Yeremi-aq 11
11
Dangshikaq Htên Byùq É Hkyô
1Yeremi-aq chyáng haû Yhûmsîng Garaî chyáng mâ é mungdang jé é gi, 2“Dangshikaq shí mâ é dang pé lé gyô yù luî, Yudaq byu pé eq Yerusalem wà mó má nyi é bang lé shî su nghû taî kyo keq. 3Isira-elaq é Garai Gasang, haû Yhûmsîng Garai taî le, ‘Dangshikaq shí mâ é dang pé lé a châng é sû gi, nhîng pyâm é hui râ nghut lhê; 4dang haú pé gi, jòqtoq nyé yui é myibung hkyûng nghut é, Egutuq ming mai núngmòq é îchyí îwâ pé lé Ngò shuî htoq lo é hkûn, Ngò hkunmó hkyô tô é dang nghut lhê. Ngò gi, “Ngá é jì-no gyo keq; Ngò hkunmó hkyô é eq rajung za kut keq; haú hkûn, núngmòq gi, Ngá é byu pé dùt mù, Ngò gi, núngmòq é Garai Gasang dùt râ nghut lhê. 5Haú hkûn, Ngò gi, no-naú eq byo-î yui é mau lé byi râ nghû núngmòq é îchyí îwâ pé lé dâkam tô é dang lé lhoqdìk râ nghut lhê.” ga taî é nghut lhê.’ gâ ri. Hkû-nyí núngmòq sing tô é maumyî gi, haû nghut ri.” gâ ri.
Haú hkûn, ngò gi, “Yhûmsîng Garai ê, Amen!” nghû tû taî é nghut lhê.
6Haû Yhûmsîng Garai gi, ngo lé, “Yudaq wà pé eq Yerusalem wà hkyô pé má nàng taî pyô râ dang bànshoq gi, ‘Dangshikaq shî mâ é dang pé lé gyô yù mù, cháng kut keq. 7Ngò gi, núngmòq é îchyí îwâ pé lé Egutuq ming mai shuî htoq lo é hkûn mai hkû-nyí jé shoq, yhángmòq lé, “Ngá é jì-no gyo keq!” nghû adàm dàm sidìq byî bê nghut lhê. 8Nghut kôlhang, yhángmòq gi, a gyo kô é htoq agó, haî su a ngàm byi kut kômù, yhûmsing é agè ashop hkyô mai myìt htan é shut châng bum akô nghut ri. Haû mù, Ngò, yhángmòq lé cháng keq nghû hkunmó hkyô to kôlhang, yhángmòq a châng kut é, dangshikaq shî má bo é nhinghkun bànshoq yhángmòq chyáng jé nhâng bê nghut lhê.’ nghû àq gâ é nghut ri.” ga taî ri.
9Hau htâng, haû Yhûmsîng Garai mai ngo lé taî é gi, “Yudaq byu pé eq Yerusalem wà mó má nyi é bang gi, gumlau toq râ hen é hkyô rahkat jòq akô nghut ri. 10Yhángmòq gi, Ngá é dang pé lé a kâm gyô é, yhángmòq é îchyí îwâ pê é yubàk mara shut lhing taû ló bekô nghut ri. Yhángmòq gi, gótû hparà pé lé dójaú râ ga, haú pê htâng châng ló byùq bekô nghut ri. Isira-elaq byu pé eq Yudaq byu pé gi, yhángmòq é îchyí îwâ pé eq Ngò tô tô é dangshikaq lé lhoqhtên pyám bekô nghut ri. 11Haû mù, haû Yhûmsîng Garai taî le, ‘Ngò gi, yhángmòq a wó hpang lùt râ nghut é byò dàn byò sho hkyô lé, yhángmòq chyáng jé nhâng râ nghut lhê. Yhángmòq, Ngo lé wùt dûng ngaù kôlhang, Ngò gi, yhángmòq lé gyo byi râ a nghut. 12Haú hkûn, Yudaq wà pé mâ é bang eq Yerusalem wà byù wuì gi, yhángmòq namngón jung nyhê nhông byî é hparà pê chyáng wùt dûng ngaù râ matú ê kôrâ nghut lhê; nghut kôlhang, haú pé gi, yhángmòq hui zô é byò dàn byò sho hkyô haî lé le, lhom wó garúm yû râ a nghut. 13Yudaq ê, náng é wà hkâ-myhó jòq le, náng é hparà le hkâ-myhó jòq ri; Yerusalem wà mó mâ é hkyô hkâ-myhó hkat jòq le, hoq hpu hkyô nghut é Balaq hparà pé lé namngón jung nyhê nhông byi râ matú, kaúgyàp pé le hkâ-myhó saî tô akô nghut ri.’ gâ ri.
