Yeremi-aq 25
25
Nyhit Xê Zàn Shúm Zûng Râ Hkyô
1Yudaq hkóhkâm Yosi-a é yhang zo Yehoi-akim ùp é myí zan zàn, Babelon hkóhkâm Nebuhkatneza ùp é sânghî zàn má, Yudaq byù bànshoq bang eq séng luî, Yeremi-aq chyáng mungdang jé ri. 2Haû mù, myìqhtoi Yeremi-aq gi, Yudaq byù bànshoq bang lé le, Yerusalem wà mó má nyi é bànshoq bang lé le, shî su ga dáng nyo ri; 3Yudaq hkóhkâm Amon é yhang zo Yosi-a, hkóhkâm hkô má zung é raxe súm zan zàn mai, hkû-nyí í xe sum zân jé shoq, haû Yhûmsîng Garaî é mungdang ngá chyáng jé mù, núngmòq lé ngò adàm dàm taî kyo bê nghut lhê; nghut kôlhang, núngmòq gi, a gyo kó nghut ri.
4Haû Yhûmsîng Garai gi, Yhâng é duìnhâng zoshâng myìqhtoi shí bang lé, núngmòq chyáng adàm dàm nhang kat bê nghut lhê; nghut kôlhang, núngmòq gi, a lhom gyo byi kô é htoq agó, haî su le a ngàm byi lhom kut pyâm akô nghut ri. 5Yhángmòq gi, núngmòq lé, “Núngmòq yùq hkangmó, yhûmsing é agè ashop hkyô pé eq yhûmsîng kut nyi é agè ashop hkyô pé mai lhing taû lo keq; haú hkûn, núngmòq eq núngmòq é îchyí îwâ pé lé haû Yhûmsîng Garai ahtum abyùq byî tô é mau má núngmòq wó nyi nyì râ nghut lhê. 6Gótû hparà hpôlhô pé lé hkâ dójaú, hkâ noqkuq kó; yhûmsing lòq èq saî é zè èq Ngo lé nhikjum hkâyo nhâng kó; haú hkûn, Ngò, núngmòq lé ihkyùp a lhoqháng byi râ nghut lhê.” ga taî kyô akô.
7“Nghut kôlhang, núngmòq gi, Ngá é dang lé a gyo kó; núngmòq gi, yhûmsing lòq èq saî é ze èq Ngo lé nhikjum lhoqyo kô é nghut mù, yhûmsing gùng yhûmsîng ihkyùp she hâng yù bekô nghut ri.” ga haû Yhûmsîng Garai taî pyo ri.
8Haû mù, haû Wum-o a-tsam dìk shoq bò Sû Yhûmsîng Garai shî su ga taî ri; “Núngmòq gi, Ngá é dang pé lé a gyo kut kô é yánmai, 9Ngò gi, mautsûng mau mâ é byù bànshoq lé le, Ngá é duìnhâng zoshâng, Babelon hkóhkâm Nebuhkatneza lé le ji tsîng yu râ nghut lhê.” ga haû Yhûmsîng Garai taî pyo ri; hau htoq agó, “Haû mù, Ngò gi, shí mau eq shí mau má nyi é bànshoq bang lé le, awui ayàm mâ é byù myû wuì bànshoq bang lé le htîm sat pyám râ matú, yhángmòq lé shuî lé râ nghut mù, yhángmòq lé chyuí yhang lhoqhtên pyám luî, gyùq chiq hpo eq rhoî dang taí jowò kut pyám mù, ahtum abyùq htên byòq byùq nhâng râ nghut lhê. 10Ngò gi, yhángmòq chyáng mai, gabú byam chyu htê lé le, myisik eq lusik é htê lé le, luí luí myhîng é htê lé le, myibûng é dùq wùp lé le, lhoqzim lhoqsat pyám byi râ nghut lhê. 11Shî ra-mau gón gi, yù whuî a mù loshoq chamchyuîyuì dùt byùq mù, byù myû shí pé gi, Babelon hkóhkâm lé zànwut nyhit xê zàn yhang dójaú kôrâ nghut lhê.
