Yeremi-aq 10
10
Garai Gasang Eq Hparà Hpôlhô Pé
1Isira-elaq byu pé ê, haû Yhûmsîng Garai núngmòq lé taî é dang gyo keq. 2Haû Yhûmsîng Garai taî le,
“Gótû byù myû wui é hkyô pé lé hkâ-mhoq yû kó;
yhángmòq gyùq ngha é, mauhkûng mâ é alhô agàn pé lé,
núngmòq hkâ gyùq nghâ kó.
3Hkâsu mù gâ le, byù haú bang kut é htûngli gi, a-kyû a bo é chyat nghut ri;
yhángmòq gi, sik mó yô mâ é sikgâm lé htuq yû kômù,
kyûng é hpàqchyî sé sû gi, haú lé wazûng èq azòng kyûng htoq ri.
4Yhángmòq gi, haú lé ngùn eq hîng shup kômù,
a dui nún loshoq, bàtdu èq jòqtoq zu bàt tap tô akô nghut ri.
5Yhángmòq é hparà hpôlhô pé gi,
dùnghko yò mâ é jòlhô su dang a dàt nyò nghut ri;
haú pé lé gi, hkyô a wó sô é yánmai,
wàq wún ra râ nghut lhê.
Haú pé lé hkâgyùq kó;
hkâsu mù gâ le, haú pé gi, ihkyùp wó she háng râ le a nghut;
ge é hkyô wó kut htoq râ le a nghut.” gâ ri.
6Yhûmsîng Garai ê, Nàng eq du é ó a nyì;
Nàng gi, kô hkìk Sû nghut mù,
Náng é myìng gi, hpungwup a-tsam mó bo ri.
7Byù myû wui é Hkóhkâm hpó ê,
Nàng gi, gyùq hkúngga gíng é sû nghut mù,
Nang lé a gyùq hkúnggâ é ó yùq nghut lhê lhú?
Byù myû wuì mâ é hpàqchyî bo é ushuq bànshoq bang má le,
yhángmòq é mîngdán pé bànshoq má le,
Nàng eq du é ó a nyì nghut ri.
8Yhángmòq bànshoq bang gi, nâ byùq mù, nghâ bang chyat nghut akô;
yhángmòq lé gi, a-kyû a bo é, sik hparà hpôlhô pê èq mhoqshit é za nghut ri.
9Bàt tô é ngùn long gi, Tarishi wà mâ é nghut mù,
hîng long gi, Uhpaza jowò mâ é nghut ri.
Kyûng é hpàqchyî sé sû eq hîng bàt zo sû saî tô é lé,
nyui é eq nòq nè ne é mèbu hut byî akô nghut ri;
bànshoq lé gi, lòqmú bò bâng èq saî é chyat nghut ri.
10Nghut kôlhang, haû Yhûmsîng Garai gi, tengmán é Garai Gasang nghut ri;
Yhang gi, rû dui nyi é Garai Gasang eq ahtum abyùq é Hkóhkâm nghut ri.
Yhang nhikjum yo jáng, myìdàm htoq nán ri;
Yhang nhikmó-yô é lé byù myû wuì a wó ung hkâm nghut ri.
11“Mauhkûng eq myigùng lé a hpan é hparà hpôlhô pé gi, myìdàm htoq mai le, mauhkûng ô mai le, htûm ló byùq râ nghut lhê.” nghû yhángmòq lé taî kyo keq.
12Nghut kôlhang, Garai Gasang gi, Yhâng é hpungwup a-tsam èq myìdàm htoq lé hpân mù,
Yhâng é hpàqchyî byéng-yá èq mingkan lé lhoqgîng to luî,
Yhâng é sê gyô é u-nuq èq mauhkûng lé hpyi hkâng to bê nghut ri.
13Yhang, maugum lhoqgûm kat jáng, mauhkûng mâ é wuì pé mying hûm lo ri;
Yhang gi, myìdàm htoq ló htâng é mai mhut lhoqtoq kat ri.
Yhang gi, maú wo é eq lhap hpyat é lé rahá dùt nhâng mù,
Yhâng é sùtdò mai laì lhoqhtoq kat ri.
