showui kyuq huî byùq bê nghut mù, ngá-mòq é myòqbyù hkyô byùq byùq bê nghut ri; ngá-mòq gi, htûm byùq bê nghut ri.’ ga taî bum akô nghut ri. 12Haû mù, myìqhtoi htoi luî, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngá é byu pé ê, Ngò gi, núngmòq é lùp pé lé hpóng mù, núngmòq lé shuî htoq yû luî, núngmòq lé Isira-elaq ming shut shuî taû ló râ nghut lhê. 13Haû mù, Ngá é byu pé ê, Ngò, núngmòq é lùp pé lé hpóng mù, núngmòq lé shuî htoq yu é hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 14Ngò gi, núngmòq chyáng Ngá é Sô kat byi râ nghut mù, núngmòq gi, chyungxe duì kôrâ nghut lhê; Ngò gi, núngmòq lé, núngmòq é ming má nyhi to râ nghut lhê. Haú hkûn, haú hkyô lé, Ngò, Yhûmsîng Garai taî é nghut mù, Ngò gi, haú hkyô lé kut bê nghut é lé, núngmòq sé kôrâ nghut lhê; haû gi, Yhûmsîng Garai taî pyo ri.’ nghû taí aq.” ga taî ri.
Byù Myû Ra-myû Hkóhkâm Rayùq Za Dùt É Hkyô
15Haû Yhûmsîng Garaî é mungdang ngá chyáng jé é gi, 16“Byù zo ê, sik ralong yù mù, ‘Yudaq ming eq yhâng é byìn xoq Isira-elaq byu pê é matú.’ nghû kâ tap to aq. Hau htâng, sik ralong dum yù mù, ‘Ehprim siklong nghut é Yosep eq yhâng é byìn xoq Isira-elaq byù bànshoq é matú.’ nghû kâ tap to aq.#37:16 Sânghî é siklong gi, maupyî mîngdán nghut é Yudaq mau lé taí nau é nghut mù, htang lhê é siklong gi, mautsûng mîngdán Isira-elaq mau lé taí nau é nghut lhê. 17Siklong haû í long lé, náng é lòq má ralong za dùt shoq, rahá xoq yû àq.
18Náng é byu pé mai nang lé, ‘Nàng kut é shí hkyô hai lichyúm nghut é lé, ngá-mòq lé a wó taî kyo râ lhú?’ ga myi kôjáng, 19yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ehprim é lòq má nghut nyi é, yhâng é byìn xoq Isira-elaq up bang eq rahá, Yosep é siklong lé, Ngò yù mù, Yudaq é siklong má xoq râ nghut lhê. Ngò gi, haû í long lé, ralong za dùt nhâng râ nghut mù, haû í long gi, Ngá é lòq má ralong za dùt to râ nghut lhê.’ nghû taí aq. 20Nàng kâ tap tô é siklong í long lé, yhángmòq é myòq hí má chung to mù, 21yhángmòq gi, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Isira-elaq byu pé byo myín jé tô é byù myû wui chyáng mai yhángmòq lé shuî htoq yû râ nghut lhê; Ngò gi, jowò hkangmó mai yhángmòq lé shuî tsîng yù mù, yhángmòq é mau má shuî taû ló râ nghut lhê. 22Ngò gi, yhángmòq lé, haú mau mâ é Isira-elaq bùm pê é ahtoq má byù myû ra-myû dùt nhâng mù, yhángmòq bànshoq bang lé hkóhkâm rayùq èq za ùp nhâng râ nghut lhê; yhángmòq gi, hkâ-nhám le byù myû í myû dum dùt râ a nghut lô é htoq agó, mîngdán í lhum le dum gam hkoq râ a nghut lo. 23Yhángmòq gi, yhûmsing é hparà hpôlhô pê èq le, achaq achyut é alhô pê èq le, mara shut é htûngli pê èq, yhûmsing gùng lé agòt a-û dum kut lo kôrâ a nghut; hkâsu mù gâ le, Ngò gi, yhángmòq lu laî pyâm é yubàk mara bànshoq mai yhángmòq lé hkyi yù luî, yhángmòq lé lhoq sân-yúng byi râ nghut lhê. Haû mù, yhángmòq gi, Ngá é byu pé dùt kôrâ nghut mù, Ngò gi, yhángmòq é Garai Gasang dùt râ nghut lhê.
24Haú hkûn, Ngá é duìnhâng zoshâng Dawiq gi, yhángmòq é hkóhkâm dùt râ nghut mù, yhángmòq bànshoq gi, sau zúng sû rayùq za wó kôrâ nghut lhê. Yhángmòq gi, Ngá é târâ pé lé cháng mù, Ngá é cháng ra târâ pé lé rago châng kut kôrâ nghut lhê. 25Yhángmòq gi, núngmòq é îchyí îwâ pé nyi lai bê nghut é, Ngá é duìnhâng zoshâng Yakup lé Ngò byî tô é mîngdán má nyì kôrâ nghut lhê. Yhángmòq le, yhángmòq é zodù wuì eq gashû pé le, haú má ahtum abyùq nyì kôrâ nghut mù, Ngá é duìnhâng zoshâng Dawiq gi, ahtum abyùq yhángmòq é zau dùt râ nghut lhê. 26Hau htoq agó, Ngò gi, yhángmòq eq nguì ngón dangshikaq to râ nghut mù, haû gi, ahtum abyùq é dangshikaq dùt râ nghut lhê. Ngò gi, yhángmòq lé lhoq gingtîng to mù, yhángmòq lé myoluq jebe nhâng râ nghut lhê; Ngò gi, Ngá é sân-yúng jowò lé, yhángmòq chyáng ahtum abyùq tô to râ nghut lhê. 27Ngò nyi é jowò gi, yhángmòq eq rahá nghut nyî râ nghut mù, Ngò gi, yhángmòq é Garai Gasang dùt râ nghut luî, yhángmòq gi, Ngá é byu pé dùt kôrâ nghut lhê. 28Haû mù, Ngá é sân-yúng jowò gi, yhángmòq chyáng ahtum abyùq jòq tô é hkûn, Ngò, Yhûmsîng Garai gi, Isira-elaq a-myû lé chyoiyúng nhâng sû nghut é lé, byù myû wuì sé kôrâ nghut lhê.’ nghû taí aq.” gâ ri.
Currently Selected:
Ezekela 37: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