12Nghut kôlhang, zànwut nyhit xê zàn haû byíng jáng, Ngò gi, Babelon hkóhkâm, yhâng é a-myû eq Babelon byu pê é mau lé, yhángmòq é yubàk marâ é yánmai, mara dam byi mù, ahtum abyùq chamchyuîyuì dùt nhang to râ nghut lhê.” ga haû Yhûmsîng Garai taî pyo ri. 13Hau htoq agó, “Ngò gi, byù myû bànshoq lé htuqhtíng râ eq séng luî, Yeremi-aq myìqhtoi htoî tô é eq laiká bùk shí má kâ tô é bànshoq eq rajung za, mîngdán shî lé lhoq-ang luî Ngò taî é dang bànshoq lé, hau é ahtoq má lhoqdìk râ nghut lhê. 14Yhángmòq yhang le, byù myû myo myo eq hkóhkâm mó pê èq jùn kut é hui zo kôrâ nghut lhê; Ngò gi, yhángmòq lé, yhángmòq kut é hkyîzó lòqzó eq yhángmòq é lòq èq zui saî é múzó pé má cháng luî, lató hpuq râ nghut lhê.” ga le taî pyo ri.
Garai Gasâng É Nhikmó-yo Gòm
15Isira-elaq é Garai Gasang, haû Yhûmsîng Garai gi, ngo lé shî su ga taî ri; “Shî Ngá é nhikmó-yo nghu é tsibyiq wing byíng tô é gòm lé, Ngá é lòq mai yù mù, Ngò, nang lé ê kum nhang é a-myû wuì bànshoq lé shuq nhâng àq. 16Yhángmòq gi, haú lé shuq kô é hkûn, Ngò, yhángmòq chyáng nhang kat é sham é yánmai, a-pai ayhón shuq wùt nâ bùm kôrâ nghut lhê.” gâ ri.
17Haû mù, ngò gi, haû Yhûmsîng Garaî é lòq mai gòm haú lé yù luî, Yhang, ngo lé ê kum nhang é byù myû wuì bànshoq lé haû shuq nhang é nghut lhê. 18Haú lé shuq é a-myû wuì gi, hkû-nyí dùt nyi bum é su, htên byòq hkyô, gyùq chiq hpo, rhoî dang taí jowò eq nhîng pyám jang dùt râ matú, Yerusalem wà mó eq Yudaq mau mâ é wà pé, hau é hkóhkam pé eq zaugun wuì; 19Egutuq hkóhkâm Hpara-uq, yhâng é duìnhâng zoshâng wuì, yhâng é zaugun wuì eq yhâng é mingbyû wuì bànshoq; 20haú má nyi é gó-mîng byù bànshoq; Uza mau mâ é hkóhkam pé bànshoq; Hpilisiti mau nghut é Ashikelon, Gaza, Ekron eq Ashidot má nyi myìt tô é byu pé é hkóhkam pé bànshoq; 21Edom byù, Moba byù eq Ammon byu pé; 22Turuq eq Sidon hkóhkam pé bànshoq; wuìshuq lung-aû hé hpoq mâ é zinlóng mâ é hkóhkam pé; 23Dedan byù, Tema byù, Buza byù eq mau we jowò pé mâ é bang bànshoq; 24Arabi-a hkóhkam pé bànshoq eq yòso má nyi é gó-mîng byu pê é hkóhkam pé bànshoq; 25Zimri mau, Elam mau eq Medi mau mâ é hkóhkam pé bànshoq; 26wê é chyâng é mautsûng mâ é hkóhkam pé bànshoq, rayùq htâng rayùq nghut bum akô; haú bang gi, myìdàm htoq mâ é mîngdán bànshoq mâ é bang nghut ri. Haú bang bànshoq é htâng má, Sheshak#25:26 Sheshak gi, Babelon lé taí nau é nghut lhê. hkóhkâm le, haú lé shuq râ nghut lhê.