14Yùq hkangmó gi, na bang chyat nghut mù, hpàqchyî a bò kó nghut ri;
hîng bàt zô é yùq hkangmó gi, yhángmòq saî é hparà hpôlhô pê é yánmai, hoq hpû bum akô nghut ri.
Yhang saî é alhô pé gi, mhaû é chyat nghut mù,
soq a bò bum nghut ri.
15Haú pé gi, a-kyû a bo é chyat nghut mù, taî hpoî pyám râ zè chyat nghut ri;
haú pé lé târâ jéyáng râ ahkyíng jé jáng, haú pé gi, htûm byùq râ nghut lhê.
16Yakup é gàmbùm nghut Sû Yhûmsîng kúm gi, haú pé eq a dù nghut ri;
Yhang gi, lhúnglháng lé hpan é Sû nghut ri;
Isira-elaq byu pé gi, Yhâng é silî wunlî byu pé nghut ri;
Yhâng é myìng gi, Wum-o a-tsam dìk shoq bò Sû Yhûmsîng Garai gâ é nghut ri.
Jé Lo Nyi É Htên Byòq Hkyô
17Lóm tô é hui bang ê, mîngdán mai htoq ló byùq râ matú,
núngmòq é wò món to keq hkoi.
18Hkâsu mù gâ le, haû Yhûmsîng Garai taî é gi,
“Ahkuî lháng, Ngò gi, shí mîngdán má nyi é bang lé,
hkat htoq pyám râ nghut mù,
yhángmòq bûn gyîng lò râ matú,
yhángmòq chyáng myìt myo ûng wom hkyô jé nhâng râ nghut lhê.” gâ ri.
19Ngò dàm dap bê nghut é yánmai, dingnyé wó ri!
Ngá é dàm pé gi, wó yâ gè râ a nghut!
Nghut kôlhang, ngò gi, ngá gûng ngò, “Shî gi, ngá é nòhpyo nòwaq nghut ri.
Ngò hkam yù ra râ nghut lhê.” nghû taî é nghut lhê.
20Ngá é zúm gi, lhoqhtên pyâm é hui bê nghut ri;
haú mâ é tui pé bànshoq gi, byìt byùq bê nghut ri.
Ngá é zoshâng wuì le ngá chyáng mai htoq ló kômù, byùq byùq bekô nghut ri;
ngá é zúm saí râ byù eq ngá é pán-gyang bo gyang byi râ byù, ahkuî a nyì lo nghut ri.
21Sau zúng bang gi, nâ byùq bekô nghut mù,
haû Yhûmsîng Garai lé a hô kó nghut ri;
haû mù, yhángmòq a wó ûngmyuq kó nghut luî,
yhángmòq é sau bainám hpúng gi, byo myín byùq bê nghut ri.
22Gyo keq! Hkyanglù mó rahkat jé ri.
Yudaq mâ é wà pé lé chamchyuîyuì kut pyám mù,
dànghkuî pê é hkyûng kut pyám râ matú,
mautsûng mau mai htê mó o mó nghut é byù hpúng jé râ nghut lhê.
Yeremi-aq É Kyûdung Dang
23Yhûmsîng Garai ê, waxâng zo gi, yhûmsing é chyungxe lé a sîng nghut é hkyô lé ngò sê lhê;
yhángmòq é hkyîbyè lé lháng, yhángmòq wó hkang é a nghut.
24Yhûmsîng Garai ê, ngo lé mhoqshit àq;
nghut kôlhang, Nàng nhik-yô é mai ngò htûm byùq shoq mhoqshit é a nghut é za,
tú luî shèq ngo lé mhoq shit àq.
25Nang lé a hàp yu é gótû byù myû wui é ahtoq má le,
Náng é myìng a lâng é byu pê é ahtoq má le,
Náng é nhikmó-yo hkyô hut hkyô kat àq.
Hkâsu mù gâ le, yhángmòq gi, Yakup lé myui pyám bekô nghut ri;
yhángmòq gi, yhang lé chyut myui pyám kômù,
yhâng é yhummau lé lhoqhtên pyám byi bekô nghut ri.
Currently Selected:
Yeremi-aq 10: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.