14Yeremi-aq ê, byù shí bâng é matú kyû hkâbo dung byi; yhángmòq é mara le hkâbo dûng tôngbán byi; hkâsu mù gâ le, yhángmòq myìt myo ûng wôm é hkûn Ngo lé wùt dung kôjáng, Ngò, yhángmòq lé gyo byi râ a nghut.
15Ngá é chyit sû gi, byù góbang myo myo eq,
yhâng é agè ashop hkyô kut htoq bê nghut mù,
Ngá é noqkuq yhûm eq haî wó séng kôrâ lhú?
Náng é chyoiyúng hkungga sho gi, nàng hui zo râ nghut é mara dam lé wó lhing pyám byi râ lhú?
Nàng gi, agè ashop hkyô kut é hkûn,
gabú myìt ngón ri nhung.” gâ ri.
16Haû Yhûmsîng Garai gi, nang lé, nyui yúng mù,
ashi já é tsanlun gàm ga wùt kôlhang,
mying hûm é laìdun mó èq,
agàm haú lé myi tap kat râ nghut luî,
hau é akoq pé gyuî byùq râ nghut lhê.
17Isira-elaq byu pé eq Yudaq byu pé gi, agè ashop hkyô kut mù, Balaq hparà lé namngón jung nyhê nhông byî é dông Ngo lé nhikjum lhoqyo kô é yánmai, nang lé hô tô é, haû Wum-o a-tsam dìk shoq bò Sû Yhûmsîng Garai gi, náng chyáng byò dàn byò sho hkyô jé nhâng râ matú hkunmó hkyô to bê nghut ri.
Yeremi-aq Lé Haq Gyám Kô É Hkyô
18Haû Yhûmsîng Garai gi, yhángmòq haq htung tô é hkyô ngo lé hpông shit é nghut mù, ngò gi, haú hkyô lé wó sê é nghut lhê; yhángmòq haî kut nyi é hkyô lé, haú hkûn, Yhang, ngo lé tûn shit ri. 19Ngò gi, sat râ matú shuî e ló é sau zo eq du ri; yhángmòq gi,
“Shigâm eq hau é ashi lé lhoqhtên pyám sháng;
yhâng é myìng lé ó yùq le a bûn nyì loshoq,
rû dui nyi é maumyî mai yhang lé chyung hpyit pyám sháng.” ga, ngo lé haq gyám kô é hkyô lé, ngò a sê kat é nghut lhê.
20Nghut kôlhang, i-myìt ûnghkaû eq myìt é hkyô lé chyam wú mù,
díngmán é dông târâ jéyáng é, Wum-o a-tsam dìk shoq bò Sû Yhûmsîng Garai ê,
ngò gi, ngá é mû shî Nang lé àp to bê nghut é yánmai,
yhángmòq lé Nàng lató hpuq é hkyô, ngo lé myàng nhâng laq.
21Haû mù, “Ngá-mòq é lòq mai nàng a shî sháng gàq, Yhûmsîng Garaî é myìng lang luî myìqhtoi hkâhtoi.” ga taí luî, nang lé sat râ matú kyuq é, Anahtot byu pé eq séng luî, haû Yhûmsîng Garai shî su ga taî é nghut ri; 22haû mù, Wum-o a-tsam dìk shoq bò Sû Yhûmsîng Garai taî le, “Ngò gi, yhángmòq lé mara dam byi râ nghut lhê; yhángmòq é zorâm wuì gi, shâm mai shî byùq kôrâ nghut mù, yhángmòq é yùqzo byìzô pé gi, mùtmó gyó é mai shi byùq kôrâ nghut lhê. 23Yhángmòq chyáng mâ é nyi myìt gyó tô é byù rayùq lháng a bò râ nghut lhê; hkâsu mù gâ le, Ngò gi, yhángmòq lé mara dam byî é zànwut má, Anahtot byu pê chyáng byò dàn byò sho hkyô jé nhâng râ nghut lhê.” gâ ri.
Currently Selected:
Yeremi-aq 11: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.