27“Haú hkûn, yhángmòq lé, ‘Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; shuq keq; Ngò, núngmòq chyáng nhang kat râ nghut é sham é yánmai, wùt keq; hpat keq; lèqbàt luî, hkâtoq lo kó.’ nghû taî kyo aq. 28Nghut kôlhang, yhángmòq gi, shuq râ matú náng lòq mâ é gòm lé a yù kô é nghut jáng, ‘Haû Wum-o a-tsam dìk shoq bò Sû Yhûmsîng Garai shî su ga taî ri; núngmòq, haû lé shuq ra kôrâ nghut lhê! 29Wú keq; Ngò, Ngá é Myìng wun é wà htoq má byò dàn byò sho hkyô jé hi nhang ló é nghut jáng, núngmòq mara dam byî é a hui kôrâ nghut lhê lhú? Mara dam byî é hui zo râ za nghut lhê; hkâsu mù gâ le, myìdàm htoq má nyi é lhúnglháng bâng é ahtoq má, Ngò shâm jé nhâng râ nghut lhê ga haû Wum-o a-tsam dìk shoq bò Sû Yhûmsîng Garai taî pyo ri.’ nghû yhángmòq lé taî kyo aq.
30Yhángmòq lé htuqhtîng é dang shí pé bànshoq lé myìqhtoi htoi mù,
‘Haû Yhûmsîng Garai gi, myhang é jang mai mying hum râ nghut lhê;
Yhang gi, Yhâng é chyoiyúng nyì jowò mai maugum gum mù,
Yhâng é maumyî lé htê mó èq garû htuqhtíng râ nghut lhê.
Yhang gi, myìdàm htoq má nyi é bang bànshoq lé,
tsibyiq shi nâng nyhoq bang garû é su, garû htuqhtíng râ nghut lhê.
31Mying hûm é htê pé gi, myìdàm htoq ló htâng é pé jé shoq jam ló râ nghut lhê;
hkâsu mù gâ le, haû Yhûmsîng Garai gi, byù myû wuì lé htuqhtíng dangnyhin nyhin râ nghut lhê;
Yhang gi, waxâng zo wuî bànshoq lé târâ jéyáng râ nghut mù,
agè ashop bang lé shâm má àp pyám râ nghut lhê.’ nghû yhángmòq lé taí aq.” ga,
haû Yhûmsîng Garai taî pyo ri.
32Haû Wum-o a-tsam dìk shoq bò Sû Yhûmsîng Garai taî le,
“Wú keq, byò dàn byò sho hkyô gi,
byù myû ra-myû mai ra-myû má byo myín ló bê nghut ri.
Laìdun mó gi, myìdàm htoq ló htâng é pé mai
toq htoq lô râ nghut lhê.” gâ ri.
33Haú u má, haû Yhûmsîng Garaî èq sat huî é bang gi, myìdàm htoq rahtâng mai góhtâng jé shoq byíng zang to râ nghut lhê. Yhángmòq é matú yón ngaû kôrâ le a nghut, yhángmòq lé gùq tsing kôrâ le a nghut, myhup yhûm pyám kôrâ le a nghut; myìhpún su myìdàm htoq má lèq bùm râ za nghut lhê.
34Sau zúng bang ê, ngaù keq, yón garû ngaû keq;
sau bainám hpúng lé shuî-û é bang ê, hpuílhup yô má leng keq.
Núngmòq lé sat pyám râ eq lhoqpyo pyám râ ahkyíng jé bê nghut ri;
núngmòq gi, je réng é saulo jùm lêng lèq é su, lêng lèq kôrâ nghut lhê.
35Sau zúng bang hpâng râ hkyô a jòq nghut mù,
sau bainám hpúng lé shuî-û é bang wó hpang lùt râ jang a jòq nghut ri.
36Sau zúng bâng é ngaù htê lé le,
sau bainám hpúng lé shuî-û é bang wùt ngau é htê lé le, gyo keq;
hkâsu mù gâ le, haû Yhûmsîng Garai gi, yhángmòq é mhan nú yô lé lhoqhtên pyâm nyi ri.
37Haû Yhûmsîng Garaî é nhikmó-yo hkyo é yánmai,
nguì ngón é mhan yô gi, tô sâ to bê nghut ri.
38Hkanghkyi gi, yhâng é hkyûng lé tô pyâm tô é su,
yhángmòq é maumyî gi, haû Yhûmsîng Garai nhikmó-yô é yánmai le,
zìk zo zìk shuq bâng é sham é yánmai le, chamchyuîyuì dùt byùq râ nghut lhê.
Currently Selected:
Yeremi-aq 25: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.